Genesis 29 — Coptic (Sahidic)

1 ⲁⲓⲁⲕⲱⲃ ⲇⲉ ⲧⲱⲟⲩⲛ ϩⲛⲛⲉϥⲟⲩⲉⲣⲏⲧⲉ ⲁϥⲙⲟⲟϣⲉ ⲉϩⲣⲁⲓ ⲉⲡⲕⲁϩ ⲛⲙⲙⲁⲛϣⲁ ⲉⲣⲁⲧϥ ⲛⲗⲁⲃⲁⲛ ⲡϣⲏⲣⲉ ⲛⲃⲁⲑⲟⲩⲏⲗ ⲡⲥⲩⲣⲟⲥ ⲡⲥⲟⲛ ⲛϩⲣⲃⲉⲕⲕⲁ ⲧⲙⲁⲁⲩ ⲛⲓⲁⲕⲱⲃ ⲙⲛⲏⲥⲁⲩ

2 ⲁϥⲛⲁⲩ ⲁⲩⲱ ⲉⲓⲥ ϩⲏⲏⲧⲉ ⲛⲉⲟⲩⲛⲟⲩϣⲱⲧⲉ ϩⲛⲧⲥⲱϣⲉ ⲛⲉⲩϣⲟⲟⲡ ⲇⲉ ⲙⲙⲁⲩ ϩⲛⲟⲩⲙⲧⲟⲛ ⲙⲙⲟⲟⲩ ϩⲓϫⲱⲥ ⲛϭⲓϣⲟⲙⲏⲧ ⲛⲟϩⲉ ⲛⲉⲥⲟⲟⲩ ⲛⲉⲩⲧⲥⲟ ⲅⲁⲣ ⲛⲛⲉⲩⲉⲥⲟⲟⲩ ⲉⲃⲟⲗ ϩⲛⲧϣⲱⲧⲉ ⲉⲧⲙⲙⲁⲩ ⲛⲉⲟⲩⲛⲟⲩⲛⲟϭ ⲇⲉ ⲛⲱⲛⲉ ⲕⲏ ϩⲓϫⲛⲧⲧⲁⲡⲣⲟ ⲛⲧϣⲱⲧⲉ

3 ⲁⲩⲱ ⲛⲉϣⲁⲩⲥⲱⲟⲩϩ ⲙⲙⲁⲩ ⲡⲉ ⲛϭⲓⲛϣⲟⲟⲥ ⲧⲏⲣⲟⲩ ⲛⲥⲉⲥⲕⲟⲣⲕⲣ ⲙⲡⲱⲛⲉ ϩⲓⲣⲛ ⲧⲧⲁⲡⲣⲟ ⲛⲧϣⲱⲧⲉ ⲛⲥⲉⲧⲥⲟ ⲛⲛⲉⲩⲉⲥⲟⲟⲩ ⲛⲥⲉⲕⲱ ⲟⲛ ⲙⲡⲱⲛⲉ ϩⲓⲣⲛ ⲧⲧⲁⲡⲣⲟ ⲛⲧϣⲱⲧⲉ ⲉⲡⲉϥⲙⲁ

4 ⲡⲉϫⲉⲓⲁⲕⲱⲃ ⲇⲉ ⲛⲁⲩ ϫⲉⲛⲉⲥⲛⲏⲩ ⲛⲧⲉⲧⲛϩⲉⲛⲉⲃⲟⲗ ⲧⲱⲛ ⲛⲧⲱⲧⲛ ⲛⲧⲟⲟⲩ ⲇⲉ ⲡⲉϫⲁⲩ ϫⲉⲁⲛⲟⲛ ϩⲉⲛⲉⲃⲟⲗ ϩⲛⲭⲁⲣⲣⲁⲛ

