Isaiah 23 — Coptic (Sahidic)

1 ⲡϣⲁϫⲉ ⲛⲧⲩⲣⲟⲥ ⲱϣ ⲉⲃⲟⲗ ⲛⲉϫⲏⲩ ⲛⲕⲁⲣⲭⲏⲇⲱⲛ ϫⲉⲁⲩⲧⲁⲕⲟ ⲁⲩⲱ ⲛⲥⲉⲛⲁⲥⲟⲧⲟⲩ ⲁⲛ ⲉⲉⲓ ⲁⲩⲛ ϩⲉⲛⲁⲓⲭⲙⲁⲗⲱⲧⲟⲥ ⲉⲃⲟⲗ ϩⲙⲡⲕⲁϩ ⲛⲛⲁⲓⲧⲓⲁⲓⲟⲥ

2 ⲛⲧⲁⲛⲉⲧⲟⲩⲏϩ ϩⲛⲧⲉⲓⲛⲏⲥⲟⲥ ⲉⲓⲛⲉ ⲛⲛⲓⲙ ⲙⲙⲉⲧⲁⲃⲟⲗⲟⲥ ⲛⲧⲉⲫⲟⲓⲛⲓⲕⲏ ⲉⲧϫⲓⲟⲟⲣ ⲛⲧⲑⲁⲗⲁⲥⲥⲁ

3 ⲉⲩⲉⲓⲣⲉ ⲛϩⲉⲛϩⲃⲏⲩⲉ ϩⲛⲟⲩⲙⲟⲟⲩ ⲉϥⲟϣ ⲡⲉⲥⲡⲉⲣⲙⲁ ⲛⲙⲙⲉⲧⲁⲃⲟⲗⲟⲥ ⲛⲧϩⲉ ⲛⲟⲩⲱϩⲥ ⲉⲩⲱⲗ ⲙⲙⲟϥ ⲉϩⲟⲩⲛ ⲙⲙⲉⲧⲁⲃⲟⲗⲟⲥ ⲛⲛϩⲉⲑⲛⲟⲥ

4 ⲡⲉϫⲉⲑⲁⲗⲁⲥⲥⲁ ϫⲉϫⲓϣⲓⲡⲉ ⲥⲓⲇⲱⲛ ⲡⲉϫⲉⲧϭⲟⲙ ⲛⲧⲑⲁⲗⲁⲥⲥⲁ ϫⲉⲙⲡⲓϯⲛⲁⲁⲕⲉ ⲙⲡⲓⲙⲓⲥⲉ ⲟⲩⲇⲉ ⲙⲡⲓⲥⲁⲁⲛϣ ⲛϩⲣϣⲓⲣⲉ ⲟⲩⲇⲉ ⲙⲡⲓϫⲉⲥⲧⲡⲁⲣⲑⲉⲛⲟⲥ

