Read Job 16 side by side with translations · The Final Bible
1 ⲁⲓⲱⲃ ⲇⲉ ⲟⲩⲱϣⲃ ⲉϥϫⲱ ⲙⲙⲟⲥ
2 ϫⲉⲁⲓⲥⲱⲧⲙ ⲉϩⲁϩ ⲛⲧⲓⲙⲓⲛⲉ ⲛⲣⲉϥⲥⲁⲗⲥⲉⲗ ⲛⲛⲉⲧϩⲟⲟⲩ ⲧⲏⲣⲟⲩ
3 ⲉϣⲁⲣⲉⲟⲩ ⲅⲁⲣ ϣⲱⲡⲉ ⲙⲏ ⲟⲩⲧⲁⲝⲓⲥ ⲛϣⲁϫⲉ ⲙⲡⲉⲡⲛⲉⲩⲙⲁ
4 ⲁⲛⲟⲕ ϩⲱ ⲉⲓⲉϣⲁϫⲉ ⲛⲧⲉⲧⲛϩⲉ ⲉⲛⲉⲣⲉⲧⲉⲧⲛⲯⲩⲭⲏ ⲟ ⲉⲡⲙⲁ ⲛⲧⲱⲓ ⲛⲉⲓⲛⲁⲃⲱϭⲉ ⲡⲉ ⲉϫⲱⲧⲛ ϩⲛϩⲉⲛϣⲁϫⲉ ϯⲛⲁⲕⲓⲙ ⲛⲧⲁⲁⲡⲉ ⲉϫⲱⲧⲛ
5 ⲉⲣⲉⲟⲩϭⲟⲙ ⲇⲉ ϣⲱⲡⲉ ϩⲛⲣⲱⲓ ⲛⲛⲉⲓϯⲥⲟ ⲇⲉ ⲉⲡⲕⲓⲙ ⲛⲛⲁⲥⲡⲟⲧⲟⲩ
6 ⲉⲓϣⲁⲛϣⲁϫⲉ ⲅⲁⲣ ⲛⲛⲉⲓⲙⲕⲁϩ ⲉⲡⲁⲥⲁϣ ⲁⲩⲱ ⲟⲛ ⲉⲓϣⲁⲛⲧⲕⲁⲣⲱⲓ ⲛⲛⲁⲙⲧⲟⲛ ⲛϩⲟⲩⲟ
7 ⲧⲉⲛⲟⲩ ⲇⲉ ⲁϥϩⲁⲥⲏⲧ ⲁϥⲁⲁⲧ ⲛⲥⲟϭ ⲁϥⲗⲉϥ ⲗⲱⲃⲧ
9 ⲁϥⲭⲣⲱ ⲛⲧⲉϥⲟⲣⲅⲏ ⲁϥⲧⲁⲩⲟⲓ ⲉϩⲣⲁⲓ ⲁϥϩⲣⲟϫⲣϫ ⲛⲛⲉϥⲟⲃϩⲉ ⲉϩⲣⲁⲓ ϫⲱⲓ ⲁϥⲣⲱϩⲧ ⲇⲉ ⲙⲙⲟⲓ ϩⲛⲛⲥⲟⲟⲧⲉ ⲛⲛⲉϥⲙⲁⲛⲥⲟⲛⲉ
10 ⲁϥϥⲱϭⲉ ⲉϫⲱⲓ ϩⲙⲡⲟⲩⲟⲉⲓⲛ ⲛⲛⲉϥⲃⲁⲗ ⲁϥⲣⲁϩⲧ ⲉϫⲛⲛⲁⲡⲉⲓⲁⲧ ⲁⲩⲡⲱⲧ ⲇⲉ ⲉϩⲣⲁⲓ ⲉϫⲱⲓ ϩⲓⲟⲩⲥⲟⲡ
11 ⲁⲡϫⲟⲉⲓⲥ ⲅⲁⲣ ⲧⲁⲁⲧ ⲉⲧⲟⲟⲧϥ ⲙⲡⲣⲉϥϫⲓⲛϭⲟⲛⲥ ⲁϥⲛⲟϫⲧ ⲇⲉ ⲛⲛⲁⲥⲉⲃⲏⲥ
12 ⲁϥϫⲟⲟⲣⲧ ⲉⲃⲟⲗ ⲉⲓⲥⲙⲟⲛⲧ ⲁϥⲁⲙⲁϩⲧⲉ ⲙⲡⲁⲃⲱ ⲁϥⲃⲟϭⲧ ⲁϥⲧⲁϩⲟⲓ ⲉⲣⲁⲧⲛⲧϩⲉ ⲛⲟⲩⲥⲕⲟⲡⲟⲥ
