Read Job 10 side by side with translations · The Final Bible
1 ⲉⲓϣⲡϩⲓⲥⲉ ϩⲛⲧⲁⲯⲩⲭⲏ ϯⲛⲁⲟⲩⲉϩⲛⲁⲓ ⲛⲧⲁϣⲁϫⲉ ⲉϩⲣⲁⲓ ⲉϫⲱϥ ⲉⲓⲁϣⲁϩⲟⲙ ϯⲛⲁϣⲁϫⲉ ⲉⲓϣⲟⲟⲡ ϩⲙⲡⲉⲛⲟⲩϭⲥ ⲛⲧⲁⲯⲩⲭⲏ
2 ⲧⲁϫⲟⲟⲥ ⲙⲡϫⲟⲉⲓⲥ ϫⲉⲙⲡⲣⲧⲥⲁⲃⲟⲓ ⲣⲛⲟⲃⲉ ⲁⲩⲱ ⲉⲧⲃⲉⲟⲩ ⲉⲕⲕⲣⲓⲛⲉ ⲙⲙⲟⲓ ϩⲁⲛⲁⲓ
3 ⲙⲏ ⲛⲁⲛⲟⲩⲥ ⲛⲁⲕ ⲉⲓϣⲁⲛⲣⲛⲟⲃⲉ ϫⲉⲁⲕⲕⲱ ⲛⲥⲱⲕ ⲛⲛⲉϩⲃⲏⲩⲉ ⲛⲛⲉⲕϭⲓϫ ⲁⲕϯϩⲧⲏⲕ ⲇⲉ ⲉⲡϣⲟϫⲛⲉ ⲛⲛϣⲁⲛⲧⲉ
4 ⲙⲏ ⲉⲕⲛⲁⲩ ⲛⲧϩⲉ ⲉϣⲁⲣⲉⲟⲩⲣⲱⲙⲉ ⲛⲁⲩ
5 ⲏ ⲟⲩⲁϩⲉ ⲛⲣⲱⲙⲉ ⲡⲉ ⲡⲉⲕⲁϩⲉ ⲏ ⲛⲉⲕⲣⲟⲙⲡⲉ ϩⲉⲛⲣⲟⲙⲡⲉ ⲛⲣⲱⲙⲉ ⲛⲉ
6 ϫⲉⲁⲕϣⲓⲛⲉ ⲛⲥⲁⲧⲁⲁⲛⲟⲙⲓⲁ ⲁⲩⲱ ⲁⲕϩⲟⲧϩⲧ ⲛⲥⲁⲡⲁⲛⲟⲃⲉ
7 ⲕⲥⲟⲟⲩⲛ ⲅⲁⲣ ϫⲉⲙⲡⲉⲓⲣⲛⲟⲃⲉ ⲁⲗⲗⲁ ⲛⲓⲙ ⲡⲉⲧⲛⲁⲣⲃⲟⲗ ⲉⲛⲉⲕϭⲓϫ
8 ⲛⲉⲕϭⲓϫ ⲛⲉⲛⲧⲁⲩⲡⲗⲁⲥⲥⲉ ⲙⲙⲟⲓ ⲁⲩⲧⲁⲙⲓⲟⲓ ⲙⲛⲛⲥⲱⲥ ⲁⲕⲕⲟⲧⲕ ⲁⲕⲣⲁϩⲧ
9 ⲁⲣⲓⲡⲙⲉⲉⲩⲉ ϭⲉ ϫⲉⲛⲧⲁⲕⲡⲗⲁⲥⲥⲉ ⲙⲙⲟⲓ ⲛⲟⲙⲉ ⲁⲩⲱ ⲟⲛ ⲕⲛⲁⲕⲧⲟⲓ ⲉⲡⲕⲁϩ
10 ⲙⲏ ⲛⲧⲟⲕϩⲟⲣⲧ ⲁⲛ ⲛⲧϩⲉ ⲛⲟⲩⲉⲣⲱⲧⲉ ⲁⲕⲧⲟⲕⲧ ⲇⲉ ⲛⲧϩⲉ ⲛⲟⲩϩⲁⲗⲱⲙ
11 ⲁⲕϯϩⲓⲱⲱⲧ ⲛⲟⲩϣⲁⲁⲣ ⲙⲛϩⲉⲛⲁϥ ⲁⲕⲙⲟⲗϩⲧ ⲇⲉ ⲛϩⲉⲛⲕⲉⲉⲥ ⲙⲛϩⲉⲛⲙⲟⲩⲧⲉ
12 ⲁⲕⲕⲱ ⲛϩⲏⲧ ⲛⲟⲩⲱⲛϩ ⲙⲛⲟⲩⲛⲁⲡⲉⲕϭⲙⲡϣⲓⲛⲉ ⲇⲉ ⲡⲉⲛⲧⲁϥϩⲁⲣⲉϩ ⲉⲡⲁⲡⲛⲉⲩⲙⲁ
