Isaiah 15 — Coptic (Sahidic)

1 ⲡϣⲁϫⲉ ⲉⲧϣⲟⲟⲡ ⲉⲧⲃⲉⲧⲙⲱⲁⲃⲓⲧⲏⲥ ⲧⲙⲱⲁⲃⲓⲧⲏⲥ ⲛⲁⲧⲁⲕⲟ ϩⲛⲧⲉⲟⲩϣⲏ ⲉⲣⲉⲡⲥⲟⲃⲧ ⲅⲁⲣ ⲛⲧⲙⲱⲁⲃⲓⲧⲏⲥ ⲛⲁⲧⲁⲕⲟ ϩⲛⲧⲉⲟⲩϣⲏ

2 ⲗⲩⲡⲏ ⲉϩⲣⲁⲓ ⲉϫⲱⲧⲛ ⲡⲭⲉⲇⲏⲃⲱⲛ ⲅⲁⲣ ⲛⲁⲧⲁⲕⲟ ⲡⲙⲁ ⲉⲧⲉⲣⲉⲧⲉⲧⲛϣⲏⲩⲉ ⲛϩⲏⲧϥ ⲉⲧⲉⲧⲛⲛⲁⲃⲱⲕ ⲙⲙⲁⲩ ⲉⲣⲓⲙⲉ ⲉϫⲛⲛⲁⲃⲁⲩ ⲛⲧⲉⲧⲙⲱⲁⲃⲓⲧⲏⲥ ϫⲓϣⲕⲁⲕ ⲉⲃⲟⲗ ⲟⲩⲛⲟⲩϩⲱⲱⲕⲉ ⲅⲁⲣ ⲛⲁϣⲱⲡⲉ ⲉϫⲛⲁⲡⲉ ⲛⲓⲙ ⲁⲩⲱ ϭⲃⲟⲓ ⲛⲓⲙ ⲡⲉϩ

3 ⲙⲉⲣⲧⲏⲩⲧⲛ ⲛϩⲉⲛϭⲟⲟⲩⲛⲉ ϩⲛⲛⲉⲥⲡⲗⲁϯⲁ ⲛⲧⲉⲧⲛⲛⲉϩⲡⲉ ϩⲛⲛⲉⲥϫⲉⲛⲉⲡⲱⲣ ⲁⲩⲱ ⲱϣ ⲉⲃⲟⲗ ⲧⲏⲣⲧⲛ ϩⲛⲟⲩⲣⲓⲙⲉ ϩⲛⲛⲉⲥϩⲓⲣ

4 ϫⲉⲁⲉⲥⲉⲃⲱⲛ ⲱϣ ⲉⲃⲟⲗ ⲁⲩⲱ ⲁⲥϣⲁϫⲉ ϣⲁⲛⲧⲟⲩⲥⲱⲧⲙ ⲉⲡⲉⲥϩⲣⲟⲟⲩ ⲉⲧⲃⲉⲡⲁⲓ ⲧϯⲡⲉ ⲛⲧⲙⲱⲁⲃⲓⲧⲏⲥ ⲱϣ ⲉⲃⲟⲗ ⲧⲉⲥⲯⲩⲭⲏ ⲛⲁⲉⲓⲙⲉ

5 ⲡϩⲏⲧ ⲛⲧⲙⲱⲁⲃⲓⲧⲏⲥ ⲱϣ ⲉⲃⲟⲗ ⲛϩⲏⲧⲥ ϣⲁⲥⲉⲅⲱⲣ ⲟⲩⲃⲁϩⲥⲉ ⲅⲁⲣ ⲛϣⲙⲛⲧⲣⲟⲙⲡⲉ ⲧⲉ ϩⲣⲁⲓ ⲇⲉ ⲙⲡⲉⲓⲉϩⲣⲁⲓ ⲉⲣⲁⲧⲉ ⲥⲉⲛⲏⲩ ⲉϩⲣⲁⲓ ⲉⲩⲣⲓⲙⲉ ϩⲓⲧⲉϩⲓⲏ ⲛⲁⲣⲱⲛⲓⲉⲓⲙ ⲛⲧϩⲉ ⲛϣⲁⲣⲉⲟⲩⲟⲩⲱϣϥ ⲱϣ ⲉⲃⲟⲗ ⲙⲛⲟⲩⲕⲙⲧⲟ

6 ⲡⲙⲟⲟⲩ ⲛⲧⲉⲛⲉⲃⲣⲓⲉⲓⲙ ⲛⲁⲣϫⲁⲓⲉ ⲁⲩⲱ ⲡⲉⲥⲭⲱⲣⲧⲟⲥ ⲛⲁⲱϫⲛ ⲙⲛⲭⲱⲣⲧⲟⲥ ⲅⲁⲣ ϫⲓⲛⲧⲉⲛⲟⲩ ⲛⲁϣⲱⲡⲉ ⲉϥⲟⲩⲉⲧⲟⲩⲱⲧ

7 ⲙⲏ ⲥⲛⲁⲟⲩϫⲁⲓ ⲣⲱ ⲛⲧⲉⲓⲕⲉϩⲉ ϯⲛⲁⲛ ⲛⲁⲣⲁⲃⲟⲥ ⲉϩⲣⲁⲓ ⲉϫⲙⲡⲉⲓⲁ ⲛⲥⲉϫⲓⲧϥ

8 ⲁⲡⲁϣϣⲕⲁⲕ ⲅⲁⲣ ⲧⲉϭⲡⲧⲟϣ ⲛⲧⲙⲱⲁⲃⲓⲧⲏⲥ ⲉⲧⲁⲅⲁⲗⲗⲉⲓⲙ ⲁⲩⲱ ⲡⲉⲥⲁϣϣⲕⲁⲕ ϣⲁⲧϣⲱⲧⲉ ⲛⲉⲗⲓⲉⲓⲙ

9 ⲙⲙⲟⲟⲩ ⲇⲉ ⲛϩⲣⲉⲙⲙⲱⲛ ⲛⲁⲙⲟⲩϩ ⲛⲥⲛⲟϥ ϯⲛⲁⲛ ⲛⲁⲣⲁⲃⲟⲥ ⲅⲁⲣ ⲉϩⲣⲁⲓ ⲉϫⲛϩⲣⲉⲙⲙⲱⲛ ⲁⲩⲱ ϯⲛⲁϥⲓ ⲙⲡⲉⲥⲡⲉⲣⲙⲁ ⲙⲙⲱⲁⲃ ⲙⲛⲁⲣⲓⲏⲗ ⲡⲥⲉⲉⲡⲉ ⲛⲁⲇⲁⲙⲁ