Jeremiah 26 — Coptic (Sahidic)

1 ϩⲛⲧⲁⲣⲭⲏ ⲉϥⲟ ⲛⲣⲣⲟ ⲛϭⲓⲥⲉⲇⲉⲕⲓⲁⲥ ⲡⲣⲣⲟ ⲡⲉⲓϣⲁϫⲉ ⲁϥϣⲱⲡⲉ ⲉϫⲛⲁⲓⲗⲁⲙ

2 ⲉⲧⲃⲉⲕⲏⲙⲉ ⲉϫⲛⲧϭⲟⲙ ⲙⲫⲁⲣⲁⲱ ⲛⲁⲭⲁⲱ ⲡⲣⲣⲟ ⲛⲕⲏⲙⲉ ⲡⲁⲓ ⲉⲧϩⲓϫⲙ ⲡⲓⲉⲣⲟ ⲛⲉⲩⲫⲣⲁⲧⲏⲥ ϩⲛⲭⲁⲣⲙⲓⲥ ⲡⲉⲛⲧⲁϥⲡⲁⲧⲁⲥⲥⲉⲓ ⲙⲙⲟϥ ⲛϭⲓⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ ϩⲛⲧⲙⲉϩϥⲧⲟⲟⲩ ⲛⲣⲟⲙⲡⲉ ⲛⲓⲱⲁⲕⲉⲓⲙ ⲡⲣⲣⲟ ⲛⲓⲟⲩⲇⲁ

3 ϫⲓ ⲛⲏⲧⲛ ⲛϩⲉⲛϩⲟⲡⲗⲟⲛ ⲙⲛϩⲉⲛϭⲗ ⲛⲧⲉⲧⲉⲛⲥⲱⲟⲩϩ ⲉϩⲟⲩⲛ ⲉⲡⲡⲟⲗⲉⲙⲟⲥ

4 ϩⲱⲕ ⲛⲛⲉⲧⲛϩⲧⲱⲱⲣ ⲛϩⲓⲡⲡⲉⲩⲥ ⲁⲗⲉ ⲉϩⲣⲁⲓ ⲉϫⲱⲟⲩ ⲁⲩⲱ ⲛⲧⲉⲧⲛⲁϩⲉⲣⲁⲧⲧⲏⲩⲧⲛ ϩⲛⲛⲉⲧⲛⲡⲉⲣⲓⲕⲉⲫⲁⲗⲁⲓⲁ ⲉⲓⲛⲉ ⲉⲃⲟⲗ ⲛⲛⲉⲧⲉⲛⲙⲉⲣⲉϩ ⲛⲧⲉⲧⲛϯ ϩⲓⲱⲧⲧⲏⲩⲧⲛ ⲛⲛⲉⲧⲛϩⲱⲕ

5 ⲉⲧⲃⲉⲟⲩ ⲛⲧⲟⲟⲩ ⲥⲉϣⲧⲣⲧⲱⲣ ⲁⲩⲱ ⲥⲉⲡⲏⲧ ⲉⲡⲁϩⲟⲩ ⲉⲃⲟⲗ ϫⲉⲛⲉⲩϫⲱⲱⲣⲉ ⲥⲉⲛⲁϭⲉϫϭⲱϫⲟⲩ ϩⲛⲟⲩⲡⲱⲧ ⲁⲩⲡⲱⲧ ⲁⲩⲱ ⲙⲡⲟⲩⲕⲧⲟⲟⲩ

