Read Job 11 side by side with translations · The Final Bible
1 ⲁⲥⲱⲫⲁⲣ ⲇⲉ ⲡⲙⲓⲛⲛⲁⲓⲟⲥ ⲟⲩⲱϣⲃ ⲉϥϫⲱ ⲙⲙⲟⲥ
2 ϫⲉⲡⲉⲧⲟ ⲛϩⲁϩ ⲛϣⲁϫⲉ ϣⲁϥⲥⲉⲧⲙⲡⲉⲩⲟⲩϩⲙ ⲏ ⲉⲣⲉⲡⲣⲉϥϣⲁϫⲉ ⲙⲉⲉⲩⲉ ϫⲉⲟⲩⲇⲓⲕⲁⲓⲟⲥ ⲡⲉ
3 ⲛⲁⲓⲁⲧϥ ⲙⲡⲣⲱⲙⲉ ⲛϣⲁⲣⲁϩⲉ ⲙⲡⲣⲁϣⲁⲓ ϩⲛⲛⲉⲕϣⲁϫⲉ ⲙⲛⲡⲉⲧϫⲓϩⲁⲡ ⲅⲁⲣ ⲟⲩⲃⲏⲕ
4 ⲙⲡⲣϫⲟⲟⲥ ϫⲉϯⲟⲩⲁⲁⲃ ⲅⲁⲣ ϩⲛⲛⲁϩⲃⲏⲩⲉ ⲁⲩⲱ ϯⲥⲟⲧⲡ ⲙⲡⲉϥⲙⲧⲟ ⲉⲃⲟⲗ
5 ⲁⲗⲗⲁ ⲉⲣⲉⲡϫⲟⲉⲓⲥ ⲛⲁϣⲁϫⲉ ⲛⲙⲙⲁⲕ ⲛⲁϣⲛϩⲉ
6 ⲉⲓⲧⲁ ϥⲛⲁϫⲱ ⲛⲁⲕ ⲛⲧϭⲟⲙ ⲛⲧⲥⲟⲫⲓⲁ ϫⲉϥⲛⲁϣⲱⲡⲉ ⲉϥⲕⲏⲃ ⲙⲡⲉⲧⲉⲓⲛⲉ ⲙⲙⲟⲕ ⲧⲟⲧⲉ ⲕⲛⲁⲉⲓⲙⲉ ϫⲉⲛⲉⲧⲕⲙⲡϣⲁ ⲙⲙⲟⲟⲩ ⲛⲉⲛⲧⲁⲩⲉⲓ ⲉϫⲱⲕ ϩⲓⲧⲙⲡϫⲟⲉⲓⲥ ⲛⲛⲟⲃⲉ ⲛⲧⲁⲕⲁⲁⲩ
7 ⲙⲏ ⲕⲛⲁϭⲛⲣⲁⲧϥ ⲙⲡϫⲟⲉⲓⲥ ⲏ ⲕⲛⲁϣⲧⲁϩⲉ ⲁⲣⲏϫⲛⲟⲩ ⲛⲛⲉⲛⲧⲁⲡⲡⲁⲛⲧⲟⲕⲣⲁⲧⲱⲣ ⲧⲁⲙⲓⲟⲟⲩ
8 ⲧⲡⲉ ϫⲟⲥⲉ ⲉⲕⲛⲁⲣⲟⲩ ⲟⲩⲇⲉ ⲡⲉⲧϣⲟⲕϩ ⲉⲁⲙⲛⲧⲉ ⲉⲕⲥⲟⲟⲩⲛ ⲙⲙⲟϥ
9 ⲏ ⲛⲉⲧϣⲟⲓ ⲉⲡϣⲓ ⲙⲡⲕⲁϩ ⲏ ⲡⲡⲱϫϭ ⲛⲧⲑⲁⲗⲁⲥⲥⲁ
10 ⲉϥϣⲁⲛⲧⲁⲩⲟⲟⲩ ⲧⲏⲣⲟⲩ ⲉϩⲣⲁⲓ ⲛⲓⲙ ⲡⲉⲧⲛⲁϫⲟⲟⲥ ⲛⲁϥ ϫⲉⲛⲧⲁⲕⲣⲟⲩ
11 ϥⲥⲟⲟⲩⲛ ⲅⲁⲣ ⲛⲧⲟϥ ⲛⲛⲉϩⲃⲏⲩⲉ ⲛⲛⲁⲛⲟⲙⲟⲥ ⲉⲁϥⲛⲁⲩ ⲇⲉ ⲉⲛⲉϩⲃⲏⲩⲉ ⲉⲧⲉⲙⲉϣϣⲉ ⲛϥⲛⲁⲟⲃϣϥ ⲁⲛ
