Read Psalms 45 side by side with translations · The Final Bible
1 ⲉⲡϫⲱⲕ ⲉⲃⲟⲗ ϩⲁⲛϣⲏⲣⲉ ⲛⲕⲟⲣⲉ ϩⲁⲛⲉⲧϩⲏⲡ ⲡⲉⲯⲁⲗⲙⲟⲥ ⲛⲇⲁⲩⲉⲓⲇ
2 ⲡⲉⲛⲛⲟⲩⲧⲉ ⲡⲉ ⲡⲉⲛⲙⲁ ⲙⲡⲱⲧ ⲁⲩⲱ ⲧⲉⲛϭⲟⲙ ⲡⲉⲛⲃⲟⲏⲑⲟⲥ ϩⲛⲛⲉⲛⲑⲗⲓⲯⲓⲥ ⲉⲛⲧⲁⲩⲧⲁϩⲟⲛ ⲉⲙⲁⲧⲉ
3 ⲉⲧⲃⲉⲡⲁⲓ ⲛⲧⲛⲛⲁⲣϩⲟⲧⲉ ⲁⲛ ϩⲙⲡⲧⲣⲉⲡⲕⲁϩ ϣⲧⲟⲣⲧⲣ ⲛⲧⲉⲛⲧⲟⲟⲩ ⲡⲱⲱⲛⲉ ⲉⲃⲟⲗ
4 ⲁⲩⲱϣ ⲉⲃⲟⲗ ϩⲛⲛϩⲏⲧ ⲛⲛⲉⲑⲁⲗⲁⲥⲥⲁ ⲁⲩⲱ ⲁⲩϣⲧⲟⲣⲧⲣ ⲛϭⲓⲛⲉⲩⲙⲟⲟⲩ ⲁⲛⲧⲟⲟⲩ ϣⲧⲟⲣⲧⲣ ϩⲛⲧⲉϥϭⲟⲙ ⲇⲓⲁⲯⲁⲗⲙⲁ
5 ⲙⲙⲁ ⲙⲙⲟⲟⲛⲉ ⲙⲡⲓⲉⲣⲟ ⲛⲁⲉⲩⲫⲣⲁⲛⲉ ⲛⲧⲡⲟⲗⲓⲥ ⲙⲡⲛⲟⲩⲧⲉ ⲁⲡⲉⲧϫⲟⲥⲉ ⲧⲃⲃⲉⲡⲉϥⲙⲁ ⲛϣⲱⲡⲉ
6 ⲡⲛⲟⲩⲧⲉ ϩⲛⲧⲉⲥⲙⲏⲧⲉ ⲁⲩⲱ ⲛⲥⲛⲁⲕⲓⲙ ⲁⲛ ⲡⲛⲟⲩⲧⲉ ⲛⲁⲃⲟⲏⲑⲉⲓ ⲉⲣⲟⲥ ⲙⲡⲛⲁⲩ ⲛϩⲧⲟⲟⲩⲉ
7 ⲁⲛϩⲉⲑⲛⲟⲥ ϣⲧⲟⲣⲧⲣ ⲁⲙⲙⲛⲧⲣⲣⲟ ⲣⲓⲕⲉ ⲁϥϯ ⲛⲧⲉϥⲥⲙⲏ ⲁⲡⲕⲁϩ ⲕⲓⲙ
8 ⲡϫⲟⲉⲓⲥ ⲛⲛϭⲟⲙ ⲛⲙⲙⲁⲛ ⲡⲛⲣⲉϥϣⲟⲡⲛ ⲉⲣⲟϥ ⲡⲉ ⲡⲛⲟⲩⲧⲉ ⲛⲓⲁⲕⲱⲃ ⲇⲓⲁⲯⲁⲗⲙⲁ
9 ⲁⲙⲏⲓⲧⲛ ⲁⲛⲁⲩ ⲉⲛⲉϩⲃⲏⲩⲉ ⲙⲡⲛⲟⲩⲧⲉ ⲛⲉϣⲡⲏⲣⲉ ⲛⲧⲁϥⲁⲁⲩ ϩⲓϫⲙⲡⲕⲁϩ
10 ⲉϥϥⲓ ⲛⲙⲡⲟⲗⲉⲙⲟⲥ ϣⲁⲁⲣⲏϫϥ ⲙⲡⲕⲁϩ ϥⲛⲁⲟⲩⲱϣϥ ⲛⲟⲩⲡⲓⲧⲉ ⲁⲩⲱ ⲛϥϩⲟⲣⲃⲥ ⲟⲩϩⲟⲡⲗⲟⲛ ⲙⲛⲟⲩⲑⲩⲣⲱⲛ ϥⲛⲁⲣⲟⲕϩⲟⲩ ϩⲛⲟⲩⲕⲱϩⲧ
11 ⲥⲣϥⲉ ⲛⲧⲉⲧⲛⲛⲁⲩ ϫⲉⲁⲛⲟⲕ ⲡⲉ ⲡⲛⲟⲩⲧⲉ ϯⲛⲁϫⲓⲥⲉ ϩⲛⲛϩⲉⲑⲛⲟⲥ ϯⲛⲁϫⲓⲥⲉ ϩⲙⲡⲕⲁϩ
12 ⲡϫⲟⲉⲓⲥ ⲡⲛⲟⲩⲧⲉ ⲛⲛϭⲟⲙ ⲛⲙⲙⲁⲛ ⲡⲛⲣⲉϥϣⲟⲡⲛ ⲉⲣⲟϥ ⲡⲉ ⲡⲛⲟⲩⲧⲉ ⲛⲓⲁⲕⲱⲃ
Psalms 44 · Psalms 46 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)