Haggai 2 — Coptic (Sahidic)

1 ⲡϫⲟⲉⲓⲥ ⲁϥϣⲁϫⲉ ϩⲛⲧϭⲓϫ ⲛⲁⲅⲅⲁⲓⲟⲥ ⲡⲉⲡⲣⲟⲫⲏⲧⲏⲥ ⲉϥϫⲱ ⲙⲙⲟⲥ ϫⲉ

2 ⲁϫⲓⲥ ⲛⲍⲟⲣⲟⲃⲁⲃⲉⲗ ⲡϣⲏⲣⲉ ⲛⲥⲁⲗⲁⲑⲓⲏⲗ ⲡⲉ ⲉⲃⲟⲗ ϩⲛⲧⲉⲫⲩⲗⲏ ⲛⲓⲟⲩⲇⲁ ⲁⲩⲱ ⲓⲏⲥⲥⲟⲩⲥ ⲡϣⲏⲣⲉ ⲛⲓⲱⲥⲁⲇⲉⲕ ⲡⲛⲟϭ ⲛⲟⲩⲏⲏⲃ ⲁⲩⲱ ⲛⲕⲟⲟⲩⲉ ⲧⲏⲣⲟⲩ ⲙⲡⲗⲁⲟⲥ ⲉⲕϫⲱ ⲙⲙⲟⲥ ⲛⲁⲩ ϫⲉ

3 ⲛⲓⲙ ⲉⲃⲟⲗ ⲛϩⲏⲧⲧⲏⲩⲧⲛ ⲡⲉⲛⲧⲁϥⲛⲁⲩ ⲉⲡⲁⲏⲓ ϩⲙⲡⲉϥⲉⲟⲟⲩ ⲛϣⲟⲣⲡ ⲁⲩⲱ ⲛⲧϩⲉ ⲛⲧⲱⲧⲛ ⲉⲧⲉⲧⲛⲛⲁⲩ ⲉⲣⲟϥ ⲧⲉⲛⲟⲩ ⲉϣϫⲉ ⲛⲉϥϣⲟⲟⲡ ⲁⲛ ⲙⲡⲉⲧⲛⲙⲧⲟ ⲉⲃⲟⲗ

4 ⲧⲉⲛⲟⲩ ϭⲉ ϭⲙϭⲟⲙ ⲍⲟⲣⲟⲃⲁⲃⲉⲗ ⲡⲉϫⲉⲡϫⲟⲉⲓⲥ ⲛⲅϭⲙϭⲟⲙ ⲓⲏⲥⲥⲟⲩⲥ ⲡϣⲏⲣⲉ ⲛⲓⲱⲥⲉⲇⲉⲕ ⲡⲛⲟϭ ⲛⲟⲩⲏⲏⲃ ⲁⲩⲱ ⲙⲁⲣⲉϥϭⲙϭⲟⲙ ⲛϭⲓⲡⲗⲁⲟⲥ ⲧⲏⲣϥ ⲙⲡⲕⲁϩ ⲡⲉϫⲉⲡϫⲟⲉⲓⲥ ⲛⲧⲉⲧⲛⲣϩⲱⲃ ⲉⲃⲟⲗ ϫⲉⲁⲛⲟⲕ ϯϣⲟⲟⲡ ⲛⲙⲙⲏⲧⲛ ⲡⲉϫⲉⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ

5 ⲡϣⲁϫⲉ ⲛⲧⲁⲓⲥⲙⲛⲧϥ ⲛⲙⲙⲏⲧⲛ ⲉⲧⲉⲧⲛⲛⲏⲩ ⲉⲃⲟⲗ ϩⲛⲕⲏⲙⲉ ⲁⲩⲱ ⲡⲁⲡⲛⲉⲩⲙⲁ ⲁϥⲁϩⲉⲣⲁⲧϥ ϩⲛⲧⲉⲧⲛⲙⲏⲧⲉ ⲧⲱⲕ ⲛϩⲏⲧ

6 ϫⲉⲛⲁⲓ ⲛⲉⲧⲉϥϫⲱ ⲙⲙⲟⲟⲩ ⲛϭⲓⲡϫⲟⲉⲓⲥ ⲡⲡⲁⲛⲧoⲕⲣⲁⲧⲱⲣ ϫⲉⲉⲧⲓ ⲕⲉⲥⲟⲡ ⲁⲛⲟⲕ ϯⲛⲁⲕⲓⲙ ⲉⲧⲡⲉ ⲙⲛⲡⲕⲁϩ ⲙⲛⲧⲉⲑⲁⲗⲁⲥⲥⲁ ⲙⲛⲡⲡⲉⲧϣⲟⲩⲱⲟⲩ

