Read Isaiah 4 side by side with translations · The Final Bible
1 ⲛⲧⲉⲥⲁϣϥⲉ ⲛⲥϩⲓⲙⲉ ⲁⲙⲁϩⲧⲉ ⲛⲟⲩⲣⲱⲙⲉ ⲛⲟⲩⲱⲧ ⲉⲩϫⲱ ⲙⲙⲟⲥ ϫⲉⲧⲛⲛⲁⲟⲩⲱⲙ ⲙⲡⲉⲛⲟⲉⲓⲕ ⲁⲩⲱ ⲧⲛⲛⲁϯ ϩⲓⲱⲱⲛ ⲛⲛⲉⲛϩⲟⲓⲧⲉ ⲙⲟⲛⲟⲛ ⲙⲁⲣⲟⲩⲧⲁⲩⲉⲡⲉⲕⲣⲁⲛ ⲉϩⲣⲁⲓ ⲉϫⲱⲛ ϥⲓ ⲙⲡⲉⲛⲛⲟϭⲛⲉϭ
2 ϩⲙⲡⲉϩⲟⲟⲩ ⲇⲉ ⲉⲧⲙⲙⲁⲩ ⲡⲛⲟⲩⲧⲉ ⲛⲁⲟⲩⲱⲛϩ ⲉⲃⲟⲗ ϩⲛⲟⲩϣⲟϫⲛⲉ ⲙⲛⲟⲩⲉⲟⲟⲩ ϩⲣⲁⲓ ⲉϫⲙⲡⲕⲁϩ ⲉϫⲓⲥⲉ ⲁⲩⲱ ⲉϯⲉⲟⲟⲩ ⲙⲡϣⲱϫⲡ ⲙⲡⲓⲥⲣⲁⲏⲗ
3 ⲁⲩⲱ ⲡϣⲱϫⲡ ⲉⲧⲛⲁϣⲱⲡⲉ ϩⲛⲥⲓⲱⲛ ⲁⲩⲱ ⲡⲥⲉⲉⲡⲉ ϩⲛⲧϩⲓⲉⲣⲟⲩⲥⲁⲗⲏⲙ ⲥⲉⲛⲁⲙⲟⲩⲧⲉ ⲉⲣⲟⲟⲩ ϫⲉⲛⲉⲧⲟⲩⲁⲁⲃ ⲟⲩⲟⲛ ⲛⲓⲙ ⲉⲛⲧⲁⲩⲥϩⲁⲓⲥⲟⲩ ϩⲙⲡϫⲱⲱⲙⲉ ⲉⲡⲱⲛϩ ⲉⲧϩⲓⲉⲣⲟⲩⲥⲁⲗⲏⲙ
4 ϫⲉⲡϫⲟⲉⲓⲥ ⲛⲁⲉⲓⲱ ⲉⲃⲟⲗ ⲙⲡⲧⲱⲗⲙ ⲛⲛϣⲏⲣⲉ ⲙⲛⲛϣⲉⲉⲣⲉ ⲛⲥⲓⲱⲛ ⲁⲩⲱ ϥⲛⲁⲧⲃⲃⲟ ⲙⲡⲉⲥⲛⲟϥ ⲛⲧϩⲓⲉⲣⲟⲩⲥⲁⲗⲏⲙ ϩⲛⲧⲉⲥⲙⲏⲧⲉ ϩⲛⲡⲉⲡⲛⲉⲩⲙⲁ ⲛϩⲁⲡ ⲙⲛⲟⲩⲡⲛⲉⲩⲙⲁ ⲛⲣⲱⲕϩ
5 ⲁⲩⲱ ϥⲛⲏⲩ ⲛⲧⲉⲙⲁ ⲛⲓⲙ ⲙⲡⲧⲟⲟⲩ ⲛⲥⲓⲱⲛ ⲁⲩⲱ ⲡⲉⲥⲕⲱⲧⲉ ⲧⲏⲣϥ ⲣϩⲁⲓⲃⲉⲥ ϩⲛⲟⲩⲕⲗⲟⲟⲗⲉ ⲙⲡⲉϩⲟⲟⲩ ⲁⲩⲱ ⲛⲧϩⲉ ⲙⲡⲉⲓⲛⲉ ⲛⲟⲩⲕⲁⲡⲛⲟⲥ ⲙⲛⲟⲩⲟⲉⲓⲛ ⲛⲕⲱϩⲧ ⲉϥϫⲉⲣⲟ ⲛⲧⲉⲩϣⲏ ⲛϥⲣϩⲁⲓⲃⲉⲥ ⲉⲡⲕⲁϩ ⲧⲏⲣϥ
6 ⲛϥϣⲱⲡⲉ ⲛϩⲁⲓⲃⲉⲥ ⲉⲃⲟⲗ ϩⲛⲟⲩⲕⲁⲩⲙⲁ ⲁⲩⲱ ⲛⲃⲱϩⲛ ⲁⲩⲱ ⲛϩⲱⲡ ⲉⲃⲟⲗ ϩⲛⲟⲩⲛϣⲟⲧ ⲙⲛⲟⲩϩⲱⲟⲩ
Isaiah 3 · Isaiah 5 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)