Read Job 41 side by side with translations · The Final Bible
1 ⲙⲡⲕⲛⲁⲩ ⲉⲣⲟϥ ⲟⲩⲇⲉ ⲟⲛ ⲙⲡⲉⲕϣⲡⲏⲣⲉ ⲉϫⲛⲛⲉⲧⲟⲩϫⲱ ⲙⲙⲟⲟⲩ ⲟⲩⲇⲉ ⲛⲅⲣϩⲟⲧⲉ ⲁⲛ ϫⲉⲉϥⲥⲃⲧⲱⲧ ⲛⲁⲓ ⲛⲓⲙ ⲅⲁⲣ ⲡⲉⲛⲧⲁϥϯⲟⲩⲃⲏⲓ
2 ⲏ ⲛⲓⲙ ⲡⲉⲛⲧⲁϥⲁϩⲉⲣⲁⲧϥ ⲉⲣⲟⲓ ⲁϥⲩⲡⲟⲙⲓⲛⲉ ⲡⲕⲁϩ ⲧⲏⲣϥ ⲡⲱⲓ ⲡⲉ
4 ⲛⲓⲙ ⲡⲉⲧⲛⲁϭⲱⲗⲡ ⲉⲃⲟⲗ ⲙⲡϩⲟ ⲛⲧⲉϥϩⲃⲥⲱ ⲛⲓⲙ ⲇⲉ ⲡⲉⲛⲧⲁϥⲃⲱⲕ ⲉϩⲟⲩⲛ ⲉⲛⲕⲃⲃⲉ ⲙⲡⲉϥϩⲱⲕ
5 ⲛⲓⲙ ⲡⲉⲧⲛⲁⲟⲩⲱⲙ ⲉⲙⲡⲩⲗⲏ ⲙⲡⲉϥϩⲟ ⲟⲩϩⲟⲧⲉ ⲇⲉ ⲡⲉ ⲡⲉⲕⲉⲓⲱⲧⲉ ⲛⲛⲉϥⲟⲃϩⲉ
6 ϩⲉⲛⲥⲃϣⲉ ⲛϩⲟⲙⲛⲧ ⲛⲉ ⲛⲉⲧⲡⲉϥϩⲟⲩⲛ ⲉⲣⲉⲧⲉϥⲙⲣⲣⲉ ⲇⲉ ⲟ ⲛⲧϩⲉ ⲛⲟⲩⲱⲛⲉ ⲛⲥⲙⲏⲣⲓⲧⲏⲥ
7 ⲛⲛⲉⲟⲩⲡⲛⲉⲩⲙⲁ ⲇⲉ ⲥⲁⲁⲧϥ
9 ϣⲁⲣⲉⲟⲩⲟⲩⲟⲉⲓⲛ ⲇⲉ ϥⲱϭⲉ ϩⲙⲡⲉϥⲁⲛⲧⲁϣ ⲉⲣⲉⲛⲉϥⲃⲁⲗ ⲇⲉ ⲟ ⲛⲧϩⲉ ⲙⲡⲓⲛⲉ ⲙⲡⲥⲟⲩⲛⲧⲟⲟⲩⲉ
10 ϩⲉⲛⲗⲁⲙⲡⲁⲥ ⲉⲩϫⲉⲣⲟ ⲛⲉⲧⲛⲏⲩ ⲉⲃⲟⲗϩⲛ ⲣⲱϥ ⲁⲩⲱ ⲉⲩϩⲏⲩ ϩⲛϩⲉⲛⲉⲥⲭⲁⲣⲁ ⲛⲕⲱϩⲧ
11 ⲟⲩⲕⲁⲡⲛⲟⲥ ⲛϩⲣⲱ ⲉⲥⲙⲟⲩϩ ϩⲛϩⲉⲛϫⲃⲃⲉⲥ ⲛⲥⲁⲧⲉ ⲡⲉⲧⲛⲏⲩ ⲉⲃⲟⲗ ϩⲛⲛⲉϥϭⲃϣⲁ
12 ϩⲉⲛϫⲃⲃⲉⲥ ⲛⲉ ⲧⲉϥⲯⲩⲭⲏ ⲟⲩϣⲁϩ ⲇⲉ ⲡⲉⲧⲛⲏⲩ ⲉⲃⲟⲗ ϩⲛⲣⲱϥ
13 ⲉⲣⲉⲟⲩϭⲟⲙ ⲇⲉ ϣⲟⲟⲡ ϩⲙⲡⲉϥⲙⲁⲕϩ ⲉⲣⲉⲡⲧⲁⲕⲟ ⲡⲏⲧ ⲙⲡⲉϥⲙⲧⲟ ⲉⲃⲟⲗ