7 ⲁⲩⲱ ϯⲛⲁⲕⲓⲙ ⲛϩⲉⲑⲛⲟⲥ ⲧⲏⲣⲟⲩ ⲛⲧⲉⲧⲛⲥⲱⲧⲡ ⲧⲏⲣⲟⲩ ⲛⲛϩⲉⲑⲛⲟⲥ ⲉⲓ ⲛⲥⲉⲙⲉϩⲡⲉⲓⲏⲓ ⲛⲉⲟⲟⲩ ⲡⲉϫⲉⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ

8 ⲡⲱⲓ ⲡⲉ ⲡⲛⲟⲩⲃ ⲁⲩⲱ ⲡⲱⲓ ⲡⲉ ⲡϩⲁⲧ ⲡⲉϫⲉⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ

9 ⲉⲃⲟⲗ ϫⲉⲡⲉⲟⲟⲩ ⲛϩⲁⲉ ⲙⲡⲉⲓⲏⲓ ϥⲛⲁϣⲱⲡⲉ ⲉⲛⲁⲁϥ ⲉⲡϣⲟⲣⲡ ⲡⲉϫⲉⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲁⲩⲱ ϯⲛⲁϯ ⲛⲟⲩⲉⲓⲣⲏⲛⲏ ⲙⲡⲉⲓⲙⲁ ⲡⲉϫⲉⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ϯⲛⲁϯ ⲛⲟⲩⲉⲓⲣⲏⲛⲏ ⲙⲯⲩⲭⲏ ⲉⲩⲟⲩϫⲁⲓ ⲛⲟⲩⲟⲛ ⲛⲓⲙ ⲉⲧⲣϩⲱⲃ ⲉⲩⲥⲟⲟⲩϩ ⲉϩⲟⲩⲛ ⲉⲧⲁϩⲟ ⲉⲣⲁⲧϥ ⲙⲡⲓⲣⲡⲉ

10 ϩⲛⲥⲟⲩϫⲁϥⲧⲉ ⲙⲡⲙⲉϩⲯⲓⲥ ⲛⲉⲃⲟⲧ ⲛⲧⲙⲉϩⲣⲙⲡⲉ ⲥⲛⲧⲉ ϩⲓⲇⲁⲣⲓⲟⲥ ⲡⲣⲣⲟ ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲁⲅⲅⲁⲓⲟⲥ ⲡⲉⲡⲣⲟⲫⲏⲧⲏⲥ ⲉϥϫⲱ ⲙⲙⲟⲥ ϫⲉ

11 ⲛⲁⲓ ⲛⲉⲧⲉϥϫⲱ ⲙⲙⲟⲟⲩ ⲛϭⲓⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ϫⲉⲛⲟⲩⲏⲏⲃ ϫⲛⲟⲩⲟⲩ ⲉⲩⲛⲟⲙⲟⲥ ⲉⲕϫⲱ ⲙⲙⲟⲥ ϫⲉ

12 ⲉⲣϣⲁⲛⲟⲩⲣⲱⲙⲉ ϫⲓ ⲛⲟⲩⲁϥ ⲉϥⲟⲩⲁⲁⲃ ϩⲙⲡⲧⲟⲡ ⲛⲧⲉϥϣⲧⲏⲛ ⲁⲩⲱ ⲛⲧⲉⲡⲧⲟⲡ ⲛⲧⲉϥϣⲧⲏⲛ ϫⲱϩ ⲉⲩⲟⲉⲓⲕ ⲏ ⲉⲩϭⲓⲛⲟⲩⲱⲙ ⲏ ⲉⲩⲏⲣⲡ ⲏ ⲉⲩⲛⲉϩ ⲏ ⲉϭⲓⲛⲟⲩⲱⲙ ⲛⲓⲙ ⲉⲛⲉ ϥⲛⲁⲧⲃⲃⲟ ⲁⲩⲟⲩⲱϣⲃ ⲛϭⲓⲛⲟⲩⲏⲏⲃ ϫⲉⲙⲙⲟⲛ

13 ⲁ ⲡⲉϫⲉⲁⲅⲅⲁⲓⲟⲥ ϫⲉⲉϥϣⲁⲛϫⲱϩ ⲛϭⲓⲡⲉⲧϫⲱϩⲙ ⲛⲡⲁⲕⲁⲑⲁⲣⲧⲟⲥ ϩⲛⲧⲉϥⲯⲩⲭⲏ ⲉⲗⲁⲁⲩ ⲛⲛⲁⲓ ⲉⲛⲉ ϥⲛⲁϫⲱϩⲙ ⲟⲛ ⲁⲩⲟⲩⲱϣⲃ ⲛϭⲓⲛⲟⲩⲏⲏⲃ ⲉⲩϫⲱ ⲙⲙⲟⲥ ϫⲉϥⲛⲁϫⲱϩⲙ

