Proverbs 23 — Coptic (Sahidic)

1 ⲉⲕϣⲁⲛϩⲙⲟⲟⲥ ⲉⲟⲩⲱⲙ ϩⲓⲧⲉⲧⲣⲁⲡⲉⲍⲁ ⲛⲟⲩϫⲱⲱⲣⲉ ϩⲛⲟⲩⲛⲟⲉⲓ ⲛⲟⲉⲓ ⲛⲛⲉⲧⲟⲩⲕⲱ ⲙⲙⲟⲟⲩ ϩⲁⲣⲱⲕ

2 ⲛⲅϩⲓⲧⲟⲟⲧⲕ ⲉⲣⲟⲟⲩ ⲉⲕⲥⲟⲟⲩⲛ ϫⲉⲕⲛⲁϫⲡⲓⲥⲟⲃⲧⲉ ⲛⲧⲉⲓϩⲉ

3 ⲉϣⲱⲡⲉ ⲛⲧⲕⲟⲩⲁⲧⲥⲉⲓ ⲙⲡⲣⲉⲡⲓⲑⲩⲙⲉⲓ ⲉⲛⲉϥϭⲓⲛⲟⲩⲱⲙ ⲛⲁⲓ ⲅⲁⲣ ϩⲏⲛ ⲉϩⲟⲩⲛ ⲉⲩⲱⲛϩ ⲛⲛⲟⲩϫ

4 ⲙⲡⲣⲥⲟⲩⲧⲛⲧⲟⲟⲧⲕ ⲉⲃⲟⲗ ⲙⲛⲟⲩⲣⲙⲙⲁⲟ ⲛⲧⲕⲟⲩϩⲏⲕⲉ ⲥⲁϩⲱⲕ ⲇⲉ ⲉⲃⲟⲗ ⲙⲙⲟϥ ϩⲙⲡⲉⲕϩⲏⲧ

5 ⲉϣⲱⲡⲉ ⲉⲕϣⲁⲛⲥⲙⲛⲓⲁⲧⲕ ⲉϫⲱϥ ⲛⲛⲉϥⲟⲩⲱⲛϩ ⲉⲃⲟⲗ ϩⲛⲗⲁⲁⲩ ⲙⲙⲁ ⲁϥⲥⲟⲃⲧⲉ ⲅⲁⲣ ⲛⲁϥ ⲛϩⲉⲛⲧⲛϩ ⲛⲧϩⲉ ⲛⲟⲩⲁϩⲱⲙ ⲉⲃⲟⲗ ⲉⲡⲁⲏⲣ ⲁⲩⲱ ϥⲛⲁⲕⲧⲟϥ ⲉⲡⲏⲓ ⲙⲡⲉⲧϩⲓϫⲱϥ ⲡⲱⲛⲉ ϩⲟⲣϣ ⲁⲩⲱ ⲡϣⲱ ⲙⲟⲕϩ ⲛϥⲓ ϩⲁⲣⲟϥ ⲧⲟⲣⲅⲏ ⲇⲉ ⲙⲡⲁⲧϩⲏⲧ ϩⲟⲣϣ ⲉϩⲟⲩⲉⲣⲟⲟⲩ ⲙⲡⲉⲥⲛⲁⲩ

6 ⲙⲡⲣⲟⲩⲱⲙ ⲙⲛⲟⲩⲣⲱⲙⲉ ⲛⲉⲓⲉⲣⲃⲟⲟⲛⲉ ⲁⲩⲱ ⲙⲡⲣⲉⲡⲓⲑⲩⲙⲉⲓ ⲉⲛⲉϥϭⲓⲛⲟⲩⲱⲙ

7 ⲛⲧϩⲉ ⲅⲁⲣ ⲛⲟⲩⲁ ⲉϥⲛⲁⲉⲙⲕⲟⲩϥⲱ ⲧⲁⲓ ⲧⲉ ⲧϩⲉ ⲉⲧϥⲛⲁⲟⲩⲱⲙ ⲁⲩⲱ ⲛⲧϩϥⲥⲱ

8 ⲙⲡⲣϫⲓⲧϥ ⲉϩⲟⲩⲛ ⲉⲡⲉⲕⲏⲓ ϫⲉⲛⲛⲉⲕⲟⲩⲱⲙ ⲛⲛⲉⲕⲟⲉⲓⲕ ⲛⲙⲙⲁϥ ϥⲛⲁⲕⲁⲃⲟⲗ ⲅⲁⲣ ⲙⲙⲟϩⲟⲟⲩ ⲛϥⲧⲁⲕⲉⲛⲉⲕϣⲁϫⲉ ⲉⲧⲛⲁⲛⲟⲩⲟⲩ

