Judith 8 — Coptic (Sahidic)

1 ⲁⲥⲥⲱⲧⲙ ⲇⲉ ϩⲛⲛⲉϩⲟⲟⲩ ⲉⲧⲙⲙⲁⲩ ⲛϭⲓⲓⲟⲩⲇⲓⲑ ⲧϣⲉⲉⲣⲉ ⲛⲙⲉⲣⲁⲣⲓ ⲡϣⲏⲣⲉ ⲛⲱⲝ ⲡϣⲏⲣⲉ ⲛⲓⲱⲥⲏⲫ ⲡϣⲏⲣⲉ ⲛⲟⲍⲉⲓⲏⲗ ⲡϣⲏⲣⲉ ⲛⲉⲗⲕⲓⲁ ⲡϣⲏⲣⲉ ⲛⲁⲛⲁⲛⲁⲓⲟⲩ ⲡϣⲏⲣⲉ ⲛⲅⲉⲇⲉⲱⲛ ⲡϣⲏⲣⲉ ⲛϩⲣⲁⲫⲁⲉⲓⲛ ⲡϣⲏⲣⲉ ⲛⲁⲭⲓⲧⲱⲃ ⲡϣⲏⲣⲉ ⲛϩⲏⲗⲓⲁⲥ ⲡϣⲏⲣⲉ ⲛⲭⲉⲗⲕⲓⲁⲥ ⲡϣⲏⲣⲉ ⲛⲉⲛⲁⲃ ⲡϣⲏⲣⲉ ⲛⲁⲑⲁⲛⲁⲏⲗ ⲡϣⲏⲣⲉ ⲛⲥⲁⲙⲁⲏⲗ ⲡϣⲏⲣⲉ ⲛⲥⲁⲣⲁⲥⲁⲇⲁⲓ ⲡϣⲏⲣⲉ ⲛⲓⲉⲥⲣⲁⲏⲗ

2 ⲁⲩⲱ ⲡⲉⲥϩⲁⲓ ⲡⲉ ⲙⲁⲛⲁⲥⲥⲏ ⲉⲃⲟⲗ ϩⲛⲧⲉⲥⲫⲩⲗⲏ ⲁⲩⲱ ⲧⲉⲥⲡⲁⲧⲣⲓⲁ ⲡⲁⲓ ⲉⲛⲧⲁϥⲙⲟⲩ ϩⲛⲛⲉϩⲟⲟⲩ ⲙⲡⲱϩⲥ ⲛⲉⲓⲱⲧ

3 ⲛⲛⲉϥⲁϩⲉ ⲅⲁⲣ ⲉⲣⲁⲧϥ ϩⲓϫⲛⲛⲉⲧⲙⲟⲩⲣ ⲛⲛⲉⲕⲛⲁⲁⲩ ϩⲛⲧⲥⲱϣⲉ ⲁⲩϣⲁⲣⲃⲁ ⲣⲉϩⲧⲧⲉϥⲁⲡⲉ ⲁϥⲛⲕⲟⲧⲕ ⲉϩⲣⲁⲓ ⲉϫⲙⲡⲉϥϭⲗⲟϭ ⲁϥⲙⲟⲩ ⲉϩⲣⲁⲓ ϩⲛⲃⲁⲓⲧⲩⲗⲟⲩⲁ ⲧⲉϥⲡⲟⲗⲓⲥ ⲁⲩⲧⲟⲙⲥϥ ⲙⲛⲛⲉϥⲉⲓⲟⲧⲉ ϩⲛⲧⲥⲱϣⲉ ⲉⲧϩⲛⲧⲙⲏⲧⲉ ⲛⲇⲱⲑⲁⲉⲓⲙ ⲙⲛⲃⲁⲗⲁⲙⲱⲛ