14 ⲉⲣⲉⲛⲥⲁⲣⲝ ⲙⲡⲉϥⲥⲱⲙⲁ ϫⲏⲥ
15 ⲁⲡⲉϥϩⲏⲧ ϫⲣⲟ ⲛⲧϩⲉ ⲛⲟⲩⲱⲛⲉ ⲁϥⲁϩⲉ ⲇⲉ ⲉⲣⲁⲧϥ ⲛⲧϩⲉ ⲛⲟⲩⲉⲙⲏϣ ⲉⲙⲉϥⲕⲓⲙ
16 ⲉϥϣⲁⲛⲕⲟⲧϥ ⲇⲉ ϣⲁⲣⲉⲟⲩϩⲟⲧⲉ ⲧⲁϩⲉ ⲛⲉⲑⲏⲣⲓⲟⲛ ⲙⲛⲛⲧⲃⲛⲟⲟⲩⲉ ⲉⲩϥⲱϭⲉ ϩⲓϫⲙⲡⲕⲁϩ
17 ⲉⲣϣⲁⲛϩⲉⲛⲗⲟⲅⲭⲏ ⲧⲱⲙⲛⲧ ⲉⲣⲟϥ ⲛⲛⲉⲩⲣⲗⲁⲁⲩ ⲛⲁϥ
18 ⲉⲣⲉⲡⲡⲉⲛⲓⲡⲉ ⲏⲡ ⲛⲧⲟⲟⲧϥ ⲛⲧϩⲉ ⲙⲡⲧⲱϩ ⲡϩⲟⲙⲛⲧ ⲇⲉ ⲛⲧϩⲉ ⲛⲟⲩϣⲉ ⲉϥⲟⲩⲟϣϥ
19 ⲛⲛⲉⲟⲩⲥⲟⲧⲉ ⲙⲡⲉⲛⲓⲡⲉ ϫⲟⲧϥ ⲉⲣⲉⲛⲃⲁⲕⲱⲛⲉ ⲏⲡ ⲛⲧⲟⲟⲧϥ ⲛⲧϩⲉ ⲛⲟⲩⲭⲟⲣⲧⲟⲥ
20 ϣⲁϥⲥⲱⲃⲉ ⲇⲉ ⲛⲥⲁⲟⲩⲕⲙⲧⲟ ⲛⲕⲱϩⲧ
21 ϩⲉⲛϩⲟⲃⲟⲗⲓⲥⲕⲟⲥ ⲉⲩⲧⲏⲙ ⲡⲉ ⲡⲉϥⲡⲣⲏϣ ⲉⲣⲉⲡⲛⲟⲩⲃ ⲧⲏⲣϥ ⲛⲧⲑⲁⲗⲁⲥⲥⲁ ϩⲁⲣⲟϥ ⲛⲧϩⲉ ⲛⲟⲩⲟⲙⲉ ⲉϥⲟϣ
22 ϣⲁϥⲧⲣⲉⲡⲛⲟⲩⲛ ⲃⲣⲃⲣ ⲛⲧϩⲉ ⲛⲟⲩⲭⲁⲗⲕⲓⲟⲛ ⲁϥⲉⲡⲑⲁⲗⲁⲥⲥⲁ ⲛⲧϩⲉ ⲛⲟⲩⲉⲓⲁⲗ
23 ⲁⲩⲱ ⲡϣⲓⲕ ⲙⲡⲛⲟⲩⲛ ⲛⲧϩⲉ ⲛⲟⲩⲁⲓⲭⲙⲁⲗⲱⲧⲟⲥ
24 ⲙⲛⲗⲁⲁⲩ ⲇⲉ ϩⲓϫⲙⲡⲕⲁϩ ⲉϥⲉⲓⲛⲉ ⲙⲙⲟϥ ⲉϥⲧⲁⲙⲓⲏⲩ ⲉⲥⲱⲃⲉ ⲙⲙⲟϥ ⲉⲃⲟⲗ ϩⲓⲧⲛⲛⲉϥⲁⲅⲅⲉⲗⲟⲥ
25 ϥⲛⲁⲩ ⲇⲉ ⲉⲛⲉⲧϫⲟⲥⲉ ⲧⲏⲣⲟⲩ ⲛⲧⲟϥ ⲡⲉ ⲡⲣⲣⲟ ⲛⲛⲉⲧϩⲛ ⲙⲙⲟⲟⲩ
Job 40 · Job 42 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)