5 ⲡⲉϫⲁϥ ⲛⲁⲩ ⲇⲉ ⲧⲉⲧⲛⲥⲟⲟⲩⲛ ⲉⲗⲁⲃⲁⲛ ⲡϣⲏⲣⲉ ⲛⲁⲭⲱⲣ ⲛⲧⲟⲟⲩ ⲇⲉ ⲡⲉϫⲁⲩ ϫⲉⲧⲛⲥⲟⲟⲩⲛ ⲙⲙⲟϥ

6 ⲡⲉϫⲁϥ ⲇⲉ ⲛⲁⲩ ϫⲉⲛϥⲟⲩⲟϫ ⲛⲧⲟⲟⲩ ⲇⲉ ⲡⲉϫⲁⲩ ϫⲉϥⲟⲩⲟϫ ⲉⲧⲓ ⲉϥϣⲁϫⲉ ⲉⲓⲥ ϩⲣⲁⲭⲏⲗ ⲧⲉϥϣⲉⲉⲣⲉ ⲁⲥⲉⲓ ⲙⲛⲛⲉⲥⲟⲟⲩ ⲙⲡⲉⲥⲉⲓⲱⲧ ⲛⲧⲟⲥ ⲅⲁⲣ ⲡⲉⲛⲉⲥⲙⲟⲟⲛⲉ ⲛⲛⲉⲥⲟⲟⲩ ⲙⲡⲉⲥⲉⲓⲱⲧ

7 ⲡⲉϫⲉⲓⲁⲕⲱⲃ ϫⲉⲉⲧⲓ ⲟⲩⲛⲛⲁⲩ ⲛⲃⲟⲗ ⲙⲡⲁⲧϥⲣⲛⲁⲩ ⲛⲥⲉⲩϩⲛⲧⲃⲛⲟⲟⲩⲉ ⲉϩⲟⲩⲛ ⲧⲥⲟ ⲛⲛⲉⲥⲟⲟⲩ ⲛⲧⲉⲧⲛⲃⲱⲕ ⲛⲧⲉⲧⲛⲙⲟⲟⲛⲉ

8 ⲛⲧⲟⲟⲩ ⲇⲉ ⲡⲉϫⲁⲩ ϫⲉⲙⲛϣϭⲟⲙ ⲙⲙⲟⲛ ϣⲁⲛⲧⲟⲩⲥⲱⲟⲩϩ ⲉϩⲟⲩⲛ ⲛϭⲓⲛϣⲟⲟⲥ ⲧⲏⲣⲟⲩ ⲛⲥⲉⲥⲕⲟⲣⲕⲣ ⲙⲡⲱⲛⲉ ϩⲓⲣⲛ ⲧⲧⲁⲡⲣⲟ ⲛⲧϣⲱⲧⲉ ⲛⲧⲛⲧⲥⲟ ⲛⲛⲉⲥⲟⲟⲩ

9 ⲉⲧⲓ ⲉϥϣⲁϫⲉ ⲛⲙⲙⲁⲩ ⲉⲓⲥ ϩⲣⲁⲭⲏⲗ ⲧϣⲉⲉⲣⲉ ⲛⲗⲁⲃⲁⲛ ⲁⲥⲉⲓ ⲙⲛⲛⲉⲥⲟⲟⲩ ⲙⲡⲉⲥⲉⲓⲱⲧ ⲛⲧⲟⲥ ⲅⲁⲣ ⲡⲉⲛⲉⲥⲙⲟⲟⲛⲉ ⲛⲛⲉⲥⲟⲟⲩ ⲙⲡⲉⲥⲉⲓⲱⲧ