4 ⲁⲩⲱ ⲛⲉⲣⲉⲓⲟⲩⲇⲉⲓⲑ ϩⲙⲟⲟⲥ ϩⲙⲡⲉⲥⲏⲓ ⲉⲥⲟ ⲛⲭⲏⲣⲓⲁ ⲛϣⲟⲙⲧⲉ ⲛⲣⲟⲙⲡⲉ ⲙⲛϥⲧⲟⲟⲩ ⲛⲉⲃⲟⲧ

5 ⲉⲁⲥⲧⲁⲙⲓⲟ ⲛⲁⲥ ⲛⲟⲩϩⲃⲱ ϩⲓϫⲛⲧϫⲉⲛⲉⲡⲱⲣ ⲙⲡⲉⲥⲏⲓ ⲁⲩⲱ ⲁⲥⲕⲱ ⲛⲟⲩϭⲟⲟⲩⲛⲉ ϩⲓϫⲛⲧⲉⲥϯⲡⲉ ⲁⲩⲱ ⲛⲉⲣⲉⲛϩⲟⲉⲓⲧⲉ ⲛⲧⲉⲥⲙⲛⲧⲭⲏⲣⲁ ⲧⲟ ϩⲓⲱⲱⲥ

6 ⲛⲛⲉⲥⲛⲏⲥⲧⲉⲩⲉ ⲇⲉ ⲡⲉ ⲛⲛⲉϩⲟⲟⲩ ⲧⲏⲣⲟⲩ ⲛⲧⲉⲥⲙⲛⲧⲭⲏⲣⲁ ϣⲁⲧⲛ ⲛϩⲁⲧϩⲏ ⲛⲛⲥⲁⲃⲃⲁⲧⲟⲛ ⲁⲩⲱ ϩⲁⲧϩⲏ ⲛⲛⲥⲟⲩⲟⲩⲁ ⲙⲛⲛⲥⲟⲩⲟⲩⲁ ⲙⲛⲛϣⲁ ⲙⲛⲛⲉϩⲟⲟⲟⲩ ⲛⲟⲩⲛⲟϥ ⲙⲡⲏⲓ ⲙⲡⲓⲥⲣⲁⲏⲗ

7 ⲛⲛⲉⲛⲁⲛⲟⲩⲥ ⲇⲉ ⲡⲉ ϩⲙⲡⲉⲥϩⲟ ⲉⲙⲁⲧⲉ ⲁⲩⲱ ⲉⲛⲉⲛⲉⲥⲱⲥ ϩⲙⲡⲉⲥⲉⲓⲛⲉ ⲉⲙⲁⲧⲉ ⲁⲩⲱ ⲁⲙⲁⲛⲁⲥⲥⲏ ⲡⲉⲥϩⲁⲓ ϣⲱϫⲡ ⲛⲁⲥ ⲛⲟⲩⲛⲟⲩⲃ ⲙⲛⲟⲩϩⲁⲧ ⲁⲩⲱ ϩⲉⲛϩⲙϩⲁⲗ ⲛϩⲟⲟⲩⲧ ⲙⲛϩⲉⲛϩⲙϩⲁⲗ ⲛⲥϩⲓⲙⲉ ⲁⲩⲱ ϩⲉⲛⲧⲃⲛⲟⲟⲩⲉ ⲙⲛϩⲉⲛⲥⲱϣⲉ ⲁⲩⲱ ⲁⲥϭⲱ ⲉϩⲣⲁⲓ ⲉϫⲱⲟⲩ

