Read Genesis 15 side by side with translations · The Final Bible
1 ⲙⲛⲛⲥⲁⲛⲉⲓϣⲁϫⲉ ⲁⲡϣⲁϫⲉ ⲙⲡϫⲟⲉⲓⲥ ϣⲱⲡⲉ ϣⲁⲁⲃⲣⲁⲙ ϩⲛⲟⲩϩⲟⲣⲁⲙⲁ ⲉϥϫⲱ ⲙⲙⲟⲥ ϫⲉⲙⲡⲣⲣϩⲟⲧⲉ ⲁⲃⲣⲁⲙ ⲁⲛⲟⲕ ϯⲟ ⲛⲁⲕ ⲛⲛⲁϣⲧⲉ ⲡⲉⲕⲃⲉⲕⲉ ⲛⲁϣⲱⲡⲉ ⲉϥⲟϣ ⲉⲙⲁⲧⲉ
2 ⲡⲉϫⲁϥ ⲇⲉ ⲛϭⲓⲁⲃⲣⲁⲙ ϫⲉⲡϫⲟⲉⲓⲥ ⲉⲕⲛⲁϯⲟⲩ ⲛⲁⲓ ⲁⲛⲟⲕ ϯⲛⲁⲙⲟⲩ ⲉⲓⲟ ⲛⲁⲧϣⲏⲣⲉ ⲡϣⲏⲣⲉ ⲇⲉ ⲙⲙⲁⲥⲉⲕ ⲧⲁⲙⲉⲥϩⲛⲛⲏⲓ ⲉⲧⲉⲡⲁⲓ ⲡⲉ ⲇⲁⲙⲁⲥⲕⲟⲥ ⲉⲗⲓⲉⲍⲉⲣ
3 ⲡⲉϫⲁϥ ⲇⲉ ⲛϭⲓⲁⲃⲣⲁⲙ ϫⲉⲉⲡⲉⲓⲇⲏ ⲙⲡⲉⲕϯ ⲛⲁⲓ ⲛⲟⲩⲥⲡⲉⲣⲙⲁ ⲡⲁⲙⲉⲥϩⲛⲛⲏⲓ ⲡⲉⲧⲛⲁⲕⲗⲏⲣⲟⲛⲟⲙⲉⲓ ⲙⲙⲟⲓ
4 ⲛⲧⲉⲩⲛⲟⲩ ⲁⲧⲉⲥⲙⲏ ⲙⲡⲛⲟⲩⲧⲉ ϣⲱⲡⲉ ϣⲁⲣⲟϥ ϫⲉⲙⲡⲁⲓ ⲛⲁⲕⲗⲏⲣⲟⲛⲟⲙⲉⲓ ⲙⲙⲟⲕ ⲁⲛ ⲁⲗⲗⲁ ⲡⲉⲧⲛⲏⲩ ⲉⲃⲟⲗ ⲛϩⲏⲧⲕ ⲡⲉⲧⲛⲁⲕⲗⲏⲣⲟⲛⲟⲙⲉⲓ ⲙⲙⲟⲕ
5 ⲁϥⲛⲧϥ ⲇⲉ ⲉⲃⲟⲗ ⲡⲉϫⲁϥ ⲛⲁϥ ϫⲉϭⲱϣⲧ ⲉϩⲣⲁⲓ ⲉⲧⲡⲉ ⲛⲅⲱⲡ ⲛⲛⲥⲓⲟⲩ ⲛⲅⲛⲁⲩ ϫⲉⲟⲩⲛϭⲟⲙ ⲙⲙⲟⲕ ⲉⲟⲡⲟⲩ ⲡⲉϫⲁϥ ⲛⲁϥ ϫⲉⲧⲁⲓ ⲧⲉ ⲧϩⲉ ⲉⲧⲉⲣⲉⲡⲉⲕⲥⲡⲉⲣⲙⲁ ⲛⲁϣⲱⲡⲉ ⲙⲙⲟⲥ
6 ⲁϥⲡⲓⲥⲧⲉⲩⲉ ⲛϭⲓⲁⲃⲣⲁⲙ ⲉⲡⲛⲟⲩⲧⲉ ⲁⲩⲟⲡⲥ ⲉⲣⲟϥ ⲉⲩⲇⲓⲕⲁⲓⲟⲥⲩⲛⲏ
