Isaiah 16 — Coptic (Sahidic)

1 ϯⲛⲁϫⲟⲟⲩⲥⲉ ⲅⲁⲣ ⲉϫⲙⲡⲕⲁϩ ⲛⲧϩⲉ ⲛϩⲉⲛϫⲁⲧϥⲉ ⲙⲏ ⲟⲩⲡⲉⲧⲣⲁ ⲛϫⲁⲓⲉ ⲡⲉ ⲡⲧⲟⲟⲩ ⲛⲥⲓⲱⲛ

2 ⲧⲉⲛⲁϣⲱⲡⲉ ⲅⲁⲣ ⲧϣⲉⲉⲣⲉ ⲙⲙⲱⲁⲃ ⲛⲧϩⲉ ⲛⲟⲩϩⲁⲗⲏⲧ ⲉⲁϥϩⲱⲗ ⲉⲃⲟⲗ ⲁⲩϥⲓ ⲛⲛⲉϥⲙⲁⲥ ⲙⲛⲛⲥⲱⲥ ⲇⲉ ⲁⲣⲛⲱⲛ

3 ⲙⲉⲉⲩⲉ ⲉⲙⲁⲧⲉ ⲙⲁⲧⲁⲙⲓⲟ ⲛⲁⲥ ⲛⲟⲩϩⲃⲱ ⲛϩⲏⲃⲉ ⲛⲟⲩⲟⲉⲓϣ ⲛⲓⲙ ⲉⲩⲡⲏⲧ ϩⲛⲟⲩⲕⲁⲕⲉ ⲙⲙⲉⲉⲣⲉ ⲁⲩⲡⲱϣⲥ ⲙⲡⲣϣⲧⲟⲣⲧⲣ

4 ⲥⲉⲛⲁϭⲟⲓⲗⲉ ⲉⲣⲟⲛϭⲓⲛⲉⲧⲡⲏⲧ ⲛⲧⲉⲙⲱⲁⲃ ⲥⲉⲛⲁϣⲱⲡⲉ ⲛⲏⲧⲛ ⲛϩⲁⲓⲃⲉⲥ ⲙⲡⲉⲙⲧⲟ ⲉⲃⲟⲗ ⲛⲛⲉⲧⲡⲏⲧ ⲛⲥⲱⲧⲛ ϫⲉⲁⲩϥⲓ ⲙⲡⲟⲩⲙⲗⲁϩ ⲁⲩⲱ ⲁⲡⲁⲣⲭⲱⲛ ⲧⲁⲕⲟⲡⲉⲧϩⲱⲙ ⲉϩⲣⲁⲓ ⲉϫⲙⲡⲕⲁϩ

5 ⲁⲩⲱ ⲡⲉⲑⲣⲟⲛⲟⲥ ⲛⲁⲁϩⲉⲣⲁⲧϥ ⲙⲛⲟⲩⲛⲁ ⲁⲩⲱ ϥⲛⲁϩⲙⲟⲟⲥ ⲉϩⲣⲁⲓ ⲉϫⲱϥ ϩⲛⲟⲩⲙⲉ ⲙⲛⲧϩⲁⲓⲃⲉⲥ ⲛⲇⲁⲩⲉⲓⲇ ⲉϥⲕⲣⲓⲛⲉ ⲁⲩⲱ ⲉϥϣⲓⲛⲉ ⲛⲥⲁⲡϩⲁⲡ ⲁⲩⲱ ⲉϥϭⲉⲡⲏ ϩⲛⲧⲇⲓⲕⲁⲓⲟⲥⲩⲛⲏ

6 ⲁⲛⲥⲱⲧⲙ ⲉⲡⲥⲱϣ ⲙⲙⲱⲁⲃ ⲟⲩⲣⲉϥⲥⲱϣ ⲉⲙⲁⲧⲉ ⲡⲉ ⲁⲓϥⲓ ⲛⲧⲉϥⲙⲛⲧϫⲁⲥⲓϩⲏⲧ ⲛⲧⲁⲓ ⲁⲛ ⲧⲉ ⲧϩⲉ ⲙⲡⲉⲕⲧⲟⲛⲧⲛ ⲛⲧⲁⲓ ⲁⲛ ⲧⲉ ⲧϩⲉ

7 ⲙⲱⲁⲃ ⲱϣ ⲉⲃⲟⲗ ⲥⲉϫⲓϣⲕⲁⲕ ⲉⲃⲟⲗ ⲧⲏⲣⲟⲩ ϩⲛⲧⲙⲱⲁⲃⲓⲧⲏⲥ ⲧⲏⲣⲥ ⲁⲩⲱ ⲧⲉⲛⲁⲙⲉⲗⲉⲧⲁ ⲛⲛⲕⲟⲟⲩⲉ ⲉⲧⲟⲩⲏϩ ϩⲛⲇⲉⲥⲏⲙ ⲁⲩⲱ ⲛⲧⲉⲛⲁϣⲓⲡⲉ ⲁⲛ ϩⲏⲧⲟⲩ