9 ⲙⲡⲣϫⲉⲗⲁⲁⲩ ⲉⲙⲙⲁⲁϫⲉ ⲙⲡⲁⲧϩⲏⲧ ⲙⲏⲡⲟⲧⲉ ⲛϥⲕⲙϣⲛⲉⲕϣⲁϫⲉ

10 ⲙⲡⲣⲃⲱⲕ ⲉϩⲟⲩⲛ ⲉϭⲱⲙ ⲛⲟⲣⲫⲁⲛⲟⲥ

11 ⲡⲛⲟⲩⲧⲉ ⲅⲁⲣ ⲉⲧϫⲟⲟⲣ ⲡⲉⲧⲥⲱⲧⲉ ⲙⲙⲟⲟⲩ ⲁⲩⲱ ϥⲛⲁϫⲓϩⲁⲡ ⲛⲑⲙⲙⲁⲕ ϩⲁⲣⲟⲟⲩ

12 ϯⲡⲉⲕϩⲏⲧ ⲉⲧⲉⲥⲃⲱ ⲛⲅⲥⲃⲧⲉⲛⲉⲕⲙⲁⲁϫⲉ ⲉⲛϣⲁϫⲉ ⲛⲧⲁⲓⲥⲑⲏⲥⲓⲥ

13 ⲙⲡⲣⲗⲟ ⲉⲕϯⲥⲃⲱ ⲛⲟⲩⲕⲟⲩⲓ ϫⲉⲉⲕϣⲁⲛⲣⲁϩⲧϥ ⲛⲟⲩϭⲉⲣⲱⲃ ⲛⲉϥⲛⲁⲙⲟⲩ ⲁⲛ

14 ⲛⲧⲟⲕ ⲙⲛⲅⲁⲣ ⲉⲕⲛⲁⲣⲉϩⲧⲡⲉⲕϣⲏⲣⲉ ϩⲛⲟⲩϭⲉⲣⲱⲃ ⲕⲛⲁⲧⲟⲩϫⲟ ⲇⲉ ⲛⲧⲉϥⲯⲩⲭⲏ ⲉⲃⲟⲗ ϩⲙⲡⲙⲟⲩ

15 ⲡⲁϣⲏⲣⲉ ⲉⲣϣⲁⲛⲡⲉⲕϩⲏⲧ ⲣⲥⲟⲫⲟⲥ ⲕⲛⲁⲉⲩⲫⲣⲁⲛⲉ ⲙⲡⲱⲓ ϩⲱ

16 ⲁⲩⲱ ⲛⲧⲉⲛⲁⲥⲡⲟⲧⲟⲩ ϣⲁϫⲉ ⲙⲛⲛⲉⲕⲥⲡⲟⲧⲟⲩ ⲉϣⲱⲡⲉ ⲉⲩⲥⲟⲩⲧⲱⲛ

17 ⲙⲡⲣⲧⲣⲉⲡⲉⲕϩⲏⲧ ⲕⲱϩ ⲉⲛⲣⲉϥⲣⲛⲟⲃⲉ ⲁⲗⲗⲁ ⲙⲁⲧⲁϣⲟⲕ ⲉⲩⲙⲛⲧⲙⲁⲓⲛⲟⲩⲧⲉ ⲁⲩⲱ ⲛⲅϣⲱⲡⲉ ϩⲛⲧϩⲟⲧⲉ ⲙⲡϫⲟⲉⲓⲥ ⲙⲡⲉϩⲟⲟⲩ ⲧⲏⲣϥ

