Jeremiah 51 — Coptic (Sahidic)

1 ⲡϣⲁϫⲉ ⲙⲡϫⲟⲉⲓⲥ ⲉⲛⲧⲁϥϣⲱⲡⲉ ϣⲁⲓⲉⲣⲉⲙⲓⲁⲥ ⲉⲧⲁⲩⲟϥ ⲉϫⲛⲛⲓⲟⲩⲇⲁⲓ ⲧⲏⲣⲟⲩ ⲉⲧϣⲟⲟⲡ ϩⲙⲡⲕⲁϩ ⲛⲕⲏⲙⲉ ⲙⲛⲛⲉⲧϩⲙⲟⲟⲥ ϩⲛⲙⲉϭⲧⲱⲗ ⲙⲛⲧⲁⲫⲛⲁⲥ ⲙⲛⲡⲕⲁϩ ⲙⲡⲁⲑⲟⲩⲣⲏⲥ ⲉϥϫⲱ ⲙⲙⲟⲥ ⲛⲁⲩ

2 ⲧⲁⲓ ⲧⲉ ⲧϩⲉ ⲉⲛⲧⲁϥϫⲟⲟⲥ ⲛϭⲓⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ϫⲉⲛⲧⲱⲧⲛ ⲁⲧⲉⲧⲛⲛⲁⲩ ⲉⲛⲡⲉⲧϩⲟⲟⲩ ⲧⲏⲣⲟⲩ ⲉⲛⲧⲁⲓⲛⲧⲟⲩ ⲉϫⲛⲧϩⲓⲏⲙ ⲙⲛⲙⲡⲟⲗⲓⲥ ⲛⲓⲟⲩⲇⲁ ⲁⲩⲱ ⲉⲓⲥ ϩⲏⲏⲛⲉ ⲥⲉϣⲏϥ ⲙⲡϩⲟⲟⲩ ϫⲉⲙⲛⲡⲉⲧϣⲟⲟⲡ ⲛϩⲏⲧⲟⲩ

3 ⲉⲧⲃⲉⲛⲉⲩⲡⲟⲛⲏⲣⲓⲁ ⲉⲛⲧⲁⲩⲁⲁⲩ ϫⲉⲉⲩⲉϯϭⲱⲛⲧ ⲛⲁⲓ ⲉⲩⲃⲏⲕ ⲉⲩⲧⲁⲗⲁⲓ ϣⲟⲩϩⲏⲛⲉ ⲉϩⲣⲁⲓ ⲛϩⲉⲛⲕⲉⲛⲟⲩⲧⲉ ⲛⲁⲓ ⲉⲧⲉⲙⲡⲉⲧⲛⲥⲟⲩⲱⲛⲟⲩ

4 ⲁⲩⲱ ⲁⲉⲓⲧⲛⲛⲟⲟⲩ ϣⲁⲣⲱⲧⲛ ⲛⲛⲁϩⲙϩⲁⲗ ⲛⲉⲡⲣⲟⲫⲏⲧⲏⲥ ⲛϣⲟⲣⲡ ⲁⲉⲓⲧⲛⲛⲟⲟⲩⲥⲉ ⲉⲉⲓϫⲱ ⲙⲙⲟⲥ ϫⲉⲙⲡⲣⲉⲓⲣⲉ ⲙⲡϩⲱⲃ ⲙⲡⲉⲓⲧⲱⲗⲙ ⲡⲁⲓ ⲉⲛⲧⲁⲓⲙⲉⲥⲧⲱϥ

5 ⲁⲩⲱ ⲙⲡⲟⲩⲥⲱⲧⲙ ⲛⲥⲱⲓ ⲟⲩⲇⲉ ⲙⲡⲟⲩⲣⲓⲕⲉ ⲙⲡⲉⲩⲙⲁⲁϫⲉ ⲉⲧⲣⲉⲩⲕⲧⲟⲟⲩ ⲉⲃⲟⲗ ϩⲛⲛⲉⲩⲡⲟⲛⲏⲣⲓⲁ ⲉⲧⲙⲧⲣⲉⲩⲧⲁⲗⲉ ϣⲟⲩϩⲏⲛⲉ ⲉϩⲣⲁⲓ ⲛϩⲉⲛⲕⲉⲛⲟⲩⲧⲉ

