Psalms 46 — Aramaic (Peshitta)

2 ܐܠܗܢ ܒܝܬ ܓܘܣܢ ܥܫܝܢܐ ܘܡܥܕܪܢܢ ܒܙܒ̈ܢܐ ܕܐܘܠܨܢܐ ܐܫܬܟܚܬ ܠܢ ܒܟܠܙܒܢ

3 ܡܛܠ ܗܢܐ ܠܐ ܕܚܠܝܢܢ ܡܐ ܕܙܝܥܐ ܐܪܥܐ ܘܙܝ̈ܥܝܢ ܛܘܪ̈ܐ ܒܠܒܐ ܕܝܡ̈ܡܐ

4 ܢܬܕܠܚܘܢ ܡܝܝ̈ܗܘܢ ܘܢܬܗܦܟܘܢ ܘܢܙܘܥܘܢ ܛܘܪ̈ܐ ܒܥܘܫܢܗ

5 ܬ̈ܦܐ ܕܢܗܪ̈ܘܬܐ ܢܚܕܘܢ ܒܡܕܝܢܬܗ ܕܐܠܗܢ ܩܕܝܫ ܗܘ ܒܝܬ ܡܫܪܝܗ ܕܡܪܝܡܐ

6 ܐܠܗܐ ܒܓܘܗ̇ ܠܐ ܬܙܘܥ ܢܥܕܪܝܗ̇ ܐܠܗܐ ܒܥܕܢ ܨܦܪܐ

7 ܐܫܬܓܫܘ ܥܡ̈ܡܐ ܘܙܥ̈ܝ ܡ̈ܠܟܘܬܐ ܐܪܝܡ ܩܠܗ ܘܙܥܬ ܐܪܥܐ

8 ܡܪܝܐ ܚܝܠܬܢܐ ܥܡܢ ܘܡܥܕܪܢܢ ܐܠܗܗ ܕܝܥܩܘܒ

9 ܬܘ ܚܙܘ ܥܒ̈ܕܘܗܝ ܕܐܠܗܐ ܕܥܒܕ ܬܕܡܪ̈ܬܐ ܒܐܪܥܐ

10 ܡܒܛܠ ܩܪ̈ܒܐ ܡܢ ܣܘ̈ܦܝܗ̇ ܕܐܪܥܐ ܩܫܬ̈ܬܐ ܡܬܒܪ ܘܡܬܒܪ ܢܝ̈ܙܟܐ ܘܡܪ̈ܟܒܬܐ ܡܘܩܕ ܒܢܘܪܐ

11 ܐܬܦܢܘ ܘܕܥܘ ܕܐܢܐ ܐܢܐ ܐܠܗܐ ܐܬܬܪܝܡܬ ܒܥܡ̈ܡܐ ܘܐܬܬܪܝܡܬ ܒܐܪܥܐ

12 ܡܪܝܐ ܚܝܠܬܢܐ ܥܡܢ ܘܡܥܕܪܢܢ ܐܠܗܗ ܕܝܥܩܘܒ