Leviticus 1 — Coptic (Sahidic)

1 ⲁⲩⲱ ⲁⲡϫⲟⲉⲓⲥ ⲙⲟⲩⲧⲉ ⲉⲙⲱⲩⲥⲏⲥ ⲁϥϣⲁϫⲉ ⲛⲙⲙⲁϥ ⲉⲃⲟⲗ ϩⲛⲧⲉⲥⲕⲏⲛⲏ ⲙⲡⲙⲁⲣⲧⲩⲣⲓⲟⲛ ⲉϥϫⲱ ⲙⲙⲟⲥ ϫⲉ

2 ϣⲁϫⲉ ⲙⲛⲛϣⲏⲣⲉ ⲙⲡⲓⲥⲣⲁⲏⲗ ⲛⲅϫⲟⲟⲥ ⲛⲁⲩ ϫⲉⲟⲩⲣⲱⲙⲉ ⲉⲃⲟⲗ ⲛϩⲏⲧⲧⲏⲩⲧⲛ ⲉϥϣⲁⲛⲉⲓⲛⲉ ⲛϩⲉⲛⲇⲱⲣⲟⲛ ⲉⲧⲁⲗⲟⲟⲩ ⲉϩⲣⲁⲓ ⲙⲡϫⲟⲉⲓⲥ ⲉⲃⲟⲗ ϩⲛⲛⲧⲃⲛⲟⲟⲩⲉ ⲉⲧⲉⲧⲛⲉⲓⲛⲉ ⲛⲛⲉⲧⲛⲇⲱⲣⲟⲛ ϩⲛⲛⲉⲧⲛⲉϩⲟⲟⲩ ⲁⲩⲱ ⲉⲃⲟⲗ ϩⲛⲛⲉⲧⲛⲉⲥⲟⲟⲩ

3 ⲉϣⲱⲡⲉ ⲉϥϣⲁⲛⲉⲓⲛⲉ ⲙⲡⲉϥⲇⲱⲣⲟⲛ ⲛϩⲟⲗⲟⲕⲁⲩⲧⲱⲙⲁ ⲉⲃⲟⲗ ϩⲛⲛⲉϩⲟⲟⲩ ⲉϥⲉⲛⲧϥ ⲉⲩϩⲟⲟⲩⲧ ⲡⲉ ⲉⲙⲛϫⲃⲓⲛ ⲛϩⲏⲧϥ ϩⲁⲧⲛⲛⲣⲟ ⲛⲧⲉⲥⲕⲏⲛⲏ ⲙⲡⲙⲁⲣⲧⲩⲣⲓⲟⲛ ⲛϥⲉⲓⲛⲉ ⲙⲡⲉⲧⲥⲟⲧⲡ ⲛⲁϩⲣⲁϥ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ

4 ⲁⲩⲱ ⲉϥⲉⲧⲁⲗⲉⲧⲟⲟⲧϥ ⲉϫⲛⲧⲁⲡⲉ ⲙⲡⲉϭⲗⲓⲗ ⲉϥⲛⲁⲧⲁⲗⲟϥ ⲉϩⲣⲁⲓ ⲛϥⲥⲟⲡⲥ ⲛⲧⲟⲟⲧϥ ⲉⲧⲣⲉⲩⲧⲱⲃϩ ⲉϫⲱϥ

5 ⲁⲩⲱ ⲉⲩⲉϣⲱⲱⲧ ⲙⲙⲟϥ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲛⲥⲉⲉⲓ ⲛϭⲓⲛϣⲏⲣⲉ ⲛⲁⲁⲣⲱⲛ ⲛⲟⲩⲏⲏⲃ ⲛⲥⲉⲡⲱϩⲧ ⲙⲡⲉϥⲥⲛⲟϥ ϩⲁⲧⲙ ⲡⲉⲑⲩⲥⲓⲁⲥⲧⲏⲣⲓⲟⲛ ⲡⲁⲓ ⲉⲧⲙⲡⲉⲙⲧⲟ ⲉⲃⲟⲗ ⲛⲧⲉⲥⲕⲏⲛⲏ ⲙⲡⲙⲁⲣⲧⲩⲣⲓⲟⲛ

