Jeremiah 47 — Coptic (Sahidic)

1 ⲡϣⲁϫⲉ ⲉⲛⲧⲁϥϣⲱⲡⲉ ϣⲁⲓⲉⲣⲉⲙⲓⲁⲥ ⲉⲃⲟⲗ ϩⲓⲧⲙⲡϫⲟⲉⲓⲥ ⲙⲛⲛⲥⲁⲧⲣⲉϥϫⲟⲟⲩ ⲛϭⲓⲛⲁⲃⲟⲩⲍⲁⲣⲇⲁⲛ ⲡⲁⲣⲭⲓⲙⲁⲅⲓⲣⲟⲥ ⲉⲃⲟⲗ ϩⲛⲇⲁⲙⲁⲛ ⲛⲧⲉⲣⲉϥϫⲓ ϩⲛϩⲉⲛⲉⲓⲛⲉ ⲛϩⲟⲙⲛⲧ ϩⲛⲧⲙⲏⲧⲉ ⲛⲧⲁⲡⲟⲓⲕⲓⲁ ⲛⲓⲟⲩⲇⲁ ⲉⲃⲟⲗ ϩⲛⲛⲉⲩϩⲏⲅⲉⲙⲱⲛ ⲉϩⲣⲁⲓ ⲉⲧⲃⲁⲃⲩⲗⲱⲛ

2 ⲁⲩⲱ ⲁϥϫⲓ ⲛⲓⲉⲣⲉⲙⲓⲁⲥ ⲛϭⲓⲡⲁⲣⲭⲓⲙⲁⲅⲓⲣⲟⲥ ⲡⲉϫⲁϥ ⲛⲁϥ ϫⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲁϥϣⲁϫⲉ ⲛⲛⲉⲓⲡⲉⲧϩⲟⲟⲩ ⲉⲛⲧⲟⲩ ⲉϫⲙⲡⲉⲓⲙⲁ

3 ⲁⲩⲱ ⲁϥⲁⲁⲩ ⲛϭⲓⲡϫⲟⲉⲓⲥ ϫⲉⲁⲧⲉⲧⲛⲣⲛⲟⲃⲉ ⲉⲣⲟϥ ⲁⲩⲱ ⲙⲡⲉⲧⲛⲥⲱⲧⲙ ⲛⲥⲁⲧⲉϥⲥⲙⲏ

4 ⲉⲓⲥ ϩⲏⲏⲧⲉ ϭⲉ ⲁⲓⲃⲟⲗⲕ ⲉⲃⲟⲗ ϩⲛⲡⲉⲓⲛⲉ ⲛϩⲟⲙⲛⲧ ⲉⲧϩⲛⲛⲉⲕϭⲓϫ ⲉϣϫⲉ ⲛⲁⲛⲟⲩⲥ ⲙⲡⲉⲕⲙⲧⲟ ⲉⲃⲟⲗ ⲉⲧⲣⲉⲕⲉⲓ ⲛⲙⲙⲁⲓ ⲉⲧⲃⲁⲃⲩⲗⲱⲛ ⲉⲉⲓⲉ ⲁⲙⲟⲩ ⲁⲩⲱ ϯⲛⲁⲟⲃϣⲧ ⲉⲣⲟⲕ ⲁⲛ

