Read Psalms 111 side by side with translations · The Final Bible
1 ⲁⲗⲗⲏⲗⲟⲩⲓⲁ ⲛⲁⲓⲁⲧϥ ⲙⲡⲣⲱⲙⲉ ⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲁⲩⲱ ⲉⲣⲉⲡⲉϥⲟⲩⲱϣ ϩⲛⲛⲉϥⲉⲛⲧⲟⲗⲏ ⲉⲙⲁⲧⲉ
2 ⲡⲉϥⲥⲡⲉⲣⲙⲁ ⲛⲁϭⲙϭⲟⲙ ϩⲙⲡⲕⲁϩ ⲧⲅⲉⲛⲉⲁ ⲛⲛⲉⲧⲥⲟⲩⲧⲱⲛ ⲛⲁϫⲓⲥⲙⲟⲩ
3 ⲡⲉⲟⲟⲩ ⲙⲛⲧⲙⲛⲧⲣⲙⲙⲁⲟ ⲛⲉⲧϩⲙⲡⲉϥⲏⲓ ⲁⲩⲱ ⲧⲉϥⲇⲓⲕⲁⲓⲟⲥⲩⲛⲏ ϣⲟⲟⲡ ϣⲁⲉⲛⲉϩ ⲛⲉⲛⲉϩ
4 ⲁⲡⲟⲩⲟⲉⲓⲛ ϣⲁϩⲙⲡⲕⲁⲕⲉ ⲛⲛⲉⲧⲥⲟⲩⲧⲱⲛ ⲟⲩⲛⲁϩⲏⲧ ⲛϣⲁⲛϩⲧⲏϥ ⲛⲇⲓⲕⲁⲓⲟⲥ ⲡⲉ ⲡϫⲟⲉⲓⲥ ⲡⲛⲟⲩⲧⲉ
5 ⲡⲉⲭⲣⲏⲥⲧⲟⲥ ⲛⲣⲱⲙⲉ ⲡⲉ ⲡϣⲁⲛϩⲧⲏϥ ⲛⲣⲉϥϯ ϥⲛⲁⲟⲓⲕⲟⲛⲟⲙⲉⲓ ⲛⲛⲉϥϣⲁϫⲉ ϩⲛⲟⲩϩⲁⲡ
6 ϫⲉϥⲛⲁⲕⲓⲙ ⲁⲛ ϣⲁⲉⲛⲉϩ ⲡⲇⲓⲕⲁⲓⲟⲥ ⲛⲁϣⲱⲡⲉ ⲛⲣⲡⲙⲉⲉⲩⲉ ϣⲁⲉⲛⲉϩ
7 ⲛϥⲛⲁⲣϩⲟⲧⲉ ⲁⲛ ϩⲏⲧϥ ⲛⲟⲩⲥⲟⲉⲓⲧ ⲉϥϩⲟⲟⲩ ⲡⲉϥϩⲏⲧ ⲥⲃⲧⲱⲧ ⲉϩⲉⲗⲡⲓⲍⲉ ⲉⲡϫⲟⲉⲓⲥ
8 ⲡⲉϥϩⲏⲧ ⲧⲁϫⲣⲏⲩ ⲛϥⲛⲁⲣϩⲟⲧⲉ ⲁⲛ ϣⲁⲛⲧϥⲙⲉϩⲉⲓⲁⲧϥ ⲛⲛⲉϥϫⲓϫⲉⲉⲩⲉ
9 ⲁϥϫⲱⲱⲣⲉ ⲉⲃⲟⲗ ⲁϥϯ ⲛⲛϩⲏⲕⲉ ⲧⲉϥⲇⲓⲕⲁⲓⲟⲥⲩⲛⲏ ϣⲟⲟⲡ ϣⲁⲉⲛⲉϩ ⲛⲉⲛⲉϩ ⲁⲩⲱ ⲡⲉϥⲧⲁⲡ ⲛⲁϫⲓⲥⲉ ϩⲛⲟⲩⲉⲟⲟⲩ
10 ⲡⲣⲉϥⲣⲛⲟⲃⲉ ⲛⲁⲛⲁⲩ ⲛϥⲛⲟⲩϭⲥ ⲛϥϩⲣⲟϫⲣⲉϫ ⲛⲛⲉϥⲟⲃϩⲉ ⲛϥⲃⲱⲗ ⲉⲃⲟⲗ ⲧⲉⲉⲡⲓⲑⲩⲙⲓⲁ ⲛⲛⲣⲉϥⲣⲛⲟⲃⲉ ⲛⲁⲧⲁⲕⲟ
Psalms 110 · Psalms 112 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)