Proverbs 24 — Coptic (Sahidic)

1 ⲙⲡⲣⲕⲱϩ ⲉⲛⲣⲱⲙⲉ ⲉⲧϩⲟⲟⲩ ⲁⲩⲱ ⲙⲡⲣⲟⲩⲉϣϣⲱⲡⲉ ⲛⲙⲙⲁⲩ

2 ⲉⲣⲉⲡⲉⲩϩⲏⲧ ⲙⲉⲗⲉⲧⲁ ⲙⲡϭⲟⲗ ⲁⲩⲱ ⲉⲣⲉⲛⲉⲩⲥⲡⲟⲧⲟⲩ ϫⲱ ⲛⲛϩⲓⲥⲉ

3 ⲉϣⲁⲩⲕⲉⲧⲟⲩⲏⲓ ϩⲛⲟⲩⲥⲟⲫⲓⲁ ⲁⲩⲱ ⲉϣⲁⲩⲥⲁϩⲱϥ ⲉⲣⲁⲧϥ ϩⲛⲟⲩⲙⲑⲛⲧⲥⲁⲃⲉ

4 ϩⲛⲟⲩⲁⲓⲥⲑⲏⲥⲓⲥ ⲉϣⲁⲩⲙⲉϩⲛⲧⲁⲙⲉⲓⲟⲛ ⲙⲙⲑⲛⲧⲣⲙⲙⲁⲟ ⲛⲓⲙ ⲉⲧⲧⲁⲓⲏⲩ ⲁⲩⲱ ⲉⲛⲁⲛⲟⲩⲟⲩ

5 ⲛⲁⲛⲟⲩ ⲟⲩⲥⲟⲫⲟⲥ ⲉϩⲟⲩⲉ ⲟⲩϫⲱⲱⲣⲉ ⲁⲩⲱ ⲟⲩⲣⲱⲙⲉ ⲛⲣⲙⲛϩⲏⲧ ⲉϩⲟⲩⲉⲟⲩⲛⲟϭ ⲛⲥⲱϣⲉ

6 ⲉϣⲁⲩⲣⲟⲩⲡⲟⲗⲉⲙⲟⲥ ϩⲛⲟⲩⲣϩⲙⲙⲉ ⲉⲣⲉⲧⲃⲟⲏⲑⲓⲁ ⲇⲉ ϩⲛⲡϩⲏⲧ ⲛⲛⲣⲉϥϫⲓϣⲟϫⲛⲉ

7 ⲉⲣⲉⲧⲥⲟⲫⲓⲁ ⲇⲉ ⲙⲛⲡⲙⲉⲉⲩⲉ ⲉⲧⲛⲁⲛⲟⲩϥ ϩⲛⲙⲡⲩⲗⲏ ⲛⲛⲥⲟⲫⲟⲥ

8 ⲙⲉⲣⲉⲛⲥⲟⲫⲟⲥ ϫⲉⲛⲉⲩⲙⲉⲉⲩⲉ ⲉⲃⲟⲗ ϩⲛⲣⲱⲟⲩ ϩⲛⲟⲩⲙⲏⲏϣⲉ ⲡⲙⲟⲩ ⲛⲁⲧⲱⲙⲛⲧ ⲉⲛⲁⲧⲥⲃⲱ

9 ⲡⲁⲧϩⲏⲧ ⲇⲉ ⲛⲁⲙⲟⲩ ϩⲛϩⲉⲛⲛⲟⲃⲉ ⲛⲁⲕⲁⲑⲁⲣⲥⲓⲁ ⲛⲁⲧⲱⲗⲙ ⲉⲩⲣⲱⲙⲉ ⲛⲗⲟⲓⲙⲟⲥ

10 ϩⲛⲟⲩϩⲟⲟⲩ ⲉϥϩⲟⲟⲩ ⲙⲛⲟⲩϩⲟⲟⲩ ⲛⲑⲗⲓⲯⲓⲥ ϣⲁⲛⲧϥⲱϫⲛ

11 ⲛⲉϩⲙⲛⲉⲧⲟⲩϫⲓ ⲙⲙⲟⲟⲩ ⲉⲡⲙⲟⲩ ⲁⲩⲱ ⲙⲡⲣϯⲥⲟ ⲉⲥⲉⲧⲛⲉⲧⲟⲩⲙⲟⲩⲟⲩⲧ ⲙⲙⲟⲟⲩ

12 ⲉⲕϣⲁⲛϫⲟⲟⲥ ⲇⲉ ϫⲉⲛϯⲥⲟⲟⲩⲛ ⲁⲛ ⲙⲡⲁⲓ ⲉⲓⲙⲉ ϫⲉⲡϫⲟⲉⲓⲥ ⲥⲟⲟⲩⲛ ⲙⲡϩⲏⲧ ⲛⲟⲩⲟⲛ ⲛⲓⲙ ⲁⲩⲱ ⲡⲉⲛⲧⲁϥⲡⲗⲁⲥⲥⲉ ⲙⲡⲛⲓϥⲉ ⲛⲟⲩⲟⲛ ⲛⲓⲙ ⲥⲟⲟⲩⲛ ⲙⲙⲟⲟⲩ ⲧⲏⲣⲟⲩ ⲡⲉⲧⲛⲁϯ ⲙⲡⲟⲩⲁ ⲡⲟⲩⲁ ⲕⲁⲧⲁⲛⲉϥϩⲃⲏⲩⲉ

13 ⲡⲁϣⲏⲣⲉ ⲟⲩⲉⲙⲉⲃⲓⲱ ⲛⲁⲛⲟⲩⲡⲙⲟⲩⲗϩ ⲅⲁⲣ ϫⲉⲉⲣⲉⲧⲉⲕϣⲟⲩⲱⲃⲉ ⲕⲛⲛⲉ

14 ⲉⲕⲛⲁⲁⲓⲥⲑⲁⲛⲉ ⲅⲁⲣ ⲛⲧⲉⲓϩⲉ ⲉⲧⲥⲟⲫⲓⲁ ϩⲙⲡⲉⲕϩⲏⲧ ⲉⲕϣⲁⲛϩⲉ ⲇⲉ ⲉⲣⲟⲥ ⲡⲉⲕⲙⲟⲩ ⲛⲁⲣⲁⲛⲁⲓ ⲁⲩⲱ ⲧⲉⲕϩⲉⲗⲡⲓⲥ ⲛⲁⲱϫⲛ ⲁⲛ