5 ⲉϣϫⲉ ⲟⲩⲡⲟⲛⲏⲣⲟⲛ ⲇⲉ ⲡⲉ ⲛⲛⲁϩⲣⲛⲛⲉⲕⲃⲁⲗ ⲉⲧⲣⲉⲕⲉⲓ ⲉⲧⲃⲁⲃⲩⲗⲱⲛ ⲉⲉⲓⲉ ⲕⲟⲧⲕ ⲛⲅⲃⲱⲕ ϣⲁⲅⲟⲇⲟⲗⲓⲁⲥ ⲡϣⲏⲣⲉ ⲛⲁⲭⲓⲕⲁⲙ ⲡϣⲏⲣⲉ ⲛⲥⲁⲫⲁⲛ ⲡⲁⲓ ⲉⲛⲧⲁϥⲕⲁⲑⲓⲥⲧⲁ ⲙⲙⲟϥ ⲛϭⲓⲡⲣⲣⲟ ⲛⲧⲃⲁⲃⲩⲗⲱⲛ ϩⲛⲡⲕⲁϩ ⲛⲓⲟⲩⲇⲁ ⲛⲅⲟⲩⲱϩ ⲛⲙⲙⲁϥ ⲛⲧⲙⲏⲧⲉ ⲙⲡⲗⲁⲟⲥ ϩⲱⲃ ⲛⲓⲙ ⲉⲧⲛⲁⲛⲟⲩϥ ⲛⲛⲁϩⲣⲛⲛⲉⲕⲃⲁⲗ ⲉⲁⲁⲩ ⲙⲟⲟϣⲉ ⲛⲅⲁⲁⲩ ⲁⲩⲱ ⲡⲁⲣⲭⲓⲙⲁⲅⲓⲣⲟⲥ ⲁϥϯ ⲛϩⲉⲛⲇⲱⲣⲟⲛ ⲛⲁϥ ⲁϥϫⲟⲟⲩϥ

6 ⲉⲣⲁⲧϥ ⲛⲅⲟⲇⲟⲗⲓⲁⲥ ⲡϣⲏⲣⲉ ⲛⲁⲭⲓⲕⲁⲙ ⲉϩⲣⲁⲓ ⲉⲙⲁⲥⲥⲏⲫⲁ ⲁϥϩⲙⲟⲟⲥ ⲛⲧⲙⲏⲧⲉ ⲙⲡⲗⲁⲟⲥ ⲉⲛⲧⲁϥϣⲱϫⲡ ϩⲙⲡⲕⲁϩ

7 ⲁⲩⲥⲱⲧⲙ ⲧⲏⲣⲟⲩ ⲛϭⲓⲛϩⲏⲅⲉⲙⲱⲛ ⲛⲧϭⲟⲙ ⲉⲧϩⲛⲧⲥⲱϣⲉ ⲛⲧⲟⲟⲩ ⲙⲛⲛⲉⲩⲣⲱⲙⲉ ⲉⲧϩⲛⲧⲥⲱϣⲉ ϫⲉⲁⲡⲣⲣⲟ ⲛⲧⲃⲁⲃⲩⲗⲱⲛ ⲕⲁⲑⲓⲥⲧⲁ ⲛⲅⲟⲇⲟⲗⲓⲁⲥ ϩⲙⲡⲕⲁϩ ⲁⲩⲱ ⲁϥϯ ⲉⲧⲟⲟⲧϥ ⲛϩⲉⲛⲣⲱⲙⲉ ⲙⲛⲛⲉⲩϩⲓⲟⲙⲉ ⲛⲁⲓ ⲉⲛⲧⲁϥⲡⲟⲟⲛⲟⲩ ⲉϩⲣⲁⲓ ⲉⲧⲃⲁⲃⲩⲗⲱⲛ

8 ⲁⲩⲱ ⲁⲩⲉⲓ ϣⲁⲅⲟⲇⲟⲗⲓⲁⲥ ⲉϩⲣⲁⲓ ⲉⲙⲁⲥⲥⲏⲫⲁ ⲛϭⲓⲥⲁⲙⲁⲏⲗ ⲡϣⲏⲣⲉ ⲛⲁⲑⲁⲛⲓⲁⲥ ⲙⲛⲓⲱⲁⲛⲁⲛ ⲡϣⲏⲣⲉ ⲛⲕⲁⲣⲏⲉ ⲙⲛⲥⲁⲣⲁⲓⲁⲥ ⲡϣⲏⲣⲉ ⲛⲑⲁⲛⲁⲉⲙⲉⲑ ⲙⲛⲛϣⲏⲣⲉ ⲛⲱⲫⲉ ⲡϣⲏⲣⲉ ⲛⲛⲉⲧⲱⲫⲁⲧⲉⲓ ⲙⲛⲓⲉⲍⲟⲛⲓⲁⲥ ⲡϣⲏⲣⲉ ⲛⲙⲟⲭⲁⲧⲉⲓ ⲛⲧⲟⲟⲩ ⲙⲛⲛⲉⲩⲣⲱⲙⲉ

