Numbers 24 — Coptic (Sahidic)

1 ⲁⲩⲱ ⲁϥⲛⲁⲩ ⲛϭⲓⲃⲁⲗⲁϩⲁⲙ ϫⲉⲟⲩⲡⲉⲧⲛⲁⲛⲟⲩϥ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲡⲉ ⲥⲙⲟⲩ ⲉⲡⲓⲥⲣⲁⲏⲗ ⲙⲡϥⲃⲱⲕ ⲕⲁⲧⲁⲡⲉϥⲥⲱⲛⲧ ⲉⲧⲱⲙⲧ ⲉⲣⲟϥ ϩⲛⲟⲩⲙⲛⲧⲉⲣⲉϥϫⲓⲙⲁⲉⲓⲛ ⲁⲗⲗⲁ ⲁϥⲕⲱⲧⲉ ⲡⲉϥϩⲟ ⲉⲧⲉⲣⲏⲙⲟⲥ

2 ⲁⲩⲱ ⲁⲃⲁⲗⲁϩⲁⲙ ϥⲓ ⲛⲛⲉϥⲃⲁⲗ ⲉϩⲣⲁⲓ ⲁϥⲛⲁⲩ ⲉⲡⲓⲥⲣⲁⲏⲗ ⲉϥⲙⲟⲟϣⲉ ⲕⲁⲧⲁⲟⲩⲣϣⲉ ⲁⲩⲱ ⲁⲡⲉⲡⲛⲉⲩⲙⲁ ⲙⲡⲛⲟⲩⲧⲉ ϣⲱⲡⲉ ⲉϩⲣⲁⲓ ⲉϫⲱϥ

3 ⲁⲩϫⲓ ⲛⲧⲉϥⲡⲁⲣⲁⲃⲟⲗⲏ ⲡⲉϫⲁϥ ⲡⲉϫⲁϥ ⲛϭⲓⲃⲁⲗⲁϩⲁⲙ ⲡϣⲏⲣⲉ ⲛⲃⲉⲱⲣ ⲡⲉϫⲁϥ ⲛϭⲓⲡⲣⲱⲙⲉ ⲉⲧⲉⲓⲱⲣϩ ⲛⲁⲙⲉ

4 ⲡⲁⲓ ⲉⲛⲧⲁϥⲛⲁⲩ ⲉⲧϩⲟⲣⲁⲥⲓⲥ ⲙⲡⲛⲟⲩⲧⲉ ϩⲛⲟⲩⲱⲃϣ ⲉⲣⲉⲛⲉϥⲃⲁⲗ ϭⲟⲗⲡ ⲉⲃⲟⲗ

5 ⲉϣϫⲉ ⲛⲁⲛⲟⲩⲛⲉⲕⲏⲓ ⲓⲁⲕⲱⲃ ⲛⲉⲕⲥⲕⲏⲛⲏ ⲡⲓⲥⲣⲁⲏⲗ

6 ⲛⲧϩⲉ ⲛⲛⲉⲕⲣⲣⲱⲟⲩ ⲉⲧⲟ ⲛϩⲁⲉⲓⲃⲉⲥ ⲁⲩⲱ ⲛⲧϩⲉ ⲛⲛⲡⲁⲣⲁⲇⲉⲓⲥⲟⲥ ⲉⲧϩⲓϫⲛⲛⲉⲓⲉⲣⲱⲟⲩ ⲁⲩⲱ ⲛⲧϩⲉ ⲛⲉⲓⲥⲕⲏⲛⲏ ⲛⲁⲓ ⲛⲧⲁⲡϫⲟⲉⲓⲥ ⲡⲏⲥⲥⲉ ⲙⲙⲟⲟⲩ ⲁⲩⲱ ⲛⲧϩⲉ ⲛⲛⲉⲓⲕⲉⲇⲣⲟⲥ ⲉⲧϩⲓϫⲛⲙⲙⲟⲟⲩ

7 ⲁⲩⲱ ⲟⲩⲣⲱⲙⲉ ⲛⲏⲩ ⲉⲃⲟⲗ ϩⲙⲡⲉϥⲥⲡⲉⲣⲙⲁ ⲁⲩⲱ ϥⲛⲁⲣϫⲟⲉⲓⲥ ⲉϩⲉⲛϩⲉⲑⲛⲟⲥ ⲉⲛⲁϣⲱⲟⲩ ⲛϥϫⲓⲥⲉ ⲉϩⲟⲩⲉ ⲧⲙⲛⲧⲣⲣⲟ ⲛⲅⲱⲅ ⲁⲩⲱ ⲛⲥⲁⲩⲝⲁⲛⲉ ⲛϭⲓⲧⲉϥⲙⲛⲧⲣⲣⲟ

