Jeremiah 52 — Coptic (Sahidic)

1 ϩⲛⲧⲙⲉϩϫⲟⲩⲧ ⲟⲩⲉⲉ ⲛⲣⲟⲙⲡⲉ ⲛⲥⲉⲇⲉⲕⲓⲁⲥ ⲛⲧⲉⲣⲉϥⲣⲣⲣⲟ ⲁⲩⲱ ⲁϥⲣⲣⲣⲟ ⲙⲙⲛⲧⲟⲩⲉ ⲛⲣⲟⲙⲡⲉ ⲁⲩⲱ ⲡⲣⲁⲛ ⲛⲧⲉϥⲙⲙⲁⲁⲩ ⲡⲉ ⲁⲛⲡⲓⲧⲁⲁⲗ ⲧϣⲉⲉⲣⲉ ⲛⲓⲉⲣⲉⲙⲓⲁⲥ ⲡⲉⲃⲟⲗ ϩⲛⲗⲟⲃⲉⲛⲁ

4 ⲁⲩⲱ ⲁⲥϣⲱⲡⲉ ϩⲛⲧⲙⲉϩⲯⲓⲧ ⲛⲣⲟⲙⲡⲉ ⲛⲧⲉϥⲙⲛⲧⲣⲣⲟ ϩⲙⲡⲙⲉϩⲯⲓⲧ ⲛⲉⲃⲟⲧ ⲛⲥⲟⲩⲙⲏⲧ ⲙⲡⲉⲃⲟⲧ ⲁϥⲉⲓ ⲛϭⲓⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ ⲙⲛⲧⲉϥϭⲟⲙ ⲧⲏⲣⲥ ⲉϫⲛⲧϩⲓⲏⲙ ⲁⲩⲕⲱⲧⲉ ⲉⲣⲟⲥ ⲁⲩⲱ ⲁⲩⲕⲱⲧ ϩⲓⲣⲱⲥ ⲛⲟⲩⲥⲟⲃⲧ ⲛϥⲧⲟⲩ ϣⲓⲙⲉ ⲛⲱⲛⲉ ⲉⲩⲕⲱⲧⲉ

5 ⲁⲩⲱ ⲧⲡⲟⲗⲓⲥ ⲁⲩⲁⲣⲃⲉⲥ ⲉϩⲟⲩⲛ ϣⲁϩⲣⲁⲓ ⲉⲧⲙⲉϩⲙⲛⲧⲟⲩⲉ ⲛⲣⲟⲙⲡⲉ ⲛⲥⲉⲇⲉⲕⲓⲁⲥ ⲡⲣⲣⲟ

6 ⲛⲥⲟⲩⲯⲓⲧ ⲙⲡⲉⲃⲟⲧ ⲁⲩⲱ ⲁϥϭⲙϭⲟⲙ ⲛϭⲓⲡⲉϩⲕⲟ ϩⲣⲁⲓ ϩⲛⲧⲡⲟⲗⲓⲥ ⲉⲙⲙⲛⲟⲉⲓⲕ ϣⲟⲟⲡ ⲙⲡⲗⲁⲟⲥ ⲙⲡⲕⲁϩ

7 ⲁⲩⲱ ⲁⲩϭⲱⲧϩ ⲉⲧⲡⲟⲗⲓⲥ ⲛⲣⲱⲙⲉ ⲧⲏⲣⲟⲩ ⲛⲣⲉϥⲙⲓϣⲉ ⲁⲩⲡⲱⲧ ⲁⲩⲉⲓ ⲉⲃⲟⲗ ϩⲛⲧⲡⲟⲗⲓⲥ ⲛⲧⲉⲩϣⲏ ϩⲛⲧⲉϩⲓⲏ ⲛⲧⲡⲩⲗⲏ ⲛⲧⲙⲏⲧⲉ ⲙⲡⲥⲟⲃⲧ ⲁⲩⲱ ⲧϫⲟ ⲉⲧϩⲓⲃⲟⲗ ⲉⲧϩⲓⲧⲟⲩⲛ ⲡⲕⲏⲡⲟⲥ ⲙⲡⲣⲣⲟ ⲁⲩⲱ ⲛⲉⲭⲁⲗⲇⲁⲓⲟⲥ ⲉⲩⲕⲧⲏⲩ ⲉⲧⲡⲟⲗⲓⲥ ⲁⲛⲏ ⲃⲱⲕ ϩⲛⲧⲉϩⲓⲏ ⲉϩⲣⲁⲓ ⲉⲁⲣⲁⲃⲁ

