Read Job 29 side by side with translations · The Final Bible
1 ⲉⲧⲓ ⲇⲉ ⲁⲓⲱⲃ ⲟⲩⲁϩⲙⲉϥ ⲡⲉϫⲁϥ ϩⲙⲡⲉⲡⲣⲟϩⲟⲙⲓⲟⲛ
2 ϫⲉⲛⲓⲙ ⲡⲉⲧⲛⲁⲕⲁⲁⲧ ⲕⲁⲧⲁⲛⲉⲃⲁⲧⲉ ⲛϣⲟⲣⲡ ⲛⲛⲉϩⲟⲟⲩ ⲉⲣⲉⲡⲛⲟⲩⲧⲉ ϩⲁⲣⲉϩ ⲉⲣⲟⲓ
3 ⲉⲛⲉⲣⲉⲡⲉϥϩⲃⲥ ⲙⲟⲩϩ ϩⲁϫⲱⲓ
4 ⲛⲛⲉϩⲟⲟⲩ ⲉⲓⲙⲟⲟϣⲉ ϩⲙⲡⲉϥⲟⲩⲟⲉⲓⲛ ϩⲙⲡⲕⲁⲕⲉ ⲛⲛⲉϩⲟⲟⲩ ⲉⲓⲧⲙⲧⲙ ϩⲓⲛⲁϩⲓⲟⲟⲩⲉ ⲛⲛⲉϩⲟⲟⲩ ⲉⲣⲉⲡϫⲟⲉⲓⲥ ϭⲙⲡϣⲓⲛⲉ ⲙⲡⲁⲏⲓ
5 ⲛⲛⲉϩⲟⲟⲩ ⲉⲓⲟϣ ⲉⲙⲁⲧⲉ ⲉⲣⲉⲛⲁϣⲏⲣⲉ ⲙⲡⲁⲕⲱⲧⲉ
6 ⲛⲛⲉϩⲟⲟⲩ ⲉⲣⲉⲛⲁϩⲓⲟⲟⲩⲉ ϩⲁⲧⲉ ⲛⲥⲁⲓⲣⲉ ⲁⲩⲱ ⲉⲣⲉⲛⲁⲧⲟⲟⲩⲉ ⲥⲱⲕ ⲙⲡⲉⲣⲱⲧⲉ
7 ⲛⲛⲉϩⲟⲟⲩ ⲉϣⲁⲓⲉⲓ ⲉⲃⲟⲗ ⲉⲓϣⲟⲣⲡ ϩⲛⲧⲁⲡⲟⲗⲓⲥ ⲉⲛⲉⲩⲕⲱ ⲙⲡⲁⲧⲟϭⲥ ϩⲛⲛⲉⲡⲗⲁϯⲁ
8 ⲛⲧⲉⲛϩⲉⲣϣⲓⲣⲉ ⲛⲁⲩ ⲉⲣⲟⲓ ⲛⲥⲉϩⲟⲡⲟⲩ ⲛⲧⲉⲛϩⲗⲗⲟ ⲇⲉ ⲧⲏⲣⲟⲩ ⲁϩⲉⲣⲁⲧⲟⲩ
9 ⲛⲧⲉⲛϫⲱⲱⲣⲉ ⲕⲁⲣⲱⲟⲩ ⲉⲩϣⲁϫⲉ ⲛⲥⲉⲕⲁ ⲡⲉⲩⲧⲏⲏⲃⲉ ϩⲓⲣⲛ ⲣⲣⲱⲟⲩ
10 ⲛⲉⲧⲥⲱⲧⲙ ⲇⲉ ⲁⲩⲙⲁⲕⲁⲣⲓⲍⲉ ⲙⲙⲟⲓ
11 ⲉⲣϣⲁⲛⲟⲩⲃⲁⲗ ⲇⲉ ⲛⲁⲩ ⲉⲣⲟⲓ ϣⲁϥⲣⲁⲕⲧϥ ⲉⲃⲟⲗ
12 ⲁⲓⲧⲟⲩϫⲟ ⲅⲁⲣ ⲙⲡϩⲏⲕⲉ ⲉⲧϭⲓϫ ⲙⲡⲣⲉϥϫⲓϫ ⲛⲁϩ ⲁⲩⲱ ⲁⲓⲃⲟⲏⲑⲉⲓ ⲉⲡⲟⲣⲫⲁⲛⲟⲥ ⲉⲧⲉⲙⲛⲧϥⲃⲟⲏⲑⲟⲥ
13 ⲁⲧⲧⲁⲡⲣⲟ ⲛⲧⲉⲭⲏⲣⲁ ⲥⲙⲟⲩ ⲉⲣⲟⲓ
