Isaiah 52 — Coptic (Sahidic)

1 ⲧⲱⲟⲩⲛⲉ ⲧⲱⲟⲩⲛⲉ ⲥⲓⲱⲛ ⲛϯϩⲓⲱⲱⲧⲉ ⲛⲧⲟⲩϭⲟⲙ ⲁⲩⲱ ⲛⲧⲟ ϩⲱⲱⲧⲉ ⲛⲧⲉϯ ⲙⲡⲟⲩⲉⲟⲟⲩ ϩⲓⲱⲱⲧⲉ ⲧϩⲓⲉⲣⲟⲩⲥⲁⲗⲏⲙ ⲧⲡⲟⲗⲓⲥ ⲉⲧⲟⲩⲁⲁⲃ ⲛⲛⲉϥⲟⲩⲱϩ ⲉⲧⲟⲟⲧϥ ⲉⲉⲓ ⲉⲃⲟⲗ ϩⲓⲧⲟⲟⲧⲉ ⲛϭⲓⲁⲧⲥⲃⲃⲉ ϩⲓⲁⲕⲁⲑⲁⲣⲧⲟⲥ

2 ⲛⲟⲩϩⲉ ⲉⲃⲟⲗ ⲙⲡϣⲟⲉⲓϣ ⲛⲧⲉⲧⲱⲟⲩⲛ ⲛⲧⲉϩⲙⲟⲟⲥ ⲧϩⲓⲉⲣⲟⲩⲥⲁⲗⲏⲙ ⲃⲱⲗ ⲉⲃⲟⲗ ⲛⲧⲙⲣⲣⲉ ⲙⲡⲟⲩⲙⲟⲕϩ ⲧⲁⲓⲭⲙⲁⲗⲱⲧⲟⲥ ⲧϣⲉⲉⲣⲉ ⲛⲥⲓⲱⲛ

3 ϫⲉⲧⲁⲓ ⲧⲉ ⲧϩⲉ ⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲥ ϫⲉⲛⲧⲁⲩϯⲧⲏⲩⲧⲛ ⲉⲃⲟⲗ ⲛϫⲓⲛϫⲏ ⲁⲩⲱ ⲛⲛⲉⲩⲛⲁⲥⲉⲧⲧⲏⲩⲧⲛ ⲁⲛ ϩⲛⲟⲩϩⲁⲧ

4 ⲧⲁⲓ ⲧⲉ ⲧϩⲉ ⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲥ ϫⲉⲁⲡⲁⲗⲁⲟⲥ ⲃⲱⲕ ⲉⲡⲉⲥⲏⲧ ⲉⲕⲏⲙⲉ ⲛϣⲟⲣⲡ ⲉⲟⲩⲱϩ ⲙⲙⲁⲩ ⲁⲩⲱ ⲁϥϥⲓⲧⲟⲩ ⲛϭⲟⲛⲥ ⲉⲛⲁⲥⲥⲩⲣⲓⲟⲥ

5 ⲧⲉⲛⲟⲩ ϭⲉ ⲉⲧⲉⲧⲛⲣ ⲟⲩ ⲙⲡⲉⲓⲙⲁ· ⲛⲁⲓ ⲛⲉ ⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲁⲩϫⲓ ⲙⲡⲁⲗⲁⲟⲥ ⲛϫⲓⲛϫⲏ ⲁⲣⲓϣⲡⲏⲣⲉ ⲛⲧⲉⲧⲛⲱϣ ⲉⲃⲟⲗ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲉⲧⲃⲉⲧⲏⲩⲧⲛ ⲥⲉϫⲓⲟⲩⲁ ⲉⲡⲁⲣⲁⲛ ϩⲛⲛϩⲉⲑⲛⲟⲥ ⲛⲟⲩⲟⲉⲓϣ ⲛⲓⲙ

6 ⲉⲧⲃⲉⲡⲁⲓ ⲡⲁⲗⲁⲟⲥ ⲛⲁⲥⲟⲩⲛⲡⲁⲣⲁⲛ ϩⲙⲡⲉϩⲟⲟⲩ ⲉⲧⲙⲙⲁⲩ ϫⲉⲁⲛⲟⲕ ⲡⲉ ⲡⲉⲧϣⲁϫⲉ ϯⲙⲡⲉⲓⲙⲁ

7 ⲛⲧϩⲉ ⲛⲟⲩⲟⲩⲛⲟⲩ ϩⲓⲛⲧⲟⲟⲩ ⲛⲧϩⲉ ⲛⲛⲟⲩⲉⲣⲏⲧⲉ ⲙⲡⲉⲧⲧⲁϣⲉⲟⲉⲓϣ ⲛⲟⲩⲥⲙⲏ ⲛⲉⲓⲣⲏⲛⲏ ⲛⲧϩⲉ ⲙⲡⲉⲧⲉⲩⲁⲅⲅⲉⲗⲓⲍⲉ ⲛϩⲉⲛⲁⲅⲁⲑⲟⲛ ϫⲉϯⲛⲁⲧⲣⲉⲩⲥⲱⲧⲙ ⲉⲡⲟⲩϫⲁⲓ ⲉⲓϫⲱ ⲙⲙⲟⲥ ϫⲉⲥⲓⲱⲛ ⲡⲟⲩⲛⲟⲩⲧⲉ ⲛⲁⲣⲣⲣⲟ ⲉϩⲣⲁⲓ ⲉϫⲱ