9 ⲁⲩⲱ ⲁϥⲱⲣⲕ ⲛⲁⲩ ⲛϭⲓⲅⲟⲇⲟⲗⲓⲁⲥ ⲙⲛⲛⲉⲩⲕⲉⲣⲱⲙⲉ ⲉϥϫⲱ ⲙⲙⲟⲥ ⲛⲁⲩ ϫⲉⲙⲡⲣⲣϩⲟⲧⲉ ϩⲏⲧⲟⲩ ⲛⲛϩⲙϩⲁⲗ ⲛⲛⲉⲭⲁⲗⲇⲁⲓⲟⲥ ⲁⲗⲗⲁ ⲟⲩⲱϩ ϩⲓϫⲙⲡⲉⲓⲕⲁϩ ⲛⲧⲉⲧⲛⲣϩⲱⲃ ⲙⲡⲣⲣⲟ ⲛⲧⲃⲁⲃⲩⲗⲱⲛ ⲁⲩⲱ ⲡⲉⲧⲛⲁⲛⲟⲩϥ ⲛⲁϣⲱⲡⲉ ⲛⲏⲧⲛ

10 ⲉⲓⲥ ϩⲏⲏⲧⲉ ⲁⲛⲟⲕ ϯϩⲙⲟⲟⲥ ⲙⲡⲉⲧⲛⲙⲧⲟ ⲉⲃⲟⲗ ϩⲛⲙⲁⲥⲥⲏⲫⲁ ⲉⲧⲣⲁϩⲉⲣⲁⲧ ⲙⲡⲉⲙⲧⲟ ⲉⲃⲟⲗ ⲛⲛⲉⲭⲁⲗⲇⲁⲓⲟⲥ ⲛⲁⲓ ⲉⲧⲛⲏⲩ ⲉϫⲛⲧⲏⲩⲧⲛ ⲛⲧⲱⲧⲛ ⲇⲉ ϩⲱⲧⲧⲏⲩⲧⲛ ⲥⲱⲟⲩϩ ⲛⲟⲩⲏⲣⲡ ⲙⲛⲟⲩϩⲟⲡⲱⲣⲁ ⲙⲛⲟⲩⲛⲉϩ ⲛⲧⲉⲧⲛⲛⲟϫⲟⲩ ⲉϩⲣⲁⲓ ⲉⲛⲉⲧⲛⲁⲅⲅⲓⲟⲛ ⲛⲧⲉⲧⲛϣⲱⲡⲉ ϩⲛⲙⲡⲟⲗⲓⲥ ⲛⲁⲓ ⲉⲛⲧⲁⲧⲉⲧⲛⲁⲙⲁϩⲧⲉ ⲉϫⲱⲟⲩ

11 ⲛⲓⲟⲩⲇⲁⲓ ⲧⲏⲣⲟⲩ ⲉⲧϩⲙⲡⲕⲁϩ ⲙⲙⲱⲁⲃ ⲙⲛⲛⲉⲧϩⲙⲡⲕⲁϩ ⲛⲛϣⲏⲣⲉ ⲛⲁⲙⲙⲱⲛ ⲙⲛⲛⲉⲧϩⲛϯⲇⲟⲩⲙⲁⲓⲁ ⲙⲛⲛⲉⲧϩⲙⲡⲕⲁϩ ⲧⲏⲣϥ ⲁⲩⲥⲱⲧⲙ ⲛϫⲉ ⲁⲡⲣⲣⲟ ⲛⲧⲃⲁⲃⲩⲗⲱⲛ ϯ ⲛⲟⲩϣⲱϫⲡ ⲛⲛⲣⲱⲙⲉ ⲛⲓⲟⲩⲇⲁ ⲁⲩⲱ ϫⲉⲁϥⲕⲁⲑⲓⲥⲧⲁ ⲛⲅⲟⲇⲟⲗⲓⲁⲥ ⲡϣⲏⲣⲉ ⲛⲁⲭⲓⲕⲁⲙ ⲉϩⲣⲁⲓ ⲉϫⲱⲟⲩ