10 ⲁⲥϣⲱⲡⲉ ⲇⲉ ⲛⲧⲉⲣⲉⲓⲁⲕⲱⲃ ⲛⲁⲩ ⲉϩⲣⲁⲭⲏⲗ ⲧϣⲉⲉⲣⲉ ⲛⲗⲁⲃⲁⲛ ⲡⲥⲟⲛ ⲛⲧⲉϥⲙⲁⲁⲩ ⲙⲛⲛⲉⲥⲟⲟⲩ ⲁⲓⲁⲕⲱⲃ ϯⲡⲉϥⲟⲩⲟⲓ ⲉϩⲟⲩⲛ ⲁϥⲥⲕⲟⲣⲕⲣ ⲙⲡⲱⲛⲉ ⲉⲃⲟⲗ ϩⲓⲣⲛ ⲧⲧⲁⲡⲣⲟ ⲛⲧϣⲱⲧⲉ ⲁϥⲧⲥⲟ ⲛⲛⲉⲥⲟⲟⲩ ⲛⲗⲁⲃⲁⲛ ⲡⲥⲟⲛ ⲛⲧⲉϥⲙⲁⲁⲩ

11 ⲁⲓⲁⲕⲱⲃ ⲟⲩⲉϣϩⲣⲁⲭⲏⲗ ⲁϥⲱϣ ⲉⲃⲟⲗ ϩⲛⲧϥⲥⲙⲏ ⲁϥⲣⲓⲙⲉ

12 ⲁⲩⲱ ⲁϥⲧⲁⲙⲉϩⲣⲁⲭⲏⲗ ϫⲉⲡⲥⲟⲛ ⲙⲡⲉⲥⲉⲓⲱⲧ ⲡⲉ ⲁⲩⲱ ϫⲉⲡϣⲏⲣⲉ ⲛϩⲣⲉⲃⲉⲕⲕⲁ ⲡⲉ ⲁⲥⲡⲱⲧ ⲇⲉ ⲛϭⲓⲧϣⲉⲉⲣⲉ ϣⲏⲙ ⲁⲥϫⲓⲡⲟⲩⲱ ⲙⲡⲉⲥⲉⲓⲱⲧ ⲕⲁⲧⲁⲛⲉⲓϣⲁϫⲉ

13 ⲁⲥϣⲱⲡⲉ ⲇⲉ ⲛⲧⲉⲣⲉⲗⲁⲃⲁⲛ ⲥⲱⲧⲙ ⲉⲡⲣⲁⲛ ⲛⲓⲁⲕⲱⲃ ⲡϣⲏⲣⲉ ⲛⲧⲉϥⲥⲱⲛⲉ ⲁϥⲡⲱⲧ ⲉⲃⲟⲗ ⲉⲧⲱⲙⲛⲧ ⲉⲣⲟϥ ⲁϥϩⲱⲗϭ ⲉⲣⲟϥ ⲁϥϯⲡⲓ ⲉⲣⲱϥ ⲁϥϫⲓⲧϥ ⲉϩⲟⲩⲛ ⲉⲡⲉϥⲏⲓ ⲁϥϫⲱ ⲉⲗⲁⲃⲁⲛ ⲛⲛⲉⲓϣⲁϫⲉ ⲧⲏⲣⲟⲩ

14 ⲡⲉϫⲉⲗⲁⲃⲁⲛ ⲛⲁϥ ϫⲉⲛⲧⲟⲕ ⲛⲧⲕ ⲟⲩⲉⲃⲟⲗ ϩⲛⲛⲁⲕⲉⲉⲥ ⲁⲩⲱ ⲛⲧⲕ ⲟⲩⲉⲃⲟⲗ ϩⲛⲧⲁⲥⲁⲣⲝ ⲁϥϭⲱ ϩⲁϩⲧⲏϥ ⲛⲟⲩⲉⲃⲟⲧ ⲛϩⲟⲟⲩ

15 ⲡⲉϫⲉⲗⲁⲃⲁⲛ ⲇⲉ ⲛⲓⲁⲕⲱⲃ ϫⲉⲉⲃⲟⲗ ϫⲉⲛⲧⲕ ⲡⲁⲥⲟⲛ ⲛⲛⲉⲕⲣϩⲙϩⲁⲗ ⲛⲁⲓ ⲛϫⲓⲛϫⲏ ⲙⲁⲧⲁⲙⲟⲓ ϫⲉⲟⲩ ⲡⲉ ⲡⲉⲕⲃⲉⲕⲉ