6 ⲁϥⲉⲓ ⲉⲡⲉⲥⲏⲧ ⲛϭⲓⲡⲁϭⲱⲛⲧ ⲁⲩⲱ ⲧⲁⲟⲣⲅⲏ ⲁⲥⲙⲟⲩϩ ϩⲛⲙⲡⲩⲗⲏ ⲛⲓⲟⲩⲇⲁ ⲙⲛⲡⲃⲟⲗ ⲛⲧϩⲓⲏⲙ ⲁⲩⲱ ⲁⲩϣⲱⲡⲉ ⲉⲩϫⲁⲓⲉ ϩⲛⲟⲩⲙⲁ ⲉⲙⲉⲩⲙⲟⲟϣⲉ ϩⲓϫⲱϥ ⲛⲧϩⲉ ⲙⲡϩⲟⲟⲩ ⲛϩⲟⲟⲩ

7 ⲧⲉⲛⲟⲩ ϭⲉ ⲧⲁⲓ ⲧⲉ ⲧϩⲉ ⲉⲛⲧⲁϥϫⲟⲟⲥ ⲛϭⲓⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ϫⲉⲉⲧⲃⲉⲟⲩ ⲛⲧⲱⲧⲛ ⲧⲉⲧⲛⲉⲓⲣⲉ ⲛⲛⲉⲓⲛⲟϭ ⲙⲡⲉⲧϩⲟⲟⲩ ϩⲛⲛⲉⲧⲙⲯⲩⲭⲏ ϫⲉⲉⲩⲉϩⲱⲧⲃ ⲛⲟⲩⲣⲱⲙⲉ ⲙⲛⲟⲩⲥϩⲓⲙⲉ ⲟⲩϣⲏⲣⲉ ⲕⲟⲩⲓ ⲙⲛⲡⲉⲧϫⲓⲉⲕⲓⲃⲉ ⲉⲃⲟⲗ ϩⲛⲧⲙⲏⲧⲉ ⲛⲓⲟⲩⲇⲁ ⲉⲧⲙⲧⲣⲉⲗⲁⲁⲩ ϣⲱϫⲡ ⲛϩⲏⲧ ⲧⲏⲩⲧⲛ

8 ⲉⲧⲣⲁϭⲱⲛⲧ ϩⲛⲛⲉϩⲃⲏⲩⲉ ⲛⲛⲉⲧⲛϭⲓϫ ⲉⲧⲉⲧⲛⲧⲁⲗⲉ ϣⲟⲩϩⲏⲛⲉ ⲉϩⲣⲁⲓ ⲛϩⲉⲛⲕⲉⲛⲟⲩⲧⲉ ϩⲙⲡⲕⲁϩ ⲛⲕⲏⲙⲉ ⲡⲁⲓ ⲉⲛⲧⲁⲧⲉⲧⲛⲃⲱⲕ ⲉϩⲟⲩⲛ ⲉⲣⲟϥ ⲉϣⲱⲡⲉ ⲛϩⲏⲧϥ ϫⲉⲕⲁⲥ ⲉⲩⲉϩⲉⲧⲃ ⲧⲏⲩⲧⲛ ⲁⲩⲱ ⲛⲧⲉⲧⲛϣⲱⲡⲉ ⲉⲩⲥⲁϩⲟⲩ ⲙⲛⲟⲩⲛⲟϭⲛⲉϭ ϩⲛⲛϩⲉⲑⲛⲟⲥ ⲙⲡⲕⲁϩ

9 ⲙⲏ ⲁⲧⲉⲧⲛⲣⲡⲱⲃϣ ⲛⲧⲱⲧⲛ ⲛⲙⲡⲉⲧϩⲟⲟⲩ ⲛⲛⲉⲧⲛⲉⲓⲟⲧⲉ ⲙⲛⲙⲡⲉⲧϩⲟⲟⲩ ⲛⲛⲉⲣⲣⲱⲟⲩ ⲛⲓⲟⲩⲇⲁ ⲙⲛⲙⲡⲉⲧϩⲟⲟⲩ ⲛⲛⲉⲧⲛⲁⲣⲭⲱⲛ ⲙⲛⲙⲡⲉⲧϩⲟⲟⲩ ⲛⲛⲉⲧⲛϩⲓⲟⲙⲉ ⲛⲉⲛⲧⲁⲩⲁⲁⲩ ϩⲙⲡⲕⲁϩ ⲛⲓⲟⲩⲇⲁ ⲙⲛⲡⲃⲟⲗ ⲛⲧϩⲓⲏⲙ

