Numbers 25 — Coptic (Sahidic)

1 ⲁⲩⲱ ⲁⲡⲓⲥⲣⲁⲏⲗ ⲟⲩⲱϩ ϩⲣⲁⲓ ϩⲛⲥⲁⲇⲧⲓⲛ ⲁⲡⲗⲁⲟⲥ ϫⲱϩⲙ ⲉⲡⲟⲣⲛⲉⲩⲉ ⲙⲛⲛϣⲉⲉⲣⲉ ⲙⲙⲱⲁⲃ

2 ⲁⲩⲱ ⲁⲩⲧⲁϩⲙⲟⲩ ⲉϩⲣⲁⲓ ⲉϫⲛⲛⲉⲑⲩⲥⲓⲁ ⲛⲛⲉⲩⲉⲓⲇⲱⲗⲟⲛ ⲁⲡⲗⲁⲟⲥ ⲟⲩⲱⲙ ⲉⲃⲟⲗ ϩⲛⲛⲉⲩⲑⲩⲥⲓⲁ ⲁⲩⲱ ⲁϥⲟⲩⲱϣⲧ ⲛⲛⲉⲩⲉⲓⲇⲱⲗⲟⲛ

3 ⲁⲡⲓⲥⲣⲁⲏⲗ ϣⲙϣⲉ ⲛⲃⲉⲉⲗⲫⲉⲅⲱⲣ ⲡϫⲟⲉⲓⲥ ⲇⲉ ⲁϥϭⲱⲛⲧ ϩⲛⲟⲩϭⲱⲛⲧ ⲉϩⲣⲁⲓ ⲉϫⲙⲡⲓⲥⲣⲁⲏⲗ

4 ⲁⲩⲱ ⲡⲉϫⲉⲡϫⲟⲉⲓⲥ ⲙⲙⲱⲩⲥⲏⲥ ϫⲉϫⲓ ⲛⲁⲣⲭⲏⲅⲟⲥ ⲛⲓⲙ ⲛⲧⲉⲡⲗⲁⲟⲥ ⲛⲅⲡⲁⲣⲁⲇⲓⲅⲙⲁⲧⲓⲍⲉ ⲙⲙⲟⲟⲩ ⲙⲡϫⲟⲉⲓⲥ ⲙⲡⲉⲙⲧⲟ ⲉⲃⲟⲗ ⲙⲡⲣⲏ ⲁⲩⲱ ⲧⲟⲣⲅⲏ ⲙⲡϭⲱⲛⲧ ⲛⲁⲕⲧⲟⲥ ⲉⲃⲟⲗ ⲙⲡⲓⲥⲣⲁⲏⲗ

5 ⲁⲩⲱ ⲡⲉϫⲉⲙⲱⲩⲥⲏⲥ ⲛⲛⲉⲫⲩⲗⲟⲟⲩⲉ ⲙⲡⲓⲥⲣⲁⲏⲗ ϫⲉⲙⲁⲣⲉⲡⲟⲩⲁ ⲡⲟⲩⲁ ⲙⲟⲩⲟⲩⲧ ⲙⲡⲉϥⲣⲙⲉⲛⲏⲓ ⲡⲉⲛⲧⲁϥϣⲙϣⲉ ⲛⲃⲉⲉⲗⲫⲉⲅⲟⲣ

6 ⲁⲩⲱ ⲉⲓⲥ ⲟⲩⲣⲱⲙⲉ ⲉⲃⲟⲗ ϩⲛⲛϣⲏⲣⲉ ⲙⲡⲓⲥⲣⲁⲏⲗ ⲁϥⲉⲓ ⲁϥⲙⲡⲉϥⲥⲟⲛ ⲙⲛⲟⲩⲥϩⲓⲙⲉ ⲉⲃⲟⲗ ϩⲙⲙⲁⲇⲓϩⲁⲙ ⲙⲡⲉⲙⲧⲟ ⲉⲃⲟⲗ ⲙⲙⲱⲩⲥⲏⲥ ⲁⲩⲱ ⲙⲡϩⲟⲧ ⲉⲃⲟⲗ ⲛⲧⲥⲩⲛⲁⲅⲱⲅⲏ ⲧⲏⲣⲥ ⲛⲛϣⲏⲣⲉ ⲙⲡⲓⲥⲣⲁⲏⲗ ⲛⲧⲟⲟⲩ ⲇⲉ ⲛⲉⲩⲣⲓⲙⲉ ⲡⲉ ϩⲁⲧⲙ ⲡⲣⲟ ⲛⲧⲉⲥⲕⲩⲛⲏ ⲙⲡⲙⲛⲧⲣⲉ

