Genesis 40 — Coptic (Sahidic)

1 ⲁⲥϣⲱⲡⲉ ⲇⲉ ⲙⲛⲛⲥⲁⲛⲓϣⲁϫⲉ ⲁϥⲣⲛⲟⲃⲉ ⲛϭⲓⲡⲣⲉϥⲟⲩⲱⲧϩ ⲙⲡⲣⲣⲟ ⲛⲕⲏⲙⲉ ⲙⲛⲡⲁⲙⲣⲉ ⲉⲡⲉⲩϫⲟⲉⲓⲥ ⲡⲣⲣⲟ ⲛⲕⲏⲙⲉ

2 ⲁϥⲛⲟⲩϭⲥ ⲛϭⲓⲫⲁⲣⲁⲱ ⲉⲡⲉϥⲥⲓⲟⲩⲣ ⲥⲛⲁⲩ ⲡⲣⲉϥⲟⲩⲱⲧϩ ⲙⲛⲡⲁⲙⲣⲉ

3 ⲁⲩⲱ ⲁϥⲛⲟⲩϫⲉ ⲙⲙⲟⲟⲩ ⲉⲡⲉϣⲧⲉⲕⲟ ϩⲁⲧⲙ ⲡⲉⲧϩⲓϫⲛ ⲡⲉϣⲧⲉⲕⲟ ⲉⲡⲙⲁ ⲉⲧⲉⲣⲉⲓⲱⲥⲏⲫ ⲟⲧⲡ ⲉϩⲟⲩⲛ ⲉⲣⲟϥ

4 ⲁⲡⲉⲧϩⲓϫⲛⲡⲉϣⲧⲉⲕⲟ ⲧⲁⲁⲩ ⲉⲧⲟⲟⲧϥ ⲛⲓⲱⲥⲏⲫ ⲁϥϣⲱⲡⲉ ϩⲓϫⲱⲟⲩ ⲛⲉⲩϣⲟⲟⲡ ⲇⲉ ⲛⲟⲩⲙⲏⲏϣⲉ ⲛϩⲟⲟⲩ ϩⲙⲡⲉϣⲧⲉⲕⲟ

5 ⲁⲩⲱ ⲁⲩⲛⲁⲩ ⲉϩⲛⲣⲁⲥⲟⲩ ⲙⲡⲉⲥⲛⲁⲩ ⲡⲟⲩⲁ ⲡⲟⲩⲁ ⲉⲩⲣⲁⲥⲟⲩ ϩⲛⲟⲩⲟⲩϣⲏ ⲛⲟⲩⲱⲧ ⲡⲛⲧⲁϥⲛⲁⲩ ⲉⲣⲟϥ ϩⲛⲧⲉϥⲣⲁⲥⲟⲩ ⲡⲣⲉϥⲟⲩⲱⲧϩ ⲙⲛⲡⲁⲙⲣⲉ ⲛⲁⲓ ⲉⲛⲉⲩϣⲟⲟⲡ ⲙⲡⲣⲣⲟ ⲛⲕⲏⲙⲉ ⲛⲁⲓ ⲉⲧϣⲟⲟⲡ ϩⲙⲡⲉϣⲧⲉⲕⲟ

6 ⲁⲓⲱⲥⲏⲫ ⲇⲉ ⲃⲱⲕ ⲉϩⲟⲩⲛ ϣⲁⲣⲟⲟⲩ ⲉϩⲧⲟⲟⲩⲉ ⲁϥⲛⲁⲩ ⲉⲣⲟⲟⲩ ⲁⲩⲱ ⲛⲉⲩϣⲟⲟⲡ ⲉⲩϣⲧⲣⲧⲱⲣ

7 ⲁϥϫⲛⲉⲛⲥⲓⲟⲩⲣ ⲇⲉ ⲙⲫⲁⲣⲁⲱ ⲛⲁⲓ ⲉⲛⲉⲩϣⲟⲟⲡ ⲛⲙⲙⲁϥ ϩⲙⲡⲉϣⲧⲉⲕⲟ ⲉⲃⲟⲗ ϩⲓⲧⲟⲟⲧϥ ⲙⲡⲉⲩϫⲟⲉⲓⲥ ⲉϥϫⲱ ⲙⲙⲟⲥ ϫⲉⲁϩⲣⲟⲟⲩ ⲛⲉⲧⲛϩⲟ ⲉⲩⲟⲕⲙ ⲙⲡϩⲟⲟⲩ

8 ⲛⲧⲟⲟⲩ ⲇⲉ ⲡⲉϫⲁⲩ ⲛⲁϥ ϫⲉⲛⲧⲁⲛⲛⲁⲩ ⲉⲩⲣⲁⲥⲟⲩ ⲁⲩⲱ ⲛϥϣⲟⲟⲡ ⲁⲛ ⲛϭⲓⲡⲉⲧⲛⲁⲃⲟⲗⲥ ⲡⲉϫⲁϥ ⲇⲉ ⲛⲁⲩ ⲛϭⲓⲓⲱⲥⲏⲫ ϫⲉⲙⲏ ⲉⲣⲉⲡⲉⲩⲃⲱⲗ ϣⲟⲟⲡ ⲁⲛ ⲉⲃⲟⲗ ϩⲓⲧⲟⲟⲧϥ ⲙⲡⲛⲟⲩⲧⲉ ϫⲟⲟⲩ ϭⲉ ⲉⲣⲟⲓ

9 ⲁϥϫⲱ ⲛϭⲓⲡⲣⲉϥⲟⲩⲱⲧϩ ⲛⲧⲉϥⲣⲁⲥⲟⲩ ⲉⲓⲱⲥⲏⲫ ⲡⲉϫⲁϥ ⲛⲁϥ ϫⲉϩⲣⲁⲓ ϩⲛⲧⲁⲣⲁⲥⲟⲩ ⲛⲉⲟⲩⲛⲟⲩⲃⲱ ⲛⲉⲗⲟⲟⲗⲉ ⲙⲡⲁⲙⲧⲟ ⲉⲃⲟⲗ

10 ⲉⲩⲛϣⲟⲙⲛⲧ ⲛⲧⲁⲣ ϩⲛⲧⲃⲱ ⲛⲉⲗⲟⲟⲗⲉ ⲁⲩⲱ ⲧⲁⲓ ⲛⲉⲥⲣⲟⲟⲩⲧ ⲉⲁⲥⲧⲁⲩⲟ ⲉⲃⲟⲗ ⲛϩⲉⲛⲥⲙⲁϩ ⲛⲉⲗⲟⲟⲗⲉ ⲛϯⲟⲩⲱ ⲉⲩⲡⲏϩ

11 ⲁⲩⲱ ⲡⲁⲡⲟⲧ ⲙⲫⲁⲣⲁⲱ ⲛⲉϥϩⲛ ⲧⲁϭⲓϫ ⲁⲓϫⲓⲛⲉⲗⲟⲟⲗⲉ ⲁⲓⲟϥⲟⲩ ⲉϩⲣⲁⲓ ⲉⲡⲁⲡⲟⲧ ⲁⲓϯ ⲙⲡⲁⲡⲟⲧ ⲉϩⲣⲁⲓ ⲉⲛϭⲓϫ ⲙⲫⲁⲣⲁⲱ

12 ⲡⲉϫⲁϥ ⲛⲁϥ ⲛϭⲓⲓⲱⲥⲏⲫ ϫⲉⲡⲁⲓ ⲡⲉ ⲡⲉⲥⲃⲱⲗ ⲡϣⲟⲙⲛⲧ ⲛⲧⲁⲣ ϣⲟⲙⲛⲧ ⲛϩⲟⲟⲩ ⲛⲉ

13 ⲉⲧⲓ ⲕⲉϣⲟⲙⲛⲧ ⲛϩⲟⲟⲩ ⲛⲉ ⲫⲁⲣⲁⲱ ⲛⲁⲣⲡⲙⲉⲉⲩⲉ ⲛⲧⲉⲕⲁⲣⲭⲏ ⲛϥⲧⲁϩⲟⲕ ⲉⲣⲁⲧⲕ ⲉϩⲣⲁⲓ ⲉϫⲛⲧⲉⲕⲙⲛⲧⲣⲉϥⲟⲩⲱⲧϩ ⲛⲅϯ ⲙⲡⲁⲡⲟⲧ ⲙⲫⲁⲣⲁⲱ ⲉϩⲣⲁⲓ ⲉⲛⲉϥϭⲓϫ ⲕⲁⲧⲁⲧⲉⲕⲁⲣⲭⲏ ⲛϣⲟⲣⲡ ⲛⲧϩⲉ ⲉⲛⲉⲕⲟⲩⲱⲧϩ ⲙⲙⲟⲥ

14 ⲁⲗⲗⲁ ⲁⲣⲓⲡⲁⲙⲉⲉⲩⲉ ϩⲙⲡⲉⲕϩⲏⲧ ⲉⲣϣⲁⲛⲡⲡⲉⲧⲛⲁⲛⲟⲩϥ ϣⲱⲡⲉ ⲙⲙⲟⲕ ⲛⲅⲉⲓⲣⲉ ⲛⲙⲙⲁⲓ ⲛⲟⲩⲛⲁ ⲁⲩⲱ ⲛⲅⲉⲓⲣⲉ ⲛⲟⲩⲣⲡⲙⲉⲉⲩⲉ ⲉⲧⲃⲏⲏⲧⲛⲛⲁϩⲣⲙⲫⲁⲣⲁⲱ ⲛⲅⲛⲧ ⲉⲃⲟⲗ ϩⲙⲡⲉⲓϣⲧⲉⲕⲟ