8 ϫⲉⲁⲡⲉϩⲣⲟⲟⲩ ⲛⲛⲉⲧϩⲁⲣⲉϩ ⲉⲣⲟϫⲓⲥⲉ ⲁⲩⲱ ⲥⲉⲛⲁⲉⲩⲫⲣⲁⲛⲉ ϩⲛⲧⲉⲥⲙⲏⲧⲉ ϩⲓⲟⲩⲥⲟⲡ ϫⲉⲥⲉⲛⲁⲛⲁⲩ ⲛϩⲟ ⲙⲛϩⲟ ⲉⲣϣⲁⲛⲡϫⲟⲉⲓⲥ ⲛⲁⲛⲥⲓⲱⲛ

9 ⲙⲁⲣⲉⲛϫⲁⲓⲉ ⲛⲧϩⲓⲉⲣⲟⲩⲥⲁⲗⲏⲙ ⲱϣ ⲉⲃⲟⲗ ϩⲛⲟⲩⲟⲩⲛⲟϥ ϩⲓⲟⲩⲥⲟⲡ ϫⲉⲁϥⲛⲁ ⲛⲁⲥ ⲁⲩⲱ ⲁϥⲛⲟⲩϩⲙ ⲙⲙⲟⲥ

10 ⲁⲩⲱ ⲡϫⲟⲉⲓⲥ ⲛⲁϭⲱⲗⲡ ⲉⲃⲟⲗ ⲙⲡⲉϥϭⲃⲟⲓ ⲉⲧⲟⲩⲁⲁⲃ ⲙⲡⲉⲙⲧⲟ ⲉⲃⲟⲗ ⲛⲛϩⲉⲑⲛⲟⲥ ⲧⲏⲣⲟⲩ ⲁⲩⲱ ⲛϩⲉⲑⲛⲟⲥ ⲧⲏⲣⲟⲩ ⲛⲁⲛⲁⲩ ϫⲓⲛⲁⲣⲏϫϥ ⲙⲡⲕⲁϩ ⲉⲡⲟⲩϫⲁⲓ ⲡⲉ ⲉⲃⲟⲗ ϩⲓⲧⲟⲟⲧϥ ⲙⲡⲛⲟⲩⲧⲉ

11 ⲥⲁϩⲱⲧⲏⲩⲧⲛ ⲉⲃⲟⲗ ⲥⲁϩⲱⲧⲛ ⲉⲃⲟⲗ ⲁⲙⲏⲉⲓⲧⲛ ⲉⲃⲟⲗ ⲙⲙⲁⲩ ⲁⲩⲱ ⲙⲡⲣϫⲱϩ ⲉⲁⲕⲁⲑⲁⲣⲧⲟⲥ ⲁⲙⲏⲉⲓⲧⲛ ⲉⲃⲟⲗ ϩⲛⲧⲉⲥⲙⲏⲧⲉ ⲁⲩⲱ ⲛⲧⲉⲧⲛⲡⲣϫⲧⲏⲩⲧⲛ ⲉⲃⲟⲗ ⲛⲉⲧⲉⲓⲛⲉ ⲛⲛⲉϩⲛⲁⲁⲩ ⲙⲡϫⲟⲉⲓⲥ

12 ϫⲉⲉⲧⲉⲧⲛⲛⲏⲩ ⲁⲛ ⲉⲃⲟⲗ ϩⲛⲟⲩϣⲧⲟⲣⲧⲣ ⲟⲩⲇⲉ ⲉⲧⲉⲧⲛⲁⲙⲟⲟϣⲉ ⲁⲛ ϩⲛⲟⲩⲡⲱⲧ ⲡϫⲟⲉⲓⲥ ⲅⲁⲣ ⲡⲉⲧⲛⲁⲙⲟⲟϣⲉ ϩⲁⲧⲉⲧⲛϩⲏ ⲁⲩⲱ ⲡⲉⲧⲥⲱⲟⲩϩ ⲙⲙⲱⲧⲛ ⲉϩⲟⲩⲛ ⲡⲉ ⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ

13 ⲉⲓⲥ ϩⲏⲏⲧⲉ ⲡⲁϣⲏⲣⲉ ⲛⲁⲉⲓⲙⲉ ⲁⲩⲱ ⲛϥϫⲓⲥⲉ ⲛϥϫⲓⲉⲟⲟⲩ ⲉⲙⲁⲧⲉ

14 ⲛⲧϩⲉ ⲉⲧⲉⲣⲉϩⲁϩ ⲛⲁⲣϣⲡⲏⲣⲉ ⲉϩⲣⲁⲓ ⲉϫⲱⲕ ⲧⲁⲓ ⲧⲉ ⲧϩⲉ ⲉⲧⲉⲣⲉⲡⲉⲕⲉⲓⲛⲉ ⲛⲁⲥⲱϣϥ ⲛⲧⲛⲛⲣⲱⲙⲉ ⲁⲩⲱ ⲡⲉⲕⲉⲟⲟⲩ ⲉⲃⲟⲗ ϩⲛⲛⲣⲱⲙⲉ

15 ⲛϩⲉⲑⲛⲟⲥ ⲉⲧⲟϣ ⲛⲁⲣϣⲡⲏⲣⲉ ⲛⲧⲉⲓϩⲉ ⲉϩⲣⲁⲓ ⲉϫⲱϥ ⲁⲩⲱ ⲛⲣⲣⲱⲟⲩ ⲛⲁϣⲧⲁⲙ ⲛⲧⲉⲩⲧⲁⲡⲣⲟ ϫⲉⲛⲉⲧⲙⲡⲟⲩϫⲱ ⲛⲁⲩ ⲉⲧⲃⲏⲏⲧϥ ⲛⲁⲛⲁⲩ ⲉⲣⲟϥ ⲁⲩⲱ ⲛⲉⲧⲙⲡⲟⲩⲥⲱⲧⲙ ⲛⲁⲉⲓⲙⲉ