7 ⲁⲩⲱ ⲛⲧⲉⲣⲉϥⲛⲁⲩ ⲛϭⲓⲫⲉⲓⲛⲉⲉⲥ ⲡϣⲏⲣⲉ ⲛⲉⲗⲉⲁⲍⲁⲣ ⲡϣⲏⲣⲉ ⲛⲁⲁⲣⲱⲛ ⲡⲟⲩⲏⲏⲃ ⲁϥⲧⲱⲟⲩⲛ ⲉⲃⲟⲗ ϩⲛⲧⲙⲏⲧⲉ ⲛⲧⲥⲩⲛⲁⲅⲱⲅⲏ ⲁϥϫⲓ ⲛⲟⲩⲥⲓⲣⲱⲙⲁⲥⲧⲏⲥ ϩⲣⲁⲓ ϩⲛⲧⲉϥϭⲓϫ

8 ⲁϥⲃⲱⲕ ⲉϩⲟⲩⲛ ⲉⲧⲉϩⲣⲱ ϩⲓⲡⲁϩⲟⲩ ⲙⲡⲣⲱⲙⲉ ⲡⲓⲥⲣⲁⲏⲗⲓⲧⲏⲥ ⲁϥⲕⲟⲛⲥⲟⲩ ⲙⲡⲉⲥⲛⲁⲩ ⲡⲣⲱⲙⲉ ⲡⲓⲥⲣⲁⲏⲗⲓⲧⲏⲥ ⲙⲛⲧⲉⲥϩⲓⲙⲉ ⲉⲃⲟⲗ ϩⲓⲧⲛⲧⲉⲥⲟⲟⲧⲉ ⲁⲩⲱ ⲁⲧⲟⲣⲅⲏ ⲗⲟ ϩⲛⲛϣⲏⲣⲉ ⲙⲡⲓⲥⲣⲁⲏⲗ

9 ⲛⲉⲛⲧⲁⲩⲙⲟⲩ ⲇⲉ ϩⲣⲁⲓ ϩⲛⲧⲉⲡⲗⲩⲅⲏ ⲁⲩⲣϫⲟⲩⲧⲁϥⲧⲉ ⲛϣⲟ

10 ⲁⲩⲱ ⲡϫⲟⲉⲓⲥ ⲁϥϣⲁϫⲉ ⲙⲛⲙⲱⲩⲥⲏⲥ ⲉϥϫⲱ ⲙⲙⲟⲥ

11 ϫⲉⲫⲓⲛⲉⲉⲥ ⲡϣⲏⲣⲉ ⲛⲉⲗⲉⲁⲍⲁⲣ ⲡϣⲏⲣⲉ ⲛⲁⲁⲣⲱⲛ ⲡⲟⲩⲏⲏⲃ ⲡⲉⲛⲧⲁϥϯϩⲣⲟⲕ ⲙⲡⲁϭⲱⲛⲧ ϩⲛⲛϣⲏⲣⲉ ⲙⲡⲓⲥⲣⲁⲏⲗ ϩⲙⲡⲧⲣⲉⲩⲕⲱϩ ⲉⲡⲁⲕⲱϩ ϩⲣⲁⲓ ⲛϩⲏⲧⲟⲩ ⲁⲩⲱ ⲙⲡⲓⲃⲱⲧⲉ ⲉⲃⲟⲗ ⲉⲛⲉⲛϣⲏⲣⲉ ⲙⲡⲓⲥⲣⲁⲏⲗ ϩⲙⲡⲁⲕⲱϩ

12 ⲁϫⲓⲥ ⲛⲁϥ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁϯ ⲛⲁϥ ⲛⲛⲟⲩⲇⲓⲁⲑⲏⲕⲏ ⲛⲉⲓⲣⲏⲛⲏ