13 ⲉⲟⲩⲛⲧⲕ ⲛⲁⲓ ⲛϩⲏⲧ ϯⲥⲟⲟⲩⲛ ϫⲉⲟⲩⲛϭⲟⲙ ⲙⲙⲟⲕ ⲉϩⲱⲃ ⲛⲓⲙ ⲙⲛⲗⲁⲁⲩ ⲇⲉ ⲟ ⲛⲁⲕ ⲛⲁⲧϭⲟⲙ
14 ⲉⲓϣⲁⲛⲣⲛⲟⲃⲉ ⲅⲁⲣ ⲕⲛⲁϯϩⲧⲏⲕ ⲉⲣⲟⲓ ⲙⲡⲉⲕⲧⲃⲃⲟⲓ ⲇⲉ ⲉⲛⲁⲁⲛⲟⲙⲓⲁ
15 ⲟⲩⲟⲓ ⲅⲁⲣ ⲛⲁⲓ ⲡⲉ ⲉⲓϣⲁⲛⲣⲛⲟⲃⲉ ⲉϣⲱⲡⲉ ⲟⲛ ⲁⲛⲅ ⲟⲩⲇⲓⲕⲁⲓⲟⲥ ⲙⲛϣϭⲟⲙ ⲙⲙⲟⲓ ⲉϥⲉⲓϫⲱⲓ ⲉϩⲣⲁⲓ ϯⲙⲉϩ ⲅⲁⲣ ⲛⲥⲱϣ
16 ⲥⲉϭⲟⲣϭ ⲅⲁⲣ ⲉⲣⲟⲓ ⲛⲧϩⲉ ⲛⲛⲉⲓⲙⲟⲩⲓ ⲉⲩⲡⲁϩⲥ ⲁⲩⲱ ⲟⲛ ⲁⲕⲕⲟⲧⲕ ⲁⲕⲧⲁⲕⲟⲓ ⲉⲙⲁⲧⲉ
17 ⲁⲕⲉⲓⲣⲉ ⲛⲧⲁⲥⲏϣⲉ ⲛⲃⲣⲣⲉ ⲉⲣⲟⲓ ⲁⲕⲭⲣⲱ ⲇⲉ ⲛⲁⲓ ϩⲛⲟⲩⲛⲟϭ ⲛⲟⲣⲅⲏ ⲁⲕⲉⲓⲛⲉ ⲇⲉ ⲉϩⲣⲁⲓ ⲉϫⲱⲓ ⲛϩⲉⲛⲙⲁⲛⲥⲟⲟⲛⲉ
18 ⲉⲧⲃⲉⲟⲩ ⲇⲉ ⲁⲕⲛⲧ ⲉⲃⲟⲗ ϩⲛⲧϩⲏ ⲙⲡⲓⲙⲟⲩ ⲛⲉ ⲙⲛⲃⲁⲗ ⲇⲉ ⲛⲁⲩ ⲉⲣⲟⲓ ⲡⲉ
19 ⲁⲩⲱ ⲛⲉⲓⲛⲁⲣⲧϩⲉ ⲙⲡⲉⲧⲉ ⲛϥϣⲟⲟⲡ ⲁⲛ ⲉⲧⲃⲉⲟⲩ ⲅⲁⲣ ⲛⲧⲉⲣⲓⲉⲓ ⲉⲃⲟⲗ ϩⲛⲧϩⲏ ⲙⲡⲓⲙⲟⲩ
20 ⲙⲏ ⲟⲩⲕⲟⲩⲓ ⲁⲛ ⲡⲉ ⲡⲉⲟⲩⲉⲓϣ ⲙⲡⲁⲁϩⲉ ⲕⲁⲁⲧ ⲧⲁⲙⲧⲟⲛ ⲙⲙⲟⲓ ⲛⲟⲩⲕⲟⲩⲓ
21 ⲙⲡⲁⲧⲓⲃⲱⲕ ⲉⲡⲙⲁ ⲛⲧⲁⲧⲙⲥⲟⲧⲧ ⲉⲩⲕⲁϩ ⲛⲕⲁⲕⲉ ϩⲓϭⲟⲥⲙ ⲟⲩⲕⲁϩ ⲛⲕⲁⲕⲉ ϣⲁⲉⲛⲉϩ ⲡⲙⲁ ⲉⲧⲉⲙⲛⲟⲩⲟⲉⲓⲛ ⲛϩⲏⲧϥ ⲟⲩⲇⲉ ⲛⲁⲩ ⲉϭⲓⲛⲱⲣ ϩⲛⲣⲱⲙⲉ
Job 9 · Job 11 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)