1 ϫⲉⲉⲓⲥϩⲏⲏⲧⲉ ⲁⲛⲟⲕ ϩⲛⲛⲉϩⲟⲟⲩ ⲉⲧⲙⲙⲁⲩ ⲁⲩⲱ ϩⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲉⲓϣⲁⲛⲕⲧⲟ ⲛⲧⲁⲓⲭⲙⲁⲗⲱⲥⲓⲁ ⲛⲓⲟⲩⲇⲁ ⲙⲛⲧϩⲓⲉⲣⲟⲩⲥⲁⲗⲏⲙ
2 ϯⲛⲁⲥⲱⲟⲩϩ ⲉϩⲟⲩⲛ ⲛⲛϩⲉⲑⲛⲟⲥ ⲧⲏⲣⲟⲩ ⲛⲧⲁⲛⲧⲟⲩ ⲉϩⲣⲁⲓ ⲉⲡⲉⲓⲁ ⲛⲓⲱⲥⲁⲫⲁⲧ ⲛⲧⲁϫⲓ ϩⲁⲡ ⲛⲙⲙⲁⲩ ϩⲙⲡⲙⲁ ⲉⲧⲙⲙⲁⲩ ⲉⲧⲃⲉⲡⲁⲗⲁⲟⲥ ⲙⲛⲧⲁⲕⲗⲏⲣⲟⲛⲟⲙⲓⲁ ⲡⲓⲥⲣⲁⲏⲗ ⲛⲁⲓ ⲉⲛⲧⲁⲩϫⲟⲟⲣⲟⲩ ⲉⲃⲟⲗ ϩⲛⲛϩⲉⲑⲛⲟⲥ ⲁⲩⲱ ⲡⲁⲕⲁϩ ⲁⲩⲡⲟϣϥ ⲉϩⲣⲁⲩ
3 ⲁⲩⲛⲉϫⲕⲗⲏⲣⲟⲥ ⲉϫⲙⲡⲁⲗⲁⲟⲥ ⲁⲩⲱ ⲁⲩϯ ⲛⲛϣⲏⲣⲉ ϣⲏⲙ ⲉⲩⲡⲟⲣⲛⲉⲓⲁ ⲁⲩⲱ ⲛϣⲉⲉⲣⲉ ϣⲏⲙ ⲁⲩⲧⲁⲁⲩ ⲉⲃⲟⲗ ϩⲁⲟⲩⲏⲣⲡ ⲁⲩⲥⲟⲟϥ
4 ⲟⲩ ⲡⲉ ⲡⲉⲧⲛϩⲱⲃ ⲛⲧⲱⲧⲛ ⲛⲙⲙⲁⲓ ⲧⲩⲣⲟⲥ ⲙⲛⲥⲓⲇⲱⲛ ⲁⲩⲱ ⲧⲅⲁⲗⲓⲗⲁⲓⲁ ⲧⲏⲣⲥ ⲛⲛⲁⲗⲗⲟⲫⲩⲗⲟⲥ ⲙⲏ ⲛⲧⲱⲧⲛ ⲉⲧⲉⲧⲛⲁⲧⲱⲱⲃⲉ ⲛⲁⲓ ⲛⲟⲩⲧⲱⲱⲃⲉ ⲏ ⲛⲧⲱⲧⲛ ⲉⲧⲉⲧⲛⲛⲁⲙⲉⲉⲩⲉ ⲉⲩⲕⲁⲕⲓⲁ ⲉⲣⲟⲓ ϩⲛⲟⲩϭⲉⲡⲏ ⲉⲙⲛⲱⲥⲕ ϯⲛⲁϯ ⲙⲡⲉⲧⲛⲧⲱⲱⲃⲉ ⲉϫⲛⲛⲉⲧⲛⲁⲡⲏⲩⲉ