8 ⲙⲡⲉⲗⲁⲁⲩ ⲧⲁⲩⲟ ⲉϩⲣⲁⲓ ⲉϫⲱⲥ ⲛⲟⲩϣⲁϫⲉ ⲙⲡⲟⲛⲏⲣⲟⲛ ⲉⲧⲉⲃⲉϫⲉ ⲛⲛⲉⲥⲣϩⲟⲧⲉ ϩⲏⲧϥ ⲙⲡⲛⲟⲩⲧⲉ ⲉⲙⲁⲧⲉ

9 ⲁⲩⲱ ⲁⲥⲥⲱⲧⲙ ⲉⲛϣⲁϫⲉ ⲉⲧϩⲟⲟⲩ ⲛⲧⲉⲡⲗⲁⲟⲥ ⲉⲛⲧⲁⲩϫⲟⲟⲩ ⲉϫⲙⲡⲁⲣⲭⲱⲛ ⲉⲧⲃⲉϫⲉⲁⲩⲣⲕⲟⲩⲓ ⲛϩⲏⲧ ϩⲙⲡⲧⲣⲉⲛⲉⲩⲙⲟⲟⲩ ⲥⲃⲏⲕ ⲁⲩⲱ ⲁⲥⲥⲱⲧⲙ ⲛϭⲓⲓⲟⲩⲇⲉⲓⲑ ⲉϣⲁϫⲉ ⲛⲓⲙ ⲉⲛⲧⲁϥϫⲟⲟⲩ ⲛⲁⲩ ⲛϭⲓⲟⲍⲉⲓⲁⲥ ⲛⲧϩⲉ ⲉⲛⲧⲁϥⲱⲣⲕ ⲛⲁⲩ ⲉϯ ⲛⲧⲡⲟⲗⲓⲥ ⲉϩⲣⲁⲓ ⲉⲧⲟⲟⲧⲟⲩ ⲛⲛⲁⲥⲥⲩⲣⲓⲟⲥ ⲙⲛⲛⲥⲁϯⲟⲩ ⲛϩⲟⲟⲩ

10 ⲁⲥϫⲟⲟⲩ ⲛⲧⲉⲥϩⲙϩⲁⲗ ⲧⲁⲓ ⲉⲧϩⲓϫⲛ ⲛⲉⲥϩⲩⲡⲁⲣⲭⲟⲛⲧⲁ ⲁⲥⲙⲟⲩⲧⲉ ⲉⲭⲁⲃⲣⲉⲓ ⲙⲛⲭⲁⲣⲙⲉⲓ ⲛⲉⲡⲣⲉⲥⲃⲩⲧⲉⲣⲟⲥ ⲛⲧⲉⲥⲡⲟⲗⲓⲥ

11 ⲁⲩⲉⲓ ϣⲁⲣⲟⲥ ⲡⲉϫⲁⲥ ⲛⲁⲩ ϫⲉⲥⲱⲧⲙ ⲉⲣⲟⲓ ⲛⲁⲣⲭⲱⲛ ⲛⲉⲧⲟⲩⲏϩ ϩⲛⲃⲁⲓⲧⲩⲗⲟⲩⲁ ⲉⲧⲃⲉϫⲉⲛϥⲥⲟⲩⲧⲱⲛ ⲁⲛ ⲛϭⲓⲡⲉⲧⲛϣⲁϫⲉ ⲉⲛⲧⲁⲧⲉⲧⲛⲧⲁⲩⲟϥ ⲙⲡⲉⲙⲧⲟ ⲉⲃⲟⲗ ⲙⲡⲗⲁⲟⲥ ϩⲙⲡϩⲟⲟⲩ ⲛϩⲟⲟⲩ ⲁⲩⲱ ⲁⲧⲉⲧⲛⲧⲁϩⲟ ⲉⲣⲁⲧϥ ⲙⲡⲁⲛⲁϣ ⲉⲛⲧⲁⲧⲉⲧⲛⲧⲁⲩⲟϥ ϩⲛⲧⲉⲧⲛⲙⲏⲧⲉ ⲙⲛⲡⲛⲟⲩⲧⲉ ⲁⲩⲱ ⲁⲧⲉⲧⲛϫⲟⲟⲥ ⲉϯ ⲛⲧⲡⲟⲗⲓⲥ ⲉϩⲣⲁⲓ ⲉⲧⲟⲟⲧⲟⲩ ⲛⲛⲉⲛϫⲓⲥⲉⲩ ⲉⲣϣⲁⲛⲧⲙⲡϫⲟⲉⲓⲥ ⲕⲱ ⲛⲟⲩⲃⲟⲏⲑⲓⲁ ⲛⲏⲧⲛ ϩⲣⲁⲓ ϩⲙⲡⲉⲓϩⲟⲟⲩ