15 ⲙⲡⲣϩⲛ ⲟⲩⲁⲥⲉⲃⲏⲥ ⲉϩⲟⲩⲛ ⲉⲧⲉⲕⲥⲕⲩⲛⲏ ⲛⲛⲇⲓⲕⲁⲓⲟⲥ ⲁⲩⲱ ⲙⲡⲣⲧⲣⲉⲩⲁⲡⲁⲧⲁ ⲙⲙⲟⲕ ϩⲛⲟⲩⲥⲓ ⲛϩⲏ

16 ⲡⲇⲓⲕⲁⲓⲟⲥ ⲅⲁⲣ ⲛⲁϩⲉ ⲛⲥⲁϣϥ ⲛⲥⲟⲡ ⲁⲩⲱ ⲛϥⲧⲱⲟⲩⲛ ⲛⲁⲥⲉⲃⲏⲥ ⲇⲉ ⲛⲁϩⲉ ϩⲛϩⲉⲛⲡⲉⲧϩⲟⲟⲩ

17 ⲉⲣϣⲁⲛⲡⲉⲕϫⲁϫⲉ ϩⲉ ⲙⲡⲣⲣⲁϣⲉ ⲙⲙⲟϥ ⲁⲩⲱ ⲙⲡⲣϫⲓⲥⲉ ⲙⲙⲟⲕ ϩⲙⲡⲉϥⲥⲗⲁⲁⲧⲉ

18 ϫⲉⲛⲛⲉⲡϫⲟⲉⲓⲥ ⲛⲁⲩ ⲛϥⲧⲙⲣⲁⲛⲁϥ ⲁⲩⲱ ⲛϥⲕⲱⲧⲉⲡⲉϥϭⲱⲛⲧ ⲉⲃⲟⲗ ⲙⲙⲟϥ

19 ⲙⲡⲣⲣⲁϣⲉ ⲉϫⲛⲡⲣⲉϥⲣⲡⲉⲧϩⲟⲟⲩ ⲁⲩⲱ ⲙⲡⲣⲕⲱϩ ⲉⲛⲣⲉϥⲣⲛⲟⲃⲉ

20 ⲅⲁⲣ ϣⲱⲡⲉ ⲛⲙⲡⲟⲛⲏⲣⲟⲥ ⲡⲟⲩⲟⲉⲓⲛ ⲇⲉ ⲛⲛⲁⲥⲉⲃⲏⲥ ⲛⲁϫⲉⲛⲁ ϣⲁⲉⲛⲉϩ

21 ⲡⲁϣⲏⲣⲉ ⲁⲣⲓϩⲟⲧⲉ ϩⲏⲧϥ ⲙⲡⲛⲟⲩⲧⲉ ⲙⲛⲡⲣⲣⲟ ⲁⲩⲱ ⲙⲡⲣⲣⲛⲟⲃⲉ ⲉⲟⲩⲟⲛ ⲙⲙⲟⲟⲩ

22 ⲥⲉⲛⲁϫⲓⲕⲃⲁ ⲅⲁⲣ ⲛⲛⲁⲥⲉⲃⲏⲥ ϩⲛⲟⲩϣⲥⲛⲉ ⲛⲓⲙ ⲇⲉ ⲡⲉⲧⲛⲁⲉⲓⲙⲉ ⲉⲛⲉⲧⲓⲙⲟⲣⲓⲁ ⲙⲡⲉⲥⲛⲁⲩ ⲡϣⲏⲣⲉ ⲉⲧϩⲁⲣⲉϩ ⲉⲩϣⲁϫⲉ ϥⲛⲁⲟⲩϫⲁⲓ ⲉⲡⲧⲁⲕⲟ ⲡⲉⲧϣⲱⲡ ⲇⲉ ⲉⲣⲟϥ ⲙⲡⲧⲁⲕⲟ ⲁϥϫⲓⲧϥ ⲛⲁϥ ⲡⲉⲧⲉⲛϥⲧⲁⲙⲟ ⲇⲉ ⲁⲛ ⲙⲡⲉϥϣⲏⲣⲉ ⲛϣⲟⲣⲡ ⲉⲧⲣⲉϥϩⲁⲣⲉϩ ⲉⲣⲟϥ ⲉⲡⲉⲧϩⲟⲟⲩ ϥⲛⲁⲗⲩⲡⲉⲓ ϩⲛⲟⲩϣⲥⲛⲉ ⲙⲡⲣϫⲓϭⲟⲗ ⲗⲁⲁⲩ ϩⲙⲡⲉⲕⲗⲁⲥ ⲉⲡⲣⲣⲟ ⲁⲩⲱ ⲛⲛⲉⲗⲁⲁⲩ ⲛϭⲟⲗ ⲉⲓ ⲉⲃⲟⲗ ϩⲙⲡⲉⲕⲗⲁⲥ ⲟⲩⲥⲏϥⲉ ⲅⲁⲣ ⲡⲉ ⲡⲗⲁⲥ ⲛⲛⲟⲩⲣⲣⲟ ⲁⲩⲱ ⲛⲟⲩⲥⲁⲣⲝ ⲁⲛ ⲡⲉ ⲡⲉⲧⲟⲩⲛⲁⲧⲁⲁϥ ⲛⲁϥ ϥⲛⲁⲟⲩⲟϣϥϥ ⲉⲩϣⲁⲛⲧⲱⲃⲥ ⲅⲁⲣ ⲙⲡⲉϥϭⲱⲛⲧ ϥⲛⲁⲱϫⲛ ⲛⲛϣⲏⲣⲉ ⲛⲛⲣⲱⲙⲉ ϥⲛⲁⲟⲩⲱⲙ ⲇⲉ ⲛϩⲉⲛⲕⲉⲉⲥ ⲛⲣⲱⲙⲉ ⲁⲩⲱ ⲛϥⲣⲟⲕϩⲟⲩ ⲛⲧϩⲉ ⲛⲟⲩⲕⲱϩⲧ ϩⲱⲥⲧⲉ ⲉⲧⲙⲧⲣⲉⲛϣⲏⲣⲉ ⲛⲁϩⲱⲙⲉ ⲟⲩⲟⲙⲟⲩ

23 ⲉⲓϫⲱ ϭⲉ ⲛⲛⲁⲓ ⲛⲏⲧⲛ ⲛⲥⲟⲫⲟⲥ ⲉⲧⲣⲉⲧⲛⲛⲟⲉⲓ ⲛⲁⲛⲟⲩϫⲓϩⲟ ⲁⲛ ϩⲛⲟⲩϩⲁⲡ ⲟⲩⲇⲉ ⲉⲡⲓⲃⲟⲩⲗⲉⲩⲉ ⲟⲩⲁⲁⲃ ⲁⲛ

24 ⲡⲉⲧⲛⲁϫⲟⲟⲥ ϫⲉⲟⲩⲇⲓⲕⲁⲓⲟⲥ ⲡⲉ ⲡⲁⲥⲉⲃⲏⲥ ϥⲛⲁϣⲱⲡⲉ ⲉϥⲥϩⲟⲩⲟⲣⲧ ϩⲛⲛⲗⲁⲟⲥ ⲁⲩⲱ ⲙⲙⲉⲥⲧⲉ ϩⲛⲛϩⲉⲑⲛⲟⲥ