8 ⲁⲥⲡⲱⲧ ⲛϭⲓⲧϭⲟⲙ ⲛⲛⲉⲭⲁⲗⲇⲁⲓⲟⲥ ⲛⲥⲁⲡⲣⲣⲟ ϩⲓⲡⲉⲕⲣⲟ ⲛϩⲓⲉⲣⲓⲭⲱ ⲁⲩⲱ ⲛⲉϥϩⲙϩⲁⲗ ⲧⲏⲣⲟⲩ ⲁⲩϫⲱⲱⲣⲉ ⲉⲃⲟⲗ ⲛⲧⲟⲟⲧϥ

9 ⲁⲩϭⲱⲡⲉ ⲙⲡⲣⲣⲟ ⲁⲩⲛⲧϥ ⲙⲡⲣⲣⲟ ⲛⲧⲃⲁⲃⲩⲗⲱⲛ ⲉϩⲣⲁⲓ ⲉⲇⲁⲃⲗⲁⲑⲁ ⲁⲩⲱ ⲁϥϣⲁϫⲉ ⲛⲙⲙⲁϥ ϩⲛⲟⲩϩⲁⲡ

10 ⲡⲣⲣⲟ ⲇⲉ ⲛⲧⲃⲁⲃⲩⲗⲱⲛ ⲁϥⲕⲱⲛⲥ ⲛⲛϣⲏⲣⲉ ⲛⲥⲉⲇⲉⲕⲓⲁⲥ ⲙⲡⲉⲙⲧⲟ ⲉⲃⲟⲗ ⲛⲛⲉϥⲃⲁⲗ ⲁⲩⲱ ⲛⲁⲣⲭⲱⲛ ⲧⲏⲣⲟⲩ ⲛⲓⲟⲩⲇⲁ ⲁϥⲕⲟⲛⲥⲟⲩ ϩⲛⲇⲉⲃⲗⲁⲑⲁ

11 ⲛⲃⲁⲗ ⲇⲉ ⲛⲥⲉⲇⲉⲕⲓⲁⲥ ⲁϥⲁⲁⲩ ⲛⲃⲗⲗⲉ ⲁϥⲥⲟⲛϩϥ ϩⲛϩⲉⲛⲡⲉⲇⲉⲥ ⲁϥⲛⲧϥ ⲛϭⲓⲡⲣⲣⲟ ⲛⲧⲃⲁⲃⲩⲗⲱⲛ ⲉⲧⲃⲁⲃⲩⲗⲱⲛ ⲁϥⲧⲁⲁϥ ⲉⲟⲧⲡϥ ⲉϩⲟⲩⲛ ⲉⲡⲙⲁ ⲛⲥⲓⲕⲉ ϣⲁⲡⲉϩⲟⲟⲩ ⲉⲛⲧⲁϥⲙⲟⲩ ⲛϩⲏⲧϥ