14 ⲁϥⲟⲩ ⲛϭⲓⲁⲅⲅⲁⲓ ⲉϥϫⲱ ⲙⲙⲟⲥ ϫⲉⲧⲁⲓ ⲧⲉ ⲧϩⲉ ⲙⲡⲉⲓϩⲉⲑⲛⲟⲥ ⲙⲡⲁⲙⲧⲟ ⲉⲃⲟⲗ ⲡⲉϫⲉⲡϫⲟⲉⲓⲥ ⲡⲡⲁⲛⲧⲟ ⲁⲩⲱ ⲧⲁⲓ ⲧⲉ ⲧϩⲉ ⲛⲛⲉϩⲃⲏⲩⲉ ⲧⲏⲣⲟⲩ ⲛⲛⲉⲩϭⲓϫ ⲁⲩⲱ ⲛⲉⲧⲛⲁϩⲱⲛ ⲉⲣⲟⲟⲩ ⲥⲉⲛⲁϫⲱϩⲙ ⲥⲉⲛⲁϣⲱⲡⲉ ⲛⲁⲕⲁⲑⲁⲣⲧⲟⲛ ⲉⲧⲃⲉⲡⲗⲏⲙⲙⲁ ⲛϣⲟⲣⲡ ⲥⲉⲛⲁⲙⲕⲁϩ ⲛϩⲏⲧ ⲙⲡⲉⲙⲧⲟ ⲉⲃⲟⲗ ⲛⲛⲉⲩϩⲓⲥⲉ ⲁⲩⲱ ⲧⲉⲧⲛⲛⲛⲉϫⲡⲓⲟ ϩⲛⲙⲡⲩⲗⲏ

15 ⲧⲉⲛⲟⲩ ϭⲉ ⲕⲁⲁⲥ ϩⲛⲛⲉⲧⲛϩⲏⲧ ϫⲓⲛⲙⲡϩⲟⲟⲩ ⲁⲩⲱ ⲙⲛⲛⲥⲱⲥ ⲙⲡⲁⲧⲟⲩⲕⲁⲱⲛⲉ ⲉϫⲛⲱⲛⲉ ϩⲙⲡⲣⲡⲉ ⲙⲡϫⲟⲉⲓⲥ

16 ϫⲉⲛⲉⲧⲉⲧⲛⲟ ⲛⲁϣ ⲛϩⲉ ⲙⲡⲉⲟⲩⲟⲉⲓϣ ⲉⲧⲉⲧⲛⲛⲟⲩϫⲉ ⲛⲟⲩⲁϣⲏ ⲛϫⲟⲩⲱⲧ ⲛϣⲓ ⲛⲉⲓⲱⲧ ⲁⲩⲱ ⲉϣⲁⲩⲣⲙⲏⲧ ⲛϣⲓ ⲛⲉⲓⲱⲧ ⲁⲩⲱ ⲛⲉϣⲁⲧⲉⲧⲛⲃⲱⲕ ⲡⲉ ⲉϩⲟⲩⲛ ⲉⲡⲉⲓⲟⲙ ϩⲁⲏⲣⲡ ⲉϫⲱⲗϩ ⲛϩⲏⲧϥ ⲛⲧⲁⲉⲓⲟⲩ ⲙⲙⲉⲧⲣⲏⲧⲏⲥ ⲁⲩⲱ ⲛⲉϣⲁⲩⲣϫⲟⲩⲱⲧ ⲡⲉ

17 ⲁⲓⲡⲁⲧⲁⲥⲥⲉⲓ ⲙⲙⲱⲧⲛ ϩⲛⲟⲩϭⲣⲱϩ ⲁⲩⲱ ϩⲛⲟⲩϣⲱⲛⲉ ⲛⲓⲕⲧⲉⲣⲟⲥ ⲁⲩⲱ ⲛⲉϩⲃⲏⲩⲉ ⲧⲏⲣⲟⲩ ⲛⲛⲉⲧⲛϭⲓϫ ⲁⲓⲡⲁⲧⲁⲥⲥⲉⲓ ⲙⲙⲟⲟⲩ ϩⲙⲡⲁⲗⲙⲡⲉ ⲁⲩⲱ ⲙⲡⲉⲧⲛⲕⲧⲉ ⲧⲏⲩⲧⲛ ⲉⲣⲟⲓ ⲡⲉϫⲉⲡϫⲟⲉⲓⲥ