12 ⲧⲉⲛⲟⲩ ϭⲉ ⲛⲧⲉⲧⲛⲛⲓⲙ ⲛⲧⲱⲧⲛ ⲉⲁⲧⲉⲧⲛⲡⲉⲓⲣⲁⲍⲉ ⲙⲡⲛⲟⲩⲧⲉ ϩⲙⲡϩⲟⲟⲩ ⲛϩⲟⲟⲩ ⲁⲩⲱ ⲁⲧⲉⲧⲛⲁϩⲉⲣⲁⲧⲧⲏⲩⲧⲛ ϩⲁⲡⲛⲟⲩⲧⲉ ⲛⲧⲙⲏⲧⲉ ⲛⲛϣⲏⲣⲉ ⲛⲛⲣⲱⲙⲉ

13 ⲉⲁⲧⲉⲧⲛϩⲟⲧϩⲧ ⲙⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲛⲧⲉⲧⲛⲁⲉⲓⲙⲉ ⲁⲛ ⲉⲗⲁⲁⲩ ϣⲁⲉⲛⲉϩ

14 ⲉⲧⲃⲉϫⲉⲡϣⲓⲕ ⲙⲡϩⲏⲧ ⲙⲡⲣⲱⲙⲉ ⲛⲧⲉⲧⲛⲁϩⲉ ⲉⲣⲟϥ ⲁⲛ ⲁⲩⲱ ⲛϣⲁϫⲉ ⲙⲡⲉϥϩⲏⲧ ⲛⲧⲉⲧⲛⲁⲧϫⲟⲟⲩ ⲁⲛ ⲁⲩⲱ ⲛⲁϣ ⲛϩⲉ ⲧⲉⲧⲛⲛⲁϣϩⲉⲧϩⲧⲡⲛⲟⲩⲧⲉ ⲡⲉⲛⲧⲁϥⲧⲁⲙⲓⲉⲛⲁⲓ ⲧⲏⲣⲟⲩ ⲁⲩⲱ ⲧⲉⲧⲛⲛⲁⲥⲟⲩⲛⲡⲉϥϩⲏⲧ ⲛⲧⲉⲧⲛⲉⲓⲙⲉ ⲉⲡⲉϥⲙⲟⲕⲙⲉⲕ ⲙⲡⲱⲣ ⲛⲁⲥⲛⲏⲩ ⲙⲡⲣϯⲛⲟⲩϭⲉ ⲙⲡϫⲟⲉⲓⲥ ⲡⲉⲛⲛⲟⲩⲧⲉ

15 ϫⲉⲉϥϣⲁⲛⲧⲙⲟⲩⲱϣ ⲉⲃⲟⲏⲑⲉⲓ ⲉⲣⲟⲛ ϩⲣⲁⲓ ϩⲙⲡϯⲟⲩ ⲛϩⲟⲟⲩ ⲛⲧⲟϥ ⲡⲉⲧⲉⲛⲟⲩⲧϥⲧⲉⲝⲟⲩⲥⲓⲁ ⲙⲙⲁⲩ ⲉⲃⲟⲏⲑⲉⲓ ⲉⲣⲟⲛ ϩⲛⲛⲉϩⲟⲟⲩ ⲉⲧⲉϩⲛⲁϥ ⲏ ⲉϥⲟⲧⲛ ⲉⲃⲟⲗ ⲙⲡⲉⲙⲧⲟ ⲉⲃⲟⲗ ⲛⲛⲉⲛϫⲓⲥⲉⲉⲩ

16 ⲛⲧⲱⲧⲛ ⲇⲉ ⲙⲡⲣⲥⲱϣⲧ ⲛⲛϣⲟϫⲛⲉ ⲙⲡϫⲟⲉⲓⲥ ⲡⲉⲛⲛⲟⲩⲧⲉ ϫⲉⲙⲉⲣⲉⲡⲛⲟⲩⲧⲉ ⲟ ⲛⲧϩⲉ ⲁⲛ ⲛⲟⲩⲣⲱⲙⲉ ⲉⲧⲣⲉⲩϭⲱⲛⲧ ⲉⲣⲟϥ ⲟⲩⲇⲉ ⲛⲧϩⲉ ⲁⲛ ⲛⲟⲩϣⲏⲣⲉ ⲛⲣⲱⲙⲉ ⲉⲧⲣⲉⲩϯϩⲁⲡ ⲉⲣⲟϥ