12 ⲁⲩⲱ ϩⲣⲁⲓ ϩⲙⲡⲙⲉϩⲛϯⲟⲩ ⲛⲉⲃⲟⲧ ⲛⲥⲟⲩⲙⲏⲧ ⲙⲡⲉⲃⲟⲧ ⲁϥⲉⲓ ⲛϭⲓⲛⲁⲃⲟⲩⲍⲁⲣⲇⲁⲛ ⲡⲁⲣⲭⲓⲙⲁⲅⲓⲣⲟⲥ ⲉⲧⲁϩⲉⲣⲁⲧϥ ⲙⲡⲉⲙⲧⲟ ⲉⲃⲟⲗ ⲙⲡⲣⲣⲟ ⲛⲧⲃⲁⲃⲩⲗⲱⲛ ⲉϩⲣⲁⲓ ⲉⲧϩⲓⲏⲙ

13 ⲁϥⲣⲱⲕϩ ⲙⲡⲏⲓ ⲙⲡϫⲟⲉⲓⲥ ⲙⲛⲡⲏⲓ ⲙⲡⲣⲣⲟ ⲙⲛⲛⲏⲓ ⲧⲏⲣⲟⲩ ⲛⲧⲡⲟⲗⲓⲥ ⲁⲩⲱ ⲛⲟϭ ⲛⲓⲙ ⲛⲏⲓ ⲁϥⲣⲟⲕ ϩⲟⲩⲟ ϩⲛⲟⲩⲥⲁⲧⲉ

14 ⲁⲩⲱ ⲥⲟⲧⲃ ⲛⲓⲙ ⲉⲧⲕⲱⲧⲉ ⲉⲧϩⲓⲏⲙ ⲁⲥϣⲣϣⲱⲣⲟⲩ ⲛϭⲓⲧϭⲟⲙ ⲧⲏⲣⲥ ⲛⲛⲉⲭⲁⲗⲇⲁⲓⲟⲥ ⲧⲁⲓ ⲉⲧϣⲟⲟⲡ ⲙⲛⲡⲁⲣⲭⲓⲙⲁⲅⲉⲓⲣⲟⲥ

16 ⲁⲩⲱ ⲁϥϣⲱϫⲡ ⲙⲡⲥⲉⲉⲡⲉ ⲙⲡⲗⲁⲟⲥ ⲛϭⲓⲛⲁⲃⲟⲩⲍⲁⲣⲇⲁⲛ ⲉϩⲉⲛϭⲙⲏⲩⲉ ⲙⲛϩⲉⲛⲟⲩⲉⲓⲉ

17 ⲁⲩⲱ ⲛⲉⲥⲧⲩⲗⲟⲥ ⲛϩⲟⲙⲛⲧ ⲉⲧϩⲙⲡⲏⲓ ⲙⲡϫⲟⲉⲓⲥ ⲙⲛⲛⲃⲁⲥⲓⲥ ⲙⲛⲧⲉⲑⲁⲗⲁⲥⲥⲁ ⲛϩⲟⲙⲛⲧ ϩⲙⲡⲏⲓ ⲙⲡϫⲟⲉⲓⲥ ⲁⲩⲟⲩⲟϣϥⲟⲩ ⲛϭⲓⲛⲉⲭⲁⲗⲇⲁⲓⲟⲥ ⲁⲩϫⲓ ⲡⲉⲩϩⲟⲙⲛⲧ ⲉϩⲣⲁⲓ ⲉⲧⲃⲁⲃⲩⲗⲱⲛ