25 ϭⲉⲛⲁⲧⲁⲉⲓⲟ ⲇⲉ ⲛⲛⲉⲧϫⲡⲓⲟ ⲡⲉⲥⲙⲟⲩ ⲇⲉ ⲉⲧⲛⲁⲛⲟⲩϥ ⲛⲏⲩ ⲉϫⲱⲟⲩ

26 ⲥⲉⲛⲁⲙⲉⲣⲉⲛⲉⲥⲡⲟⲧⲟⲩ ⲇⲉ ⲉⲧϫⲱ ⲛⲛϣⲁϫⲉ ⲉⲧⲛⲁⲛⲟⲩⲟⲩ

27 ⲥⲃⲧⲉⲛⲉⲕϩⲃⲏⲩⲉ ⲉⲧⲉⲕϩⲓⲏ ⲁⲩⲱ ⲛⲅⲥⲃⲧⲱⲧⲕ ⲉⲧⲉⲕⲥⲱϣⲉ ⲛⲅⲟⲩⲁϩⲕ ⲛⲥⲱⲓ ⲁⲩⲱ ⲕⲛⲁⲕⲱⲧ ⲙⲡⲉⲕⲏⲓ

28 ⲙⲡⲣⲣⲙⲛⲧⲣⲉ ⲛⲛⲟⲩϫ ⲉⲡⲉⲕⲣⲙⲛϯⲙⲉ ⲁⲩⲱ ⲙⲡⲣⲟⲩⲱϣⲥ ⲙⲙⲟⲕ ϩⲓⲛⲉⲕⲥⲡⲟⲧⲟⲩ

29 ⲙⲡⲣϫⲟⲟⲥ ϫⲉϯⲛⲁⲉⲓⲣⲉ ⲛⲁϥ ⲕⲁⲧⲁⲧϩⲉ ⲉⲛⲧⲁϥⲉⲓⲣⲉ ⲛⲁⲓ ⲧⲁⲧⲱⲱⲃⲉ ⲛⲁϥ ⲛⲛⲉϥϫⲓⲛϭⲟⲛⲥ ⲉⲛⲧⲁϥⲁⲁⲩ ⲛⲁⲓ

30 ⲉⲣⲉⲡⲣⲱⲙⲉ ⲛⲁⲧϩⲏⲧ ⲟ ⲛⲧϩⲉ ⲛⲟⲩⲉⲓⲱϩⲉ ⲁⲩⲱ ⲡⲣⲱⲙⲉ ⲛⲁⲧⲥⲃⲱ ⲛⲧϩⲉ ⲛⲟⲩϭⲱⲙ

31 ⲉⲕϣⲁⲛⲕⲁⲁϥ ϥⲛⲁⲣϣⲛⲁ ⲁⲩⲱ ⲛⲉϥⲣⲛⲧⲏϭ ⲧⲏⲣϥ ⲛϥⲣϫϩⲓⲙ ⲛⲥⲉⲧⲁⲩⲟ ⲉϩⲣⲁⲓ ⲛⲛϫⲟⲗϫⲗ ⲛⲛⲉϥⲱⲛⲉ

32 ⲙⲛⲛⲥⲱⲥ ⲁⲛⲟⲕ ⲁⲓⲙⲉⲧⲁⲛⲟⲉⲓ ⲁⲓϭⲱϣⲧ ⲉⲥⲉⲧⲡⲧⲉⲥⲃⲱ ϣⲁⲧⲛⲁⲩ ⲕⲛⲉϫⲡⲣⲉϥϫⲛⲁⲁⲩ ⲉⲕⲛⲁⲧⲱⲟⲩⲛ ⲇⲉ ϩⲁⲡϩⲓⲛⲏⲃ ⲧⲛⲁⲩ

33 ⲟⲩⲁⲡⲣⲏⲧⲉ ⲙⲛⲕϫⲓⲣⲉⲕⲣⲓⲕⲉ ⲕⲛⲕⲟⲧⲕ ⲛⲟⲩⲁⲡⲣⲏⲧⲉ ⲕⲕⲱⲗϫ ⲛⲛⲉⲕϭⲓϫ ϩⲁⲕⲟⲩⲛⲅ ⲛⲟⲩⲁⲡⲣⲏⲧⲉ

34 ⲉϣⲱⲡⲉ ⲇⲉ ⲉⲕϣⲁⲛⲣⲡⲁⲓ ⲧⲙⲛⲧϩⲏⲕⲉ ⲛⲏⲩ ⲛⲁⲕ ⲉⲥⲙⲟⲟϣⲉ ⲁⲩⲱ ⲡⲉϭⲣⲱϩ ⲛⲧϩⲉ ⲛⲟⲩⲇⲣⲟⲙⲉⲩⲉ ⲉⲛⲁⲛⲟⲩϥ