Read Job 18 side by side with translations · The Final Bible
1 ⲁⲃⲁⲗⲗⲁⲗ ⲇⲉ ⲟⲩⲱϣⲃ ⲡⲥⲁⲩⲭⲓⲧⲏⲥ ⲡⲉϫⲁϥ ϫⲉϣⲁⲧⲛⲁⲩ ⲉⲛⲅⲛⲁⲕⲁⲣⲱⲕ ⲁⲛ
2 ϭⲱ ϫⲉⲛⲛⲁϣⲁϫⲉ ϩⲱⲱⲛ
3 ⲉⲧⲃⲉⲟⲩ ⲁⲛⲅⲁⲣⲱⲛ ⲙⲡⲉⲕⲙⲧⲟ ⲉⲃⲟⲗ ⲛⲧϩⲉ ⲛⲛⲉⲓⲧⲃⲛⲏ
4 ⲁⲩⲟⲣⲅⲏ ⲇⲉ ⲉⲓ ⲛⲁⲕ ⲉϣⲁⲣⲉⲟⲩ ⲅⲁⲣ ϣⲱⲡⲉ ⲙⲏ ⲉⲕϣⲁⲛⲙⲟⲩ ⲉⲣⲉⲡⲕⲁϩ ⲛⲁϣⲱϥ ⲏ ⲉⲩⲛⲁϣⲣϣⲣ ⲛⲧⲟⲟⲩ ϣⲁⲛⲉⲩⲥⲛⲧⲉ
5 ⲡⲟⲩⲟⲉⲓⲛ ⲇⲉ ⲛⲛⲁⲥⲉⲃⲏⲥ ⲛⲁϫⲉⲛⲁ ⲁⲩⲱ ⲡⲉⲩϣⲁϩ ⲛⲁⲱϣⲙ ⲁⲛ
6 ⲡⲉϥⲟⲩⲟⲉⲓⲛ ⲅⲁⲣ ⲛⲁⲣⲕⲁⲕⲉ ⲛⲁϥ ϩⲙⲡⲉϥⲙⲁⲛϣⲱⲡⲉ ⲁⲩⲱ ⲡⲉϥϩⲏⲃⲥ ⲛⲁϫⲉⲛⲁ ⲉⲣⲟϥ
7 ⲉⲣⲉⲛⲉⲗⲁⲭⲓⲥⲧⲟⲥ ϭⲱⲣϭ ⲉⲛⲉϥⲛⲕⲁ ⲛⲧⲉⲡⲉϥϣⲟϫⲛⲉ ⲡⲱϩⲥ
8 ⲧⲉϥⲟⲩⲉⲣⲏⲧⲉ ⲇⲉ ⲛⲏϫ ⲉⲩⲡⲁϣ ⲁⲩⲱ ⲉⲩⲉⲥⲏϩⲥⲱϩϥ ϩⲛⲟⲩϣⲛⲏ
9 ⲉⲣⲉϩⲉⲛϭⲟⲣϭⲥ ⲉⲓ ⲉϫⲱϥ
11 ⲙⲡⲉϥⲕⲱⲧⲉ ⲛⲧⲉϩⲉⲛϣⲥⲛϩⲏⲧ ⲧⲁⲕⲟϥ ⲉⲣⲉϩⲁϩ ⲇⲉ ⲕⲱⲧⲉ ⲉⲣⲁⲧϥ ϩⲛⲟⲩϩⲕⲟ ⲉϥϩⲉϫϩⲱϫ
12 ⲁⲩⲥⲟⲃⲧⲉ ⲛⲁϥ ⲛⲟⲩϩⲧⲟⲡ ⲛϣⲏⲣⲉ
13 ⲉⲩⲉⲟⲩⲱⲙ ⲛⲙⲙⲣⲣⲉ ⲛⲣⲁⲧϥ
14 ⲉⲣⲉⲡⲙⲟⲩ ⲇⲉ ⲟⲩⲉⲙⲡⲉϥⲥⲁ ⲉⲣⲉⲡⲟⲩϫⲁⲓ ⲇⲉ ⲗⲟ ϩⲙⲡⲉϥⲙⲁⲛϣⲱⲡⲉ ⲉⲣⲉⲟⲩⲁⲛⲁⲅⲕⲏ ⲇⲉ ⲧⲁϩⲟϥ ⲙⲛⲟⲩⲗⲁ ⲛⲣⲣⲟ
17 ⲉⲣⲉⲡⲉϥⲣⲡⲙⲉⲉⲩⲉ ⲧⲁⲕⲟ ⲉⲃⲟⲗ ϩⲙⲡⲕⲁϩ
18 ⲉⲩⲉⲛⲧϥ ⲉⲃⲟⲗ ϩⲙⲡⲟⲩⲟⲉⲓⲛ ⲉⲡⲕⲁⲕⲉ
19 ⲁⲩⲱ ⲛⲛⲉⲩⲥⲟⲩⲱⲛϥ ϩⲙⲡⲉϥⲗⲁⲟⲥ ⲟⲩⲇⲉ ⲛⲛⲉⲡⲉϥⲏⲓ ⲟⲩϫⲁⲓ ϩⲁⲧⲡⲉ ⲁⲗⲗⲁ ⲉⲣⲉϩⲉⲛⲕⲟⲟⲩⲉ ⲱⲛϩ ϩⲛⲛⲉϥⲛⲕⲁ
20 ⲁⲛϩⲁⲉⲉⲩⲉ ⲁϣⲁϩⲟⲙ ⲉϫⲱϥ ⲁⲛϣⲟⲣⲡ ⲇⲉ ⲣϣⲡⲏⲣⲉ
21 ⲛⲁⲓ ⲛⲉ ⲛⲏⲓ ⲛⲛⲣⲉϥϫⲓⲛϭⲟⲛⲥ ⲡⲁⲓ ⲇⲉ ⲡⲉ ⲡⲙⲁ ⲛⲛⲉⲧⲉ ⲛⲥⲉⲥⲟⲟⲩⲛ ⲁⲛ ⲙⲡϫⲟⲉⲓⲥ
Job 17 · Job 19 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)