10 ⲁⲩⲱ ⲙⲡⲟⲩⲗⲟ ϩⲛⲛⲁⲓ ϣⲁϩⲟⲩⲛ ⲉⲡϩⲟⲟⲩ ⲛϩⲟⲟⲩ ⲟⲩⲇⲉ ⲙⲡⲟⲩⲁⲙⲁϩⲧⲉ ⲛⲛⲁⲟⲩⲁϩ ⲥⲁϩⲛⲉ ⲙⲛⲛⲁⲛⲟⲙⲟⲥ ⲛⲁⲓ ⲉⲛⲧⲁⲓⲧⲁⲁⲩ ⲙⲡⲉⲧⲛⲙⲧⲟ ⲉⲃⲟⲗ ⲁⲩⲱ ⲙⲡⲉⲙⲧⲟ ⲉⲃⲟⲗ ⲛⲛⲉⲧⲛⲉⲓⲟⲧⲉ

11 ⲉⲧⲃⲉⲡⲁⲓ ⲧⲁⲓ ⲧⲉ ⲧϩⲉ ⲉⲛⲧⲁⲡϫⲟⲉⲓⲥ ϫⲟⲟⲥ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁⲕⲱ ⲙⲡⲁϩⲟ

12 ⲉⲧⲣⲁⲧⲁⲕⲉ ⲡϣⲱϫⲡ ⲧⲏⲣϥ ⲉⲧϩⲛⲕⲏⲙⲉ ⲛⲥⲉϩⲉ ϩⲛⲧⲥⲏϥⲉ ⲛⲥⲉⲱϫⲛ ϩⲙⲡⲉϩⲕⲟ ϫⲓⲛⲡⲉⲩⲕⲟⲩⲓ ϣⲁⲡⲉⲩⲛⲟϭ ⲛⲥⲉϣⲱⲡⲉ ⲉⲩⲛⲟϭⲛⲉϭ ⲙⲛⲟⲩⲧⲁⲕⲟ ⲙⲛⲟⲩⲥⲁϩⲟⲩ

13 ⲁⲩⲱ ϯⲛⲁϭⲙ ⲡϣⲓⲛⲉ ⲛⲛⲉⲧϩⲙⲟⲟⲥ ϩⲙⲡⲕⲁϩ ⲛⲕⲏⲙⲉ ⲛⲧϩⲉ ⲉⲛⲧⲁⲓϭⲙ ⲡϣⲓⲛⲉ ⲛⲧϩⲓⲏⲙ ϩⲛⲟⲩⲥⲏϥⲉ ⲙⲛⲟⲩϩⲕⲟ ⲙⲛⲡⲙⲟⲩ

14 ⲁⲩⲱ ⲛⲛⲉⲗⲁⲁⲩ ⲟⲩϫⲁⲓ ⲉⲃⲟⲗ ϩⲙⲡϣⲱϫⲡ ⲛⲓⲟⲩⲇⲁ ⲛⲁⲓ ⲉⲧⲟ ⲛⲣⲙⲛϭⲟⲉⲓⲗⲉ ϩⲙⲡⲕⲁϩ ⲛⲕⲏⲙⲉ ⲉⲧⲣⲉⲩⲕⲧⲟⲟⲩ ⲉⲡⲕⲁϩ ⲛⲓⲟⲩⲇⲁ ⲡⲁⲓ ⲉⲧⲟⲩϩⲉⲗⲡⲓⲍⲉ ⲉⲣⲟϥ ϩⲛⲛⲉⲩⲯⲩⲭⲏ ⲉⲧⲣⲉⲩⲕⲧⲟⲟⲩ ⲙⲙⲁⲩ ⲛⲛⲉⲩⲕⲧⲟⲟⲩ ϭⲉ ⲙⲙⲁⲩ ⲉⲓⲙⲏⲧⲓ ⲛⲉⲧⲛⲁⲟⲩϫⲁⲓ