8 ϫⲉⲡⲛⲟⲩⲧⲉ ⲡⲉⲛⲧⲁϥϫⲓⲙⲟⲉⲓⲧ ϩⲏⲧϥ ⲉϥⲛⲏⲩ ⲉⲃⲟⲗ ϩⲛⲕⲏⲙⲉ ⲛⲧϩⲉ ⲙⲡⲉⲟⲟⲩ ⲙⲡⲙⲟⲛⲟⲕⲉⲣⲱⲥ ⲛⲁϥ ϫⲉϥⲛⲁⲟⲩⲱⲙ ⲛⲛϩⲉⲑⲛⲟⲥ ⲙⲛⲛⲉϥϫⲓⲛϫⲉⲉⲩ ⲛϥⲟⲩⲱⲙ ⲟⲛ ⲛⲛⲉⲩⲛⲟⲙⲧⲉ ⲙⲛⲛⲉⲩⲁⲗⲧⲕⲁⲥ ϥⲛⲁⲥⲱⲙⲧ ⲙⲡⲉϥϫⲁϫⲉ ϩⲓⲧⲛⲛⲉϥⲥⲟⲧⲉ

9 ⲁϥⲣⲁⲕⲧϥ ⲁϥⲙⲧⲟⲛ ⲙⲙⲟϥ ⲛⲧϩⲉ ⲛⲛⲉⲓⲙⲟⲩⲓ ⲛⲓⲙ ⲡⲉⲧⲛⲁϣⲧⲟⲩⲛⲟⲥϥ ⲛⲉⲧⲥⲙⲟⲩ ⲉⲣⲟⲕ ⲥⲉⲥⲙⲁⲙⲁⲁⲧ ⲁⲩⲱ ⲛⲉⲧⲥⲁϩⲟⲩ ⲙⲙⲟⲕ ⲥⲉⲥϩⲟⲩⲟⲣⲧ

10 ⲁⲃⲁⲣⲁⲕ ⲛⲟⲩϭⲥ ⲉϫⲛⲃⲁⲗⲁϩⲁⲙ ⲁϥⲣⲱϩⲧ ⲛⲛⲉϥϭⲓϫ ⲉϫⲛⲛⲉⲩⲉⲣⲏⲩ ⲁⲩⲱ ⲡⲉϫⲁϥ ⲛϭⲓⲃⲁⲣⲁⲕ ⲛⲃⲁⲗⲁϩⲁⲙ ϫⲉⲙⲛⲧⲁⲓⲙⲟⲩⲧⲉ ⲉⲣⲟⲕ ⲉⲥϩⲟⲩⲉⲣⲡⲁϫⲁϫⲉ ⲛⲁⲓ ⲁⲩⲱ ⲉⲓⲥ ϩⲏⲏⲧⲉ ϩⲛⲟⲩⲥⲙⲟⲩ ⲁⲕⲥⲙⲟⲩ ⲉⲣⲟϥ ⲡⲙⲉϩϣⲟⲙⲛⲧ ⲛⲥⲟⲡ ⲡⲉ ⲡⲁⲓ

11 ⲧⲉⲛⲟⲩ ϭⲉ ⲃⲱⲕ ⲉϩⲣⲁⲓ ⲉⲡⲉⲕⲙⲁ ⲛⲉⲁⲓϫⲟⲟⲥ ⲡⲉ ϫⲉϯⲛⲁⲧⲁⲉⲓⲟⲕ ⲧⲉⲛⲟⲩ ϭⲉ ⲁⲡⲛⲟⲩⲧⲉ ⲁⲡⲟⲥⲧⲉⲣⲓ ⲙⲙⲟⲕ ⲉⲡⲉⲟⲟⲩ

12 ⲛⲧⲉⲣⲉⲃⲁⲗⲁϩⲁⲙ ⲙⲛⲃⲁⲣⲁⲕ ϫⲉⲛⲁⲓ ⲡⲉϫⲉⲃⲁⲗⲁϩⲁⲙ ⲛⲃⲁⲣⲁⲕ ϫⲉⲙⲏ ⲙⲡⲓϫⲟⲟⲥ ⲉⲛⲉⲕϥⲁⲓϣⲓⲛⲉ ⲛⲧⲁⲕⲧⲛⲛⲟⲟϫⲥⲟⲩ ϣⲁⲣⲟⲓ