12 ⲁⲗⲗⲁ ⲉϣϫⲉ ⲉⲣⲉⲡⲣⲱⲙⲉ ⲛⲏⲏⲃⲉ ϩⲛⲛⲉϥϭⲓϫ ⲉⲣⲉⲡⲣⲱⲙⲉ ⲇⲉ ⲛϫⲡⲟ ⲛⲥϩⲓⲙⲉ ⲟ ⲛⲟⲩⲉⲓⲁⲛⲧⲟⲟⲩ ϩⲓⲡϫⲁⲓⲉ
13 ⲉⲛⲉ ⲛⲧⲟⲕ ⲇⲉ ⲁⲕⲧⲃⲃⲉ ⲡⲉⲕϩⲏⲧ ⲛⲉⲕⲛⲁϫⲉⲥⲧ ⲛⲉⲕϭⲓϫ ⲉϩⲣⲁⲓ ⲉⲣⲟϥ ⲡⲉ
14 ⲉϣϫⲉ ⲟⲩⲛ ⲛⲟⲃⲉ ⲗⲁⲁⲩ ϩⲛⲛⲉⲕϭⲓϫ ⲙⲁⲣⲉϥⲟⲩⲉ ⲙⲙⲟⲕ ⲙⲡⲣⲧⲣⲉϫⲓⲛϭⲟⲛⲥ ϣⲱⲡⲉ ϩⲙⲡⲉⲕⲙⲁⲛⲟⲩⲱϩ
15 ⲧⲁⲓ ⲅⲁⲣ ⲧⲉ ⲧϩⲉ ⲉⲧⲉⲣⲉⲡⲉⲕϩⲟ ⲛⲁⲟⲩⲟⲡ ⲛⲧϩⲉ ⲛⲟⲩⲙⲟⲟⲩ ⲉϥⲥⲟⲧϥ ⲕⲛⲁⲕⲁⲁⲕ ⲇⲉ ⲕⲁϩⲏⲩ ⲙⲡⲧⲱⲗⲙ ⲛⲅⲧⲙⲣϩⲟⲧⲉ
16 ⲁⲩⲱ ⲕⲛⲁⲣⲡⲱⲃϣ ⲛⲛⲉⲕϩⲓⲥⲉ ⲛⲧϩⲉ ⲛⲟⲩϩⲟⲉⲓⲙ ⲉⲁϥⲥⲁⲁⲧⲕ ⲁⲩⲱ ⲛⲅⲧⲙϣⲧⲟⲣⲧⲣ
17 ⲛⲧⲉⲡⲉⲕϣⲗⲏⲗ ϣⲱⲡⲉ ⲛⲧϩⲉ ⲙⲡⲥⲟⲩⲛϩⲧⲟⲟⲩⲉ ⲛⲧⲉⲡⲱⲛϩ ϣⲁⲛⲁⲕ ⲙⲡⲛⲁⲩ ⲙⲙⲉⲉⲣⲉ
18 ⲕⲛⲁⲕⲁϩⲧⲏⲕ ⲡⲉ ϫⲉⲟⲩⲛⲧⲁⲕ ⲙⲙⲁⲩ ⲛⲟⲩϩⲉⲗⲡⲓⲥ ⲉⲃⲟⲗ ⲇⲉ ϩⲛⲛⲉⲕⲗⲉϩ ⲙⲛⲛⲉⲕⲣⲟⲟⲩϣ ⲧ ⲛⲁⲟⲩⲱⲛϩ ⲛⲁⲕ ⲉⲃⲟⲗ
19 ⲕⲛⲁϩⲣⲟⲕ ⲅⲁⲣ ⲛϥⲧⲙϣⲱⲡⲉ ⲛϭⲓⲡⲉⲧϯ ⲟⲩⲃⲏⲕ ⲟⲩⲛϩⲁϩ ⲇⲉ ⲛⲁⲕⲧⲟⲟⲩ ⲛⲥⲉⲥⲡⲥⲱⲡⲕ
20 ⲡⲟⲩϫⲁⲓ ⲇⲉ ⲛⲁⲃⲱⲕ ⲛϥⲕⲁⲁⲩ ⲧⲉⲩϩⲉⲗⲡⲓⲥ ⲅⲁⲣ ⲡⲉ ⲡⲧⲁⲕⲟ ⲛⲃⲁⲗ ⲇⲉ ⲛⲛⲁⲥⲉⲃⲏⲥ ⲛⲁⲃⲱⲗ ⲉⲃⲟⲗ
Job 10 · Job 12 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)