15 ⲁⲩⲱ ⲁⲩⲟⲩⲱϣⲃ ⲛⲓⲉⲣⲉⲙⲓⲁⲥ ⲛϭⲓⲛⲣⲱⲙⲉ ⲧⲏⲣⲟⲩ ⲉⲛⲧⲁⲩⲉⲓⲙⲉ ϫⲉⲛⲉⲩϩⲓⲟⲙⲉ ⲧⲁⲗⲉ ϣⲟⲩϩⲏⲛⲉ ⲉϩⲣⲁⲓ ⲛϩⲉⲛⲕⲉⲛⲟⲩⲧⲉ ⲙⲛⲛⲕⲉϩⲓⲟⲙⲉ ⲧⲏⲣⲟⲩ ⲟⲩⲥⲩⲛⲁⲅⲱⲅⲏ ⲉⲛⲁϣⲱⲥ ⲙⲛⲡⲗⲁⲟⲥ ⲧⲏⲣϥ ⲉⲧϩⲙⲟⲟⲥ ϩⲙⲡⲕⲁϩ ⲛⲕⲏⲙⲉ ϩⲣⲁⲓ ϩⲙⲡⲁⲑⲟⲩⲣⲏⲥ ⲉⲩϫⲱ ⲙⲙⲟⲥ ⲛⲁϥ ϫⲉ

16 ⲡϣⲁϫⲉ ⲉⲛⲧⲁⲕϫⲟⲟϥ ⲛⲁⲛ ϩⲙⲡⲣⲁⲛ ⲙⲡϫⲟⲉⲓⲥ ⲛⲧⲛⲛⲁⲥⲱⲧⲙ ⲛⲥⲱⲕ ⲁⲛ ⲛϩⲏⲧϥ

17 ϫⲉϩⲛⲟⲩⲉⲓⲣⲉ ⲧⲛⲛⲁⲉⲓⲣⲉ ⲛϣⲁϫⲉ ⲛⲓⲙ ⲉⲧⲛⲏⲩ ⲉⲃⲟⲗ ϩⲛⲣⲱⲛ ⲉⲧⲣⲉⲛⲣⲑⲩⲥⲓⲁ ⲛⲧⲉⲣⲱ ⲛⲧⲡⲉ ⲁⲩⲱ ⲛⲧⲛⲟⲩⲱⲧⲛ ⲛⲁⲥ ⲉⲃⲟⲗ ⲛϩⲉⲛⲟⲩⲱⲧⲛ ⲕⲁⲧⲁⲧϩⲉ ⲉⲧⲛⲉⲓⲣⲉ ⲙⲙⲟⲥ ⲁⲛⲟⲛ ⲙⲛⲛⲉⲛⲉⲓⲟⲧⲉ ⲙⲛⲛⲉⲛⲉⲣⲱⲟⲩ ⲙⲛⲛⲉⲛⲁⲣⲭⲱⲛ ϩⲛⲙⲡⲟⲗⲓⲥ ⲛⲓⲟⲩⲇⲁ ⲙⲛⲡⲃⲟⲗ ⲛⲧϩⲓⲏⲙ ⲁⲩⲱ ⲛⲉⲁⲛⲥⲓ ⲛⲟⲉⲓⲕ ⲡⲉ ⲁⲛ ϣⲱⲡⲉ ⲉⲛⲥⲙⲟⲛⲧ ⲁⲩⲱ ⲙⲡⲛⲛⲁⲩ ⲉⲡⲉⲧϩⲟⲟⲩ