18 ⲁⲩⲱ ⲧⲥⲧⲉⲫⲁⲛⲏ ⲙⲛⲛⲉⲫⲓⲁⲗⲏ ⲙⲛⲛⲉⲕⲣⲁⲩⲣⲁ ⲙⲛⲛⲉⲥⲕⲉⲩⲟⲥ ⲧⲏⲣⲟⲩ ⲛϩⲟⲙⲛⲧ ⲉⲧⲟⲩϣⲙϣⲉ ⲛϩⲏⲧⲟⲩ

19 ⲙⲛⲛϣⲟⲩⲣⲏ ⲙⲛⲛⲗⲩⲭⲛⲓⲁ ⲙⲛⲛⲉⲑⲩⲥⲕⲏ ⲙⲛⲛⲟⲩⲟⲧϩ ⲛⲉϩⲛⲁⲁⲩ ⲛⲉⲓⲉⲡ ⲛⲟⲩⲃ ⲉⲩⲟ ⲛⲛⲟⲩⲃ ⲧⲏⲣⲟⲩ ⲁⲩⲱ ⲛⲉⲧⲟ ⲛⲉⲓⲉⲡ ϩⲁⲧ ⲉϩⲉⲛϩⲁⲧ ⲧⲏⲣⲟⲩ ⲛⲉ ⲁϥϫⲓⲧⲟⲩ ⲛϭⲓⲡⲁⲣⲭⲓⲙⲁⲅⲉⲓⲣⲟⲥ

20 ⲁⲩⲱ ⲡⲉⲥⲧⲩⲗⲟⲥ ⲥⲛⲁⲩ ⲙⲛⲧⲉⲑⲁⲗⲁⲥⲥⲁ ⲙⲛⲡⲙⲛⲧⲥⲛⲟⲟⲩⲥ ⲙⲙⲁⲥⲉ ⲛϩⲟⲙⲛⲧ ⲉⲧϩⲁⲣⲟⲥ ⲛⲧⲉⲑⲁⲗⲁⲥⲥⲁ ⲛⲁⲓ ⲉⲛⲧⲁⲡⲣⲣⲟ ⲥⲟⲗⲟⲙⲱⲛ ⲧⲁⲙⲓⲟⲟⲩ ⲉⲕⲁⲁⲩ ϩⲙⲡⲏⲓ ⲙⲡϫⲟⲉⲓⲥ ⲉⲙⲙⲛ ϣⲓ ϣⲟⲟⲡ ⲙⲡⲉⲩϩⲟⲙⲛⲧ

21 ⲁⲩⲱ ⲛⲉⲥⲧⲩⲗⲟⲥ ⲛⲉϥⲟ ⲛⲙⲁⲁⲃⲧⲏ ⲙⲙⲁϩⲉ ⲛϫⲓⲥⲉ ⲉⲡⲟⲩⲁ ⲡⲟⲩⲁ ⲁⲩⲱ ⲟⲩϩⲱⲥ ⲉϥⲛⲁⲣⲙⲛⲧⲥⲛⲟⲟⲩⲥ ⲙⲙⲁϩⲉ ⲡⲉ ⲡⲉϥⲕⲧⲟ ⲉⲣⲟϥ ⲉⲣⲉⲡⲉϥⲟⲩⲙⲟⲧ ⲛⲁⲣⲉϥⲧⲟⲟⲩ ⲛⲧⲏⲏⲃⲉ ⲉϥⲕⲱⲧⲉ

22 ⲉⲣⲉⲟⲩⲧⲟⲩⲁ ⲛϩⲟⲙⲛⲧ ϩⲓϫⲱⲟⲩ ⲉⲣⲉϯⲟⲩ ⲙⲙⲁϩⲉ ⲛϣⲓⲏ ϩⲓⲧⲡⲉ ⲙⲡⲉⲧⲟⲩⲁ ⲁⲩⲱ ⲟⲩⲙⲟⲩⲛⲅ ⲛϣⲛⲉ ⲙⲛϩⲉⲛⲙⲟⲩⲛⲅ ⲛϩⲉⲣⲙⲁⲛ ϩⲓϫⲙⲡⲉⲧⲟⲩⲁ ⲉⲩⲕⲱⲧⲉ ⲉⲣⲟϥ ⲉϩⲉⲛϩⲟⲙⲛⲧ ⲧⲏⲣⲟⲩ ⲛⲉ ⲕⲁⲧⲁⲛⲁⲓ ⲟⲛ ⲛⲉⲩϣⲟⲟⲡ ⲡⲉ ⲙⲡⲙⲉϩⲥⲛⲁⲩ ⲛⲥⲧⲩⲗⲟⲥ ⲉⲩⲛϣⲙⲟⲩⲛ ⲛϩⲉⲣⲙⲁⲛ ϣⲟⲟⲡ ⲉⲡⲙⲁϩⲉ ⲙⲡⲙⲛⲧⲥⲛⲟⲟⲩⲥ ⲙⲙⲁϩⲉ