17 ⲉⲧⲃⲉϫⲉⲧⲛⲁⲉⲡⲓⲕⲁⲗⲉⲓ ⲙⲙⲟϥ ⲉⲩⲃⲟⲏⲑⲓⲁ ⲛⲁⲛ ⲉⲛϭⲉⲉⲧ ⲉⲡⲟⲩϫⲁⲓ ⲡⲉⲃⲟⲗϩⲓⲧⲟⲟⲧϥ ⲁⲩⲱ ϥⲛⲁⲥⲱⲧⲙ ⲡⲉ ⲉⲡⲉⲛϩⲣⲟⲟⲩ ⲉϣⲱⲡⲉ ⲉϩⲛⲁϥ

18 ⲉⲧⲃⲉϫⲉⲙⲡⲉⲟⲩⲟⲛ ⲧⲱⲟⲩⲛ ϩⲛⲧⲉⲛⲅⲉⲛⲉⲁ ⲟⲩⲇⲉ ⲛⲥⲉϣⲟⲟⲡ ⲁⲛ ϩⲙⲡϩⲟⲟⲩ ⲛϩⲟⲟⲩ ⲛϭⲓⲟⲩⲫⲩⲗⲏ ⲟⲩⲇⲉ ⲟⲩⲡⲁⲧⲣⲓⲁ ⲟⲩⲇⲉ ⲟⲩⲇⲏⲙⲟⲥ ⲟⲩⲇⲉ ⲟⲩⲡⲟⲗⲓⲥ ⲉⲃⲟⲗ ⲛϩⲏⲧⲛ ⲛⲁⲓ ⲉⲧϣⲙϣⲉ ⲛϩⲉⲛⲛⲟⲩⲧⲉ ⲛⲧⲁⲙⲓⲟ ⲛϭⲓϫ ⲕⲁⲧⲁⲧϩⲉ ⲉⲛⲧⲁⲥϣⲱⲡⲉ ϩⲛⲛⲉϩⲟⲟⲩ ⲛϣⲟⲣⲡ

19 ⲉⲧⲃⲉⲡⲁⲓ ⲁⲩϯ ⲛⲛⲉⲛⲉⲓⲟⲧⲉ ⲉϩⲣⲁⲓ ⲉⲧⲟⲟⲧⲥ ⲛⲧⲥⲏϥⲉ ⲁⲩⲱ ⲉⲩⲧⲱⲣⲡ ⲁⲩⲱ ⲁⲩϩⲉ ϩⲛⲟⲩⲛⲟϭ ⲛϩⲧⲟⲡ ⲙⲡⲉⲙⲧⲟ ⲉⲃⲟⲗ ⲛⲛⲉⲩϫⲓϫⲉⲉⲩⲉ

20 ⲁⲛⲟⲛ ⲇⲉ ⲙⲡⲛⲥⲟⲩⲛⲕⲉⲛⲟⲩⲧⲉ ⲛⲃⲗⲗⲁϥ ⲉⲧⲃⲉⲡⲁⲓ ⲧⲛϩⲉⲗⲡⲓⲍⲉ ϫⲉⲛϥⲛⲁⲟⲃϣϥ ⲁⲛ ⲉⲣⲟⲛ ⲟⲩⲇⲉ ⲉⲡⲉⲛⲅⲉⲛⲟⲥ

21 ⲉⲧⲃⲉϫⲉⲉⲩϣⲁⲛϫⲓⲧⲛ ⲡⲉ ϩⲓⲛⲁⲓ ⲥⲉⲛⲁⲡⲱⲣⲕ ⲡⲉ ⲛⲧⲓⲟⲩⲇⲁⲓⲁ ⲧⲏⲣⲥ ⲁⲩⲱ ⲥⲉⲛⲁϣⲱⲗ ⲡⲉ ⲙⲡⲉⲛⲙⲁ ⲉⲧⲟⲩⲁⲁⲃ ⲛϥϣⲓⲛⲉ ⲛⲥⲁⲡⲉⲩϫⲱϩⲙ ⲉⲃⲟⲗ ϩⲙⲡⲉⲛⲥⲛⲟϥ

