Leviticus 2 — Coptic (Sahidic)

1 ⲟⲩⲯⲩⲭⲏ ⲇⲉ ⲉⲥϣⲁⲛⲉⲓⲛⲉ ⲛⲟⲩⲇⲱⲣⲟⲛ ⲉϣⲱⲡⲉ ⲟⲩⲥⲁⲙⲓⲧ ⲡⲉ ⲁⲩⲱ ⲉϥⲉⲡⲉϩⲧⲛⲉϩ ⲉϩⲣⲁⲓ ⲉϫⲱϥ ⲁⲩⲱ ⲛϥⲕⲱ ϩⲓϫⲱϥ ⲛⲟⲩⲗⲓⲃⲁⲛⲟⲥ ⲟⲩⲑⲩⲥⲓⲁ ⲅⲁⲣ ⲡⲉ

2 ⲁⲩⲱ ⲉϥⲉⲛⲧϥ ⲉⲣⲁⲧⲟⲩ ⲛⲛϣⲏⲣⲉ ⲛⲁⲁⲣⲱⲛ ⲛⲟⲩⲏⲏⲃ ⲁⲩⲱ ⲉϥⲉⲙⲉϩⲧⲟⲟⲧϥ ⲛϭⲓⲡⲟⲩⲏⲏⲃ ⲉⲃⲟⲗ ϩⲙⲡⲥⲁⲙⲓⲧ ⲙⲡⲛⲉϩ ⲙⲛⲡⲗⲓⲃⲁⲛⲟⲥ ⲧⲏⲣϥ ⲛⲧⲉⲡⲟⲩⲏⲏⲃ ⲧⲁⲗⲟ ⲙⲡⲣⲡⲙⲉⲉⲩⲉ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲉⲩⲑⲩⲥⲓⲁ ⲛⲥϯⲛⲟⲩϥⲉ ⲙⲙⲁϩ ⲙⲡϫⲟⲉⲓⲥ

3 ⲡⲕⲉⲥⲉⲉⲡⲉ ⲇⲉ ⲉⲃⲟⲗ ϩⲛⲧⲉⲑⲩⲥⲓⲁ ⲉϥⲉϣⲱⲡⲉ ⲛⲁⲁⲣⲱⲛ ⲙⲛⲛⲉϥϣⲏⲣⲉ ⲛⲉⲧⲟⲩⲁⲁⲃ ⲛⲛⲉⲧⲟⲩⲁⲁⲃ ⲉⲃⲟⲗ ϩⲛⲛⲉⲑⲩⲥⲓⲁ ⲙⲡϫⲟⲉⲓⲥ

4 ⲉϥϣⲁⲛⲉⲓⲛⲉ ⲇⲉ ⲛⲟⲩⲇⲱⲣⲟⲛ ⲙⲡϫⲟⲉⲓⲥ ⲟⲩⲑⲩⲥⲓⲁ ⲉⲥⲟⲩⲟϣⲙ ϩⲛⲟⲩⲗⲓⲃⲁⲛⲟⲥ ⲉϥⲉⲉⲓⲛⲉ ⲛϩⲉⲛⲟⲉⲓⲕ ⲛⲁⲑⲁⲃ ⲉⲃⲟⲗ ϩⲛⲟⲩⲥⲁⲙⲓⲧ ⲉϥⲟⲩⲟϣⲙ ϩⲓⲛⲉϩ ⲁⲩⲱ ϩⲉⲛⲗⲁⲅⲁⲛⲟⲛ ⲛⲁⲑⲁⲃ ⲉⲩⲧⲁϩⲥ ⲉⲛⲉϩ

5 ⲉϣⲱⲡⲉ ⲇⲉ ⲧⲉⲑⲩⲥⲓⲁ ⲟⲩⲉⲃⲟⲗ ⲧⲉ ϩⲛⲟⲩⲧⲱϣ ⲛⲗⲁⲕⲛⲧ ⲉϥⲉϣⲱⲡⲉ ⲡⲉ ⲉⲩⲥⲁⲙⲓⲧ ⲡⲉ ⲉϥⲟⲩⲟϣⲙ ϩⲓⲛⲉϩ ⲛⲥⲉϣⲱⲡⲉ ⲉⲩⲟ ⲛⲁⲑⲁⲃ