13 ϫⲉⲉϣⲱⲡⲉ ⲉⲣϣⲁⲛⲃⲁⲣⲁⲕ ϯ ⲛⲁⲓ ⲙⲡⲉϥⲏⲓ ⲧⲏⲣϥ ⲉϥⲙⲏϩ ⲛⲛⲟⲩⲃ ϩⲓϩⲁⲧ ⲙⲛϭⲟⲙ ⲙⲙⲟⲓ ⲉⲡⲁⲣⲁⲃⲁ ⲙⲡϣⲁϫⲉ ⲙⲡϫⲟⲉⲓⲥ ⲉⲧⲣⲁⲁϥ ⲛⲟⲩⲡⲉⲧϩⲟⲟⲩ ⲏ ⲟⲩⲡⲉⲧⲛⲁⲛⲟⲩϥ ϩⲁⲣⲟⲓ ⲙⲁⲩⲁⲁⲧ ⲡⲛⲟⲩⲧⲉ ⲛⲁϫⲟⲟⲩ ⲛⲁⲓ ⲛⲉⲧⲓⲛⲁⲧⲁⲩⲟⲟⲩ

14 ⲁⲩⲱ ⲧⲉⲛⲟⲩ ϯⲛⲁⲡⲱⲧ ⲉϩⲣⲁⲓ ⲉⲡⲁⲙⲁ ⲁⲙⲟⲩ ⲧⲁϫⲓϣⲟϫⲛⲉ ⲛⲁⲕ ϫⲉⲉⲣⲉⲡⲉⲓⲗⲁⲟⲥ ⲛⲁⲣ ⲟⲩ ⲙⲡⲉⲕⲗⲁⲟⲥ ϩⲛⲧϩⲁⲏ ⲛⲛⲉϩⲟⲟⲩ

15 ⲁⲩⲱ ⲛⲧⲉⲣⲉϥⲕⲧⲟϥ ⲉⲧⲉϥⲡⲁⲣⲁⲃⲟⲗⲏ ⲡⲉϫⲁϥ ϫⲉⲡⲉϫⲉⲃⲁⲗⲁϩⲁⲙ ⲡϣⲏⲣⲉ ⲛⲃⲉⲱⲣ ⲡⲉϫⲉⲡⲣⲱⲙⲉ ⲉⲧⲓⲱⲣϩ ϩⲛⲟⲩⲙⲉ

16 ⲉⲧⲥⲱⲧⲙ ⲉⲛϣⲁϫⲉ ⲙⲡⲛⲟⲩⲧⲉ ⲉⲧⲥⲟⲟⲩⲧⲛ ⲛⲟⲩⲥⲃⲱ ⲉⲃⲟⲗ ϩⲓⲧⲙⲡⲉⲧϫⲟⲥⲉ ⲉⲧⲛⲁⲩ ⲉⲩϩⲟⲣⲁⲥⲓⲥ ⲛⲧⲉⲡⲛⲟⲩⲧⲉ ϩⲛⲟⲩϩⲓⲛⲏⲃ ⲉⲣⲉⲛⲉϥⲃⲁⲗ ϭⲟⲗⲡ ⲉⲃⲟⲗ

17 ϯⲛⲁⲧⲁⲩⲟϥ ⲁⲩⲱ ⲧⲉⲛⲟⲩ ⲟⲛ ϯⲛⲁⲥⲙⲟⲩ ⲁⲩⲱ ⲛϥⲛⲁϩⲱⲛ ⲉϩⲟⲩⲛ ⲁⲛ ⲟⲩⲛⲟⲩⲥⲓⲟⲩ ⲛⲁϣⲁ ⲉⲃⲟⲗ ϩⲛⲓⲁⲕⲱⲃ ⲁⲩⲱ ⲟⲩⲛⲟⲩⲣⲱⲙⲉ ⲛⲁⲧⲱⲟⲩⲛ ⲉⲃⲟⲗ ϩⲙⲡⲓⲥⲣⲁⲏⲗ ϥⲛⲁⲟⲩⲱϣϥ ⲛⲛⲁⲣⲭⲏⲅⲟⲥ ⲙⲙⲱⲁⲃ ϥⲛⲁϣⲱⲗ ⲛⲛϣⲏⲣⲉ ⲧⲏⲣⲟⲩ ⲉⲛⲥⲏⲑ