23 ⲉⲩⲛ ⲡⲥⲧⲁⲉⲓⲟⲩⲧⲁⲥⲉ ⲛϩⲉⲣⲙⲁⲛ ϩⲛⲟⲩⲥⲁ ⲛϩⲉⲣⲙⲁⲛ ⲇⲉ ⲧⲏⲣⲟⲩ ⲉⲧϩⲓϫⲛⲡⲉϣⲛⲉ ⲙⲡⲉϥⲕⲱⲧⲉ ⲥⲉⲉⲓⲣⲉ ⲛϣⲉ

24 ⲁⲩⲱ ⲁϥϫⲓ ⲛϭⲓⲡⲁⲣⲭⲓⲙⲁⲅⲉⲓⲣⲟⲥ ⲛⲥⲁⲣⲁⲓⲁⲥ ⲡϣⲟⲣⲡ ⲛⲟⲩⲏⲏⲃ ⲙⲛⲥⲟⲫⲟⲛⲓⲁⲥ ⲡⲉⲧⲟ ⲛⲡⲙⲉϩⲥⲛⲁⲩ ⲛⲟⲩⲏⲏⲃ ⲙⲛⲡϣⲟⲙⲧ ⲉⲧⲁⲣⲉϩ ⲉⲧⲉϩⲓⲏ

25 ⲙⲛⲟⲩⲥⲓⲟⲩⲣ ⲡⲉⲧⲟ ⲛⲉⲡⲓⲥⲧⲁⲧⲏⲥ ⲉϫⲛⲛⲣⲱⲙⲉ ⲉⲧⲙⲓϣⲉ ⲙⲛⲥⲁϣϥ ⲛⲣⲱⲙⲉ ⲛⲁⲓ ⲉⲧⲟ ⲛⲣⲙⲛⲥⲟⲉⲓⲧ ⲙⲡⲉⲙⲧⲟ ⲉⲃⲟⲗ ⲙⲡⲣⲣⲟ ⲉⲁⲩϭⲛⲧⲟⲩ ϩⲛⲧⲡⲟⲗⲓⲥ ⲁⲩⲱ ⲡⲉⲅⲣⲁⲙⲙⲁⲧⲉⲩⲥ ⲛⲛϭⲟⲙ ⲉⲧⲥϩⲁⲓ ⲛⲥⲁⲡⲗⲁⲟⲥ ⲛⲧⲉⲡⲕⲁϩ ⲁⲩⲱ ⲥⲉⲛⲣⲱⲙⲉ ⲉⲃⲟⲗ ϩⲙⲡⲗⲁⲟⲥ ⲙⲡⲕⲁϩ ⲛⲉⲛⲧⲁⲩϩⲉ ⲉⲣⲟⲟⲩ ϩⲛⲧⲙⲏⲧⲉ ⲛⲧⲡⲟⲗⲓⲥ