14 ⲁⲓϯ ⲇⲉ ϩⲓⲱⲱⲧ ⲛⲧⲇⲓⲕⲁⲓⲱⲥⲩⲛⲏ ⲁⲓϯ ⲡϩⲁⲡ ⲇⲉ ϩⲓⲱⲱⲧ ⲛⲧϩⲉ ⲛⲟⲩⲇⲓⲡⲗⲟⲉⲓⲥ
15 ⲛⲉⲓⲟ ⲛⲃⲁⲗ ⲛⲛⲃⲗⲗⲉ ⲟⲩⲣⲏⲧⲉ ⲛⲛϭⲁⲗⲉ
16 ⲁⲛⲟⲕ ⲡⲉ ⲛⲉⲓⲱⲧ ⲛⲛϭⲱⲃ ⲁⲓϩⲟⲧϩⲉⲧ ⲛⲥⲁⲡϩⲁⲡ ⲉⲛⲓⲥⲟⲟⲩⲛ ⲙⲙⲟϥ ⲁⲛ
17 ⲁⲓⲟⲩⲱϣⲃ ⲇⲉ ⲛⲛⲛⲁϫϩⲉ ⲛⲛⲣⲉϥϫⲓⲛϭⲟⲛⲥ ⲁⲓⲧⲱⲣⲡ ⲇⲉ ⲙⲡⲧⲱⲣⲡ ⲉⲃⲟⲗ ϩⲛⲛⲉⲩⲛⲁϫϩⲉ
18 ⲁⲓϫⲟⲟⲥ ⲇⲉ ϫⲉⲧⲁϭⲟⲧ ⲛⲁⲣϩⲉⲗⲗⲟ ϯⲛⲁⲣⲟⲩⲛⲟϭ ⲇⲉ ⲛⲟⲩⲟⲉⲓϣ ⲛⲧϩⲉ ⲛⲟⲩϣⲗϩⲛⲃⲛⲛⲉ
21 ⲁⲩⲥⲱⲧⲙ ⲉⲣⲟⲓ ⲁⲩϯϩⲧⲏⲩ ⲁⲩⲕⲁⲣⲱⲟⲩ ⲇⲉ ⲉϫⲙⲡⲁϣⲟϫⲛⲉ
22 ⲁⲩⲱ ⲙⲡⲟⲩⲟϩⲙⲟⲩ ⲉϫⲙⲡⲁϣⲁϫⲉ ϣⲁⲩⲣⲁϣⲉ ⲇⲉ ⲉⲓϣⲁⲛϣⲁϫⲉ ⲛⲙⲙⲁⲩ
23 ⲛⲧϩⲉ ⲛⲟⲩⲕⲁϩ ⲉϥⲟⲃⲉ ⲉϥϭⲱϣⲧ ⲉⲃⲟⲗ ϩⲏⲧϥ ⲙⲡϩⲱⲟⲩ ⲧⲁⲓ ⲧⲉ ⲧϩⲉ ⲛⲛⲁⲓ ϩⲏⲧϥ ⲙⲡⲁϣⲁϫⲉ
24 ⲉⲓϣⲁⲛⲥⲱⲃⲉ ⲛⲙⲙⲁⲩ ⲛⲛⲉⲩⲛϩⲟⲩⲧⲥ ⲁⲩⲱ ⲛⲛⲉϥϩⲉ ⲉⲃⲟⲗ ⲛϭⲓⲡⲟⲩⲟⲉⲓⲛ ⲙⲡⲁϩⲟ
25 ⲁⲓⲥⲱⲧⲡ ⲉⲧⲉⲩϩⲓⲏ ⲁⲩⲱ ⲁⲓϩⲙⲟⲟⲥ ⲉⲓⲟ ⲛⲁⲣⲭⲱⲛ ⲁⲩⲱ ⲉⲓⲟ ⲛⲧϩⲉ ⲛⲟⲩⲣⲣⲟ ϩⲛϩⲉⲛⲙⲟⲩⲉ ⲛⲁⲍⲱⲙⲉⲛⲟⲥ ⲛⲧϩⲉ ⲛϩⲟⲓⲛⲉ ⲉⲩⲣϩⲏⲃⲉ ⲉⲓⲉϯⲛⲟⲙⲧⲉ ⲛⲁⲩ
Job 28 · Job 30 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)