16 ⲗⲁⲃⲁⲛ ⲇⲉ ⲛⲉⲟⲩⲛⲧⲉϥϣⲉⲉⲣⲉ ⲥⲛⲧⲉ ⲡⲣⲁⲛ ⲛⲧⲛⲟϭ ⲡⲉ ⲗⲉⲓⲁ ⲁⲩⲱ ⲡⲣⲁⲛ ⲛⲧⲕⲟⲩⲓ ⲡⲉ ϩⲣⲁⲭⲏⲗ

17 ⲛⲃⲁⲗ ⲇⲉ ⲛⲗⲉⲓⲁ ⲛⲉⲩϭⲟⲟⲃ ϩⲣⲁⲭⲏⲗ ⲇⲉ ⲛⲉⲛⲉⲥⲱⲥ ϩⲙⲡⲉⲥⲉⲓⲛⲉ ⲉⲛⲉⲥⲉϩⲣⲁⲥ ⲉⲙⲁⲧⲉ ϩⲙⲡⲉⲥϩⲟ

18 ⲁⲓⲁⲕⲱⲃ ⲟⲩⲉϣϩⲣⲁⲭⲏⲗ ⲡⲉϫⲁϥ ⲛⲁϥ ϫⲉϯⲛⲁⲉⲣϩⲙϩⲁⲗ ⲛⲁⲕ ⲛⲥⲁϣϥ ⲛⲣⲟⲙⲡⲉ ⲉⲧⲃⲉϩⲣⲁⲭⲏⲗ ⲧⲕⲕⲟⲩⲓ ⲛϣⲉⲉⲣⲉ

19 ⲡⲉϫⲉⲗⲁⲃⲁⲛ ⲛⲁϥ ϫⲉⲛⲁⲛⲟⲩⲥ ⲉⲧⲣⲁⲧⲁⲁⲥ ⲛⲁⲕ ⲛϩⲟⲩⲉⲧⲁⲁⲥ ⲛⲟⲩⲣⲱⲙⲉ ⲛϣⲙⲙⲟ ⲟⲩⲱϩ ⲛⲙⲙⲁⲛ

20 ⲁⲓⲁⲕⲱⲃ ⲣϩⲙϩⲁⲗ ⲉⲧⲃⲉϩⲣⲁⲭⲏⲗ ⲛⲥⲁϣϥⲉ ⲛⲣⲟⲙⲡⲉ ⲁⲩⲱ ⲛⲉⲩϣⲟⲟⲡ ⲙⲡⲉϥⲙⲧⲟ ⲉⲃⲟⲗ ⲛⲧϩⲉ ⲛϩⲉⲛⲕⲟⲩⲓ ⲛϩⲟⲟⲩ ⲉⲃⲟⲗ ϫⲉⲛⲉϥⲟⲩⲁϣⲥ

21 ⲡⲉϫⲉⲓⲁⲕⲱⲃ ⲇⲉ ⲛⲗⲁⲃⲁⲛ ϫⲉⲙⲁ ⲛⲁⲓ ⲛⲧⲁⲥϩⲓⲙⲉ ⲁⲛⲉϩⲟⲟⲩ ⲅⲁⲣ ϫⲱⲕ ⲉⲃⲟⲗ ϫⲉⲉⲓⲉⲃⲱⲕ ⲉϩⲟⲩⲛ ϣⲁⲣⲟⲥ

22 ⲁⲗⲁⲃⲁⲛ ⲇⲉ ⲥⲱⲟⲩϩ ⲉϩⲟⲩⲛ ⲛⲛⲣⲱⲙⲉ ⲧⲏⲣⲟⲩ ⲙⲡⲙⲁ ⲉⲧⲙⲙⲁⲩ ⲁϥⲉⲓⲣⲉ ⲛⲧϣⲉⲗⲉⲉⲧ

23 ⲁⲣⲟⲩϩⲉ ⲇⲉ ϣⲱⲡⲉ ...

