Job 33 — Coptic (Sahidic)

1 ⲙⲙⲟⲛ ⲇⲉ ⲁⲗⲗⲁ ⲥⲱⲧⲙ ⲉⲛⲁϣⲁϫⲉ ⲓⲱⲃ ϫⲓⲥⲙⲏ ⲉⲧⲁϭⲓⲛϣⲁϫⲉ

2 ⲉⲓⲥ ϩⲏⲏⲧⲉ ⲅⲁⲣ ⲁⲓⲟⲩⲏⲛ ⲛⲣⲱⲓ ⲁⲩⲱ ⲁⲡⲁⲗⲁⲥ ϣⲁϫⲉ

3 ⲡⲁϩⲏⲧ ⲟⲩⲁⲁⲃ ϩⲛϩⲉⲛϭⲓⲛϣⲁϫⲉ ⲉⲣⲉⲧⲙⲛⲧⲣⲙⲛϩⲏⲧ ⲛⲛⲁⲥⲡⲟⲧⲟⲩ ⲛⲁⲛⲟⲉⲓⲛ ⲛⲛⲉⲑⲃⲃⲓⲏⲩ

4 ⲟⲩⲡⲛⲉⲩⲙⲁ ⲉϥⲟⲩⲁⲁⲃ ⲡⲉⲛⲧⲁϥⲧⲁⲙⲓⲟⲓ ⲧⲉⲡⲛⲟⲏ ⲇⲉ ⲙⲡⲡⲁⲛⲧⲟⲕⲣⲁⲧⲱⲣ ⲧⲉⲧϯⲥⲃⲱ ⲛⲁⲓ

5 ⲉϣϫⲉ ⲟⲩⲛϣϭⲟⲙ ⲙⲙⲟⲕ ⲉⲟⲩⲱϣⲃⲧ ϩⲏⲡⲟⲙⲓⲛⲏ ⲛⲛⲁϩⲣⲁⲓ ⲁϩⲉⲣⲁⲧⲕ ⲟⲩⲃⲏⲓ ⲁⲩⲱ ⲁⲛⲟⲕ ⲟⲩⲃⲏⲕ

6 ⲛⲧⲁⲩⲧⲁⲙⲓⲟⲕ ⲅⲁⲣ ⲉⲃⲟⲗ ϩⲛⲟⲩⲟⲙⲉ ⲛⲟⲩⲱⲧ ⲛⲧⲁϩⲉ ϩⲱ ⲛⲧⲁⲩⲧⲁⲙⲓⲟⲛ ⲉⲃⲟⲗ ϩⲙⲡⲉⲓⲟⲙⲉ ⲛⲟⲩⲱⲧ

7 ⲛⲧⲁϩⲟⲧⲉ ⲅⲁⲣ ⲛⲁϣⲧⲣⲧⲱⲣⲕ ⲁⲛ ⲁⲩⲱ ⲛⲧⲁϭⲓϫ ⲛⲁϩⲣⲟϣ ⲁⲛ ⲉϫⲱⲕ

8 ⲁⲓⲥⲱⲧⲙ ⲉⲡⲉϩⲣⲟⲟⲩ ⲛⲛⲉⲕϣⲁϫⲉ

9 ⲁⲓϫⲟⲟⲥ ϫⲉϯⲟⲩⲁⲁⲃ ⲙⲡⲓⲣⲛⲟⲃⲉ ⲁⲩⲱ ⲁⲛⲅ ⲟⲩⲥⲱⲧⲡ ⲙⲡⲉⲓⲣⲁⲛⲟⲙⲓⲁ

10 ⲙⲡⲉϥϭⲛⲁⲣⲓⲕⲉ ⲇⲉ ⲉⲣⲟⲓ ⲁϥⲕⲁⲁⲧ ⲇⲉ ⲛⲧϩⲉ ⲙⲡⲉⲧϯⲟⲩⲃⲏⲃ

11 ⲁϥⲕⲁⲧⲁⲟⲩⲉⲣⲏⲧⲉ ⲇⲉ ϩⲙⲡϣⲉ ⲁϥϩⲁⲣⲉϩ ⲅⲁⲣ ⲉⲛⲁϩⲓⲟⲟⲩⲉ ⲧⲏⲣⲟⲩ

12 ⲛⲁϣ ⲅⲁⲣ ⲛϩⲉ ⲕϫⲱ ⲙⲙⲟⲥ ϫⲉⲁⲛⲅ ⲟⲩⲇⲓⲕⲁⲓⲟⲥ ⲙⲡⲉϥⲥⲱⲧⲙ ⲉⲣⲟⲓ ⲟⲩϣⲁⲉⲛⲉϩ ⲅⲁⲣ ⲡⲉ ⲡⲉⲧϩⲓϫⲛ ⲛⲣⲱⲙⲉ