18 ⲛⲧⲉⲣⲛⲗⲟ ⲇⲉ ⲉⲛⲣⲑⲩⲥⲓⲁ ⲛⲧⲉⲣⲱ ⲛⲧⲡⲉ ⲁⲛⲥⲃⲟⲕ ⲧⲏⲣⲛ ⲁⲩⲱ ⲁⲛⲱϫⲛ ϩⲛⲧⲥⲏϥⲉ ⲙⲛⲡϩⲉⲃⲱⲱⲛ

19 ⲁⲛⲟⲛ ϭⲉ ⲧⲛⲛⲁⲧⲁⲗⲉ ϣⲟⲩϩⲏⲛⲉ ⲉϩⲣⲁⲓ ⲛⲧⲉⲣⲱ ⲛⲧⲡⲉ ⲁⲩⲱ ⲧⲛⲛⲁⲟⲩⲱⲧⲛ ⲛⲁⲥ ⲉⲃⲟⲗ ⲛϩⲉⲛⲟⲩⲱⲧⲛ ⲙⲏ ⲁⲧϫⲛ ⲛⲉⲛϩⲟⲟⲩⲧ ⲛⲧⲁⲛⲧⲁⲙⲓⲟ ⲛⲁⲥ ⲛϩⲉⲛⲭⲁⲃⲱⲛⲏ ⲁⲩⲱ ⲁⲛⲟⲩⲱⲧⲛ ⲛⲁⲥ ⲉⲃⲟⲗ ⲛⲟⲩⲏⲣⲡ

20 ⲡⲉϫⲉⲓⲉⲣⲉⲙⲓⲁⲥ ⲙⲡⲗⲁⲟⲥ ⲧⲏⲣϥ ⲛⲇⲩⲛⲁⲧⲟⲥ ⲙⲛⲛⲉϩⲓⲟⲙⲉ ⲙⲡⲗⲁⲟⲥ ⲧⲏⲣϥ ⲛⲉⲛⲧⲁⲩⲟⲩⲱϣⲃ ⲛⲁϥ ⲛϩⲉⲛϣⲁϫⲉ ⲉϥϫⲱ ⲙⲙⲟⲥ ⲛⲁⲩ

21 ϫⲉⲙⲏ ⲛⲧⲉⲑⲩⲥⲓⲁ ⲁⲛ ⲉⲛⲧⲁⲧⲉⲧⲛⲁⲁⲥ ϩⲛⲙⲡⲟⲗⲓⲥ ⲛⲓⲟⲩⲇⲁ ⲙⲛⲡⲃⲟⲗ ⲛⲧϩⲓⲏⲙ ⲛⲧⲱⲧⲛ ⲙⲛⲛⲉⲧⲛⲉⲓⲟⲧⲉ ⲙⲛⲛⲉⲧⲛⲣⲣⲱⲟⲩ ⲙⲛⲛⲉⲧⲛⲁⲣⲭⲱⲛ ⲙⲛⲡⲗⲁⲟⲥ ⲙⲡⲕⲁϩ ⲧⲉⲛⲧⲁϥⲣⲡⲉⲥⲙⲉⲉⲩⲉ ⲛϭⲓⲡϫⲟⲉⲓⲥ ⲉⲁⲥⲉⲓ ⲉϩⲣⲁⲓ ⲉϫⲙⲡⲉϥϩⲏⲧ

22 ⲙⲡϥⲉϣϥⲓ ϭⲉ ⲉⲣⲟϥ ⲛϭⲓⲡϫⲟⲉⲓⲥ ⲙⲡⲉⲙⲧⲟ ⲉⲃⲟⲗ ⲛⲙⲡⲟⲛⲏⲣⲓⲁ ⲛⲛⲉⲧⲛϩⲃⲏⲩⲉ ⲁⲩⲱ ⲉⲃⲟⲗ ϩⲛⲛⲃⲟⲧⲉ ⲉⲛⲧⲁⲧⲉⲧⲛⲁⲁⲩ ⲁⲡⲉⲧⲛⲕⲁϩ ϣⲱⲡⲉ ⲉⲩϫⲁⲓⲉ ⲙⲛⲟⲩⲙⲁ ⲉⲙⲉⲩⲙⲟⲟϣⲉ ϩⲓϫⲱϥ ⲁⲩⲱ ⲉⲩⲥⲁϩⲟⲩ ⲛⲧϩⲉ ⲙⲡϩⲟⲟⲩ ⲛϩⲟⲟⲩ