24 ⲁⲗⲁⲃⲁⲛ ⲇⲉ ϯ ⲛⲗⲉⲓⲁ ⲧⲉϥϣⲉⲉⲣⲉ ⲛⲍⲉⲗⲫⲁ ⲧⲉϥϩⲙϩⲁⲗ ⲛⲁⲥ ⲛϩⲙϩⲁⲗ

25 ⲁϩⲧⲟⲟⲩⲉ ⲇⲉ ϣⲱⲡⲉ ⲁⲩⲱ ⲉⲓⲥ ϩⲏⲏⲧⲉ ⲛⲉⲗⲉⲓⲁ ⲧⲉ ⲡⲉϫⲉⲓⲁⲕⲱⲃ ⲇⲉ ⲛⲗⲁⲃⲁⲛ ϫⲉⲟⲩ ⲡⲉ ⲡⲁⲓ ⲉⲛⲧⲁⲕⲁⲁϥ ⲛⲁⲓ ⲛⲧⲁⲓⲣϩⲙϩⲁⲗ ⲛⲁⲕ ⲁⲛ ⲉⲧⲃⲉϩⲣⲁⲭⲏⲗ ⲉⲧⲃⲉⲟⲩ ⲁⲕⲣϩⲁⲗ ⲙⲙⲟⲓ

26 ⲡⲉϫⲁϥ ⲇⲉ ⲛϭⲓⲗⲁⲃⲁⲛ ϫⲉⲛⲛⲉⲥϣⲱⲡⲉ ⲛⲧⲉⲓϩⲉ ⲙⲡⲉⲓⲙⲁ ⲉϯ ⲛⲧⲕⲟⲩⲓ ϩⲁⲧϩⲏ ⲛⲧⲛⲟϭ

27 ϫⲱⲕ ⲉⲃⲟⲗ ⲛⲧⲥⲁϣϥⲉ ⲛⲧⲁⲓ ⲧⲁϯ ⲛⲁⲕ ⲛⲧⲕⲉⲟⲩⲉⲓ ⲉⲡⲙⲁ ⲙⲡϩⲱⲃ ⲉⲧⲕⲛⲁⲁⲁϥ ϩⲁϩⲧⲏⲓ ⲛⲧⲕⲉⲥⲁϣϥⲉ ⲛⲣⲟⲙⲡⲉ

28 ⲁⲓⲁⲕⲱⲃ ⲇⲉ ⲉⲓⲣⲉ ϩⲓⲛⲁⲓ ⲁϥϫⲱⲕ ⲉⲃⲟⲗ ⲙⲡⲥⲁϣϥ ⲛⲧⲁⲓ ⲁⲗⲁⲃⲁⲛ ϯ ⲛⲁϥ ⲛϩⲣⲁⲭⲏⲗ ⲧⲉϥϣⲉⲉⲣⲉ ⲛⲁϥ ⲛⲥϩⲓⲙⲉ

29 ⲁⲗⲁⲃⲁⲛ ⲇⲉ ϯ ⲛϩⲣⲁⲭⲏⲗ ⲧⲉϥϣⲉⲉⲣⲉ ⲛⲃⲁⲗⲗⲁ ⲧⲉϥϩⲙϩⲁⲗ ⲛⲁⲥ ⲛϩⲙϩⲁⲗ

30 ⲁϥⲃⲱⲕ ⲉϩⲟⲩⲛ ϣⲁϩⲣⲁⲭⲏⲗ ⲓⲁⲕⲱⲃ ⲇⲉ ⲁϥⲟⲩⲉϣ ϩⲣⲁⲭⲏⲗ ⲉϩⲟⲩⲉ ⲗⲉⲓⲁ ⲁϥⲣϩⲙϩⲁⲗ ⲛⲁϥ ⲛⲕⲉⲥⲁϣϥⲉ ⲛⲣⲟⲙⲡⲉ