18 ⲉⲇⲱⲙ ϥⲛⲁϣⲱⲡⲉ ⲛⲟⲩⲕⲗⲏⲣⲟⲛⲟⲙⲓⲁ ⲏⲥⲁⲩ ⲡⲉϥϫⲁϫⲉ ϥⲛⲁϣⲱⲡⲉ ⲛⲟⲩⲕⲗⲏⲣⲟⲛⲟⲙⲓⲁ ⲡⲓⲥⲣⲁⲏⲗ ⲇⲉ ⲁϥⲉⲓ ⲉϩⲣⲁⲓ ϩⲛⲟⲩϭⲟⲙ

19 ϥⲛⲁⲧⲱⲟⲩⲛ ⲉⲃⲟⲗ ϩⲛⲓⲁⲕⲱⲃ ⲛϥⲧⲁⲕⲟ ⲙⲡⲉⲧⲛⲁⲟⲩϫⲁⲓ ⲉⲃⲟⲗ ϩⲛⲧⲡⲟⲗⲓⲥ

20 ⲁⲩⲱ ⲛⲧⲉⲣⲉϥⲛⲁⲩ ⲉⲡⲁⲙⲁⲗⲏⲕ ⲁϥⲕⲟⲧϥ ⲉⲧⲉϥⲡⲁⲣⲁⲃⲟⲗⲏ ⲡⲉϫⲁϥ ϫⲉⲟⲩⲁⲣⲭⲏ ⲛⲧⲉⲛϩⲉⲑⲛⲟⲥ ⲡⲉ ⲡⲁⲙⲁⲗⲏⲕ ⲡⲉϥⲥⲡⲉⲣⲙⲁ ⲛⲁⲧⲁⲕⲟ

21 ⲁⲩⲱ ⲛⲧⲉⲣⲉϥⲛⲁⲩ ⲉⲕⲁⲓⲛⲉⲟⲥ ⲁϥⲕⲟⲧϥ ⲉⲧⲉϥⲡⲁⲣⲁⲃⲟⲗⲏ ⲡⲉϫⲁϥ ϫⲉϥϫⲟⲟⲣ ⲛϭⲓⲡⲉⲕⲙⲁ ⲛⲟⲩⲱϩ ⲁⲩⲱ ⲉⲕϣⲁⲛⲕⲁⲛⲉⲕϣⲏⲣⲉ ϩⲣⲁⲓ ϩⲛⲟⲩⲡⲉⲧⲣⲁ

22 ⲁⲩⲱ ⲉⲩϣⲁⲛϣⲱⲡⲉ ⲛⲃⲉⲱⲣ ⲛϭⲓϩⲉⲛϣⲏⲣⲉ ⲙⲡⲁⲛⲟⲩⲣⲅⲟⲥ ⲛⲁⲥⲥⲩⲣⲓⲟⲥ ⲛⲁⲁⲓⲭⲙⲁⲗⲱⲧⲉⲩⲉ ⲙⲙⲟⲕ

23 ⲁⲩⲱ ⲁϥⲕⲟⲧϥ ⲟⲛ ⲉⲧⲉϥⲡⲁⲣⲁⲃⲟⲗⲏ ⲡⲉϫⲁϥ ϫⲉⲱ ⲛⲓⲙ ⲡⲉⲧⲛⲁϣⲱⲡⲉ ⲉⲣϣⲁⲛⲡⲛⲟⲩⲧⲉ ⲕⲁⲛⲁⲓ

24 ⲁⲩⲱ ϥⲛⲏⲩ ⲉⲃⲟⲗ ϩⲛⲛϭⲓϫ ⲉⲛϭⲓⲇⲣⲉⲱⲥ ⲛⲥⲉⲑⲙⲕⲟ ⲛⲛⲁⲥⲥⲟⲩⲣ ⲥⲉⲛⲁⲙⲉⲕϩⲛϩⲉⲃⲣⲁⲓⲟⲥ ⲁⲩⲱ ⲛⲧⲟⲟⲩ ϩⲓⲟⲩⲥⲟⲡ ⲥⲉⲛⲁⲧⲁⲕⲟ

25 ⲛⲧⲉⲣⲉⲃⲁⲗⲁϩⲁⲙ ⲇⲉ ⲧⲱⲟⲩⲛ ⲁϥⲃⲱⲕ ⲁϥⲕⲧⲟϥ ⲉϩⲣⲁⲓ ⲉⲡⲉϥⲙⲁ ⲃⲁⲗⲁⲕ ϩⲱⲱϥ ⲁϥⲕⲧⲟϥ ⲉϩⲣⲁⲓ ⲉⲡⲉϥⲏⲓ