12 ⲁⲩⲕⲧⲟⲟⲩ ϭⲉ ⲛϭⲓⲛⲓⲟⲩⲇⲁⲓ ⲉⲃⲟⲗ ϩⲛⲛⲉⲩⲙⲁ ⲉⲛⲧⲁⲩϫⲱⲱⲣⲉ ⲉⲣⲟⲟⲩ ⲁⲩⲉⲓ ⲉϩⲣⲁⲓ ⲉⲡⲕⲁϩ ⲛⲓⲟⲩⲇⲁ ϣⲁⲅⲟⲇⲟⲗⲓⲁⲥ ⲉϩⲣⲁⲓ ⲉⲙⲁⲥⲥⲏⲫⲁ ⲁⲩⲥⲱⲟⲩϩ ⲉϩⲟⲩⲛ ⲛⲟⲩⲏⲣⲡ ⲙⲛⲟⲩⲛⲟϭ ⲛϩⲟⲡⲱⲣⲁ ⲉⲛⲁϣⲱⲥ ⲙⲛⲟⲩⲛⲉϩ

13 ⲁⲩⲱ ⲓⲱⲁⲛⲁⲛ ⲡϣⲏⲣⲉ ⲛⲕⲁⲣⲏⲉ ⲙⲛⲛϩⲏⲅⲉⲙⲱⲛ ⲧⲏⲣⲟⲩ ⲛⲧϭⲟⲙ ⲛⲁⲓ ⲉⲧϩⲛⲧⲥⲱϣⲉ ⲁⲩⲉⲓ ϣⲁⲅⲟⲇⲟⲗⲓⲁⲥ ⲉⲙⲁⲥⲥⲏⲫⲁ

14 ⲡⲉϫⲁⲩ ⲛⲁϥ ϫⲉϩⲛⲟⲩⲉⲓⲙⲉ ⲕⲉⲓⲙⲉ ϫⲉⲃⲉⲗⲓⲥⲁ ⲡⲣⲣⲟ ⲛⲛϣⲏⲣⲉ ⲛⲁⲙⲙⲱⲛ ⲁϥϫⲟⲟⲩ ⲓⲥⲙⲁⲏⲗ ⲡϣⲏⲣⲉ ⲛⲁⲑⲁⲛⲓⲁⲥ ⲉⲧⲣⲉϥⲡⲁⲧⲁⲥⲥⲉⲓ ⲛⲧⲉⲕⲯⲩⲭⲏ ⲁⲩⲱ ⲅⲟⲇⲟⲗⲓⲁⲥ ⲙⲡϥⲡⲓⲥⲧⲉⲩ ⲛⲁⲩ

15 ⲡⲉϫⲉⲓⲱⲁⲛⲁⲛ ⲛⲅⲟⲇⲟⲗⲓⲁⲥ ϩⲛⲟⲩϩⲱⲡ ϩⲛⲙⲁⲥⲥⲏⲫⲁ ϫⲉϯⲛⲁⲃⲱⲕ ⲧⲉⲛⲟⲩ ⲧⲁⲡⲁⲧⲁⲥⲥⲉⲓ ⲛⲓⲥⲙⲁⲏⲗ ⲙⲡⲣⲧⲣⲉⲗⲁⲁⲩ ⲉⲓⲙⲉ ⲙⲏⲡⲱⲥ ⲛϥⲡⲁⲧⲁⲥⲥⲉⲓ ⲛⲧⲉⲕⲯⲩⲭⲏ ⲛⲥⲉϫⲱⲱⲣⲉ ⲉⲃⲟⲗ ⲛϭⲓⲛⲓⲟⲩⲇⲁⲓ ⲧⲏⲣⲟⲩ ⲉⲧⲥⲟⲟⲩϩ ⲉⲣⲟⲕ ⲁⲩⲱ ⲛⲥⲉⲧⲁⲕⲟ ⲛϭⲓⲛϣⲱϫⲡ ⲛⲓⲟⲩⲇⲁ

16 ⲡⲉϫⲉⲅⲟⲇⲟⲗⲓⲁⲥ ⲛⲓⲱⲁⲛⲁⲛ ϫⲉⲙⲡⲣⲉⲓⲣⲉ ⲕⲁⲧⲁⲡⲉⲓϣⲁϫⲉ ⲉⲕϫⲓ ϭⲟⲗ ⲅⲁⲣ ⲛⲧⲟⲕ ⲉⲓⲥⲙⲁⲏⲗ