8 ⲙⲡⲓⲉⲣⲟ ⲁϥϫⲟⲟⲥ ϫⲉϯⲛⲁϫⲓⲥⲉ ⲧⲁϩⲃⲥ ⲡⲕⲁϩ ⲁⲩⲱ ⲛⲧⲁⲧⲁⲕⲉ ⲛⲉⲧϣⲟⲟⲡ ⲛϩⲏⲧϥ

9 ⲁⲗⲉ ⲉϫⲛⲛⲉϩⲧⲱⲱⲣ ⲛⲧⲉⲧⲛⲥⲟⲃⲧⲉ ⲛϩⲉⲛϩⲁⲣⲙⲁ ⲁⲙⲏⲉⲓⲛ ⲉⲃⲟⲗ ⲛⲣⲉϥⲙⲓϣⲉ ⲛⲛⲉϭⲟⲟϣ ⲁⲩⲱ ⲛⲗⲓⲃⲩⲕⲟⲥ ⲉⲧⲉⲧⲛϩⲏⲕ ⲛϩⲉⲛϩⲟⲡⲗⲟⲛ ⲛⲗⲩⲇⲟⲥ ⲃⲱⲕ ⲉϩⲣⲁⲓ ⲛⲧⲉⲧⲛϫⲱⲗⲕ ⲛⲛⲉⲧⲛⲡⲓⲧⲉ

10 ⲁⲩⲱ ⲡⲉϩⲟⲟⲩ ⲉⲧⲙⲙⲁⲩ ⲡⲉϩⲟⲟⲩ ⲙⲡϫⲓ ⲕⲃⲁ ⲡⲉ ⲙⲡϫⲟⲉⲓⲥ ⲡⲉⲛⲛⲟⲩⲧⲉ ⲉⲧⲣⲉϥϫⲓ ⲕⲃⲁ ϩⲛⲛⲉϥϫⲓϫⲉⲟⲩ ⲁⲩⲱ ⲧⲥⲏϥⲉ ⲙⲡϫⲟⲉⲓⲥ ⲥⲛⲁⲟⲩⲱⲙ ⲛⲥⲥⲉⲓ ⲁⲩⲱ ⲛⲥϯϩⲉ ⲉⲃⲟⲗ ϩⲙⲡⲉⲩⲥⲛⲟϥ ϫⲉⲧⲉⲑⲩⲥⲓⲁ ⲙⲡϫⲟⲉⲓⲥ ⲥⲁⲃⲁⲱⲑ ⲉⲥϣⲟⲟⲡ ⲉⲃⲟⲗ ϩⲙⲡⲕⲁϩ ⲙⲡⲉⲙϩⲓⲧ ϩⲓϫⲙⲡⲓⲉⲣⲟ ⲡⲉⲩⲫⲣⲁⲧⲏⲥ

11 ⲁⲙⲏ ⲉϩⲣⲁⲓ ⲉⲅⲁⲗⲁⲁⲇ ⲛⲧⲉϫⲓ ⲛⲟⲩⲥⲟⲛⲧⲉ ⲧⲡⲁⲣⲑⲉⲛⲟⲥ ⲧϣⲉⲉⲣⲉ ⲛⲕⲏⲙⲉ ⲁⲣⲧⲁϣⲟ ⲛⲛⲟⲩⲧⲁⲗϭⲟ ⲉⲩⲡⲉⲧϣⲟⲩⲉⲓⲧ ⲙⲙⲛϩⲏⲩ ϣⲟⲟⲡ ⲛⲉ

12 ⲁⲛϩⲉⲑⲛⲟⲥ ⲥⲱⲧⲙ ⲉⲡⲟⲩϩⲣⲟⲟⲩ ⲁⲩⲱ ⲁⲡⲕⲁϩ ⲙⲟⲩϩ ϩⲙⲡⲟⲩⲁϣϣⲕⲁⲕ ϫⲉⲟⲩⲣⲉϥⲙⲓϣⲉ ⲁϥϭⲃⲃⲉ ⲛⲛⲁϩⲣⲛⲟⲩⲣⲉϥⲙⲓϣⲉ ⲁⲩϩⲉ ⲙⲡⲉⲥⲛⲁⲩ ϩⲓⲟⲩⲥⲟⲡ

13 ⲛⲁⲓ ⲛⲉ ⲛϣⲁϫⲉ ⲉⲛⲧⲁⲡϫⲟⲉⲓⲥ ϫⲟⲟⲩ ϩⲛⲧϭⲓϫ ⲛⲓⲉⲣⲏⲙⲓⲁⲥ ⲡⲉⲡⲣⲟⲫⲏⲧⲏⲥ ⲉⲧⲣⲉⲡⲣⲣⲟ ⲛⲧⲃⲁⲃⲩⲗⲱⲛ ⲉⲓ ⲛϥⲧⲁⲕⲟ ⲙⲡⲕⲁϩ ⲛⲕⲏⲙⲉ

