Read Psalms 37 side by side with translations · The Final Bible
1 ⲡⲉⲯⲁⲗⲙⲟⲥ ⲛⲇⲁⲩⲉⲓⲇ ⲉⲩⲣⲡⲙⲉⲉⲩⲉ ⲉⲧⲃⲉⲡⲁⲥⲁⲃⲃⲁⲧⲟⲛ
2 ⲡϫⲟⲉⲓⲥ ⲙⲡⲣϫⲡⲓⲟⲓ ϩⲙⲡⲉⲕϭⲱⲛⲧ ⲟⲩⲇⲉ ⲙⲡⲣϯⲥⲃⲱ ⲛⲁⲓ ϩⲛⲧⲉⲕⲟⲣⲅⲏ
3 ϫⲉⲁⲛⲉⲕⲥⲟⲧⲉ ⲧⲣⲧⲱⲣⲧ ⲁⲩⲱ ⲁⲕⲧⲁϫⲣⲟ ⲛⲧⲉⲕϭⲓϫ ⲉϩⲣⲁⲓ ⲉϫⲱⲓ
4 ⲙⲛⲧⲁⲗϭⲟ ϩⲛⲧⲁⲥⲁⲣⲝ ⲙⲡⲉⲙⲧⲟ ⲉⲃⲟⲗ ⲛⲧⲉⲕⲟⲣⲅⲏ ⲙⲛⲉⲓⲣⲏⲛⲏ ϣⲟⲟⲡ ⲛⲛⲁⲕⲉⲉⲥ ⲛⲁϩⲣⲛ ⲛⲁⲛⲟⲃⲉ
5 ϫⲉⲁⲛⲁⲁⲛⲟⲙⲓⲁ ϫⲓⲥⲉ ⲉⲧⲁⲁⲡⲉ ⲁⲩϩⲣⲟϣ ⲉϩⲣⲁⲓ ⲉϫⲱⲓ ⲛⲧϩⲉ ⲛⲟⲩⲉⲧⲡⲱ ⲉⲥϩⲟⲣϣ
6 ⲁⲩⲕⲛⲟⲥ ⲁⲩⲱ ⲁⲩⲗⲟϥⲗⲉϥ ⲛϭⲓⲛⲁⲥⲁϣ ⲙⲡⲉⲙⲧⲟ ⲉⲃⲟⲗ ⲛⲧⲁⲙⲛⲧⲁⲧϩⲏⲧ
7 ⲁⲓⲧⲁⲗⲁⲓⲡⲱⲣⲉⲓ ⲁⲩⲱ ⲁⲓⲱⲗⲕ ϣⲁⲃⲟⲗ ⲛⲉⲓⲙⲟⲟϣⲉ ⲡⲉ ⲉⲓⲟⲕⲙ ⲙⲡⲉϩⲟⲟⲩ ⲧⲏⲣϥ
8 ϫⲉⲁⲧⲁⲯⲩⲭⲏ ⲙⲟⲩϩ ⲛⲛⲟϭⲛⲉϭ ⲁⲩⲱ ⲙⲛⲧⲁⲗϭⲟ ϣⲟⲟⲡ ϩⲛⲧⲁⲥⲁⲣⲝ
9 ⲁⲓⲙⲕⲁϩ ⲁⲩⲱ ⲁⲓⲑⲃⲃⲓⲟ ⲉⲙⲁⲧⲉ ⲁⲓϫⲓϣⲕⲁⲕ ⲉⲃⲟⲗ ϩⲙⲡⲁϣⲁϩⲟⲙ ⲙⲡⲁϩⲏⲧ
10 ⲧⲁⲉⲡⲓⲑⲩⲙⲓⲁ ⲧⲏⲣⲥ ⲙⲡⲉⲕⲙⲧⲟ ⲉⲃⲟⲗ ⲡϫⲟⲉⲓⲥ ⲁⲩⲱ ⲙⲡⲉⲡⲁϣⲁϩⲟⲙ ⲙⲡⲁϩⲏⲧ ϩⲱⲡ ⲉⲣⲟⲕ
11 ⲁⲡⲁϩⲏⲧ ϣⲧⲟⲣⲧⲣ ⲁⲧⲁϭⲟⲙ ⲕⲁⲁⲧ ⲛⲥⲱⲥ ⲁⲩⲱ ⲡⲟⲩⲟⲉⲓⲛ ⲛⲛⲁⲃⲁⲗ ⲡⲉⲓⲕⲉ ⲛⲙⲙⲁⲓ ⲁⲛ
12 ⲛⲁϣⲃⲉⲉⲣ ⲙⲛⲛⲉⲧϩⲓⲧⲟⲩⲱⲓ ⲁⲩϩⲱⲛ ⲉϩⲟⲩⲛ ⲉⲣⲟⲓ ⲁⲩⲁϩⲉⲣⲁⲧⲟⲩ ⲁⲩⲱ ⲛⲉⲧϩⲏⲛ ⲉⲣⲟⲓ ⲁⲩⲁϩⲉⲣⲁⲧⲟⲩ ⲙⲡⲟⲩⲉ