23 ⲙⲡⲉⲙⲧⲟ ⲉⲃⲟⲗ ⲛⲛⲉⲧⲉⲧⲛⲧⲁⲗⲉ ϣⲟⲩϩⲏⲛⲉ ⲛⲁⲩ ⲉϩⲣⲁⲓ ⲙⲛⲛⲉⲛⲧⲁⲧⲉⲧⲛⲣⲛⲟⲃⲉ ⲉⲡϫⲟⲉⲓⲥ ⲛϩⲏⲧⲟⲩ ⲁⲩⲱ ⲙⲡⲉⲧⲛⲥⲱⲧⲙ ⲛⲥⲁⲡϫⲟⲉⲓⲥ ⲟⲩⲇⲉ ⲙⲡⲉⲧⲛⲙⲟⲟϣⲉ ϩⲛⲛⲉϥⲟⲩⲁϩ ⲥⲁϩⲛⲉ ⲙⲛⲡⲉϥⲛⲟⲙⲟⲥ ⲙⲛⲛⲉϥⲙⲛⲧⲙⲛⲧⲣⲉ ⲁⲛⲉⲓⲡⲉⲧϩⲟⲟⲩ ⲧⲏⲣⲟⲩ ⲉⲓ ⲉϩⲣⲁⲓ ⲉϫⲱⲧⲛ

24 ⲁⲩⲱ ⲡⲉϫⲉⲓⲉⲣⲉⲙⲓⲁⲥ ⲙⲡⲗⲁⲟⲥ ⲧⲏⲣϥ ⲙⲛⲛⲉϩⲓⲟⲙⲉ ϫⲉⲥⲱⲧⲙ ⲉⲡϣⲁϫⲉ ⲙⲡϫⲟⲉⲓⲥ

25 ⲧⲁⲓ ⲧⲉ ⲧϩⲉ ⲉⲛⲧⲁϥϫⲟⲟⲥ ⲛϭⲓⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ϫⲉⲛⲧⲱⲧⲛ ⲙⲛⲛⲉⲧⲛϩⲓⲟⲙⲉ ⲁⲧⲉⲧⲛϣⲁϫⲉ ϩⲛⲧⲉⲧⲛⲧⲁⲡⲣⲟ ⲁⲩⲱ ⲁⲧⲉⲧⲛϫⲱⲕ ⲉⲃⲟⲗ ϩⲛⲛⲉⲧⲛϭⲓϫ ⲉⲧⲉⲧⲛϫⲱ ⲙⲙⲟⲥ ϫⲉϩⲛⲟⲩⲉⲓⲣⲉ ⲧⲛⲛⲁⲉⲓⲣⲉ ⲛϩⲉⲛϩⲟⲙⲟⲗⲟⲅⲓⲁ ⲛⲉⲛⲧⲁⲛϫⲟⲟⲩ ⲉⲧⲣⲉⲛⲧⲁⲗⲉ ⲑⲩⲥⲓⲁ ⲉϩⲣⲁⲓ ⲛⲧⲉⲣⲱ ⲛⲧⲡⲉ ⲁⲩⲱ ⲉⲩⲱⲧⲛ ⲛⲁⲥ ⲉⲃⲟⲗ ⲛϩⲉⲛⲏⲣⲡ ϩⲛⲟⲩⲙⲟⲩⲛ ⲉⲃⲟⲗ ⲁⲧⲉⲧⲛⲙⲟⲩⲛ ⲉⲃⲟⲗ ϩⲛⲛⲉⲧⲛϩⲟⲙⲟⲗⲟⲅⲓⲁ ⲁⲩⲱ ϩⲛⲟⲩⲉⲓⲣⲉ ⲁⲧⲉⲧⲛⲁⲁⲩ

26 ⲉⲧⲃⲉⲡⲁⲓ ⲥⲱⲧⲙ ⲉⲡϣⲁϫⲉ ⲙⲡϫⲟⲉⲓⲥ ⲛⲁⲓⲟⲩⲇⲁ ⲧⲏⲣⲟⲩ ⲛⲉⲧϩⲙⲟⲟⲥ ϩⲙⲡⲕⲁϩ ⲛⲕⲏⲙⲉ ⲉⲓⲥ ϩⲏⲏⲧⲉ ⲁⲉⲓⲱⲣⲕ ϩⲙⲡⲁⲛⲟϭ ⲛⲣⲁⲛ ⲡⲉϫⲉⲡϫⲟⲉⲓⲥ ϫⲉⲉϣⲱⲡⲉ ⲉⲣⲉⲡⲁⲣⲁⲛ ϫⲓⲛⲧⲉⲛⲟⲩ ⲛⲁϭⲱ ϩⲛⲧⲧⲁⲡⲣⲟ ⲛⲛⲁⲓⲟⲩⲇⲁ ⲧⲏⲣⲟⲩ ⲉⲧⲣⲉⲩϫⲟⲟⲥ ϫⲉϥⲟⲛϩ ⲛϭⲓⲡϫⲟⲉⲓⲥ ⲡϫⲟⲉⲓⲥ ⲉϫⲙⲡⲕⲁϩ ⲧⲏⲣϥ ⲛⲕⲏⲙⲉ