14 ϫⲟⲟⲩ ⲉϩⲣⲁⲓ ⲉⲙⲉϭⲧⲱⲗ ⲁⲩⲱ ⲛⲧⲉⲧⲛϫⲓ ⲡⲟⲩⲱ ⲉϩⲣⲁⲓ ⲉⲙⲛϥⲉ ⲁϫⲓⲥ ϩⲛⲧⲁⲫⲛⲁⲥ ϫⲉⲁϩⲉⲣⲁⲧⲉ ⲛⲧⲉⲥⲟⲃⲧⲉ ⲛⲉ ϫⲉⲁⲧⲥⲏϥⲉ ⲟⲩⲱⲙ ⲛⲛⲉⲧⲕⲱⲧⲉ ⲉⲣⲟ

15 ⲉⲧⲃⲉⲟⲩ ⲁϥⲡⲱⲧ ⲛϭⲓⲡⲟⲩⲙⲁⲥⲉ ⲉⲧⲥⲟⲧⲡ ϩⲁⲡⲉ ⲙⲡϥⲁϩⲉⲣⲁⲧϥ ϫⲉⲁⲡϫⲟⲉⲓⲥ ⲃⲟⲗϥ ⲉⲃⲟⲗ

16 ⲡⲟⲩⲙⲏⲏϣⲉ ⲁϥϭⲃⲃⲉ ⲁⲩⲱ ⲁϥϩⲉ ⲡⲟⲩⲁ ⲡⲟⲩⲁ ⲁϥϣⲁϫⲉ ⲛⲛⲁϩⲣⲙⲡⲉⲧϩⲓⲧⲟⲩⲱϥ ⲉⲩϫⲱ ⲙⲙⲟⲥ ϫⲉⲙⲁⲣⲛⲧⲱⲟⲩⲛ ⲛⲧⲛⲕⲧⲟⲛ ⲛⲛⲁϩⲣⲙⲡⲉⲛⲗⲁⲟⲥ ⲉϩⲣⲁⲓ ⲉⲧⲉⲛⲡⲟⲗⲓⲥ ⲙⲡⲉⲙⲧⲟ ⲉⲃⲟⲗ ⲛⲧⲥⲏϥⲉ ⲛϩⲉⲗⲗⲏⲛ

17 ⲙⲟⲩⲧⲉ ⲉⲡⲣⲁⲛ ⲙⲫⲁⲣⲁⲱ ⲛⲉⲭⲁⲱ ⲡⲣⲣⲟ ⲛⲕⲏⲙⲉ ϫⲉⲥⲁⲱⲛⲟⲩ ⲛⲟⲉⲥⲃⲉⲓ ⲉⲙⲱⲏⲇ

18 ϯⲟⲛϩ ⲁⲛⲟⲕ ⲡⲉϫⲉⲡϫⲟⲉⲓⲥ ⲡⲛⲟⲩⲧⲉ ϫⲉⲛⲧϩⲉ ⲙⲡϩⲓⲧⲁⲃⲩⲣⲓⲟⲛ ϩⲛⲛⲧⲟⲟⲩ ⲁⲩⲱ ⲛⲧϩⲉ ⲙⲡⲕⲁⲣⲙⲏⲗⲟⲥ ⲉⲧϩⲛⲧⲉⲑⲁⲗⲁⲥⲥⲁ ϥⲛⲏⲩ

19 ⲙⲁⲧⲁⲙⲓⲟ ⲛⲉ ⲛⲛⲉⲥⲕⲉⲩⲏ ⲙⲡⲡⲱⲱⲛⲉ ⲉⲃⲟⲗ ⲧⲉⲧⲟⲩⲏϩ ⲧϣⲉⲉⲣⲉ ⲛⲕⲏⲙⲉ ϫⲉⲙⲛϥⲉ ϥⲛⲁϣⲱⲡⲉ ...