Read Psalms 38 side by side with translations · The Final Bible
1 ⲉⲡϫⲱⲕ ⲉⲃⲟⲗ ⲛⲓⲇⲓⲑⲟⲩⲛ ⲧⲱⲇⲏ ⲛⲇⲁⲩⲉⲓⲇ
2 ⲁⲓϫⲟⲟⲥ ϫⲉϯⲛⲁϩⲁⲣⲉϩ ⲉⲛⲁϩⲓⲟⲟⲩⲉ ⲉⲧⲙⲣⲛⲟⲃⲉ ϩⲙⲡⲁⲗⲁⲥ ⲁⲓⲕⲱ ⲛⲟⲩϩⲁⲣⲉϩ ϩⲓⲣⲛ ⲣⲱⲓ ϩⲙⲡⲧⲣⲉⲡⲣⲉϥⲣⲛⲟⲃⲉ ⲁϩⲉⲣⲁⲧϥ ⲙⲡⲁⲙⲧⲟ ⲉⲃⲟⲗ
3 ⲁⲓⲣⲙⲡⲟ ⲁⲓϣⲧⲟⲣⲧⲣ ⲁⲓⲑⲃⲃⲓⲟ ⲁⲩⲱ ⲁⲓⲕⲁⲣⲱⲓ ⲉⲃⲟⲗ ϩⲛⲛⲁⲁⲅⲁⲑⲟⲛ ⲁⲩⲱ ⲁⲡⲁⲥⲁϣ ⲣⲃⲣⲣⲉ ⲉⲣⲟⲓ
4 ⲁⲡⲁϩⲏⲧ ϩⲙⲟⲙ ϩⲙⲡⲁⲥⲁ ⲛϩⲟⲩⲛ ⲁⲩⲱ ⲟⲩⲛⲟⲩⲕⲱϩⲧ ⲛⲁⲙⲟⲩϩ ϩⲛⲧⲁⲙⲉⲗⲉⲧⲏ ⲁⲓϣⲁϫⲉ ϩⲙⲡⲁⲗⲁⲥ ϫⲉ
5 ⲙⲁⲧⲁⲙⲟⲓ ⲡϫⲟⲉⲓⲥ ⲉⲧⲁϩⲁⲏ ⲁⲩⲱ ⲧⲏⲡⲉ ⲛⲛⲁϩⲟⲟⲩ ϫⲉⲟⲩⲏⲣ ⲧⲉ ϫⲉⲉⲓⲉⲉⲓⲙⲉ ϫⲉⲉⲓϣⲁⲁⲧ ⲛⲟⲩ
6 ⲉⲓⲥ ϩⲏⲏⲧⲉ ⲁⲕⲧⲣⲉⲛⲁϩⲟⲟⲩ ⲣⲁⲥ ⲁⲩⲱ ⲉⲣⲉⲡⲁⲧⲁϫⲣⲟ ⲟ ⲛⲧϩⲉ ⲛⲗⲁⲁⲩ ⲙⲡⲉⲕⲙⲧⲟ ⲉⲃⲟⲗ ⲡⲗⲏⲛ ⲡⲧⲏⲣϥ ϣⲟⲩⲉⲓⲧ ⲣⲱⲙⲉ ⲛⲓⲙ ⲉⲧⲟⲛϩ ⲇⲓⲁⲯⲁⲗⲙⲁ
7 ⲙⲉⲛⲧⲟⲓⲅⲉ ⲉⲣⲉⲡⲣⲱⲙⲉ ⲙⲟⲟϣⲉ ϩⲛⲟⲩϩⲓⲕⲱⲛ ⲡⲗⲏⲛ ⲉϥϣⲧⲣⲧⲱⲣ ⲉⲡϫⲓⲛϫⲏ ϥⲥⲱⲟⲩϩ ⲉϩⲟⲩⲛ ⲛⲉϥⲥⲟⲟⲩ ⲁⲛ ϫⲉⲉϥⲥⲱⲟⲩϩ ⲙⲙⲟⲟⲩ ⲛⲛⲓⲙ
8 ⲧⲉⲛⲟⲩ ⲛⲓⲙ ⲡⲉ ⲧⲁϩⲩⲡⲟⲙⲟⲛⲏ ⲙⲏ ⲙⲡϫⲟⲉⲓⲥ ⲁⲛ ⲡⲉ ⲁⲩⲱ ⲡⲁⲧⲁϫⲣⲟ ⲙⲏ ⲉϥϩⲁⲧⲏⲕ ⲁⲛ
9 ⲙⲁⲧⲟⲩϫⲟⲓ ⲉⲃⲟⲗ ϩⲛⲛⲁⲁⲛⲟⲙⲓⲁ ⲧⲏⲣⲟⲩ ⲁⲕϯ ⲙⲙⲟⲓ ⲛⲛⲟϭⲛⲉϭ ⲛⲛⲓⲁⲧϩⲏⲧ
10 ⲁⲓⲣⲙⲡⲟ ⲙⲡⲓⲟⲩⲱⲛ ⲛⲣⲱⲓ ϫⲉⲛⲧⲟⲕ ⲡⲉⲛⲧⲁⲕⲧⲁⲙⲓⲟⲉⲓ
11 ⲥⲟⲟϩⲉ ⲛⲛⲉⲕⲙⲁⲥⲧⲓⲝ ⲛⲥⲁⲃⲟⲗ ⲙⲙⲟⲓ ⲉⲃⲟⲗ ⲅⲁⲣ ϩⲛⲧϭⲟⲙ ⲛⲧⲉⲕϭⲓϫ ⲁⲛⲟⲕ ⲁⲓⲱϫⲛ
12 ⲁⲕⲡⲁⲓⲇⲉⲩⲉ ⲙⲡⲣⲱⲙⲉ ϩⲛϩⲉⲛϫⲡⲓⲟ ϩⲁⲧⲉϥⲁⲛⲟⲙⲓⲁ ⲁⲕⲃⲱⲗ ⲉⲃⲟⲗ ⲛⲧⲉϥⲯⲩⲭⲏ ⲛⲧϩⲉ ⲛⲛⲓϩⲁⲗⲟⲩⲥ ⲡⲗⲏⲛ ⲣⲱⲙⲉ ⲛⲓⲙ ⲉⲧⲟⲛϩ ϣⲧⲣⲧⲱⲣ ⲇⲓⲁⲯⲁⲗⲙⲁ
13 ⲥⲱⲧⲙ ⲉⲡⲁϣⲗⲏⲗ ⲙⲛⲡⲁⲥⲟⲡⲥ ϫⲓⲥⲙⲏ ⲉⲛⲁⲣⲙⲉⲓⲏ ⲙⲡⲣⲕⲁⲣⲱⲕ ⲉⲣⲟⲓ ϫⲉⲁⲛⲅ ⲟⲩⲣⲙⲛϭⲟⲓⲗⲉ ϩⲙⲡⲕⲁϩ ⲁⲩⲱ ⲉⲓϭⲁⲗⲱⲟⲩ ⲕⲁⲧⲁⲧϩⲉ ⲛⲛⲁⲉⲓⲟⲧⲉ ⲧⲏⲣⲟⲩ
14 ⲃⲱϣ ⲛⲁⲓ ϫⲉⲉⲓⲉⲙⲧⲟⲛ ⲙⲙⲟⲓ ⲉⲙⲡⲁⲧϯⲃⲱⲕ ⲧⲁⲧⲙⲥⲟⲧⲧ ⲉϣⲱⲡⲉ
Psalms 37 · Psalms 39 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)