13 ⲛⲥϣⲱⲡⲉ ⲛⲁϥ ⲙⲛⲡⲉϥⲥⲡⲉⲣⲙⲁ ⲙⲛⲛⲥⲱϥ ⲟⲩⲇⲓⲁⲑⲏⲕⲏ ⲙⲙⲛⲧⲟⲩⲏⲏⲃ ϣⲁⲉⲛⲉϩ ⲉⲧⲃⲉϫⲉⲁϥⲕⲱϩ ⲉⲡⲉϥⲛⲟⲩⲧⲉ ⲁⲩⲱ ⲁϥⲥⲟⲡⲥ ϩⲁⲛϣⲏⲣⲉ ⲙⲡⲓⲥⲣⲁⲏⲗ

14 ⲡⲣⲁⲛ ⲇⲉ ⲙⲡⲣⲱⲙⲉ ⲛⲓⲥⲣⲁⲏⲗⲓⲧⲏⲥ ⲡⲉⲛⲧⲁϥⲕⲱⲛⲥ ⲙⲙⲟϥ ⲙⲛⲧⲉⲥϩⲓⲙⲉ ⲧⲉ ⲉⲃⲟⲗ ϩⲛⲙⲁⲇⲓϩⲁⲙ ⲡⲉ ⲥⲁⲙⲃⲣⲓ ⲡϣⲏⲣⲉ ⲛⲥⲁⲗⲱⲙ ⲡⲁⲣⲭⲱⲛ ⲙⲡⲏⲓ ⲛⲧⲡⲁⲧⲣⲓⲁ ⲛⲥⲩⲙⲉⲱⲛ

15 ⲁⲩⲱ ⲡⲣⲁⲛ ⲛⲧⲉⲥϩⲓⲙⲉ ⲧⲉ ⲉⲃⲟⲗ ϩⲛⲙⲁⲇⲓϩⲁⲙ ⲧⲉⲛⲧⲁϥⲕⲟⲟⲛⲥ ⲧⲉ ⲭⲁⲥⲃⲓ ⲧϣⲉⲉⲣⲉ ⲛⲥⲟⲩⲣ ⲡⲁⲣⲭⲱⲛ ⲙⲡϩⲉⲑⲛⲟⲥ ⲛⲟⲙⲙⲱⲑ ⲡⲏⲓ ⲛⲧⲡⲁⲧⲣⲓⲁ ⲛⲧⲉⲙⲁⲇⲓϩⲁⲙ

16 ⲁⲩⲱ ⲡϫⲟⲉⲓⲥ ⲁϥϣⲁϫⲉ ⲙⲛⲙⲱⲩⲥⲏⲥ ⲉϥϫⲱ ⲙⲙⲟⲥ ϫⲉϣⲁϫⲉ ⲙⲛⲛϣⲏⲣⲉ ⲙⲡⲓⲥⲣⲁⲏⲗ ⲉⲕϫⲱ ⲙⲙⲟⲥ

17 ϫⲉⲁⲣⲓϫⲁϫⲉ ⲙⲙⲁⲛⲇⲓⲛⲛⲁⲓⲟⲥ ⲛⲧⲉⲧⲛⲡⲁⲧⲁⲥⲥⲉⲓ ⲙⲙⲟⲟⲩ

18 ϫⲉⲛⲧⲟⲟⲩ ⲥⲉⲟ ⲛϫⲁϫⲉ ⲉⲣⲱⲧⲛ ϩⲛⲟⲩⲕⲣⲟϥ ⲁⲩⲱ ⲥⲉⲣⲕⲣⲟϥ ⲉⲣⲱⲧⲛ ⲉⲧⲃⲉⲫⲟⲅⲱⲣ ⲙⲛⲭⲁⲥⲃⲓ ⲧϣⲉⲉⲣⲉ ⲙⲡⲁⲣⲭⲱⲛ ⲙⲙⲁⲇⲓϩⲁⲙ ⲧⲉⲩⲥⲱⲛⲉ ⲧⲉⲛⲧⲁⲩⲕⲟⲟⲛⲥ ϩⲙⲡⲉϩⲟⲟⲩ ⲛⲧⲉⲡⲗⲏⲅⲏ ⲉⲧⲃⲉⲫⲟⲅⲱⲣ