5 ϩⲟⲧⲁⲛ ⲇⲉ ⲉⲣϣⲁⲛⲕⲏⲙⲉ ⲥⲉⲧⲙⲡⲁⲓ ⲟⲩⲛⲟⲩⲙⲕⲁϩ ⲛϩⲏⲧ ⲛⲁⲧⲁϩⲟⲟⲩ ⲉⲧⲃⲉⲧⲩⲣⲟⲥ

6 ⲃⲱⲕ ⲉⲕⲁⲣⲭⲏⲇⲱⲛ ϫⲓϣⲕⲁⲕ ⲉⲃⲟⲗ ⲛⲉⲧⲟⲩⲏϩ ϩⲛⲧⲉⲓⲛⲏⲥⲟⲥ

7 ⲙⲡⲁⲓ ⲁⲛ ⲡⲉ ⲡⲉⲧⲛⲥⲱϣ ϫⲓⲛⲛϣⲟⲣⲡ ⲉⲙⲡⲁⲧⲟⲩⲡⲁⲣⲁⲇⲓⲇⲟⲩ ⲙⲙⲟϥ

8 ⲛⲓⲙ ⲡⲉⲛⲧⲁϥⲙⲉⲉⲩⲉ ⲉⲛⲁⲓ ⲉϫⲛⲧⲩⲣⲟⲥ ⲙⲏ ⲟⲩⲕⲟⲩⲓ ⲧⲉ ⲏ ⲛⲉⲥⲉϣⲱⲧ ⲁⲛ ϭⲙϭⲟⲙ ⲛⲉⲧⲧⲁⲓⲏⲩ ⲛⲉ ⲛⲁⲣⲭⲱⲛ ⲙⲡⲕⲁϩ

9 ⲡϫⲟⲉⲓⲥ ⲥⲁⲃⲁⲱⲑ ⲁϥⲙⲉⲉⲩⲉ ⲉⲃⲱⲗ ⲉⲃⲟⲗ ⲙⲡⲥⲱϣ ⲧⲏⲣϥ ⲛⲛⲉⲧϩⲁ ⲉⲟⲟⲩ ⲁⲩⲱ ⲉⲥⲱϣ ⲙⲡⲉⲩⲧⲁⲉⲓⲟ ⲧⲏⲣϥ ϩⲓϫⲙⲡⲕⲁϩ

10 ⲁⲣⲓϩⲱⲃ ⲉⲡⲟⲩⲕⲁϩ ⲕⲁⲓⲅⲁⲣ ⲛⲉϫⲏⲩ ⲛⲁⲥⲟⲧⲟⲩ ⲁⲛ ⲉⲉⲓ ⲉⲃⲟⲗ ϩⲛⲕⲁⲣⲭⲏⲇⲱⲛ

11 ⲧⲟⲩϭⲓϫ ϭⲉ ⲛⲁϭⲙϭⲟⲙ ⲁⲛ ⲕⲁⲧⲁⲧⲉⲑⲁⲗⲁⲥⲥⲁ ⲧⲉⲧϯⲛⲟⲩϭⲥ ⲛⲛⲣⲣⲱⲟⲩ ⲁⲡϫⲟⲉⲓⲥ ⲥⲁⲃⲁⲱⲑ ϩⲱⲛ ⲉⲧⲃⲉⲭⲁⲛⲁⲁⲛ ⲉⲧⲁⲕⲟ ⲛⲧⲉⲥϭⲟⲙ

12 ⲁⲩⲱ ⲥⲉⲛⲁϫⲟⲟⲥ ϫⲉⲛⲛⲉⲧⲛⲟⲩⲱϩ ϭⲉ ⲉⲧⲉⲧⲏⲩⲧⲛ ⲉϫⲓ ⲛϭⲟⲛⲥ ⲁⲩⲱ ⲉⲥⲱϣ ⲛⲧϣⲉⲉⲣⲉ ⲛⲥⲓⲱⲛ ⲁⲩⲱ ⲉⲣϣⲁⲛⲃⲱⲕ ⲟⲛ ⲉϭⲓⲧⲉⲓⲥ ⲙⲛⲙⲧⲟⲛ ⲛⲁϣⲱⲡⲉ ⲛⲏⲙⲙⲁⲩ

13 ⲁⲩⲱ ⲉⲡⲕⲁϩ ⲛⲛⲉⲭⲁⲗⲇⲁⲓⲟⲥ ⲁⲡⲉⲓⲕⲉⲣϫⲁⲓⲉ ⲉⲃⲟⲗ ϩⲓⲧⲛⲛⲁⲥⲥⲩⲣⲓⲟⲥ ⲟⲩⲇⲉ ⲙⲛⲙⲧⲟⲛ ⲛⲁϣⲱⲡⲉ ⲛⲏⲙⲙⲁⲩ ϫⲉⲁⲧⲉⲥϫⲟ ϩⲉ