31 ⲁⲡϫⲟⲉⲓⲥ ⲇⲉ ⲛⲁⲩ ϫⲉⲥⲉⲙⲟⲥⲧⲉ ⲛⲗⲉⲓⲁ ⲁϥⲟⲩⲱⲛ ⲛⲧⲉⲥⲟⲟⲧⲉ ϩⲣⲁⲭⲏⲗ ⲇⲉ ⲛⲉⲩⲁϭⲣⲏⲛ ⲧⲉ

32 ⲁⲗⲓⲁ ⲇⲉ ⲱ ⲁⲥϫⲡⲟ ⲛⲟⲩϣⲏⲣⲉ ⲛⲓⲁⲕⲱⲃ ⲁⲥⲙⲟⲩⲧⲉ ⲉⲡⲉϥⲣⲁⲛ ϫⲉϩⲣⲟⲩⲃⲏⲛ ⲉⲥϫⲱ ⲙⲙⲟⲥ ϫⲉⲁⲡϫⲟⲉⲓⲥ ⲛⲁⲩ ⲉⲡⲁⲑⲃⲃⲓⲟ ⲁϥϯ ⲛⲁⲓ ⲛⲟⲩϣⲏⲣⲉ ⲧⲉⲛⲟⲩ ϭⲉ ⲡⲁϩⲁⲓ ⲛⲁⲟⲩⲁϣⲧ

33 ⲁⲛⲉⲓⲁ ⲟⲛ ⲱ ⲁⲥϫⲡⲟ ⲙⲡⲙⲉϩⲥⲛⲁⲩ ⲛϣⲏⲣⲉ ⲛⲓⲁⲕⲱⲃ ⲡⲉϫⲁⲥ ϫⲉⲉⲃⲟⲗ ϫⲉⲁⲡϫⲟⲉⲓⲥ ⲥⲱⲧⲙ ϫⲉⲥⲉⲙⲟⲥⲧⲉ ⲙⲙⲟⲓ ⲁϥϯ ⲛⲁⲓ ⲙⲡⲉⲓⲕⲉⲟⲩⲁ ⲁⲥⲙⲟⲩⲧⲉ ⲉⲡⲉϥⲣⲁⲛ ϫⲉⲥⲩⲙⲉⲱⲛ

34 ⲁⲥⲱ ⲟⲛ ⲁⲥϫⲡⲟ ⲛⲟⲩϣⲏⲣⲉ ⲡⲉϫⲁⲥ ϫⲉϩⲙⲡⲉⲓⲟⲩⲟⲉⲓϣ ⲡⲁϩⲁⲓ ⲛⲁⲕⲧⲟϥ ⲉⲣⲟⲓ ⲁⲓϫⲡⲟ ⲅⲁⲣ ⲛⲁϥ ⲛϣⲟⲙⲛⲧ ⲛϣⲏⲣⲉ ⲉⲧⲃⲉⲡⲁⲓ ⲁⲥⲙⲟⲩⲧⲉ ⲉⲡⲉϥⲣⲁⲛ ϫⲉⲗⲉⲩⲉⲓ

35 ⲁⲥⲱ ⲟⲛ ⲁⲥϫⲡⲟ ⲛⲕⲉϣⲏⲣⲉ ⲡⲉϫⲁⲥ ϫⲉⲧⲉⲛⲟⲩ ϯⲛⲁⲉⲝⲟⲙⲟⲗⲟⲅⲉⲓ ⲙⲡⲁⲓ ⲙⲡϫⲟⲉⲓⲥ ⲡⲛⲟⲩⲧⲉ ⲉⲧⲃⲉⲡⲁⲓ ⲁⲥⲙⲟⲩⲧⲉ ⲉⲡⲉϥⲣⲁⲛ ϫⲉⲓⲟⲩⲇⲁⲥ ⲁⲥⲗⲟ ⲉⲥⲙⲓⲥⲉ