5 ⲉⲃⲟⲗ ϫⲉⲡⲁϩⲁⲧ ⲙⲛⲡⲁⲛⲟⲩⲃ ⲁⲧⲉⲧⲛϫⲓⲧⲟⲩ ⲁⲩⲱ ⲛⲁⲥⲱⲧⲡ ⲉⲧⲧⲙⲁⲉⲓⲏⲩ ⲁⲧⲉⲧⲛϫⲓⲧⲟⲩ ⲉϩⲟⲩⲛ ⲉⲛⲉⲧⲛⲣⲡⲏⲩⲉ
6 ⲁⲩⲱ ⲛϣⲏⲣⲉ ⲛⲓⲟⲩⲇⲁ ⲙⲛⲛϣⲏⲣⲉ ⲛⲧϩⲓⲉⲣⲟⲩⲥⲁⲗⲏⲙ ⲁⲧⲉⲧⲛⲧⲁⲁⲩ ⲉⲃⲟⲗ ⲛⲛϣⲏⲣⲉ ⲛⲛⲟⲩⲉⲉⲓⲉⲛⲓⲛ ϫⲉⲕⲁⲥ ⲉⲧⲉⲧⲛⲁⲛⲟϫⲟⲩ ⲉⲃⲟⲗ ϩⲛⲛⲉⲩⲧⲟϣ
7 ⲉⲓⲥ ϩⲏⲏⲧⲉ ⲁⲛⲟⲕ ϯⲛⲁⲧⲟⲩⲛⲟⲥⲟⲩ ⲉⲃⲟⲗ ϩⲙⲡⲙⲁ ⲉⲛⲧⲁⲧⲉⲧⲛⲧⲁⲁⲩ ⲉϩⲣⲁⲓ ⲉⲣⲟϥ ⲁⲩⲱ ϯⲛⲁϯ ⲙⲡⲉⲧⲛⲧⲱⲱⲃⲉ ⲉϫⲛⲛⲉⲧⲛⲁⲡⲏⲩⲉ
8 ⲁⲩⲱ ϯⲛⲁϯ ⲛⲛⲉⲧⲛϣⲏⲣⲉ ⲙⲛⲛⲉⲧⲛϣⲉⲉⲣⲉ ⲉϩⲣⲁⲓ ⲉⲧⲟⲟⲧⲟⲩ ⲛⲛϣⲏⲣⲉ ⲛⲓⲟⲩⲇⲁ ⲛⲥⲉⲧⲁⲁⲩ ⲉⲩⲁⲓⲙⲁⲗⲱⲥⲓⲁ ⲉⲩϩⲉⲑⲛⲟⲥ ⲉϥⲟⲩⲏϩ ⲉⲃⲟⲗ ϫⲉⲁⲡϫⲟⲉⲓⲥ ϣⲁϫⲉ
9 ⲧⲁϣⲉⲟⲉⲓϣ ⲛⲛⲁⲓ ϩⲛⲛϩⲉⲑⲛⲟⲥ ⲧⲃⲃⲟ ⲛⲟⲩⲡⲟⲗⲉⲙⲟⲥ ⲧⲟⲩⲛⲟⲥ ⲛⲛⲣⲉϥⲙⲓϣⲉ ϯⲡⲉⲧⲛⲟⲩⲟⲉⲓ ⲉϩⲟⲩⲛ ⲛⲧⲉⲧⲛⲃⲱⲕ ⲉϩⲣⲁⲓ ⲛⲣⲱⲙⲉ ⲧⲏⲣⲟⲩ ⲛⲣⲉϥⲙⲓϣⲉ
10 ⲟⲩⲱⲧϩ ⲛⲛⲉⲧⲛⲥⲓⲛⲉ ⲛⲥⲕⲁⲓ ⲉϩⲉⲛⲥⲏϥⲉ ⲁⲩⲱ ⲛⲉⲧⲛⲟϩⲥ ⲉϩⲉⲛⲙⲉⲣⲉϩ ⲡⲉⲧⲉⲙⲛϭⲟⲙ ⲙⲙⲟϥ ⲙⲁⲣⲉϥϫⲟⲟⲥ ϫⲉϯϭⲙϭⲟⲙ ⲁⲛⲟⲕ