18 ⲕⲁⲁⲥ ϩⲣⲁⲓ ϩⲛⲛⲉⲧⲛϩⲏⲧ ϫⲛ ⲙⲡⲉⲓϩⲟⲟⲩ ⲉⲃⲟⲗ ϫⲓⲛⲥⲟⲩϫⲁϥⲧⲉ ⲙⲡⲙⲉϩⲯⲓⲥ ⲛⲉⲃⲟⲧ ⲁⲩⲱ ϫⲓⲛⲡⲉϩⲟⲟⲩ ⲛⲧⲁⲩⲥⲙⲛⲥⲛⲧⲉ ⲙⲡⲉⲣⲡⲉ ⲙⲡϫⲟⲉⲓⲥ ⲕⲁⲁⲥ ϩⲛⲛⲉⲧⲛϩⲏⲧ

19 ϫⲉⲥⲉⲛⲁⲉⲓⲙⲉ ⲉⲣⲟⲟⲩ ϫⲓⲛⲧⲉⲛⲟⲩ ϩⲓⲡⲉϫⲛⲟⲟⲩ ⲁⲩⲱ ⲉϣⲱⲡⲉ ⲛⲧⲃⲱ ⲛⲉⲗⲟⲟⲗⲉ ⲙⲛⲧⲃⲱ ⲛⲕⲛⲧⲉ ⲙⲛⲧⲃⲱ ⲛϩⲉⲣⲙⲁⲛ ⲁⲩⲱ ⲧⲃⲱ ⲛϫⲟⲉⲓⲧ ⲛⲉⲧⲉⲛⲥⲉⲛⲁⲧⲁⲩⲟ ⲉⲃⲟⲗ ⲁⲛ ⲙⲡⲉⲩⲕⲁⲣⲡⲟⲥ ϯⲛⲁⲥⲙⲟⲩ ⲉⲣⲟⲟⲩ

20 ⲁⲩⲱ ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲁⲅⲅⲁⲓⲟⲥ ⲡⲉⲡⲣⲟⲫⲏⲧⲏⲥ ⲉϥϫⲱ ⲙⲙⲟⲥ ⲛⲁϥ ϩⲙⲡⲙⲉϩⲥⲉⲡⲥⲛⲁⲩ ⲛⲥⲟⲩϫⲁϥⲧⲉ ⲙⲡⲉⲃⲟⲧ ⲉϥϫⲱ ⲙⲙⲟⲥ ⲛⲁϥ ϫⲉ

21 ⲁϫⲓⲥ ⲛⲍⲟⲣⲟⲃⲁⲃⲉⲗ ⲡϣⲏⲣⲉ ⲛⲥⲁⲗⲁⲑⲓⲏⲗ ⲡⲉⲃⲟⲗϩⲛ ⲧⲉⲫⲩⲗⲏ ⲛⲓⲟⲩⲇⲁ ⲉⲕϫⲱ ⲙⲙⲟⲥ ⲛⲁϥ ϫⲉⲁⲛⲟⲕ ϯⲛⲁⲕⲓⲙ ⲉⲧⲡⲉ ⲙⲛⲡⲕⲁϩ ⲙⲛⲧⲉⲑⲁⲗⲁⲥⲥⲁ ⲙⲛⲡⲉⲧϣⲟⲩⲱⲟⲩ

22 ⲁⲩⲱ ⲛⲉⲑⲣⲟⲛⲟⲥ ⲛⲛⲉⲣⲣⲱⲟⲩ ϯⲛⲁⲧⲁⲩⲟⲟⲩ ⲉⲡⲉⲥⲏⲧ ⲁⲩⲱ ϯⲛⲁⲧⲁⲕⲟ ⲛⲧϭⲟⲙ ⲛⲛⲉⲣⲣⲱⲟⲩ ⲛⲛϩⲉⲑⲛⲟⲥ ⲁⲩⲱ ϯⲛⲁⲧⲁⲩⲟ ⲉⲡⲉⲥⲏⲧ ⲛⲛϩⲁⲣⲙⲁ ⲙⲛⲛⲉⲧⲧⲁⲗⲏⲩ ⲉⲣⲟⲟⲩ ⲡⲟⲩⲁ ⲡⲟⲩⲁ ϩⲛⲟⲩⲥⲏϥⲉ ⲉϫⲙⲡⲉϥⲥⲟⲛ

23 ϩⲙⲡⲉϩⲟⲟⲩ ⲉⲧⲙⲙⲁⲩ ⲡⲉϫⲉⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ϯⲛⲁϫⲓⲧⲕ ⲍⲟⲣⲟⲃⲁⲃⲉⲗ ...