22 ⲁⲩⲱ ⲡϩⲱⲃⲧ ⲛⲛⲉⲛⲥⲛⲏⲩ ⲙⲛⲧⲁⲓⲭⲙⲁⲗⲱⲥⲓⲁ ⲙⲡⲕⲁϩ ⲙⲛⲡϣⲱϥ ⲛⲧⲉⲛⲕⲗⲏⲣⲟⲛⲟⲙⲓⲁ ϥⲛⲁⲕⲧⲟϥ ⲉϩⲣⲁⲓ ⲉϫⲛⲧⲉⲛⲁⲡⲉ ϩⲛⲛϩⲉⲑⲛⲟⲥ ⲉⲧⲛⲁⲣϩⲙϩⲁⲗ ϩⲣⲁⲓ ⲛϩⲏⲧⲟⲩ ⲁⲩⲱ ⲧⲛⲛⲁϣⲱⲡⲉ ⲉⲩϫⲣⲟⲡ ⲙⲛⲟⲩⲛⲟϭⲛⲉϭ ⲙⲡⲉⲙⲧⲟ ⲉⲃⲟⲗ ⲛⲛⲉⲧⲛⲁϫⲡⲟⲛ ⲛⲁⲩ

23 ϫⲉⲛⲧⲉⲛⲙⲛⲧϩⲙϩⲁⲗ ⲛⲁⲥⲟⲟⲩⲧⲛ ⲁⲛ ⲡⲉ ⲉⲩϩⲙⲟⲧ ⲁⲗⲗⲁ ⲡϫⲟⲉⲓⲥ ⲡⲉⲛⲛⲟⲩⲧⲉ ⲛⲁⲕⲁⲁⲥ ⲡⲉ ⲉⲩⲥⲱϣ

24 ⲧⲉⲛⲟⲩ ϭⲉ ⲛⲉⲥⲛⲏⲩ ⲙⲁⲣⲉⲛⲧⲁⲙⲉ ⲛⲉⲛⲥⲛⲏⲩ ⲉⲧⲃⲉϫⲉⲉⲣⲉⲧⲉⲩⲯⲩⲭⲏ ⲁϣⲉ ⲛϩⲏⲧⲛ ⲁⲩⲱ ⲙⲡⲉⲧⲟⲩⲁⲁⲃ ⲙⲛⲡⲏⲓ ⲙⲡⲉⲩⲑⲩⲥⲓⲁⲥⲧⲏⲣⲓⲟⲛ ⲉⲩⲧⲁϫⲣⲏⲩ ⲉϩⲣⲁⲓ ⲉϫⲱⲛ

25 ⲛⲃⲗⲗⲛⲁⲓ ⲧⲏⲣⲟⲩ ⲙⲁⲣⲉⲛϣⲡϩⲙⲟⲧ ⲛⲧⲛⲡϫⲟⲉⲓⲥ ⲡⲉⲛⲛⲟⲩⲧⲉ ⲡⲁⲓ ⲉⲧⲡⲉⲓⲣⲁⲍⲉ ⲙⲙⲟⲛ ⲕⲁⲧⲁⲛⲉⲛⲉⲓⲟⲧⲉ

26 ⲁⲣⲓⲡⲙⲉⲉⲩⲉ ⲛⲛⲉⲛⲧⲁϥⲁⲁⲩ ⲛⲁⲃⲣⲁϩⲁⲙ ⲁⲩⲱ ⲛⲉⲛⲧⲁϥⲡⲉⲓⲣⲁⲍⲉ ⲛⲓⲥⲁⲁⲕ ⲛϩⲏⲧⲟⲩ ⲙⲛⲛⲉⲛⲧⲁⲩϣⲱⲡⲉ ⲛⲓⲁⲕⲱⲃ ϩⲛⲧⲙⲉⲥⲟⲡⲟⲧⲁⲙⲓⲁ ⲛⲧⲥⲩⲣⲓⲁ ⲉϥⲙⲟⲟⲛⲉ ⲛⲛⲉⲥⲟⲟⲩ ⲛⲗⲁⲃⲁⲛ ⲡⲥⲟⲛ ⲛⲧⲉϥⲙⲁⲁⲩ