13 ⲕϫⲱ ⲇⲉ ⲙⲙⲟⲥ ϫⲉⲉⲧⲃⲉⲟⲩ ⲙⲡⲉϥⲥⲱⲧⲙ ⲉⲡⲁϩⲁⲡ ϩⲛϣⲁϫⲉ ⲛⲓⲙ

14 ϩⲙⲡⲧⲣⲉⲡϫⲟⲉⲓⲥ ⲅⲁⲣ ϣⲁϫⲉ ⲛⲟⲩⲥⲟⲡ ⲙⲡⲙⲉϩⲥⲟⲡⲥⲛⲁⲩ

15 ⲟⲩⲣⲁⲥⲟⲩ ⲇⲉ ⲏ ⲟⲩⲙⲏⲗⲏⲧⲁ ⲛϭⲱⲣϩ ⲛⲧϩⲉ ⲉⲧⲉⲣⲉⲟⲩϩⲟⲧⲉ ⲉⲥⲛⲁϣⲧ ⲛⲁϩⲉ ⲉϩⲣⲁⲓ ⲉϫⲛⲣⲱⲙⲉ

16 ϩⲛⲟⲩⲉⲓⲛⲉ ⲛϩⲟⲧⲉ ⲁϥϣⲧⲣⲧⲱⲣⲟⲩ ⲛϯϩⲉ

17 ⲉⲕⲧⲉⲡⲣⲱⲙⲉ ⲉⲃⲟⲗ ϩⲙⲡⲉϥϫⲓⲛϭⲟⲛⲥ ⲁϥⲧⲟⲩϫⲟ ⲅⲁⲣ ⲙⲡⲉϥⲥⲱⲙⲁ ⲉⲩϩⲧⲟⲡ

18 ⲁϥϯⲥⲟ ⲇⲉ ⲉⲧⲉϥⲯⲩⲭⲏ ⲉⲡⲙⲟⲩ ⲉⲧⲙⲧⲣⲉϥϩⲉ ϩⲛⲟⲩⲡⲟⲗⲉⲙⲟⲥ

19 ⲡⲁⲗⲓⲛ ⲟⲛ ⲁϥϫⲡⲓⲟϥ ϩⲙⲡⲗⲟϫⲗϫ ⲙⲡϣⲱⲛⲉ ⲙⲡⲉϥⲙⲁⲛⲛⲕⲟⲧⲕ

20 ⲉⲙⲛϭⲟⲙ ⲙⲙⲟϥ ⲉⲟⲩⲉⲙϩⲣⲉ ⲛⲓⲙ

21 ϣⲁⲛⲧⲉⲛⲉϥⲥⲁⲣⲝ ⲗⲟⲃⲗⲉϥ ⲁϥⲟⲩⲉⲛϩⲛⲉϥⲕⲉⲉⲥ ⲉⲃⲟⲗ ⲉⲩϣⲟⲩⲉⲓⲧ

22 ⲁⲧⲉϥⲯⲩⲭⲏ ϩⲱⲛ ⲉϩⲟⲩⲛ ⲉⲡⲙⲟⲩ ⲁⲩⲱ ⲡⲉϥⲱⲛϩ ⲉⲁⲙⲛⲧⲉ