18 ⲉⲕϣⲁⲛϩⲁⲣⲉϩ ⲅⲁⲣ ⲉⲛⲁⲓ ⲟⲩⲛϩⲉⲛϫⲡⲟ ⲛⲁϣⲱⲡⲉ ⲛⲁⲕ ⲁⲩⲱ ⲧⲉⲕϩⲉⲗⲡⲓⲥ ⲛⲁⲱϫⲛ ⲁⲛ

19 ⲥⲱⲧⲙ ⲡⲁϣⲏⲣⲉ ⲛⲅⲣⲥⲟⲫⲟⲥ ⲁⲩⲱ ⲛⲅⲣϩⲉⲛⲙⲉⲉⲩⲉ ⲉⲩⲥⲟⲩⲧⲱⲛ ⲙⲡⲉⲕϩⲏⲧ

20 ⲙⲡⲣⲛⲣⲉϥϯϩⲉ ⲁⲩⲱ ⲙⲡⲣⲥⲟⲩⲧⲛⲧⲟⲟⲧⲕ ⲉⲃⲟⲗ ⲉϩⲉⲛⲥⲩⲙⲃⲟⲗⲏ ⲉϣⲉⲡⲁϥ

21 ⲣⲉϥϯϩⲉ ⲅⲁⲣ ⲛⲓⲙ ϩⲓⲡⲟⲣⲛⲟⲕⲟⲡⲟⲥ ⲛⲁⲣϩⲏⲕⲉ ⲁⲩⲱ ⲥⲁⲟⲩⲏⲣⲡ ⲛⲓⲙ ⲛⲁϯ ϩⲓⲱⲱϥ ⲛϩⲉⲛⲧⲟⲉⲓⲥ

22 ⲥⲱⲧⲙ ⲡⲁϣⲏⲣⲉ ⲛⲥⲁⲡⲉⲕⲉⲓⲱⲧ ⲛⲧⲁϥϫⲡⲟⲕ ⲁⲩⲱ ⲙⲡⲣⲕⲁⲧⲁⲫⲣⲟⲛⲉⲓ ϫⲉⲁⲧⲉⲕⲙⲁⲁⲩ ⲣϩⲗⲗⲱ

24 ϣⲁⲣⲉⲟⲩⲉⲓⲱⲧ ⲛⲇⲓⲕⲁⲓⲟⲥ ϣⲁⲛⲧϣ ⲕⲁⲗⲱⲥ ϣⲁⲣⲉⲡⲉϥϩⲏⲧ ⲇⲉ ⲉⲩⲫⲣⲁⲛⲉ ⲉϫⲛⲟⲩϣⲏⲣⲉ ⲛⲥⲁⲃⲉ

25 ⲙⲁⲣⲉⲡⲉⲕⲉⲓⲱⲧ ⲙⲛⲧⲉⲕⲙⲁⲁⲩ ⲉⲩⲫⲣⲁⲛⲉ ϩⲣⲁⲓ ⲉϫⲱⲕ ⲛⲧⲉⲧⲉⲛⲧⲁⲥϫⲡⲟⲕ ⲣⲁϣⲉ

26 ⲡⲁϣⲏⲣⲉ ⲙⲁ ⲛⲁⲓ ⲙⲡⲉⲕϩⲏⲧ ⲙⲁⲣⲉⲛⲉⲕⲃⲁⲗ ⲇⲉ ϩⲁⲣⲉϩ ⲉⲛⲁϩⲓⲟⲟⲩⲉ

27 ⲟⲩⲡⲓⲑⲟⲥ ⲅⲁⲣ ⲉϥϭⲟⲧϩ ⲡⲉ ⲟⲩⲏⲓ ⲉⲛⲡⲱⲕ ⲁⲛ ⲡⲉ ⲁⲩⲱ ⲟⲩϣⲱⲧⲉ ⲧⲉ ⲉⲥⲉⲥϭⲏⲩ ⲉⲥⲙⲟⲕϩ ⲛⲉⲓⲉϩⲣⲁⲓ

28 ⲏⲇⲏ ⲅⲁⲣ ϥⲛⲁⲧⲁⲕⲟ ⲛⲧⲉⲩⲛⲟⲩ ⲁⲩⲱ ⲡⲁⲣⲁⲛⲟⲙⲟⲥ ⲛⲓⲙ ⲛⲁⲱϫⲛ

29 ⲉⲣⲉⲡⲟⲩⲟⲓ ⲛⲁϣⲱⲡⲉ ⲛⲛⲓⲙ ⲁⲩⲱ ⲡⲉϣⲧⲟⲣⲧⲣ ⲛⲛⲓⲙ ⲙⲛⲡϫⲓϩⲁⲡ ⲛⲛⲓⲙ ⲙⲛⲛⲗⲉⲥⲭⲏ ⲉⲧϩⲟⲟⲩ ⲛⲓⲙ ⲉⲣⲉⲛⲟⲩⲱϣⲥϥ ⲉⲡϫⲓⲛϫⲏ ϣⲟⲟⲡ ⲛⲛⲓⲙ ⲏ ⲛⲓⲙ ⲡⲉⲧⲉⲣⲉⲛⲉϥⲃⲁⲗ ⲟ ⲛⲉⲗⲉⲗⲕⲏⲙⲉ

