Read Micah 3 side by side with translations · The Final Bible
1 ⲁⲩⲱ ϥⲛⲁϫⲟⲟⲥ ϫⲉⲥⲱⲧⲙ ϭⲉ ⲉⲛⲁⲓ ⲛⲁⲣⲭⲏ ⲙⲡⲏⲓ ⲛⲓⲁⲕⲱⲃ ⲁⲩⲱ ⲛⲥⲉⲉⲡⲉ ⲙⲡⲏⲓ ⲙⲡⲓⲥⲣⲁⲏⲗ ϫⲉⲙⲡⲱⲧⲛ ⲁⲛ ⲡⲉ ⲥⲟⲩⲛ ⲡϩⲁⲡ
2 ⲛⲛⲉⲧⲙⲟⲥⲧⲉ ⲙⲡⲁⲅⲁⲑⲟⲛ ⲁⲩⲱ ⲉⲩⲙⲉ ⲙⲡⲉⲧϩⲟⲟⲩ ⲉⲩⲧⲱⲣⲡ ⲛⲛⲉⲩϣⲁⲁⲣ ϩⲓⲱⲟⲩ ⲁⲩⲱ ⲛⲉⲩⲥⲁⲣⲝ ϩⲓⲧⲡⲉ ⲛⲛⲉⲩⲕⲉⲉⲥ
3 ⲛⲁⲓ ⲛⲧⲁⲩⲟⲩⲱⲙ ⲛⲛⲥⲁⲣⲝ ⲙⲡⲁⲗⲁⲟⲥ ⲁⲩⲱ ⲛⲉⲩϣⲁⲁⲣ ⲁⲩϣⲁⲧⲟⲩ ⲛⲉⲩⲕⲉⲉⲥ ⲁⲩⲟⲩⲟϭⲡⲟⲩ ⲁⲩⲱ ⲁⲩⲁⲁⲩ ⲛϣⲁⲩϣⲁⲩ ⲛⲧϩⲉ ⲛϩⲉⲛⲥⲁⲣⲝ ⲉϩⲉⲛⲭⲁⲗⲕⲓⲟⲛ ⲁⲩⲱ ⲛⲧϩⲉ ⲛϩⲉⲛⲁϥ ⲉⲩϭⲁⲗⲁϩⲧ
4 ⲧⲟⲧⲉ ⲥⲉⲛⲁⲱϣ ⲉϩⲣⲁⲓ ⲉⲡϫⲟⲉⲓⲥ ⲛϥⲧⲙⲥⲱⲧⲙ ⲉⲣⲟⲟⲩ ⲁⲩⲱ ϥⲛⲁⲕⲧⲉ ⲡⲉϥϩⲟ ⲉⲃⲟⲗ ⲙⲙⲟⲟⲩ ϩⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲉⲃⲟⲗ ϫⲉⲁⲩⲡⲟⲛⲏⲣⲉⲩⲉ ⲛⲛⲉⲩϩⲃⲏⲩⲉ ⲉϩⲣⲁⲓ ⲉϫⲱⲟⲩ
5 ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ⲉϫⲛⲛⲉⲡⲣⲟⲫⲏⲧⲏⲥ ⲛⲉⲧⲡⲗⲁⲛⲁ ⲙⲡⲁⲗⲁⲟⲥ ⲛⲉⲧⲗⲱⲕⲥ ⲙⲙⲟϥ ϩⲛⲛⲉⲩⲟⲃϩⲉ ⲁⲩⲱ ⲉⲩⲕⲩⲣⲏⲥⲥⲉ ⲉϩⲣⲁⲓ ⲉϫⲱϥ ⲛⲟⲩⲉⲓⲣⲏⲛⲏ ⲉⲙⲡⲟⲩⲧⲁⲁⲥ ⲉⲧⲉⲩⲧⲁⲡⲣⲟ ⲁⲩⲧⲟⲩⲛⲟⲥ ⲉϫⲱϥ ⲛⲟⲩⲡⲟⲗⲉⲙⲟⲥ
6 ⲉⲧⲃⲉⲡⲁⲓ ⲧⲉⲩϣⲏ ⲛⲁϣⲱⲡⲉ ⲛⲏⲧⲛ ⲉⲃⲟⲗϩⲛ ⲟⲩϩⲟⲣⲁⲥⲓⲥ ⲁⲩⲱ ⲟⲩⲕⲁⲕⲉ ⲡⲉⲧⲛⲁϣⲱⲡⲉ ⲛⲏⲧⲛ ⲉⲃⲟⲗϩⲛ ⲟⲩϣⲓⲛⲉ ⲁⲩⲱ ⲡⲣⲏ ⲛⲁϩⲱⲧⲡ ⲉϫⲛⲛⲉⲡⲣⲟⲫⲏⲧⲏⲥ ⲛⲧⲉⲡⲉϩⲟⲟⲩ ⲣⲕⲁⲕⲉ ⲉϫⲱⲟⲩ