7 ⲁⲩⲱ ⲛϣⲏⲣⲉ ⲛⲁⲁⲣⲱⲛ ⲉⲧⲉⲛⲟⲩⲏⲏⲃ ⲛⲉ ⲉⲩⲉⲧⲁⲗⲉⲕⲱϩⲧ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲁⲩⲱ ⲉⲩⲉϩⲉⲣϭϣⲉ ⲉϫⲙⲡⲕⲱϩⲧ

8 ⲁⲩⲱ ⲉⲣⲉⲛϣⲏⲣⲉ ⲛⲁⲁⲣⲱⲛ ⲛⲟⲩⲏⲏⲃ ⲧⲁⲗⲉⲙⲙⲉⲣⲟⲥ ⲉϫⲛⲧⲁⲡⲉ ⲁⲩⲱ ⲡⲱⲧ ⲉϫⲛⲛϣⲉ ⲉⲧϩⲓϫⲙⲡⲕⲱϩⲧ ⲙⲡⲉⲑⲩⲥⲓⲁⲥⲧⲏⲣⲓⲟⲛ

9 ⲛⲉⲧⲙⲡⲉϥϩⲟⲩⲛ ⲇⲉ ⲙⲛⲛⲉϥⲟⲩⲉⲣⲏⲧⲉ ⲉⲩⲉⲉⲓⲁⲁⲩ ⲉⲃⲟⲗ ϩⲛⲟⲩⲙⲟⲟⲩ ⲁⲩⲱ ⲉⲣⲉⲡⲟⲩⲏⲏⲃ ⲧⲁⲗⲟⲟⲩ ⲧⲏⲣⲟⲩ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲉⲩϩⲟⲗⲟⲕⲁⲩⲧⲱⲙⲁ ⲡⲉ ⲛⲑⲩⲥⲓⲁ ⲙⲙⲁϩ ⲙⲡϫⲟⲉⲓⲥ

10 ⲉϣⲱⲡⲉ ⲇⲉ ⲡⲉϥⲇⲱⲣⲟⲛ ⲉϥⲛⲁⲉⲓⲛⲉ ⲙⲙⲟϥ ⲉⲃⲟⲗ ϩⲛⲛⲉϥⲉⲥⲟⲟⲩ ⲙⲡϫⲟⲉⲓⲥ ⲉⲁⲁϥ ⲛϩⲟⲗⲟⲕⲁⲩⲧⲱⲙⲁ ⲉϥⲉⲉⲓⲛⲉ ⲙⲙⲟϥ ⲟⲩϩⲟⲟⲩⲧ ⲡⲉ ⲉⲙⲛϫⲃⲓⲛ ⲛϩⲏⲧϥ ⲉⲃⲟⲗ ϩⲛⲛⲉϩⲓⲉⲓⲃ ⲙⲛⲛⲃⲁⲁⲙⲡⲉ ⲁⲩⲱ ⲉϥⲉⲧⲁⲗⲉⲧⲟⲟⲧϥ ⲉϫⲛⲧⲉϥⲁⲡⲉ

11 ⲛⲥⲉϣⲱⲱⲧ ⲙⲙⲟϥ ⲛⲥⲁⲥⲡⲓⲣ ⲙⲡⲉⲑⲩⲥⲓⲁⲥⲧⲏⲣⲓⲟⲛ ⲉⲡⲥⲁ ⲛⲉⲙϩⲓⲧ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲛϣⲏⲣⲉ ⲛⲁⲁⲣⲱⲛ ⲛⲟⲩⲏⲏⲃ ⲉⲩⲉⲡⲱϩⲧ ⲙⲡⲉϥⲥⲛⲟϥ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲉϥⲕⲱⲧⲉ

12 ⲁⲩⲱ ⲉⲩⲉⲛⲁϩϥ ⲉⲃⲟⲗ ⲕⲁⲧⲁⲙⲉⲗⲟⲥ ⲛⲧⲉⲛⲟⲩⲏⲏⲃ ϥⲓ ⲛⲧⲁⲡⲉ ⲙⲛⲡⲱⲧ ⲛⲥⲉϩⲟⲣϫⲟⲩ ⲉϫⲛⲛϣⲉ ⲉⲧϩⲓϫⲙⲡⲕⲱϩⲧ ⲉⲧϩⲓϫⲙⲡⲉⲑⲩⲥⲓⲁⲥⲧⲏⲣⲓⲟⲛ