6 ⲁⲩⲱ ⲉⲕⲉⲡⲟϣⲟⲩ ⲛⲅⲁⲁⲩ ⲛⲗⲁⲕⲙ ⲗⲁⲕⲙ ⲛⲅⲡⲉϩⲧⲛⲉϩ ⲉϩⲣⲁⲓ ⲉϫⲱⲟⲩ ⲟⲩⲑⲩⲥⲓⲁ ⲧⲉ ⲙⲡϫⲟⲉⲓⲥ

7 ⲉϣⲱⲡⲉ ⲇⲉ ⲡⲉⲕⲇⲱⲣⲟⲛ ⲟⲩⲉⲃⲟⲗ ⲡⲉ ϩⲛⲟⲩⲉⲥⲭⲁⲣⲁ ⲉⲩⲉⲧⲁⲙⲓⲟϥ ⲛⲟⲩⲥⲁⲙⲓⲧ ϩⲓⲛⲉϩ

8 ⲁⲩⲱ ⲉϥⲉⲉⲓⲛⲉ ⲛⲧⲉϥⲑⲩⲥⲓⲁ ⲉⲧϥⲛⲁⲧⲁⲙⲓⲟⲥ ϩⲛⲛⲁⲓ ⲙⲡϫⲟⲉⲓⲥ ⲁⲩⲱ ⲉϥⲉⲉⲓⲛⲉ ⲙⲙⲟⲥ ⲉⲣⲁⲧϥ ⲙⲡⲟⲩⲏⲏⲃ ⲁⲩⲱ ⲉϥⲉϩⲛⲧϥ ⲉϩⲟⲩⲛ ⲉⲡⲉⲑⲩⲥⲓⲁⲥⲧⲏⲣⲓⲟⲛ

9 ⲛⲧⲉⲡⲟⲩⲏⲏⲃ ϥⲓ ⲉⲃⲟⲗ ϩⲛⲧⲉⲑⲩⲥⲓⲁ ⲙⲡⲉⲥⲣⲡⲙⲉⲉⲩⲉ ⲛⲧⲉⲡⲟⲩⲏⲏⲃ ⲧⲁⲗⲟϥ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲟⲩⲑⲩⲥⲓⲁ ⲧⲉ ⲛⲥϯⲛⲟⲩϥⲉ ⲙⲙⲁϩ ⲙⲡϫⲟⲉⲓⲥ

10 ⲡⲉⲧⲛⲁⲥⲉⲉⲡⲉ ⲇⲉ ⲉⲃⲟⲗ ϩⲛⲧⲉⲑⲩⲥⲓⲁ ⲉϥⲉϣⲱⲡⲉ ⲛⲁⲁⲣⲱⲛ ⲙⲛⲛⲉϥϣⲏⲣⲉ ⲛⲉⲧⲟⲩⲁⲁⲃ ⲛⲧⲉⲛⲉⲧⲟⲩⲁⲁⲃ ⲉⲃⲟⲗ ϩⲛⲛⲕⲁⲣⲡⲱⲙⲁ ⲙⲡϫⲟⲉⲓⲥ

11 ⲑⲩⲥⲓⲁ ⲛⲓⲙ ⲉⲧⲉⲧⲛⲁⲛⲧⲟⲩ ⲉϩⲣⲁⲓ ⲉⲧⲁⲗⲟⲟⲩ ⲉϩⲣⲁⲓ ⲙⲡϫⲟⲉⲓⲥ ⲛⲛⲉⲧⲛⲧⲁⲙⲓⲟⲟⲩ ϩⲓⲑⲁⲃ ⲑⲁⲃ ⲅⲁⲣ ⲛⲓⲙ ϩⲓⲉⲃⲓⲱ ⲛⲓⲙ ⲛⲛⲉⲧⲛⲡⲓⲥⲉ ⲉⲃⲟⲗ ⲛϩⲏⲧϥ ⲉⲧⲁⲗⲟ ⲉϩⲣⲁⲓ ⲙⲙⲁϩ ⲙⲡϫⲟⲉⲓⲥ

