Read Jeremiah 46 side by side with translations · The Final Bible
1 ⲁⲥϣⲱⲡⲉ ϩⲙⲡⲙⲉϩⲯⲓⲧ ⲛⲉⲃⲟⲧ ⲛⲥⲉⲇⲉⲕⲓⲁⲥ ⲡⲣⲣⲟ ⲛⲓⲟⲩⲇⲁ ⲁϥⲉⲓ ⲛϭⲓⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ ⲙⲛⲧⲉϥϭⲟⲙ ⲧⲏⲣⲥ ⲉϫⲛⲧϩⲓⲉⲣⲟⲩⲥⲁⲗⲏⲙ ⲁⲩⲕⲱⲧⲉ ⲉⲣⲟⲥ
2 ⲁⲩⲱ ϩⲛⲧⲙⲉϩⲙⲛⲧⲟⲩⲉ ⲛⲣⲟⲙⲡⲉ ⲛⲥⲉⲇⲉⲕⲓⲁⲥ ϩⲛⲡⲙⲉϩϥⲧⲟⲟⲩ ⲛⲉⲃⲟⲧ ⲛⲥⲟⲩⲯⲓⲧ ⲙⲡⲉⲃⲟⲧ ⲁⲥⲡⲱϩ ⲛϭⲓⲧⲡⲟⲗⲓⲥ
3 ⲁⲩⲃⲱⲕ ⲉϩⲟⲩⲛ ⲧⲏⲣⲟⲩ ⲉⲣⲟⲥ ⲛϭⲓⲛϩⲏⲅⲉⲙⲱⲛ ⲙⲡⲣⲣⲟ ⲛⲧⲃⲁⲃⲩⲗⲱⲛ ⲁⲩϩⲙⲟⲟⲥ ϩⲛⲧⲡⲩⲗⲏ ⲉⲧϩⲛⲧⲙⲏⲧⲉ ⲉⲧⲉⲛⲁⲓ ⲛⲉ ⲙⲁⲣⲅⲁⲛⲁⲥⲁⲣ ⲥⲁⲙⲁⲅⲱⲑ ⲙⲛⲛⲁⲃⲟⲩⲥⲁⲭⲁⲣ ⲛⲁⲃⲟⲩⲥⲁⲣⲉⲓⲥ ⲛⲁⲅⲁⲣⲅⲁⲥⲛⲁⲥⲉⲣ ⲣⲁⲙⲁⲅ ⲙⲛⲡⲕⲉⲥⲉⲉⲡⲉ ⲛϩⲏⲅⲉⲙⲱⲛ ⲙⲡⲣⲣⲟ ⲛⲧⲃⲁⲃⲩⲗⲱⲛ
14 ⲁⲩⲱ ⲁⲩϫⲟⲟⲩ ⲁⲩϫⲓ ⲛⲓⲉⲣⲉⲙⲓⲁⲥ ⲉⲃⲟⲗ ϩⲛⲧⲁⲩⲗⲏ ⲙⲡⲉϣⲧⲉⲕⲟ ⲁⲩⲱ ⲁⲩⲧⲁⲁϥ ⲉⲧⲟⲟⲧϥ ⲛⲅⲟⲇⲟⲗⲓⲁⲥ ⲡϣⲏⲣⲉ ⲛⲁⲭⲓⲕⲁⲙ ⲡϣⲏⲣⲉ ⲛⲥⲁⲫⲁⲛ ⲁⲩⲱ ⲁⲩⲛⲧϥ ⲉⲃⲟⲗ ϩⲙⲡⲏⲓ ⲁϥϩⲙⲟⲟⲥ ϩⲛⲧⲙⲏⲧⲉ ⲙⲡⲗⲁⲟⲥ
15 ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲓⲉⲣⲉⲙⲓⲁⲥ ϩⲛⲧⲁⲩⲗⲏ ⲙⲡⲉϣⲧⲉⲕⲟ ⲉϥϫⲱ ⲙⲙⲟⲥ
16 ϫⲉⲃⲱⲕ ⲁϫⲓⲥ ⲛⲁⲃⲇⲉⲙⲉⲗⲉⲭ ⲡⲉϭⲱϣ ⲉⲕϫⲱ ⲙⲙⲟⲥ ϫⲉⲧⲁⲓ ⲧⲉ ⲧϩⲉ ⲉⲛⲧⲁⲡϫⲟⲉⲓⲥ ϫⲟⲟⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁⲉⲓⲛⲉ ⲛⲛⲁϣⲁϫⲉ ⲉϫⲛⲧⲉⲓⲡⲟⲗⲓⲥ ⲉϩⲉⲛⲡⲉⲧϩⲟⲟⲩ ⲁⲩⲱ ⲉϩⲉⲛⲡⲉⲧⲛⲁⲛⲟⲩϥ ⲁⲛ
17 ⲁⲩⲱ ϯⲛⲁⲧⲟⲩϫⲟⲕ ϩⲙⲡⲉϩⲟⲟⲩ ⲉⲧⲙⲙⲁⲩ ⲛⲧⲁⲧⲙⲧⲁⲁⲕ ⲉϩⲣⲁⲓ ⲛϭⲓϫ ⲛⲛⲣⲱⲙⲉ ⲛⲁⲓ ⲛⲧⲟⲕ ⲉⲧⲕⲣϩⲟⲧⲉ ⲙⲡⲉⲩⲙⲧⲟ ⲉⲃⲟⲗ
18 ϫⲉϩⲛⲟⲩⲛⲟⲩϩⲙ ϯⲛⲁⲛⲁϩⲙⲉⲕ ⲁⲩⲱ ⲛⲅⲛⲁϩⲉ ⲁⲛ ϩⲛⲧⲥⲏϥⲉ ⲧⲉⲕⲯⲩⲭⲏ ⲛⲁϣⲱⲡⲉ ⲉⲩϩⲏⲩ ϫⲉⲉⲣⲉϩⲧⲏⲕ ⲕⲏ ⲉⲣⲟⲓ ⲡⲉϫⲉⲡϫⲟⲉⲓⲥ
Jeremiah 45 · Jeremiah 47 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)