Read Job 27 side by side with translations · The Final Bible
1 ⲁⲓⲱⲃ ⲇⲉ ⲟⲛ ⲟⲩⲱϩ ⲉⲧⲟⲟⲧϥ ⲡⲉϫⲁϥ ϩⲙⲡⲉⲡⲣⲟϩⲟⲙⲓⲟⲛ
2 ϫⲉⲡϫⲟⲉⲓⲥ ⲟⲛϩ ⲡⲉⲛⲧⲁϥⲕⲣⲓⲛⲉ ⲙⲙⲟⲓ ϩⲓⲛⲁⲓ ⲁⲩⲱ ⲡⲡⲁⲛⲧⲟⲕⲣⲁⲧⲱⲣ ⲡⲉⲛⲧⲁϥⲛⲉϫⲟⲉⲓⲥ ⲧⲁⲯⲩⲭⲏ
3 ϫⲉⲉⲧⲓ ⲉⲣⲉⲡⲁⲛⲓⲃⲉ ⲛϩⲏⲧ ⲁⲩⲱ ⲉⲣⲉⲡⲉⲡⲛⲉⲩⲙⲁ ⲉⲧⲟⲩⲁⲁⲃ ϩⲛⲛⲁϭⲃϣⲁ
4 ⲛⲛⲉⲛⲁⲥⲡⲟⲧⲟⲩ ϫⲉⲛⲟⲃⲉ ⲟⲩⲇⲉ ⲛⲛⲉⲧⲁⲯⲩⲭⲏ ⲙⲉⲗⲉⲧⲁ ⲛϩⲉⲛϫⲓⲛϭⲟⲛⲥ
5 ⲛⲛⲉⲥϣⲱⲡⲉ ⲉⲧⲣⲁϫⲟⲟⲥ ϫⲉⲛⲧⲉⲧⲛϩⲉⲛⲇⲓⲕⲁⲓⲟⲥ ⲙⲡⲓⲙⲟⲩ ⲛⲛⲁϥⲓ ⲅⲁⲣ ⲛⲧⲁⲙⲛⲧⲃⲁⲗϩⲏⲧ
6 ⲉⲓⲕⲱ ⲇⲉ ⲛϩⲧⲏⲓ ⲉⲧⲇⲓⲕⲁⲓⲟⲥⲩⲛⲏ ⲛⲛⲁϩⲉ ⲉⲃⲟⲗ ϯⲥⲟⲟⲩⲛ ⲅⲁⲣ ⲁⲛ ⲙⲙⲟⲓ ⲉⲁⲓⲣϩⲱⲃ ⲉⲙⲉϣϣⲉ
7 ⲙⲙⲟⲛ ⲇⲉ ⲉⲣⲉⲛⲁϫⲁϫⲉ ⲣⲧϩⲉ ⲙⲡϣⲟⲣϣⲣ ⲛⲛⲁⲥⲉⲃⲏⲥ ⲁⲩⲱ ⲛⲉⲧⲧⲱⲟⲩⲛ ⲇⲉ ⲉϫⲱⲓ ⲛⲧϩⲉ ⲙⲡⲧⲁⲕⲟ ⲛⲙⲡⲁⲣⲁⲛⲟⲙⲟⲥ
8 ⲁϣ ⲅⲁⲣ ⲧⲉ ⲧⲧϩⲉⲗⲡⲓⲥ ⲙⲡⲁⲥⲉⲃⲏⲥ ϫⲉϥⲕⲱ ⲛϩⲧⲏϥ ⲉϥⲛⲁϩⲧⲉ ⲉⲡϫⲟⲉⲓⲥ ⲙⲏ ϥⲛⲁⲟⲩϫⲁⲓ
9 ⲏ ⲉϥⲛⲁⲥⲱⲧⲙ ⲉⲡⲉϥⲥⲟⲡⲥ ⲏ ⲉⲣϣⲁⲛⲟⲩⲁⲛⲁⲅⲉ ⲉⲓ ⲉϫⲱϥ
10 ⲙⲏ ⲟⲩⲛⲧⲉϥⲡⲁⲣⲣⲏⲥⲓⲁ ⲙⲙⲁⲩ ⲙⲡⲉϥⲙⲧⲟ ⲉⲃⲟⲗ ⲏ ⲉϥϣⲁⲛⲱϣ ⲉϩⲣⲁⲓ ⲟⲩⲃⲏϥ ϥⲛⲁⲥⲱⲧⲙ ⲉⲣⲟϥ