27 ϫⲉⲉⲓⲥϩⲏⲏⲧⲉ ⲁⲛⲟⲕ ⲁⲉⲓⲣⲟⲉⲓⲥ ⲉϩⲣⲁⲓ ⲉϫⲱⲟⲩ ⲉⲧϩⲙⲕⲟⲟⲩ ⲁⲩⲱ ⲉⲧⲙⲣⲡⲉⲧⲛⲁⲛⲟⲩϥ ⲛⲁⲩ ⲛⲥⲉⲱϫⲛ ⲛϭⲓⲛⲁⲓⲟⲩⲇⲁ ⲧⲏⲣⲟⲩ ⲛⲉⲧⲟⲩⲏϩ ϩⲙⲡⲕⲁϩ ⲛⲕⲏⲙⲉ ϩⲛⲧⲥⲏϥⲉ ⲙⲛⲡⲉϩⲕⲟ ϣⲁⲛⲧⲟⲩⲱϫⲛ

28 ⲁⲩⲱ ⲡⲉⲧⲛⲁⲛⲟⲩϩⲙ ϩⲛⲧⲥⲏϥⲉ ⲥⲉⲛⲁⲕⲧⲟⲟⲩ ⲉⲃⲟⲗ ϩⲙⲡⲕⲁϩ ⲛⲕⲏⲙⲉ ⲉⲡⲕⲁϩ ⲛⲓⲟⲩⲇⲁ ⲉⲩⲥⲟⲃⲕ ϩⲛⲧⲉⲩⲏⲡⲉ ⲁⲩⲱ ⲥⲉⲛⲁⲉⲓⲙⲉ ⲧⲏⲣⲟⲩ ⲛϭⲓⲛϣⲱϫⲡ ⲛⲓⲟⲩⲇⲁ ⲛⲁⲓ ⲉⲛⲧⲁⲩⲣⲣⲙⲛϭⲟⲉⲓⲗⲉ ϩⲙⲡⲕⲁϩ ⲛⲕⲏⲙⲉ ϫⲉϣⲁϫⲉ ⲛⲛⲓⲙ ⲡⲉⲧⲥⲙⲟⲛⲧ ⲡⲱⲓ ⲡⲉ ⲡⲉ ϫⲛ ⲡⲱⲟⲩ ⲡⲉ

29 ⲁⲩⲱ ⲡⲁⲓ ⲟⲩⲙⲁⲉⲓⲛ ⲛⲏⲧⲛ ⲡⲉ ϫⲉϯⲛⲁϭⲙ ⲡⲉⲧⲛϣⲓⲛⲉ ⲁⲛⲟⲕ ⲉϩⲉⲛⲡⲉⲧϩⲟⲟⲩ ⲡⲉϫⲉⲡϫⲟⲉⲓⲥ

30 ⲧⲁⲓ ⲧⲉ ⲧϩⲉ ⲉⲛⲧⲁⲡϫⲟⲉⲓⲥ ϫⲟⲟⲥ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁϯ ⲛⲟⲩⲁⲫⲣⲏ ⲡⲣⲣⲟ ⲛⲕⲏⲙⲉ ⲉϩⲣⲁⲓ ⲉⲛϭⲓϫ ⲙⲡⲉϥϫⲁϫⲉ ⲁⲩⲱ ⲉϩⲣⲁⲓ ⲉⲛϭⲓϫ ⲛⲛⲉⲧⲕⲱⲧⲉ ⲛⲥⲁⲧⲉϥⲯⲩⲭⲏ ⲛⲧϩⲉ ⲉⲛⲧⲁⲓϯ ⲛⲥⲉⲇⲉⲕⲓⲁⲥ ⲡⲣⲣⲟ ⲛⲓⲟⲩⲇⲁ ⲉϩⲣⲁⲓ ⲉⲛϭⲓϫ ⲛⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ ⲡⲉϥϫⲁϫⲉ ⲁⲩⲱ ⲡⲉⲧϣⲓⲛⲉ ⲛⲥⲁⲧⲉϥⲯⲩⲭⲏ