12 ⲟⲩⲇⲱⲣⲟⲛ ⲛⲁⲡⲁⲣⲭⲏ ⲉⲧⲉⲧⲛⲉⲛⲧⲟⲩ ⲙⲡϫⲟⲉⲓⲥ ⲛⲛⲉⲩⲧⲁⲗⲟⲟⲩ ⲇⲉ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲉⲩⲥϯⲛⲟⲩϥⲉ ⲙⲙⲁϩ ⲙⲡϫⲟⲉⲓⲥ

13 ⲁⲩⲱ ⲇⲱⲣⲟⲛ ⲛⲓⲙ ⲛⲧⲉⲧⲛⲑⲩⲥⲓⲁ ⲉⲧⲉⲧⲛⲉϫⲟⲕⲣⲟⲩ ⲛϩⲙⲟⲩ ⲛⲛⲉϥⲱϫⲛ ⲛϭⲓⲡⲉϩⲙⲟⲩ ⲛⲧⲇⲓⲁⲑⲏⲕⲏ ⲙⲡⲛⲟⲩⲧⲉ ⲉⲃⲟⲗ ϩⲛⲛⲉⲧⲛⲑⲩⲥⲓⲁ ⲇⲱⲣⲟⲛ ⲛⲓⲙ ⲛⲧⲉⲧⲏⲩⲧⲛ ⲉⲧⲉⲧⲛⲉϯϩⲙⲟⲩ ⲉⲣⲟⲟⲩ

14 ⲉⲕϣⲁⲛⲉⲓⲛⲉ ⲇⲉ ⲛⲟⲩⲑⲩⲥⲓⲁ ϩⲛⲛⲉⲕⲣⲱⲧ ⲛϣⲟⲣⲡ ⲙⲡϫⲟⲉⲓⲥ ⲉⲕⲉⲉⲓⲛⲉ ⲛⲛⲉⲕϭⲣⲱⲱϭ ⲛϣⲟⲣⲡ ⲉⲁⲩⲥⲉⲕⲁⲩⲁⲛ ⲁⲩⲱ ⲁⲩⲡⲱϩ ⲉⲩⲟⲩⲟϫ ⲙⲡϫⲟⲉⲓⲥ ⲁⲩⲱ ⲉⲕⲉϫⲓ ⲉϩⲣⲁⲓ ⲛⲧⲉⲑⲩⲥⲓⲁ ⲛⲛⲉⲕϭⲣⲱⲱϭ ⲛϣⲟⲣⲡ

15 ⲛⲅⲡⲱϩⲧ ⲉϩⲣⲁⲓ ⲉϫⲱⲥ ⲛⲟⲩⲛⲉϩ ⲛⲅⲕⲱ ⲛⲟⲩⲗⲓⲃⲁⲛⲟⲥ ϩⲓϫⲱⲥ ⲟⲩⲑⲩⲥⲓⲁ ⲅⲁⲣ ⲧⲉ

16 ⲁⲩⲱ ⲉⲣⲉⲡⲟⲩⲏⲏⲃ ⲧⲁⲗⲟ ⲉϩⲣⲁⲓ ⲙⲡⲉⲥⲣⲡⲙⲉⲉⲩⲉ ⲉⲃⲟⲗ ϩⲛⲛⲉⲛⲧⲁⲩⲡⲱϩ ⲙⲛⲡⲛⲉϩ ⲙⲛⲡⲉⲥⲗⲓⲃⲁⲛⲟⲥ ⲧⲏⲣϥ ⲟⲩⲕⲁⲣⲡⲱⲙⲁ ⲙⲡϫⲟⲉⲓⲥ ⲡⲉ