27 ϫⲉⲕⲁⲧⲁⲧϩⲉ ⲉⲛⲧⲁϥⲡⲉⲓⲣⲁⲍⲉ ⲛⲛⲏ ⲉⲩϩⲟⲧϩⲧ ⲙⲡⲉⲩϩⲏⲧ ⲁⲛⲟⲛ ϩⲱⲱⲛ ⲉϥϫⲓⲕⲃⲁ ⲙⲙⲟⲛ ⲁⲛ ⲁⲗⲗⲁ ⲉⲣⲉⲡϫⲟⲉⲓⲥ ⲙⲁⲍⲧⲓⲅⲟⲩ ⲛⲛⲉⲧϩⲏⲛ ⲉⲣⲟϥ ⲉⲩⲥⲃⲱ

28 ⲡⲉϫⲁϥ ⲇⲉ ⲛⲁⲥ ⲛϭⲓⲟⲍⲉⲓⲁⲥ ϫⲉⲛⲉⲛⲧⲁⲅⲓⲟⲛϫⲟⲟⲩ ⲧⲏⲣⲟⲩ ⲉⲛⲧⲁϫⲟⲟⲩ ϩⲛⲟⲩϩⲏⲧ ⲉⲛⲁⲛⲟⲩϥ ⲁⲩⲱ ⲙⲛⲡⲉⲧⲛⲁϯⲟⲩⲃⲉ ⲛⲟⲩϣⲁϫⲉ

29 ϫⲉⲉⲣⲉⲧⲟⲩⲥⲟⲫⲓⲁ ⲟⲩⲏⲛϩ ⲉⲃⲟⲗ ⲁⲛ ϩⲙⲡϩⲟⲟⲩ ⲛϩⲟⲟⲩ ⲁⲗⲗⲁ ⲉϫⲓⲛ ⲛⲉϩⲟⲟⲩ ⲛϣⲟⲣⲡ ⲁϥⲉⲓⲙⲉ ⲛϭⲓⲡⲗⲁⲟⲥ ⲧⲏⲣϥ ⲉⲧⲟⲩⲙⲛⲧⲣⲙⲛϩⲏⲧ ⲕⲁⲧⲁⲧϩⲉ ϫⲉⲟⲩⲁⲅⲁⲑⲟⲛ ⲡⲉ ⲡⲉⲡⲗⲁⲥⲙⲁ ⲙⲡⲟⲩϩⲏⲧ

30 ⲁⲗⲗⲁ ⲁⲡⲗⲁⲟⲥ ⲉⲉⲓⲃ ⲉⲙⲁⲧⲉ ⲁⲩⲁⲛⲁⲅⲕⲁⲍⲉ ⲙⲙⲟⲛ ⲉⲉⲓⲣⲉ ⲕⲁⲧⲁⲧϩⲉ ⲉⲛⲧⲁⲛϣⲁϫⲉ ⲛⲙⲙⲁⲩ ⲁⲩⲱ ⲁⲩⲉⲓⲛⲉ ⲉϩⲣⲁⲓ ⲉϫⲱⲛ ⲛⲟⲩⲁⲛⲁϣ ⲡⲁⲓ ⲉⲧⲛⲁϣⲡⲁⲣⲁⲃⲁ ⲙⲙⲟϥ ⲁⲛ