8 ⲛⲥⲱϣⲉ ⲛⲉⲥⲉⲃⲱⲛ ⲧⲃⲱ ⲛⲉⲗⲟⲟⲗⲉ ⲛⲥⲉⲃⲁⲙⲁ ⲛⲁⲣϩⲏⲃⲉ ⲉⲩⲱⲕⲙ ⲛⲛϩⲉⲑⲛⲟⲥ ⲧⲉⲧⲛⲁϩⲱⲙ ⲛⲛⲉⲥⲃⲱ ⲛⲉⲗⲟⲟⲗⲉ ⲛⲛⲉⲧⲛⲡⲱϩ ϣⲁⲓⲁⲍⲏⲣ ⲥⲱⲣⲙ ⲛⲧⲉⲣⲏⲙⲟⲥ ⲁⲩⲕⲱ ⲛⲥⲱⲟⲩ ⲛⲛⲉⲛⲧⲁⲩϫⲟⲟⲩⲥⲉ ⲁⲩϫⲓⲟⲟⲣ ⲅⲁⲣ ⲛⲧⲑⲁⲗⲁⲥⲥⲁ

9 ⲉⲧⲃⲉⲡⲁⲓ ϯⲛⲁⲣⲓⲙⲉ ⲛⲧϩⲉ ⲙⲡⲣⲓⲙⲉ ⲛⲓⲁⲍⲏⲣ ⲧⲃⲱ ⲛⲉⲗⲟⲟⲗⲉ ⲛⲥⲉⲃⲁⲙⲁ ⲁⲉⲥⲉⲃⲱⲛ ⲧⲁⲩⲉⲛⲟⲩϣⲏⲛ ⲉϩⲣⲁⲓ ⲁⲩⲱ ⲟⲛ ⲁⲥϣⲁϫⲉ ϫⲉϯⲛⲁϩⲱⲙ ⲉϫⲙⲡⲟⲩⲱϩⲥ ⲙⲛⲡⲟⲩϫⲱⲱⲗⲉ ⲁⲩⲱ ⲥⲉⲛⲁϩⲉ ⲧⲏⲣⲟⲩ

10 ⲥⲉⲛⲁϥⲓ ⲙⲡⲟⲩⲛⲟϥ ⲙⲛⲡⲧⲉⲗⲏⲗ ⲉⲃⲟⲗ ϩⲛⲛⲟⲩⲙⲁ ⲛⲉⲗⲟⲟⲗⲉ ⲁⲩⲱ ⲛⲛⲉⲩⲉⲩⲫⲣⲁⲛⲉ ϩⲛⲙⲙⲁ ⲛⲉⲗⲟⲟⲗⲉ ⲁⲩⲱ ⲛⲛⲉⲩϩⲙⲏⲣⲡ ⲉⲉⲓⲟⲙ ⲁϥⲱϫⲛ ⲅⲁⲣ

11 ⲉⲧⲃⲉⲡⲁⲓ ϩⲏⲧ ⲛⲁⲙⲟⲩⲧⲉ ⲉⲃⲟⲗ ⲛⲧϩⲉ ⲛⲟⲩⲕⲓⲑⲁⲣⲁ ⲉϫⲙⲙⲱⲁⲃ ⲁⲩⲱ ⲛⲉⲧⲙⲡⲁⲥⲁ ⲛϩⲟⲩⲛ ⲛⲧϩⲉ ⲙⲡⲥⲟⲃⲧ ⲡⲉⲛⲧⲁⲕⲁⲁϥ ⲛⲃⲣⲣⲉ

12 ϥⲛⲁϣⲱⲡⲉ ⲉⲧⲣⲉϫⲓϣⲓⲡⲉ ϫⲉⲁⲙⲱⲁⲃ ϩⲓⲥⲉ ⲉϫⲛⲛⲉϥϣⲏⲩⲉ ⲁⲩⲱ ϥⲛⲁⲃⲱⲕ ⲉϩⲟⲩⲛ ⲉⲛⲉⲥⲙⲟⲩⲛⲅ ⲛϭⲓϫ ϩⲱⲥⲧⲉ ⲉϣⲗⲏⲗ ⲁⲩⲱ ⲛⲥⲉⲧⲙⲉϣⲧⲟⲩϫⲟϥ

13 ⲡⲁⲓ ⲡⲉ ⲡϣⲁϫⲉ ⲛⲧⲁⲡϫⲟⲉⲓⲥ ϫⲟⲟϥ ⲉϫⲙⲙⲱⲁⲃ ⲛⲧϩⲉ ⲛⲧⲁϥϫⲟⲟⲥ

14 ⲧⲉⲛⲟⲩ ⲟⲛ ϥϫⲱ ⲙⲙⲟⲥ ϩⲛϣⲟⲙⲧⲉ ⲛⲣⲟⲙⲡⲉ ⲛϩⲟⲟⲩ ⲛϫⲁⲓⲃⲉⲕⲉ ⲡⲉⲟⲟⲩ ⲙⲙⲱⲁⲃ ⲛⲛⲁϫⲓⲥⲱϣ ϩⲛϩⲱⲃ ⲛⲓⲙ ⲛⲧⲙⲛⲧⲣⲙⲙⲁⲟ ⲉⲧⲛⲁϣⲱⲥ ⲁⲩⲱ ϥⲛⲁϣⲱⲡⲉ ⲉϥⲥⲟⲃⲕ ⲁⲩⲱ ⲛϥⲧⲁⲓⲏⲩ ⲁⲛ