13 ⲁⲩⲕⲱⲧⲉ ⲉⲣⲟⲓ ⲙⲛⲛⲗⲟⲅⲭⲏ ⲉⲩⲛⲟⲩϫⲉ ⲙⲙⲟⲟⲩ ⲉⲛⲁϭⲗⲟⲟⲧⲉ ⲉⲙⲛϯⲥⲟ ⲁⲩⲡⲉϩⲧⲡⲁⲥⲓϣⲉ ⲉⲡⲕⲁϩ
14 ⲁⲩⲧⲁⲩⲟⲓ ⲉϩⲣⲁⲓ ⲛⲟⲩⲧⲟⲡ ⲉϫⲛⲟⲩϩⲧⲟⲡ ⲁⲩⲡⲱⲧ ⲉϩⲟⲩⲛ ⲉⲣⲟⲓ ⲉⲩϫⲟⲟⲣ
15 ⲁⲩϯϩⲓⲱⲱⲧ ⲛⲟⲩϭⲟⲟⲩⲛⲉ ⲁⲧⲁϭⲟⲙ ⲇⲉ ⲱϫⲛ ϩⲙⲡⲕⲁϩ
16 ⲁⲡⲁϩⲏⲧ ⲣⲱⲕϩ ⲉⲃⲟⲗ ϩⲙⲡⲣⲓⲙⲉ ⲁⲩⲱ ⲟⲩϩⲁⲓⲃⲉⲥ ⲧⲉⲧϩⲓ ⲛⲁⲃⲟⲩϩⲉ
17 ⲛⲉⲙⲛⲗⲁⲁⲩ ⲇⲉ ⲛϫⲓⲛϭⲟⲛⲥ ϩⲛⲛⲁϭⲓϫ ⲧⲁϣⲗⲏⲗ ⲇⲉ ⲟⲩⲁⲁⲃ
18 ⲡⲕⲁϩ ⲙⲡⲣϩⲱⲃⲥ ⲉⲃⲟⲗ ⲉϫⲙⲡⲉⲥⲛⲟϥ ⲛⲧⲁⲥⲁⲣⲝ ⲁⲩⲱ ⲛⲛⲉⲙⲁ ϣⲱⲡⲉ ⲙⲡⲁⲁϣϣⲕⲁⲕ
19 ⲧⲉⲛⲟⲩ ⲉⲓⲥ ϩⲏⲏⲧⲉ ⲉⲣⲉⲡⲁⲙⲛⲧⲣⲉ ϩⲛⲙⲡⲏⲩⲉ ⲁⲩⲱ ⲉⲣⲉⲡⲉⲧⲥⲟⲟⲩⲛ ⲙⲙⲟⲓ ϩⲛⲛⲉⲧϫⲟⲥⲉ
20 ⲉⲣⲉⲡⲁⲥⲟⲡⲥ ⲡⲱϩ ⲉⲡϫⲟⲉⲓⲥ ⲁⲩⲱ ⲉⲣⲉⲡⲁⲃⲁⲗ ϯⲣⲙⲓⲏ ⲙⲡⲉϥⲙⲧⲟ ⲉⲃⲟⲗ
21 ⲉⲣⲉⲟⲩϫⲡⲓⲟ ⲇⲉ ⲛⲁϣⲱⲡⲉ ⲙⲡⲣⲱⲙⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ
22 ⲁⲛⲁⲣⲟⲙⲡⲉ ⲇⲉ ⲉⲧⲏⲡ ⲉⲓ ⲉⲓⲛⲁⲃⲱⲕ ⲇⲉ ⲉⲧⲉϩⲓⲏ ⲛϯⲛⲁⲕⲟⲟⲧ ⲛϩⲏⲧⲥ ⲁⲛ
Job 15 · Job 17 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)