1 ܡܪܝܐ ܐܠܗܝ ܐܫ̇ܒܚ ܫܡܟ ܒܕܝ̇ܨܐ ܒܝܢܬ ܐܝܠܝܢ ܕܝ̇ܕܥܝ̣ܢ ܕܝ̣̈ܢܝܟ ܙܕܝ̈ܩܐ
2 ܡܛܠ ܕܐܢܬ ܒܣܝ̣ܡ ܘܡܪܚܡܢ ܘܒܝܬ ܥܪܘܩܝܗ ܕܡܣܟܢܐ
3 ܟܕ ܐܓ̇ܥܐ ܠܘܬܟ ܠܐ ܬܫ̣ܬܘܩ ܡܢܝ̣
4 ܡܛܠ ܕܠܐ ܢ̇ܣܒ ܓܝܪ ܒܪܢܫܐ ܫܒܝ̣ܬܐ ܡ̣ܢ ܓܒܪܐ ܥ̣̇ܫܝ̣ܢܐ
5 ܐܘ̇ ܡ̣̇ܢܘ̣ ܢ̇ܣܒ ܡ̣ܢ ܟ̇ܠ ܡܕܡ ܕܥܒ̣ܕܬ ܐܠܐ ܐܢ ܐܢܬ ܬܬ̣ܠ ܠܗ
6 ܡܛܠ ܕܒܪܐܢܫܐ ܘܡܢ̇ܬܗ ܠܘܬܟ ܗ̣ܝ ܒܡ̣̇ܬܩܠܐ ܘܠܐ ܢ̣̇ܘܣܦ ܠܡ̣ܬܝܬܪܘ ܠܒܪ ܡ̣ܢ ܕܝ̣ܢܟ ܐܠܗܐ
7 ܒܐܘܠܨܢܢ ܩ̣ܪܝܢܟ ܠܥܘܕܪܢܢ ܘܐܢܬ ܠܐ ܐܗܦ̣ܟܬ ܒܥܘܬܢ ܡܛܠ ܕܐܢܬ ܗ̣ܘ ܐܠܗܢ
8 ܠܐ ܬ̣ܫܬܘܚܪܝ ܐܝ̣ܕܟ ܡ̣ܢܢ ܕܠܐ ܢܬ̣ܚܣܢ ܕܢܚ̣ܛܐ
9 ܘܠܐ ܬܗܦܟ ܐܦ̈ܝܟ ܡ̣ܢܢ ܕܠܐ ܢܪܚܩ ܡܢܟ ܐܠܐ ܠܘܬܟ ܢܐܬܐ
10 ܐܢܓܝܪ ܐ̇ܟܦܢ ܡܪܝܐ ܠܘܬܟ ܐ̇ܩܪܐ ܐܠܗܐ ܘܐܢܬ ܬܬ̣ܠ
11 ܠܦܪܚܬܐ ܓܝܪ ܘܠܢܘ̣̈ܢܐ ܐܢܬ ܡܪܒܐ ܐܢܬ ܟܕ ܬܬ̣ܠ ܡ̣ܛܪܐ ܒܕܒܪܐ ܠܡܘܥܝܬܐ ܕܥܣ̣ܒܐ ܠܡܛܝܒܘ ܡܐܟܘ̇ܠܬܐ ܒܕܒܪܐ ܠܟ̇ܠ ܚ̣̇ܝܘܬܐ
12 ܘܐܢ ܢܟ̣ܦܢܘܢ ܠܘܬܟ ܢܪܝ̣ܡܘܢ ܐܦ̈ܝܗܘܢ̇
13 ܠܡ̈ܠܟܐ ܘܠܪ̈ܘܪܒܢܐ ܘܠܥܡ̣̈ܡܐ ܐܢܬ ܗ̣ܘ ܡܬܪܣܐ ܐܠܗܐ ܘܣ̣̇ܒܪܗ ܕܡܣܟܢܐ ܘܕܒܝ̇ܫܐ ܡܢܘ ܐܠܐ ܐܢ ܐܢܬ ܡܪܝܐ
14 ܘܬ̣ܥܢܝܘܗܝ ܡܛܠ ܕܐܢܬ ܗ̣ܘ ܒܣܝ̣ܡܐ ܘܢܝ̣ܚܐ ܘܬܣ̣ܒܥܝ ܢܦܫܗ ܟܕ ܬܦ̣ܬܚ ܠܗ ܐܝ̣ܕܟ ܒܪ̈ܚ̣ܡܐ
15 ܛܝܒܘܬܗ ܓܝܪ ܕܒܪܐܢܫܐ ܒܚ̣̇ܘܣܢܐ ܗ̇ܝ ܝܘܡܢ ܘܡܚ̣ܪ ܘܐܢ ܗ̣ܘ ܕܢ̣ܬܢܐ ܠܡܬ̣ܠ ܘܠܐ ܢܪܛܢ ܘܗܢܐ ܬܡܝܗܐ ܗ̇ܘ
16 ܡ̣̇ܘܗܒܬܟ ܕܝܢ ܕܝ̣ܠܟ ܣ̇ܓܝܐܐ ܒܛܝܒܘܬܐ ܘܒܥܘܬܪܐ ܘܠܝܬ ܣ̣̇ܒܪܐ ܕܠܘܬܟ ܕܢܚܘ̣ܣ ܒܡܘܗ̈ܒܬܐ
17 ܥܠ ܟ̇ܠܗ̇ ܐܪܥܐ ܓܝܪ ܪ̈ܚܡܝܟ ܡܪܝܐ ܒܛܝܒܘܬܐ
18 ܛܘ̣ܒܘܗܝ ܠܒܪܢܫܐ ܕܢܬܕܟܪܝܘܗܝ ܡܪܝܐ ܒܡܣܟܢܘܬܐ
19 ܕܡܣܬܗ ܓܝܪ ܢܬܝܬܪ ܒܪܢܫܐ ܕܢ̣ܚܛܐ ܠܗ
20 ܦ̇ܩܚܐ ܡܣܟܢܘܬܐ ܒܙܕܝܩܘܬܐ
21 ܐܬܒ̣̇ܣܡܘ ܓܝܪ ܕܚ̈ܠ̇ܘܗܝ ܕܡܪܝܐ ܒܛܒ̈ܬܗ ܘܛܝܒܘܬܟ ܥܠ ܝ̣ܣܪܐܝܠ ܒܡܠܟܘܬܟ
22 ܒܪܝ̣ܟܐ ܗ̇ܝ ܬܫܒܘ̇ܚܬܗ ܕܡܪܝܐ ܡܛܠ ܕܗܘ̣ܝܘ ܡ̣̇ܠܟܢ
Psalms of Solomon 4 · Psalms of Solomon 6 · Greek (Septuagint / SBLGNT)