14 ϫⲓϣⲕⲁⲕ ⲉⲃⲟⲗ ⲛⲉϫⲏⲩ ⲛⲕⲁⲣⲭⲏⲇⲱⲛ ϫⲉⲁⲡⲉⲧⲛϫⲓⲥⲉ ⲧⲁⲕⲟ

15 ⲁⲩⲱ ⲥⲛⲁϣⲱⲡⲉ ϩⲙⲡⲉϩⲟⲟⲩ ⲉⲧⲙⲙⲁⲩ ⲧⲩⲣⲟⲥ ⲛⲁⲕⲱ ⲉⲃⲟⲗ ⲛϣϥⲉ ⲛⲣⲟⲙⲡⲉ ⲛⲧϩⲉ ⲙⲡⲉⲟⲩⲟⲉⲓϣ ⲛⲟⲩⲣⲣⲟ ⲁⲩⲱ ⲛⲧϩⲉ ⲙⲡⲉⲟⲩⲉⲓϣ ⲛⲟⲩⲣⲱⲙⲉ ⲁⲩⲱ ⲥⲛⲁϣⲱⲡⲉ ⲙⲛⲛⲥⲁϣϥⲉ ⲛⲣⲟⲙⲡⲉ ⲧⲩⲣⲟⲥ ⲛⲁⲣⲧϩⲉ ⲛⲟⲩϫⲱ ⲙⲡⲟⲣⲛⲏ

16 ϫⲓ ⲛⲉ ⲛⲟⲩⲕⲓⲑⲁⲣⲁ ϥⲓϩⲣⲉ ⲉⲃⲟⲗ ⲧⲡⲟⲗⲓⲥ ⲧⲡⲟⲣⲛⲏ ⲉⲛⲧⲁⲩⲣⲡⲉⲥⲱⲃϣ ⲕⲓⲑⲁⲣⲓⲍⲉ ⲕⲁⲗⲱⲥ ϫⲱ ⲉⲙⲁⲧⲉ ϫⲉⲉⲩⲉⲣⲡⲟⲩⲙⲉⲉⲩⲉ

17 ⲁⲩⲱ ⲥⲛⲁϣⲱⲡⲉ ⲙⲛⲛⲥⲁϣϥⲉ ⲛⲣⲟⲙⲡⲉ ⲡⲛⲟⲩⲧⲉ ⲛⲁⲣⲟⲩϭⲙⲡϣⲓⲛⲉ ⲛⲧⲩⲣⲟⲥ ⲁⲩⲱ ϥⲛⲁⲧⲁϩⲟⲥ ⲉⲣⲁⲧⲥ ⲉⲧⲉⲥϩⲟⲩⲉⲓⲧⲉ ⲁⲩⲱ ⲥⲛⲁϣⲱⲡⲉ ⲛⲟⲩⲙⲁ ⲛⲉϣⲱⲧ ⲛⲙⲙⲛⲧⲉⲣⲣⲱⲟⲩ ⲧⲏⲣⲟⲩ ⲛⲧⲟⲓⲕⲟⲩⲙⲉⲛⲏ

18 ⲁⲩⲱ ⲧⲉⲥⲙⲛⲧⲉϣⲱⲧ ⲙⲛⲡⲉⲥⲃⲉⲕⲉ ⲛⲁϣⲱⲡⲉ ⲉϥⲟⲩⲁⲁⲃ ⲙⲡϫⲟⲉⲓⲥ ⲛⲉⲩⲛⲁⲥⲟⲟⲩϩⲥ ⲛⲁⲩ ⲉϩⲟⲩⲛ ⲁⲛ ⲁⲗⲗⲁ ⲛⲛⲉⲧⲟⲩⲏϩ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϩⲛⲧϩⲓⲉⲣⲟⲩⲥⲁⲗⲏⲙ ⲧⲉⲥⲙⲛⲧⲉϣⲱⲧ ⲧⲏⲣⲥ ⲉⲟⲩⲱⲙ ⲉⲥⲱ ⲉⲥⲉⲓ ⲉⲥⲩⲙⲃⲟⲗⲏ ⲛⲣⲡⲙⲉⲉⲩⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