13 ⲁⲩⲱ ⲛⲉⲧⲙⲡⲉϥϩⲟⲩⲛ ⲙⲛⲛⲉϥⲟⲩⲉⲣⲏⲧⲉ ⲉⲩⲉⲉⲓⲁⲁⲩ ⲉⲃⲟⲗ ϩⲛⲟⲩⲙⲟⲟⲩ ⲁⲩⲱ ⲉⲣⲉⲡⲟⲩⲏⲏⲃ ϫⲓⲧⲟⲩ ⲧⲏⲣⲟⲩ ⲛϥⲧⲁⲗⲟⲟⲩ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲟⲩϩⲟⲗⲟⲕⲁⲩⲧⲱⲙⲁ ⲡⲉ ⲛⲑⲩⲥⲓⲁ ⲛⲥϯⲛⲟⲩϥⲉ ⲙⲙⲁϩ ⲙⲡϫⲟⲉⲓⲥ

14 ⲉⲕϣⲁⲛⲉⲓⲛⲉ ⲇⲉ ⲛⲟⲩⲇⲱⲣⲟⲛ ⲉⲃⲟⲗ ϩⲛⲛϩⲁⲗⲁⲧⲉ ⲉⲁⲁϥ ⲛϩⲟⲗⲟⲕⲁⲩⲧⲱⲙⲁ ⲙⲡϫⲟⲉⲓⲥ ⲉϥⲉϫⲓ ⲙⲡⲉϥⲇⲱⲣⲟⲛ ⲉⲃⲟⲗ ϩⲛⲛⲉϭⲣⲙⲡϣⲁⲛ ⲏ ⲉⲃⲟⲗ ϩⲛⲛⲉϭⲣⲟⲟⲙⲡⲉ

15 ⲁⲩⲱ ⲉⲣⲉⲡⲟⲩⲏⲏⲃ ⲉⲓⲛⲉ ⲙⲙⲟϥ ⲉⲡⲥⲁ ⲙⲡⲉⲑⲩⲥⲓⲁⲥⲧⲏⲣⲓⲟⲛ ⲛϥϭⲛϭⲛⲧⲉϥⲁⲡⲉ ⲛⲧⲉⲛⲟⲩⲏⲏⲃ ⲧⲁⲗⲟϥ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲁⲩⲱ ⲉϥⲉϫⲗϫⲗⲡⲉϥⲥⲛⲟϥ ⲉϫⲛⲧⲃⲁⲥⲓⲥ ⲙⲡⲉⲑⲩⲥⲓⲁⲥⲧⲏⲣⲓⲟⲛ

16 ⲁⲩⲱ ⲉϥⲉϥⲓ ⲙⲙⲁⲩ ⲙⲡⲉϥϣⲱⲡϣ ⲙⲛⲛⲉϥⲧⲛϩ ⲛϥⲛⲟϫⲟⲩ ϩⲁⲧⲙ ⲡⲉⲑⲩⲥⲓⲁⲥⲧⲏⲣⲓⲟⲛ ⲕⲁⲧⲁⲛⲣⲁϣⲁ ϩⲣⲁⲓ ⲉⲡⲙⲁ ⲙⲡⲕⲣⲙⲉⲥ

17 ⲁⲩⲱ ⲉϥⲉϩⲟⲣⲃϥ ⲉⲃⲟⲗ ϩⲛⲛⲉϥⲧⲛϩ ⲛϥⲧⲙⲡⲟϣϥ ⲛⲧⲉⲡⲟⲩⲏⲏⲃ ⲧⲁⲗⲟϥ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲉϫⲛⲛϣⲉ ⲉⲧϩⲓϫⲛⲧⲥⲁⲧⲉ ⲟⲩϩⲟⲗⲟⲕⲁⲩⲧⲱⲙⲁ ⲡⲉ ⲛⲑⲩⲥⲓⲁ ⲛⲥϯⲛⲟⲩϥⲉ ⲙⲙⲁϩ ⲙⲡϫⲟⲉⲓⲥ