Read Psalms 142 side by side with translations · The Final Bible
1 ⲡⲉⲯⲁⲗⲙⲟⲥ ⲛⲇⲁⲩⲉⲓⲇ ⲛⲧⲉⲣⲉⲡⲉϥϣⲏⲣⲉ ⲡⲱⲧ ⲛⲥⲱϥ ⲡϫⲟⲉⲓⲥ ⲥⲱⲧⲙ ⲉⲡⲁϣⲗⲏⲗ ϫⲓⲥⲙⲏ ⲉⲡⲁⲥⲟⲡⲥ ϩⲛⲧⲉⲕⲙⲉ ⲥⲱⲧⲙ ⲉⲣⲟⲓ ϩⲛⲧⲉⲕⲇⲓⲕⲁⲓⲟⲥⲩⲛⲏ
2 ⲛⲅⲧⲙⲉⲓ ⲉϩⲟⲩⲛ ⲉϫⲓϩⲁⲡ ⲙⲛⲡⲉⲕϩⲙϩⲁⲗ ϫⲉⲙⲛⲗⲁⲁⲩ ⲛⲣⲱⲙⲉ ⲛⲁⲧⲙⲁⲉⲓⲟ ⲙⲡⲉⲕⲙⲧⲟ ⲉⲃⲟⲗ
3 ϫⲉⲁⲡϫⲁϫⲉ ⲡⲱⲧ ⲛⲥⲁⲧⲁⲯⲩⲭⲏ ⲁϥⲑⲃⲃⲓⲟ ⲙⲡⲁⲱⲛϩ ⲉϩⲣⲁⲓ ⲉⲡⲕⲁϩ ⲁϥⲑⲃⲃⲓⲟⲓ ϩⲛϩⲉⲛⲙⲁ ⲛⲕⲁⲕⲉ ⲛⲧϩⲉ ⲛϩⲉⲛⲕⲱⲱⲥ ⲛϣⲁ ⲉⲛⲉϩ
4 ⲁⲩⲱ ⲁϥⲗⲩⲡⲉⲓ ⲛϭⲓⲡⲁⲡⲛⲉⲩⲙⲁ ⲁⲡⲁϩⲏⲧ ϣⲧⲟⲣⲧⲣ ⲛϩⲏⲧ
5 ⲁⲓⲣⲡⲙⲉⲉⲩⲉ ⲛⲛⲉϩⲟⲟⲩ ⲛϣⲟⲣⲡ ⲁⲓⲙⲉⲗⲉⲧⲁ ⲛⲛⲉⲕϩⲃⲏⲩⲉ ⲧⲏⲣⲟⲩ ⲁⲓⲙⲉⲗⲉⲧⲁ ⲛⲛⲉⲕϩⲃⲏⲩⲉ ⲛⲛⲉⲕϭⲓϫ
6 ⲁⲓⲡⲱⲣϣ ⲛⲛⲁϭⲓϫ ⲉϩⲣⲁⲓ ⲉⲣⲟⲕ ⲁⲧⲁⲯⲩⲭⲏ ⲣⲧϩⲉ ⲛⲛⲓⲕⲁϩ ⲉⲧⲟⲃⲉ ⲛⲛⲁϩⲣⲁⲕ ⲇⲓⲁⲯⲁⲗⲙⲁ
7 ⲥⲱⲧⲙ ⲉⲣⲟⲓ ⲡϫⲟⲉⲓⲥ ϩⲛⲟⲩϭⲉⲡⲏ ϫⲉⲁⲡⲁⲡⲛⲉⲩⲙⲁ ⲱϫⲛ ⲙⲡⲣⲕⲱⲧⲉ ⲙⲡⲉⲕϩⲟ ⲛⲥⲁⲃⲟⲗ ⲙⲙⲟⲓ ⲧⲁⲣⲑⲉ ⲛⲛⲉⲧⲃⲏⲕ ⲉⲡⲉⲥⲏⲧ ⲉⲡϣⲏⲓ
8 ⲙⲁⲣⲓⲥⲱⲧⲙ ⲉⲡⲉⲕⲛⲁ ⲙⲡⲛⲁⲩ ⲛϣⲱⲣⲡ ϫⲉⲁⲓϩⲉⲗⲡⲓⲍⲉ ⲉⲣⲟⲕ ⲙⲁⲧⲁⲙⲟⲓ ⲡϫⲟⲉⲓⲥ ⲉⲧⲉϩⲓⲏ ⲉϯⲛⲁⲃⲱⲕ ⲛϩⲏⲧⲥ ϫⲉⲁⲓϥⲓ ⲉϩⲣⲁⲓ ⲉⲣⲟⲕ ⲛⲧⲁⲯⲩⲭⲏ
9 ⲙⲁⲧⲟⲩϫⲟⲓ ⲉⲛⲁϫⲁϫⲉ ⲡϫⲟⲉⲓⲥ ϫⲉⲁⲓⲡⲱⲧ ⲉⲣⲁⲧⲕ
10 ⲙⲁⲧⲥⲁⲃⲟⲓ ⲉⲧⲣⲁⲣⲡⲉⲕⲟⲩⲱϣ ϫⲉⲛⲧⲟⲕ ⲡⲉ ⲡⲁⲛⲟⲩⲧⲉ ⲡⲉⲕⲡⲛⲉⲩⲙⲁ ⲉⲧⲛⲁⲛⲟⲩϥ ⲛⲁϫⲓⲙⲟⲉⲓⲧ ϩⲏⲧ ϩⲛⲟⲩⲥⲟⲟⲩⲧⲛ
11 ⲕⲛⲁⲧⲁⲛϩⲟⲓ ⲉⲧⲃⲉⲡⲉⲕⲣⲁⲛ ⲡϫⲟⲉⲓⲥ ϩⲛⲧⲉⲕⲇⲓⲕⲁⲓⲟⲥⲩⲛⲏ ⲕⲛⲁⲛⲧⲁⲯⲩⲭⲏ ⲉⲃⲟⲗ ϩⲛⲧⲉⲑⲗⲓⲯⲓⲥ
12 ⲕⲛⲁϥⲱⲧⲉ ⲉⲃⲟⲗ ⲛⲛⲁϫⲁϫⲉ ϩⲙⲡⲉⲕⲛⲁ ⲕⲛⲁⲧⲁⲕⲉⲟⲩⲟⲛ ⲛⲓⲙ ⲉⲧⲑⲗⲓⲃⲉ ⲛⲧⲁⲯⲩⲭⲏ ϫⲉⲁⲛⲅ ⲡⲉⲕϩⲙϩⲁⲗ
Psalms 141 · Psalms 143 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)