7 ⲡⲉϫⲁϥ ⲇⲉ ⲛⲁϥ ϫⲉⲁⲛⲟⲕ ⲡⲉ ⲡⲛⲟⲩⲧⲉ ⲡⲉⲛⲧⲁϥⲛⲧⲕ ⲉⲃⲟⲗ ϩⲙⲡⲕⲁϩ ⲛⲛⲉⲭⲁⲗⲇⲁⲓⲟⲥ ϩⲱⲥⲧⲉ ⲉϯ ⲛⲁⲕ ⲙⲡⲉⲓⲕⲁϩ ⲉⲕⲗⲏⲣⲟⲛⲟⲙⲉⲓ ⲙⲙⲟϥ
8 ⲡⲉϫⲁϥ ⲇⲉ ϫⲉⲡϫⲟⲉⲓⲥ ⲡⲛⲟⲩⲧⲉ ⲕⲁⲧⲁⲟⲩ ϯⲛⲁⲉⲓⲙⲉ ϫⲉϯⲛⲁⲕⲗⲏⲣⲟⲛⲟⲙⲉⲓ ⲙⲙⲟϥ
9 ⲡⲉϫⲁϥ ⲇⲉ ⲛⲁϥ ϫⲉϫⲓ ⲛⲁⲓ ⲛⲟⲩⲃⲁϩⲥⲉ ⲛϣⲟⲙⲧ ⲣⲟⲙⲡⲉ ⲙⲛⲟⲩⲃⲁⲁⲙⲡⲉ ⲛϣⲟⲙⲧ ⲣⲟⲙⲡⲉ ⲙⲛⲟⲩⲟⲉⲓⲗⲉ ⲛϣⲟⲙⲧ ⲣⲟⲙⲡⲉ ⲁⲩⲱ ⲟⲩⲧⲣⲏⲅⲱⲛ ⲙⲛⲟⲩϭⲣⲟⲟⲙⲡⲉ
10 ⲁϥϫⲓ ⲇⲉ ⲛⲁϥ ⲛⲛⲁⲓ ⲧⲏⲣⲟⲩ ⲁϥⲡⲱϣ ⲙⲙⲟⲟⲩ ⲉⲧⲉⲩⲙⲏⲧⲉ ⲁϥⲕⲁⲁⲩ ⲙⲡⲙⲧⲟ ⲉⲃⲟⲗ ⲛⲛⲉⲩⲉⲣⲏⲩ ⲛϩⲁⲗⲁⲧⲉ ⲇⲉ ⲙⲡⲉϥⲡⲟϣⲟⲩ
11 ⲁϩⲉⲛϩⲁⲗⲁⲧⲉ ⲇⲉ ⲉⲓ ⲉⲡⲉⲥⲏⲧ ⲉⲃⲟⲗ ϩⲛⲧⲡⲉ ⲉϫⲛⲛⲥⲱⲙⲁ ⲉⲧⲡⲏϣ ⲛϩⲏⲧⲟⲩ ⲁⲁⲃⲣⲁⲙ ⲡⲟⲣϣϥ ⲉⲃⲟⲗ ϩⲓϫⲱⲟⲩ
12 ⲙⲡⲛⲁⲩ ⲇⲉ ⲙⲡⲣⲏ ⲉϥⲛⲁϩⲱⲧⲡ ⲁⲩⲉⲕⲥⲧⲁⲥⲓⲥ ϣⲱⲡⲉ ⲉϫⲛⲁⲃⲣⲁⲙ ⲁⲩⲱ ⲉⲓⲥ ϩⲏⲏⲧⲉ ⲁⲩⲛⲟϭ ⲛϩⲟⲧⲉ ⲛⲕⲁⲕⲉ ϣⲱⲡⲉ ⲉϩⲣⲁⲓ ⲉϫⲱϥ
13 ⲁⲩϫⲟⲟⲥ ⲛⲁⲃⲣⲁⲙ ϫⲉϩⲛⲟⲩⲉⲓⲙⲉ ⲕⲛⲁⲉⲓⲙⲉ ϫⲉⲡⲉⲕⲥⲡⲉⲣⲙⲁ ⲛⲁⲣⲣⲙⲛϭⲟⲓⲗⲉ ϩⲛⲟⲩⲕⲁϩ ⲉⲙⲡⲱϥ ⲁⲛ ⲡⲉ ⲛⲥⲉⲁⲁⲩ ⲛϩⲙϩⲁⲗ ⲛⲥⲉⲙⲟⲕϩⲟⲩ ⲛⲥⲉⲑⲃⲃⲓⲟⲟⲩ ⲛϥⲧⲟⲟⲩ ⲛϣⲉ ⲛⲣⲟⲙⲡⲉ