31 ⲧⲉⲛⲟⲩ ϭⲉ ⲥⲟⲡⲥ ϩⲁⲣⲟⲛ ϫⲉⲛⲧⲉⲟⲩⲥϩⲓⲙⲉ ⲛⲣⲉϥϣⲙϣⲉⲛⲟⲩⲧⲉ ⲁⲩⲱ ⲡϫⲟⲉⲓⲥ ⲛⲁⲧⲛⲛⲟⲟⲩ ⲙⲡϩⲟⲩoⲙⲡⲉ ⲛϥⲧⲣⲉⲛⲉⲛϣⲏⲓ ⲙⲟⲩϩ ⲛⲧⲉⲧⲙⲱϫⲛ ϭⲉ

32 ⲡⲉϫⲁⲥ ⲇⲉ ⲛⲁⲩ ⲛϭⲓⲓⲟⲩⲇⲉⲓⲑ ϫⲉⲥⲱⲧⲙ ⲉⲣⲟⲓ ⲁⲩⲱ ϯⲛⲁⲉⲓⲣⲉ ⲛⲟⲩϩⲱⲃ ⲡⲁⲓ ⲉⲧⲛⲁⲣⲥⲟⲉⲓⲧ ⲉϩⲉⲛϫⲱⲙ ⲛⲛϣⲏⲣⲉ ⲙⲡⲉⲛⲅⲉⲛⲟⲥ

33 ⲛⲧⲉⲧⲛⲛⲁⲁϩⲉⲣⲁⲧⲧⲏⲩⲧⲛ ϩⲓϫⲛⲧⲡⲩⲗⲏ ⲛⲧⲉⲓⲟⲩϣⲏ ⲁⲩⲱ ⲁⲛⲟⲕ ϯⲛⲁⲃⲱⲕ ⲉⲃⲟⲗ ⲙⲛⲧⲁϩⲙϩⲁⲗ ⲁⲩⲱ ϩⲣⲁⲓ ϩⲛⲛⲉϩⲟⲟⲩ ⲛⲁⲓ ⲉⲛⲧⲁⲧⲉⲧⲛϫⲟⲟⲩ ϫⲉⲙⲛⲛⲥⲱⲟⲩ ⲧⲛⲛⲁϯ ⲛⲧⲡⲟⲗⲓⲥ ⲉϩⲣⲁⲓ ⲉⲧⲟⲟⲧⲟⲩ ⲛⲛⲉⲛϫⲓϫⲉⲉⲩⲉ ⲡϫⲟⲉⲓⲥ ⲛⲁϭⲙⲡϣⲓⲛⲉ ⲙⲡⲓⲥⲣⲁⲏⲗ ϩⲣⲁⲓ ϩⲛⲧⲁϭⲓϫ

34 ⲛⲧⲱⲧⲛ ⲇⲉ ⲛⲛⲉⲧⲛϩⲟⲧϩⲧ ⲙⲡⲁϩⲱⲃ ⲛϯⲛⲁϫⲟⲟϥ ⲅⲁⲣ ⲁⲛ ⲉⲣⲱⲧⲛ ϣⲁⲛⲧⲓϫⲱⲕ ⲉⲃⲟⲗ ⲛⲛⲉⲧⲓⲛⲁⲁⲁⲩ

35 ⲡⲉϫⲁϥ ⲇⲉ ⲛⲁⲥ ⲛϭⲓⲟⲍⲉⲓⲁⲥ ⲙⲛⲛⲁⲣⲭⲱⲛ ϫⲉⲃⲁⲕ ϩⲛⲟⲩⲉⲓⲣⲏⲛⲏ ⲁⲩⲱ ⲡϫⲟⲉⲓⲥ ⲡⲉⲛⲛⲟⲩⲧⲉ ϩⲓϩⲏ ⲙⲙⲟⲉⲩϫⲓⲕⲃⲁ ⲛⲛⲉⲛϫⲁϫⲉ

36 ⲁⲩⲕⲧⲟⲟⲩ ⲇⲉ ⲉⲃⲟⲗ ϩⲛⲧⲉⲥⲕⲏⲛⲏ ⲁⲩⲃⲱⲕ ⲉⲃⲟⲗ ⲉⲛⲉⲩⲙⲁ ⲉⲧⲧⲏϣ ⲛⲁⲩ