30 ⲛⲛⲉⲧⲱⲥⲕ ⲁⲛ ⲛⲉ ϩⲛⲏⲣⲡ ⲛⲛⲉⲧϣⲓⲛⲉ ⲁⲛ ⲛⲉ ϫⲉⲉⲣⲉⲙⲙⲁ ⲛⲥⲱⲛⲁϣⲱⲡⲉ ⲧⲱⲛ

31 ⲙⲡⲣϯϩⲉ ϩⲙⲡⲏⲣⲡ ⲁⲗⲗⲁ ϣⲁϫⲉ ⲙⲛⲛⲣⲱⲙⲉ ⲁⲩⲱ ⲛⲧⲉⲧⲛϣⲁϫⲉ ⲙⲛⲛⲉⲧⲙⲟⲟϣⲉ ⲉⲕϣⲁⲛϯⲛⲉⲕⲃⲁⲗ ⲅⲁⲣ ⲉⲛⲉⲫⲓⲁⲗⲏ ⲙⲛⲛϫⲱ ⲙⲛⲛⲥⲱⲥ ⲕⲛⲁⲙⲟⲟϣⲉ ⲉⲕⲕⲏⲕⲁϩⲏⲩ ⲉϩⲟⲩⲉⲟⲩⲥⲁϩⲙⲉⲥ

32 ⲛⲧϩⲁⲏ ⲇⲉ ⲕⲛⲁⲣⲧϩⲉ ⲙⲡⲉⲛⲧⲁϥⲙⲟⲩ ⲉⲁⲩϣⲟⲟϭⲉϥ ϩⲓⲧⲛⲟⲩϩⲟϥ ⲁⲩⲱ ⲛⲧϩⲉ ⲙⲡⲉⲛⲧⲁⲟⲩⲕⲉⲣⲁⲥⲧⲏⲥ ⲗⲟⲕⲥϥ ⲉⲁⲧⲙⲁⲧⲟⲩ ϣⲱⲗ ⲉⲣⲟϥ

33 ⲉⲣϣⲁⲛⲛⲉⲕⲃⲁⲗ ⲛⲁⲩ ⲉⲛⲉⲧⲛⲛⲟⲩⲕ ⲁⲛ ⲛⲉ ⲧⲉⲕⲧⲁⲡⲣⲟ ⲛⲁϫⲱ ⲛⲛⲉⲧϭⲟⲟⲙⲉ

34 ⲕⲛⲁⲛⲟϫⲕ ⲛⲧϩⲉ ⲙⲡⲉⲧϩⲙⲡϩⲏⲧ ⲛⲧⲑⲁⲗⲁⲥⲥⲁ ⲁⲩⲱ ⲛⲧϩⲉ ⲛⲟⲩⲛⲉⲉⲃ ⲉϥϩⲛⲟⲩⲛⲟϭ ⲛϩⲟⲉⲓⲙ

35 ⲕⲛⲁϫⲟⲟⲥ ϫⲉⲛⲛⲉⲩϩⲓⲟⲩⲉ ⲉⲣⲟⲓ ⲁⲩⲱ ⲙⲡⲓⲙⲕⲁϩ ⲁⲩⲱ ⲛⲉⲩⲥⲱⲃⲉ ⲙⲙⲟⲓ ⲡⲉ ⲁⲛⲟⲕ ⲇⲉ ⲛⲉⲓⲥⲟⲟⲩⲛ ⲁⲛ ⲡⲉ ⲉⲣⲉϩⲧⲟⲟⲩⲉ ⲛⲁϣⲱⲡⲉ ⲧⲛⲁⲩ ϫⲉⲉⲓⲉⲃⲱⲕ ⲧⲁϣⲓⲛⲉ ⲛⲥⲁⲛⲉϯⲛⲁⲥⲟⲩⲱϩ ⲛⲙⲙⲁⲩ