31 ⲡϣⲁϫⲉ ⲉⲛⲧⲁⲓⲉⲣⲉⲙⲓⲁⲥ ⲡⲉⲡⲣⲟⲫⲏⲧⲏⲥ ϫⲟⲟϥ ⲃⲃⲁⲣⲟⲩⲭ ⲡϣⲏⲣⲉ ⲛⲛⲏⲣⲉⲓⲁⲥ ⲛⲧⲉⲣⲉϥⲥϩⲁⲓ ⲛⲛⲉⲓϣⲁϫⲉ ⲉⲩϫⲱⲱⲙⲉ ⲉⲃⲟⲗ ϩⲛⲧⲧⲁⲡⲣⲟ ⲛⲓⲉⲣⲉⲙⲓⲁⲥ ϩⲛⲧⲙⲉϩϥⲧⲟ ⲛⲣⲟⲙⲡⲉ ⲛⲓⲱⲁⲕⲉⲓⲙ ⲡϣⲏⲣⲉ ⲛⲓⲱⲥⲓⲁⲥ ⲡⲣⲣⲟ ⲛⲓⲟⲩⲇⲁ

32 ⲧⲁⲓ ⲧⲉ ⲧϩⲉ ⲉⲛⲧⲁϥϫⲟⲟⲥ ⲛϭⲓⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲉϩⲣⲁⲓ ⲉϫⲱⲕ ⲃⲁⲣⲟⲩⲭ

33 ϫⲉⲁⲕϫⲟⲟⲥ ϫⲉⲟⲩⲟⲉⲓ ⲛⲁⲓ ⲟⲩⲟⲉⲓ ⲛⲁⲓ ϫⲉⲁⲡϫⲟⲉⲓⲥ ⲟⲩⲉϩ ⲟⲩϩⲓⲥⲉ ⲉϫⲙⲡⲁⲙⲕⲁϩ ⲁⲓⲛⲕⲟⲧⲕ ϩⲛϩⲉⲛⲁϣ ⲁϩⲟⲙ ⲁⲩⲱ ⲙⲡⲓϭⲓⲛⲉ ⲛⲟⲩⲁⲛⲁⲡⲁⲩⲥⲓⲥ

34 ⲁϫⲓⲥ ⲛⲁϥ ⲛⲧⲉⲓϩⲉ ϫⲉⲧⲁⲓ ⲧⲉ ⲧϩⲉ ⲉⲛⲧⲁϥϫⲟⲟⲥ ⲛϭⲓⲡϫⲟⲉⲓⲥ ϫⲉⲉⲓⲥϩⲏⲏⲧⲉ ⲁⲛⲟⲕ ⲛⲉⲛⲧⲁⲓⲕⲟⲧⲟⲩ ϯⲛⲁϣⲣϣⲱⲣⲟⲩ ⲁⲩⲱ ⲛⲉⲛⲧⲁⲓⲧⲟϭⲟⲩ ϯⲛⲁⲡⲟⲣⲕⲟⲩ

35 ⲛⲧⲟⲕ ϩⲱⲱⲕ ⲕϣⲓⲛⲉ ⲛⲁⲕ ⲛⲥⲁϩⲉⲛⲛⲟϭ ⲙⲡⲣϣⲓⲛⲉ ϭⲉ ⲛⲥⲱⲟⲩ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁⲉⲓⲛⲉ ⲛϩⲉⲛⲡⲉⲧϩⲟⲟⲩ ⲉϫⲛⲥⲁⲣⲝ ⲛⲓⲙ ⲡⲉϫⲉⲡϫⲟⲉⲓⲥ ⲁⲩⲱ ϯⲛⲁϯ ⲛⲧⲉⲕⲯⲩⲭⲏ ⲉⲧⲣⲉⲥⲟⲩϫⲁⲓ ϩⲛⲙⲁ ⲛⲓⲙ ⲉⲧⲕⲛⲁⲃⲱⲕ ⲉⲣⲟⲟⲩ ⲉⲙⲁⲩ.