11 ⲁⲗⲗⲁ ⲉⲓⲥ ϩⲏⲏⲧⲉ ϯⲛⲁⲧⲁⲙⲱⲧⲛ ϫⲉⲟⲩ ⲡⲉⲧϩⲛⲧϭⲓϫ ⲙⲡϫⲟⲉⲓⲥ ⲁⲩⲱ ⲛϯϫⲓϭⲟⲗ ⲁⲛ ⲉⲛⲉⲧⲛⲧⲟⲟⲧϥ ⲙⲡⲡⲁⲛⲧⲟⲕⲣⲁⲧⲱⲣ
12 ⲉⲓⲥ ϩⲏⲏⲧⲉ ⲧⲏⲣⲧⲛ ⲧⲉⲧⲛⲥⲟⲟⲩⲛ ϫⲉϩⲉⲛⲡⲉⲧϣⲟⲩⲉⲓⲧ ⲛⲉⲧⲛⲏⲩ ⲉϫⲛⲛⲉⲧϣⲟⲩⲉⲓⲧ
13 ⲧⲁⲓ ⲧⲉ ⲧⲙⲉⲣⲓⲥ ⲙⲡⲣⲱⲙⲉ ⲛⲁⲥⲉⲃⲏⲥ ⲉⲃⲟⲗ ϩⲓⲧⲙⲡϫⲟⲉⲓⲥ ⲡⲉⲧϫⲡⲓⲟ ⲇⲉ ⲛⲛⲣⲉϥϫⲓⲛϫⲛⲁϩ ⲛⲏⲩ ⲉϩⲣⲁⲓ ⲉϫⲱⲟⲩ ⲛⲧⲛⲡⲡⲁⲛⲧⲟⲕⲣⲁⲧⲱⲣ
14 ⲉϣⲱⲡⲉ ⲉⲣϣⲁⲛⲛⲉϥϣⲏⲣⲉ ⲁϣⲁⲓ ⲉⲩⲛⲁϣⲱⲡⲉ ⲉⲡⲕⲟⲛⲥⲟⲩ ⲉϣⲱⲡⲉ ⲇⲉ ⲟⲛ ⲉⲩϣⲁⲛϭⲙϭⲟⲙ ⲉⲩⲛⲁⲧⲱⲃϩ
15 ⲛⲉⲧϣⲟⲟⲡ ⲇⲉ ⲛⲁϥ ⲛⲕⲟⲟⲩⲉ ⲛⲁⲙⲟⲩ ϩⲛⲟⲩⲙⲟⲩ ⲙⲛⲗⲁⲁⲩ ⲇⲉ ⲛⲁⲛⲛⲉⲩⲭⲏⲣⲁ
16 ⲉϣⲱⲡⲉ ⲉϥϣⲁⲛⲥⲉⲩϩϩⲁⲧ ⲉϩⲟⲩⲛ ⲛⲧϩⲉ ⲛⲟⲩⲕⲁϩ ⲁⲩⲱ ⲛϥⲥⲃⲧⲉⲛⲟⲩⲃ ⲛⲧϩⲉ ⲛⲟⲩⲟⲟⲙⲉ
17 ⲛⲁⲓ ⲅⲁⲣ ⲧⲏⲣⲟⲩ ⲛⲇⲓⲕⲁⲓⲟⲥ ⲛⲉⲧⲛⲁϫⲓⲧⲟⲩ ⲁⲩⲱ ⲛⲣⲙⲙⲙⲉ ⲛⲉⲧⲛⲁⲣϫⲟⲉⲓⲥ ⲉⲛⲉϥⲭⲣⲏⲙⲁ
18 ⲉⲣⲉⲡⲉϥⲏⲓ ⲇⲉ ⲛⲁⲣϫⲟⲟⲗⲥ ⲁⲩⲱ ⲛⲧϩⲉ ⲛⲟⲩϩⲁⲗⲗⲟⲩⲥ
19 ⲁⲡⲣⲙⲙⲁⲟ ⲛⲕⲟⲧⲕ ⲛϥⲛⲁⲟⲩⲟϩⲙⲉϥ ⲁⲛ
20 ⲁⲙⲙⲟⲕϩⲥ ⲧⲱⲙⲛⲧ ⲉⲣⲟϥ ⲛⲧϩⲉ ⲛⲟⲩⲙⲟⲟⲩ ⲁⲛϭⲟⲥⲙ ⲇⲉ ϥⲓⲧϥ ⲛⲧⲉⲩϣⲏ
Job 26 · Job 28 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)