23 ⲉⲣϣⲁⲛⲟⲩϣⲟ ⲛⲁⲅⲅⲉⲗⲟⲥ ⲛⲣⲉϥⲙⲟⲟⲩⲧ ϣⲱⲡⲉ ⲛⲛⲉⲟⲩⲁ ⲙⲙⲟⲟⲩ ⲕⲟⲛⲥϥ ⲉϥϣⲁⲛⲛⲟⲉⲓ ⲇⲉ ϩⲙⲡⲉϥϩⲏⲧ ⲉⲕⲟⲧϥ ⲉⲡϫⲟⲉⲓⲥ ⲛϥϫⲱ ⲇⲉ ⲙⲡⲣⲱⲙⲉ ⲙⲡⲉϥⲁⲣⲓⲕⲉ ⲛϥⲟⲩⲱⲛϩ ⲉⲃⲟⲗ ⲛⲧⲉϥⲙⲛⲧⲁⲧϩⲏⲧ

24 ϥⲛⲁϣⲟⲡϥ ⲉⲣⲟϥ ⲉⲧⲙϩⲉ ⲉⲡⲙⲟⲩ ⲛϥⲣⲡⲉϥⲥⲱⲙⲁ ⲛⲃⲣⲣⲉ ⲛⲧϩⲉ ⲛⲟⲩϫⲟ ⲉⲥϫⲏϩ ϥⲛⲁⲙⲟⲩϩ ⲇⲉ ⲛⲛⲉϥⲕⲉⲉⲥ ⲛⲁⲗⲧⲕⲁⲥ .

25 ⲛϥⲧⲣⲉ ⲛⲉϥⲥⲁⲣⲝ ϭⲛⲟⲛ ⲛⲧϩⲉ ⲛⲛⲁⲛⲉⲓⲕⲟⲩⲓ ϥⲛⲁϫⲁⲕϥ ⲇⲉ ⲉⲃⲟⲗ ⲉϥⲧⲏⲕ ϩⲛⲛⲣⲱⲙⲉ

26 ⲉϥⲛⲁϣⲗⲏⲗ ⲇⲉ ⲉⲡϫⲟⲉⲓⲥ ϥⲛⲁϫⲓⲧϥ ⲛⲧⲟⲟⲧϥ ϥⲛⲁⲃⲱⲕ ⲇⲉ ⲉϩⲟⲩⲛ ϩⲛⲟⲩϩⲟ ⲉϥⲣⲟⲟⲩⲧ ⲙⲛⲟⲩⲥⲟⲗⲥⲗ ϥⲛⲁϯ ⲇⲉ ⲛⲧⲇⲓⲕⲁⲓⲟⲥⲩⲛⲏ ⲛⲛⲣⲱⲙⲉ

27 ⲧⲟⲧⲉ ⲡⲣⲱⲙⲉ ⲛⲁϭⲛⲁⲣⲓⲕⲉ ⲉⲣⲟϥ ⲟⲩⲁⲁϥ ⲉϥϫⲱ ⲙⲙⲟⲥ ϫⲉⲛⲧϩⲉ ⲛⲛⲉⲛⲧⲁⲓⲁⲁⲩ ⲁⲛ ⲛⲉ ⲛⲁⲓ ⲁⲩⲱ ⲙⲡⲉϥϩⲩⲧⲁⲍⲉ ⲙⲙⲟⲓ ⲙⲡⲙⲡϣⲁ ⲛⲛⲁⲛⲟⲃⲉ

30 ⲁⲗⲗⲁ ⲁϥⲧⲟⲩϫⲟ ⲧⲁⲯⲩⲭⲏ ⲉⲃⲟⲗ ϩⲙⲡⲙⲟⲩ ϫⲉⲕⲁⲥ ⲉⲣⲉⲡⲁⲱⲛϩ ⲥⲙⲟⲩ ⲉⲣⲟϥ ϩⲙⲡⲟⲩⲟⲉⲓⲛ

31 ϫⲓⲥⲙⲏ ⲓⲱⲃ ⲛⲅⲥⲱⲧⲙ ⲉⲣⲟⲓ