13 ⲁⲩϫⲓⲛϭⲟⲛⲥ ⲛϭⲓⲛⲉⲧϣⲓⲛⲉ ⲛⲥⲁⲧⲁⲯⲩⲭⲏ ⲁⲩⲱ ⲛⲉⲧϣⲓⲛⲉ ⲛⲥⲁϩⲉⲛⲡⲉⲧϩⲟⲟⲩ ⲉⲣⲟⲓ ⲁⲩϫⲱ ⲛϩⲉⲛⲡⲉⲧϣⲟⲩⲉⲓⲧ ⲁⲩⲙⲉⲗⲉⲧⲁ ⲛⲟⲩⲕⲣⲟϥ ⲙⲡⲉϩⲟⲟⲩ ⲧⲏⲣϥ
14 ⲁⲛⲟⲕ ⲇⲉ ⲛⲉⲓⲁϣⲉ ⲡⲉ ⲉⲃⲟⲗ ϩⲓⲧⲟⲟⲧⲟⲩ ⲁⲩⲱ ⲁⲓⲣⲧϩⲉ ⲛⲟⲩⲁⲗ ⲉⲙⲉϥⲥⲱⲧⲙ ⲁⲩⲱ ⲛⲧϩⲉ ⲛⲟⲩⲙⲡⲟ ⲉⲙⲉϥⲟⲩⲱⲛ ⲛⲣⲱϥ
15 ⲁⲓⲣⲧϩⲉ ⲛⲟⲩⲣⲱⲙⲉ ⲉⲛϥⲥⲱⲧⲙ ⲁⲛ ⲁⲩⲱ ⲉⲙⲛϫⲡⲓⲟ ϩⲛⲧⲉϥⲧⲁⲡⲣⲟ
16 ⲁⲓⲛⲁϩⲧⲉ ⲉⲣⲟⲕ ⲛⲧⲟⲕ ⲉⲧⲛⲁⲥⲱⲧⲙ ⲉⲣⲟⲓ ⲡϫⲟⲉⲓⲥ ⲡⲁⲛⲟⲩⲧⲉ
17 ϫⲉⲁⲓϫⲟⲟⲥ ϫⲉⲙⲏⲡⲟⲧⲉ ⲛⲧⲉⲛⲁϫⲁϫⲉ ⲣⲁϣⲉ ⲙⲙⲟⲓ ϩⲙⲡⲧⲣⲉⲛⲁⲟⲩⲉⲣⲏⲧⲉ ⲕⲓⲙ ⲁⲩϫⲉⲛⲟϭ ⲛϣⲁϫⲉ ⲉϩⲣⲁⲓ ⲉϫⲱⲓ
18 ϫⲉⲁⲛⲟⲕ ϯⲥⲃⲧⲱⲧ ⲉϩⲉⲛⲙⲁⲥⲧⲓⲅⲝ ⲁⲩⲱ ⲡⲁⲙⲕⲁϩ ⲙⲡⲉⲕⲙⲧⲟ ⲉⲃⲟⲗ ⲛⲟⲩⲟⲉⲓϣ ⲛⲓⲙ
19 ϫⲉϯⲛⲁϫⲱ ⲁⲛⲟⲕ ⲛⲧⲁⲁⲛⲟⲙⲓⲁ ⲁⲩⲱ ϯⲛⲁϥⲓⲣⲟⲟⲩϣ ϩⲁⲡⲁⲛⲟⲃⲉ
20 ⲛⲁϫⲁϫⲉ ⲛⲧⲟⲟⲩ ⲟⲛϩ ⲁⲩⲱ ⲥⲉϭⲙϭⲟⲙ ⲉϩⲟⲩ ⲉⲣⲟⲓ ⲁⲩⲟⲩⲱϣⲥ ⲉⲃⲟⲗ ⲛϭⲓⲛⲉⲧⲙⲟⲥⲧⲉ ⲙⲙⲟⲓ ϩⲛⲟⲩϫⲓⲛϭⲟⲛⲥ
21 ⲛⲉⲧⲧⲱⲱⲃⲉ ⲛⲁⲓ ⲛϩⲉⲛⲡⲉⲧϩⲟⲟⲩ ⲉⲡⲙⲁ ⲛϩⲉⲛⲡⲉⲧⲛⲁⲛⲟⲩⲟⲩ ⲁⲩϯϣⲧⲟⲩⲏⲧ ⲉⲣⲟⲓ ⲉⲃⲟⲗ ϫⲉⲁⲓⲡⲱⲧ ⲛⲥⲁⲧⲇⲓⲕⲁⲓⲟⲥⲩⲛⲏ ⲁⲩⲛⲟϫⲧ ⲉⲃⲟⲗ ⲡⲙⲉⲣⲓⲧ ⲛⲧϩⲉ ⲛⲟⲩⲣⲉϥⲙⲟⲟⲩⲧ ⲉϥⲃⲏⲧ
22 ⲙⲡⲣⲕⲁⲁⲧ ⲛⲥⲱⲕ ⲡϫⲟⲉⲓⲥ ⲡⲁⲛⲟⲩⲧⲉ ⲙⲡⲣⲥⲁϩⲱⲕ ⲉⲃⲟⲗ ⲙⲙⲟⲓ
23 ϯϩⲧⲏⲕ ⲉⲧⲁⲃⲟⲏⲑⲓⲁ ⲡϫⲟⲉⲓⲥ ⲡⲛⲟⲩⲧⲉ ⲙⲡⲁⲟⲩϫⲁⲓ
Psalms 36 · Psalms 38 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)