14 ⲡϩⲉⲑⲛⲟⲥ ⲇⲉ ⲉⲧⲟⲩⲛⲁⲣϩⲙϩⲁⲗ ⲛⲁϥ ϯⲛⲁⲕⲣⲓⲛⲉ ⲁⲛⲟⲕ ⲙⲙⲟϥ ⲙⲛⲛⲥⲁⲛⲁⲓ ⲇⲉ ⲥⲉⲛⲏⲩ ⲉⲃⲟⲗ ⲉⲡⲉⲓⲙⲁ ⲙⲛⲟⲩⲁⲡⲟⲥⲕⲉⲩⲏ ⲉⲛⲁϣⲱⲥ
15 ⲛⲧⲟⲕ ⲇⲉ ⲉⲕⲉⲃⲱⲕ ⲛⲁϩⲣⲛ ⲛⲉⲕⲉⲓⲟⲧⲉ ϩⲛⲟⲩⲉⲓⲣⲏⲛⲏ ⲉⲁⲩⲥⲁⲛⲟⲩϣⲕ ϩⲛⲟⲩⲙⲛⲧϩⲗⲗⲟ ⲉⲛⲁⲛⲟⲩⲥ
16 ϩⲛⲧⲙⲉϩϥⲧⲟ ⲇⲉ ⲛⲅⲉⲛⲉⲁ ⲥⲉⲛⲁⲕⲧⲟⲟⲩ ⲉϩⲣⲁⲓ ⲉⲡⲉⲓⲙⲁ ⲉⲙⲡⲁⲧⲧⲟⲩϫⲱⲕ ⲉⲃⲟⲗ ⲛϭⲓⲛⲛⲟⲃⲉ ⲛⲛⲁⲙⲟⲣⲣⲁⲓⲟⲥ ϣⲁϩⲣⲁⲓ ⲉⲧⲉⲛⲟⲩ
17 ⲉⲣⲉⲡⲣⲏ ⲇⲉ ⲛⲁⲃⲱⲕ ⲉⲡϩⲱⲧⲡ ⲁⲩϣⲁϩ ϣⲱⲡⲉ ⲁⲩⲱ ⲉⲓⲥ ⲟⲩⲧⲣⲓⲣ ⲉⲥϯⲕⲁⲡⲛⲟⲥ ⲁⲩⲱ ϩⲉⲛⲗⲁⲙⲡⲁⲥ ⲛⲥⲁⲧⲉ ⲁⲩⲉⲓ ⲉⲃⲟⲗ ϩⲓⲧⲛⲛⲥⲱⲙⲁ ⲉⲧⲡⲏϣ
18 ϩⲣⲁⲓ ϩⲙⲡⲉϩⲟⲟⲩ ⲉⲧⲙⲙⲁⲩ ⲁⲡϫⲟⲉⲓⲥ ⲥⲙⲛⲟⲩⲇⲓⲁⲑⲏⲕⲏ ⲙⲛⲁⲃⲣⲁⲙ ⲉϥϫⲱ ⲙⲙⲟⲥ ϫⲉϯⲛⲁϯ ⲙⲡⲉⲓⲕⲁϩ ⲙⲡⲉⲕⲥⲡⲉⲣⲙⲁ ϫⲓⲛⲡⲓⲉⲣⲟ ⲛⲕⲏⲙⲉ ϣⲁϩⲣⲁⲓ ⲉⲡⲛⲟϭ ⲛⲓⲉⲣⲟ ⲡⲉⲩⲫⲣⲁⲧⲏⲥ
19 ⲛⲅⲉⲛⲛⲁⲓⲟⲥ ⲙⲛⲛⲅⲉⲛⲉⲍⲁⲓⲟⲥ ⲙⲛⲛⲕⲉⲗⲙⲱⲛⲁⲓⲟⲥ
20 ⲙⲛⲛⲉⲭⲉⲧⲇⲁⲓⲟⲥ ⲙⲛⲛⲉⲫⲉⲣⲉⲥⲉⲟⲥ ⲙⲛⲛⲉϩⲣⲁⲫⲁⲉⲓⲛ
21 ⲙⲛⲛⲁⲙⲟⲣⲣⲁⲓⲟⲥ ⲙⲛⲛⲉⲭⲁⲛⲁⲛⲁⲓⲟⲥ ⲙⲛⲛⲅⲉⲣⲅⲉⲥⲁⲓⲟⲥ ⲙⲛⲛⲉⲩϩⲁⲓⲟⲥ ⲙⲛⲛⲓⲉⲃⲟⲩⲥⲥⲁⲓⲟⲥ
Genesis 14 · Genesis 16 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)