15 ϫⲉϩⲛⲟⲩϥⲓ ⲛⲧⲁⲩϥⲓⲧ ⲉⲃⲟⲗ ϩⲙⲡⲕⲁϩ ⲛⲛϩⲉⲃⲣⲁⲓⲟⲥ ⲁⲩⲱ ⲙⲡⲓⲣⲗⲁⲁⲩ ⲙⲡⲉⲧϩⲟⲟⲩ ⲉⲓⲙⲡⲉⲓⲙⲁ ⲁⲗⲗⲁ ⲁⲩⲛⲟⲩϫⲉ ⲙⲙⲟⲓ ⲉϩⲣⲁⲓ ⲉⲡⲏⲓ ⲙⲡⲉⲓϣⲏⲓ

16 ⲁϥⲛⲁⲩ ⲇⲉ ⲛϭⲓⲡⲁⲙⲣⲉ ϫⲉⲁϥⲃⲟⲗⲥ ϩⲛⲟⲩⲥⲟⲟⲩⲧⲛ ⲡⲉϫⲁϥ ⲛⲓⲱⲥⲏⲫ ϫⲉⲁⲛⲟⲕ ϩⲱ ⲁⲓⲛⲁⲩ ⲉⲩⲣⲁⲥⲟⲩ ⲉϣϫⲉ ⲛⲉⲓϥⲓ ⲛϣⲟⲙⲛⲧ ⲛⲕⲁⲛⲟⲩⲛ ⲛⲟⲉⲓⲕ ϩⲛⲧⲁⲁⲡⲉ

17 ϩⲣⲁⲓ ⲇⲉ ϩⲙⲡⲕⲁⲛⲟⲩⲛ ⲉⲧⲛⲧⲡⲉ ⲙⲙⲟⲟⲩ ⲛⲉⲩϣⲟⲟⲡ ϩⲓϫⲱϥ ⲉⲃⲟⲗ ϩⲛⲅⲉⲛⲟⲥ ⲛⲓⲙ ⲛϩⲱⲃ ⲙⲙⲛⲧⲁⲙⲣⲉ ⲛⲁⲓ ⲉϣⲁⲣⲉⲡⲣⲣⲟ ⲫⲁⲣⲁⲱ ⲟⲩⲟⲙⲟⲩ ⲁⲩⲱ ⲛϩⲁⲗⲁⲧⲉ ⲛⲧⲡⲉ ⲛⲉⲩⲟⲩⲱⲙ ⲙⲙⲟⲟⲩ ⲉⲃⲟⲗ ϩⲙⲡⲕⲁⲛⲟⲩⲛ ⲉⲧϩⲓϫⲛ ⲧⲁⲁⲡⲉ

18 ⲁϥⲟⲩⲱϣⲃ ⲇⲉ ⲛϭⲓⲓⲱⲥⲏⲫ ⲡⲉϫⲁϥ ⲛⲁϥ ϫⲉⲡⲁⲓ ⲡⲉ ⲡⲉⲥⲃⲱⲗ ⲡϣⲟⲙⲛⲧ ⲛⲕⲁⲛⲟⲩⲛ ϣⲟⲙⲛⲧ ⲛϩⲟⲟⲩ ⲛⲉ

19 ⲉⲧⲓ ⲕⲉϣⲟⲙⲛⲧ ⲛϩⲟⲟⲩ ⲫⲁⲣⲁⲱ ⲛⲁϥⲓ ⲛⲧⲉⲕⲁⲡⲉ ϩⲓϫⲱⲕ ⲛϥⲉⲓϣⲉ ⲙⲙⲟⲕ ⲉϩⲣⲁⲓ ⲉϫⲛⲟⲩϣⲉ ⲛⲧⲉⲛϩⲁⲗⲁⲧⲉ ⲛⲧⲡⲉ ⲟⲩⲱⲙ ⲛⲛⲉⲕⲥⲁⲣⲝ

20 ⲁⲥϣⲱⲡⲉ ⲇⲉ ϩⲙⲡⲙⲉϩϣⲟⲙⲛⲧ ⲛϩⲟⲟⲩ ⲛⲉⲡϩⲟⲩⲙⲓⲥⲉ ⲡⲉ ⲙⲫⲁⲣⲁⲱ ⲁϥⲉⲓⲣⲉ ⲛⲟⲩⲇⲉⲓⲡⲛⲟⲛ ⲉⲛⲉϥϩⲙϩⲁⲗ ⲧⲏⲣⲟⲩ ⲁϥⲣⲡⲙⲉⲉⲩⲉ ⲛⲧⲁⲣⲭⲏ ⲙⲡⲣⲉϥⲟⲩⲱⲧϩ ⲙⲛⲧⲁⲣⲭⲏ ⲙⲡⲁⲙⲣⲉ ϩⲛⲧⲙⲏⲧⲉ ⲛⲛⲉϥϩⲙϩⲁⲗ

21 ⲁϥⲧⲁϩⲟ ⲉⲣⲁⲧϥ ⲙⲡⲣⲉϥⲟⲩⲱⲧϩ ⲉϩⲣⲁⲓ ⲉϫⲛⲧⲉϥⲁⲣⲭⲏ ...

22 ...