26 ⲁϥϫⲓⲧⲟⲩ ⲛϭⲓⲛⲁⲃⲟⲩⲍⲁⲣⲇⲁⲛ ⲡⲁⲣϫⲓⲙⲁⲅⲉⲓⲣⲟⲥ ⲁϥⲛⲧⲟⲩ ϣⲁⲡⲣⲣⲟ ⲛⲧⲃⲁⲃⲩⲗⲱⲛ ⲉϩⲣⲁⲓ ⲉⲇⲉⲃⲗⲁⲑⲁ

27 ϩⲙⲡⲕⲁϩ ⲛⲉⲙⲁⲑ

31 ⲁⲥϣⲱⲡⲉ ϩⲛⲧⲙⲉϩⲙⲁⲃ ⲥⲁϣϥ ⲛⲣⲟⲙⲡⲉ ⲛⲧⲉⲣⲟⲩⲡⲱⲱⲛⲉ ⲉⲃⲟⲗ ⲛⲓⲱⲁⲕⲓⲙ ⲡⲣⲣⲟ ⲛⲓⲟⲩⲇⲁ ϩⲙⲡⲙⲉϩⲙⲛⲧⲥⲛⲟⲟⲩⲥ ⲛⲉⲃⲟⲧ ϩⲛⲥⲟⲩϫⲟⲩⲧ ⲁϥⲧⲉ ⲙⲡⲉⲃⲟⲧ ⲁϥϫⲓ ⲛϭⲓⲟⲩⲗⲉⲙⲁⲇⲁⲭⲁⲣ ⲡⲣⲣⲟ ⲛⲧⲃⲁⲃⲩⲗⲱⲛ ϩⲛⲧⲉⲣⲟⲙⲡⲉ ⲉⲛⲧⲁϥⲣⲣⲣⲟ ⲛϩⲏⲧⲥ ⲛⲧⲁⲡⲉ ⲛⲓⲱⲁⲕⲉⲓⲙ ⲡⲣⲣⲟ ⲛⲓⲟⲩⲇⲁ ⲁϥⲛⲧϥ ⲉⲃⲟⲗ ϩⲙⲡⲏⲓ ⲉⲧⲟⲩϩⲁⲣⲉϩ ⲉⲣⲟϥ ⲛϩⲏⲧϥ

32 ⲁϥϣⲁϫⲉ ⲛⲙⲙⲁϥ ⲛϩⲉⲛϣⲁϫⲉ ⲉⲛⲁⲛⲟⲩⲟⲩ ⲁⲩⲱ ⲁϥⲕⲱ ⲙⲡⲉϥⲑⲣⲟⲛⲟⲥ ϩⲓϫⲛⲛⲉⲑⲣⲟⲛⲟⲥ ⲛⲛⲉⲣⲣⲱⲟⲩ ⲉⲧϣⲟⲟⲡ ⲛⲙⲙⲁϥ ϩⲛⲧⲃⲁⲃⲩⲗⲱⲛ

33 ⲁⲩⲱ ⲁϥϣⲓⲃⲉ ⲛⲧϩⲃⲥⲱ ⲉⲧϩⲓϫⲱϥ ϩⲙⲡⲉϣⲧⲉⲕⲟ ⲁⲩϯⲕⲉⲧⲉ ϩⲓⲱⲱϥ ⲁⲩⲱ ⲛⲉϥⲟⲩⲱⲙ ⲙⲡⲉϥⲟⲉⲓⲕ ⲡⲉ ⲛⲥⲏⲩ ⲛⲓⲙ ⲙⲡⲉϥⲙⲧⲟ ⲉⲃⲟⲗ ⲛⲛⲉϩⲟⲟⲩ ⲧⲏⲣⲟⲩ ⲉⲛⲧⲁϥⲱⲛϩ ⲛϩⲏⲧⲟⲩ

34 ⲁⲩⲱ ⲡⲉⲧⲧⲏϣ ⲛⲁϥ ⲙⲛⲡⲣⲣⲟ ⲛⲧⲃⲁⲃⲩⲗⲱⲛ ⲛⲉⲩϯ ⲙⲙⲟϥ ⲛⲁϥ ⲛⲥⲛⲏⲩ ⲛⲓⲙ ⲉⲃⲟⲗ ϩⲛⲟⲩϩⲟⲟⲩ ⲉⲩϩⲟⲟⲩ ϣⲁⲡⲉϩⲟⲟⲩ ⲉⲛⲧⲁϥⲙⲟⲩ ⲛϩⲏⲧϥ ⲛⲛⲉϩⲟⲟⲩ ⲧⲏⲣⲟⲩ ⲙⲡⲉϥⲱⲛϩ