11 ⲥⲉⲩϩⲧⲏⲩⲧⲛ ⲉϩⲟⲩⲛ ⲛⲧⲉⲧⲛⲃⲱⲕ ⲉϩⲟⲩⲛ ⲛϩⲉⲑⲛⲟⲥ ⲧⲏⲣⲟⲩ ⲉⲧ ϩⲓⲛⲉⲩⲉⲣⲏⲩ ⲛⲧⲉⲧⲛⲥⲉⲩϩⲧⲏⲩⲧⲛ ⲉⲡⲙⲁ ⲉⲧⲙⲙⲁⲩ ⲡⲣⲙⲣⲁϣ ⲙⲁⲣⲉϥϣⲱⲡⲉ ⲛⲣⲉϥⲙⲓϣⲉ
12 ⲙⲁⲣⲟⲩⲧⲱⲟⲩⲛ ⲛⲥⲉⲃⲱⲕ ⲉϩⲣⲁⲓ ⲛϭⲓⲛϩⲉⲑⲛⲟⲥ ⲧⲏⲣⲟⲩ ⲉⲧ ϩⲓⲛⲉⲩⲉⲣⲏⲩ ⲛⲧⲉⲧⲛⲥⲉⲩϩⲧⲏⲩⲧⲛ ⲉⲡⲙⲁ ⲉⲧⲙⲙⲁⲩ ⲡⲣⲙⲣⲁϣ ⲙⲁⲣⲉϥϣⲱⲡⲉ ⲛⲣⲉϥⲙⲓϣⲉ
13 ⲧⲛⲛⲟⲟⲩ ⲛⲛⲉⲧⲛⲟϩⲥ ϫⲉⲁⲡϫⲱⲱⲗⲉ ϩⲱⲛ ⲉϩⲟⲩⲛ ⲃⲱⲕ ⲉϩⲟⲩⲛ ⲛⲧⲉⲧⲛϩⲱⲙ ϫⲉⲁⲧⲉϩⲣⲱⲧ ⲙⲟⲩϩ ⲁⲩⲱ ⲛⲉⲓⲟⲙ ⲁⲩⲣ ϩⲟⲩⲉ ⲡⲱⲱⲛ ⲉⲃⲟⲗ ϫⲉⲁⲥⲁϣⲁⲓ ⲛϭⲓⲧⲉⲩⲕⲁⲕⲓⲁ
14 ϩⲉⲛⲣⲟⲟⲩ ⲁⲩⲱϣ ⲉⲃⲟⲗ ϩⲙⲡⲓⲁ ⲙⲡϩⲁⲡ ⲁⲩⲱ ϥϩⲏⲛ ⲉϩⲟⲩⲛ ⲛϭⲓⲡϩⲟⲟⲩ ⲙⲡϫⲟⲉⲓⲥ ϩⲙⲡⲓⲁ ⲙⲡϩⲁⲡ
15 ⲡⲣⲏ ⲙⲛⲡⲟⲟϩ ⲥⲛⲁⲣ ⲉⲃⲏ ⲁⲩⲱ ⲛⲥⲓⲟⲩ ⲛⲥⲉⲛⲁϯ ⲁⲛ ⲙⲡⲉⲩⲟⲩⲟⲉⲓⲛ
16 ⲡϫⲟⲉⲓⲥ ⲇⲉ ϥⲛⲁⲱϣ ⲉⲃⲟⲗ ϩⲛⲥⲓⲱⲛ ⲁⲩⲱ ϥⲛⲁϯ ⲙⲡⲉϥϩⲣⲟⲟⲩ ⲉⲃⲟⲗ ϩⲛⲧϩⲓⲉⲣⲟⲩⲥⲁⲗⲏⲙ ⲧⲡⲉ ⲙⲛⲡⲕⲁϩ ⲛⲁⲛⲟⲉⲓⲛ ⲡϫⲟⲉⲓⲥ ⲇⲉ ⲛⲁϯⲥⲟ ⲉⲡⲉϥⲗⲁⲟⲥ ⲁⲩⲱ ϥⲛⲁϯϭⲟⲙ ⲛⲛϣⲏⲣⲉ ⲙⲡⲓⲥⲣⲁⲏⲗ
17 ⲛⲧⲉⲧⲛⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ ⲡⲉⲧⲛⲛⲟⲩⲧⲉ ⲉⲓⲟⲩⲏϩ ϩⲛⲥⲓⲱⲛ ⲡⲁⲧⲟⲟⲩ ⲉⲧⲟⲩⲁⲁⲃ ⲁⲩⲱ ⲧϩⲓⲉⲣⲟⲩⲥⲁⲗⲏⲙ ⲛⲁϣⲱⲡⲉ ⲛⲟⲩⲡⲟⲗⲓⲥ ⲉⲥⲟⲩⲁⲁⲃ ⲛⲧⲉⲧⲙϣⲙⲙⲟ ϭⲉ ⲙⲟⲟϣⲉ ⲉϩⲣⲁⲓ ⲛϩⲏⲧⲥ
18 ⲁⲩⲱ ⲥⲛⲁϣⲱⲡⲉ ϩⲙⲡⲉϩⲟⲟⲩ ⲉⲧⲙⲙⲁⲩ ⲛⲧⲟⲩⲉⲓⲏ ⲛⲁϣⲟⲩⲟ ⲉⲃⲟⲗ ⲛⲟⲩⲗⲟϭ ⲁⲩⲱ ⲛⲃⲟⲩⲛⲟⲥ ⲥⲉⲛⲁϣⲟⲩⲉⲉⲣⲱⲧⲉ ⲉⲃⲟⲗ ⲁⲩⲱ ⲙⲙⲁ ⲛϯⲙⲟⲟⲩ ⲧⲏⲣⲟⲩ ⲛⲓⲟⲩⲇⲁ ⲥⲉⲛⲁⲧⲁⲩⲉⲛⲉⲩⲙⲟⲟⲩ ⲉⲃⲟⲗ ⲁⲩⲱ ⲟⲩⲛⲟⲩⲡⲏⲅⲏ ⲛⲁⲉⲓ ⲉⲃⲟⲗ ϩⲙⲡⲏⲓ ⲙⲡϫⲟⲉⲓⲥ ⲛⲥⲧⲟ ⲙⲡⲉⲭⲉⲓⲙⲁⲣⲣⲟⲥ ⲛⲛϣⲟⲛⲧⲉ
19 ⲕⲏⲙⲉ ⲛⲁϣⲱⲡⲉ ⲉⲩⲧⲁⲕⲟ ⲁⲩⲱ ⲧ ⲉⲩⲙⲁ ⲛϫⲁⲓⲉ ⲛⲧⲁⲕⲟ ⲉⲃⲟⲗ ⲙⲡϫⲓⲛϭⲟⲛⲥ ⲛⲛϣⲏⲣⲉ ⲛⲓⲟⲩⲇⲁ ⲉⲧⲃⲉϫⲉⲁⲩⲡⲉϩⲧⲟⲩⲥⲛⲟϥ ⲛⲇⲓⲕⲁⲓⲟⲓ ⲉⲃⲟⲗ ϩⲙⲡⲉⲩⲕⲁϩ
20 ⲧ ⲇⲉ ⲥⲛⲁϭⲱⲣϭ ϣⲁⲉⲛⲉϩ ⲁⲩⲱ ⲧϩⲓⲉⲣⲟⲩⲥⲁⲗⲏⲙ ⲉϩⲉⲛϫⲱⲙ ⲛϫⲱⲙ
21 ⲁⲩⲱ ϯⲛⲁⲉⲓⲣⲉ ⲙⲡⲉⲕⲃⲁ ⲙⲡⲉⲩⲥⲛⲟϥ ⲛⲧⲁⲧⲙⲕⲱ ⲉⲃⲟⲗ ⲁⲩⲱ ⲡϫⲟⲉⲓⲥ ϥⲛⲁⲟⲩⲱϩ ϩⲛⲥⲓⲱⲛ