7 ⲁⲩⲱ ⲥⲉⲛⲁϫⲓϣⲓⲡⲉ ⲛϭⲓⲛⲉⲧⲡⲱⲱⲣⲉ ⲛⲛⲣⲁⲥⲟⲩ ⲛϭⲟⲗ ⲁⲩⲱ ⲥⲉⲛⲁⲥⲱⲃⲉ ⲛⲥⲁⲛⲣⲉϥϣⲓⲛⲉ ⲁⲩⲱ ⲥⲉⲛⲁϣⲁϫⲉ ⲛⲥⲱⲟⲩ ⲧⲏⲣⲟⲩ ⲉⲃⲟⲗ ϫⲉⲙⲛⲡⲉⲧⲛⲁⲥⲱⲧⲙ ⲉⲣⲟⲟⲩ
8 ⲉⲓⲧⲙⲙⲁϩⲟⲩ ⲁⲛⲟⲕ ⲛϭⲟⲙ ϩⲙⲡⲉⲡⲛⲉⲩⲙⲁ ⲙⲡϫⲟⲉⲓⲥ ⲁⲩⲱ ⲟⲩϩⲁⲡ ⲛϭⲟⲙ ⲉⲧⲁⲩⲟ ⲉⲓⲁⲕⲱⲃ ⲛⲛⲉϥⲙⲛⲧϣⲁϥⲧⲉ ⲁⲩⲱ ⲉⲡⲓⲥⲣⲁⲏⲗ ⲛⲛⲉϥⲛⲟⲃⲉ
9 ⲥⲱⲧⲙ ϭⲉ ⲉⲛⲁⲓ ⲛⲛⲟϭ ⲙⲡⲏⲓ ⲛⲓⲁⲕⲱⲃ ⲁⲩⲱ ⲛⲥⲉⲉⲡⲉ ⲙⲡⲏⲓ ⲙⲡⲓⲥⲣⲁⲏⲗ ⲛⲉⲧϥⲱⲧⲉ ⲙⲡϩⲁⲡ ⲁⲩⲱ ⲛⲉⲧⲡⲱϣⲥ ⲛⲛⲉⲧⲥⲟⲩⲧⲱⲛ ⲧⲏⲣⲟⲩ
10 ⲛⲉⲧⲕⲱⲧ ⲛⲥⲓⲱⲛ ϩⲛϩⲉⲛⲥⲛⲟϥ ⲁⲩⲱ ⲧϩⲓⲉⲣⲟⲩⲥⲁⲗⲏⲙ ϩⲛϩⲉⲛϫⲓⲛϭⲟⲛⲥ
11 ⲛⲉⲥⲛⲟϭ ⲁⲩϯϩⲁⲡ ϩⲓϩⲉⲛⲇⲱⲣⲟⲛ ⲁⲩⲱ ⲛⲉⲥⲟⲩⲏⲏⲃ ⲁⲩⲟⲩⲱ ⲉⲩϫⲓⲃⲉⲕⲉ ⲁⲩⲱ ⲛⲉⲥⲡⲣⲟⲫⲏⲧⲏⲥ ⲁⲩϫⲓ ϩⲁⲧ ⲁⲩϣⲓⲛⲉ ⲁⲩⲱ ⲁⲩϣⲟⲩϣⲟⲩ ⲙⲙⲟⲟⲩ ⲉϫⲙⲡϫⲟⲉⲓⲥ ⲉⲩϫⲱ ⲙⲙⲟⲥ ϫⲉⲙⲏ ⲙⲡϫⲟⲉⲓⲥ ϣⲟⲟⲡ ⲛⲙⲙⲁⲛ ⲁⲛ ⲙⲛⲡⲉⲧϩⲟⲟⲩ ⲛⲁⲉⲓ ⲉϫⲱⲛ
12 ⲉⲧⲃⲉⲡⲁⲓ ⲥⲉⲛⲁⲥⲕⲁⲓ ⲛⲥⲓⲱⲛ ⲛⲧϩⲉ ⲛⲟⲩⲥⲱϣⲉ ⲉⲧⲃⲉⲧⲏⲩⲧⲛ ⲁⲩⲱ ⲧϩⲓⲉⲣⲟⲩⲥⲁⲗⲏⲙ ⲥⲛⲁⲣⲧϩⲉ ⲛⲟⲩⲙⲁ ⲛϩⲁⲣⲉϩ ⲛⲃⲟⲛⲧⲉ ⲁⲩⲱ ⲡⲧⲟⲟⲩ ⲙⲡⲏⲓ ⲙⲡⲓⲥⲣⲁⲏⲗ ϥⲛⲁⲣⲧϩⲉ ⲛⲟⲩⲁⲗⲥⲟⲥ ⲙⲙⲁ ⲛϣⲏⲛ
Micah 2 · Micah 4 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)