Read Ezekiel 36 side by side with translations · The Final Bible
16 ⲁⲩⲱ ⲟⲩϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ
17 ϫⲉⲡϣⲏⲣⲉ ⲙⲡⲣⲱⲙⲉ ⲡⲏⲓ ⲙⲡⲓⲥⲣⲁⲏⲗ ⲁⲩⲟⲩⲱⲙ ϩⲓϫⲛⲟⲩⲕⲁϩ ⲁⲩⲱ ⲁⲩϫⲁϩⲙⲉϥ ϩⲓⲧⲛⲧⲉⲩϩⲓⲏ ⲙⲛⲛⲉⲩⲉⲓⲇⲱⲗⲟⲛ ⲙⲛⲛⲉⲩϫⲱϩⲙ ⲁⲛ ⲉⲩϩⲓⲟⲟⲩⲉ ⲅⲁⲣ ϣⲱⲡⲉ ⲛⲧϩⲉ ⲙⲡϫⲱϩⲙ ⲛⲥϯⲃⲱⲱⲛ ⲙⲡⲁⲙⲧⲟ ⲉⲃⲟⲗ
18 ⲁⲩⲱ ⲁⲓⲡⲱϩⲧ ⲛⲧⲁⲟⲣⲅⲏ ⲉϩⲣⲁⲓ ⲉϫⲱⲟⲩ
19 ⲉⲧⲃⲉⲡⲉⲥⲛⲟϥ ⲉⲃⲟⲗ ⲛⲧⲁⲩⲡⲟⲟⲛⲉϥ ⲉⲃⲟⲗ ϩⲓϫⲙⲡⲕⲁϩ ⲁⲩⲱ ⲁⲩϫⲁ ϩⲙⲡⲕⲁϩ ϩⲛⲛⲉⲩⲉⲓⲇⲱⲗⲟⲛ ⲁⲛⲟⲕ ⲇⲉ ⲁⲓϫⲟⲟⲣⲟⲩ ⲉⲃⲟⲗ ϩⲛⲛϩⲉⲑⲛⲟⲥ ⲁⲩⲱ ⲁⲓⲥⲟⲟⲣⲟⲩ ⲉⲃⲟⲗ ϩⲛⲛⲉⲭⲱⲣⲁ ⲕⲁⲧⲁⲛⲉⲩϩⲃⲏⲩⲉ ⲁⲩⲱ ⲕⲁⲧⲁⲛⲉⲩⲛⲟⲃⲉ ⲁⲓⲕⲣⲓⲛⲉ ⲙⲙⲟⲟⲩ
20 ϫⲉⲁⲓⲃⲱⲕ ⲉϩⲟⲩⲛ ⲙⲛⲛϩⲉⲑⲛⲟⲥ ϣⲁⲟⲩⲙⲁ ⲛⲟⲩⲱⲧ
21 ⲁⲩⲱ ⲁⲩⲥⲱⲱϥ ⲙⲡⲁⲣⲁⲛ ⲉⲧⲟⲩⲁⲃ ϩⲙⲡⲧⲣⲉⲩϫⲟⲟⲥ ϫⲉⲛⲁⲓ ⲛⲉ ⲡⲗⲁⲟⲥ ⲙⲡϫⲟⲉⲓⲥ ⲁⲩⲱ ⲁⲓⲉⲓ ⲉⲃⲟⲗ ϩⲙⲡⲉϥⲕⲁϩ ⲁⲛⲟⲕ ⲇⲉ ⲁⲓϯⲥⲟ ⲉⲣⲟⲟⲩ ⲉⲧⲃⲉⲡⲁⲣⲁⲛ ⲉⲧⲟⲩⲁⲁⲃ ⲡⲉⲛⲧⲁⲩⲥⲱⲱϥ ⲙⲙⲟϥ ⲛϭⲓⲡⲏⲓ ⲙⲡⲓⲥⲣⲁⲏⲗ ϩⲣⲁⲓ ϩⲛⲛϩⲉⲑⲛⲟⲥ
22 ⲉⲧⲃⲉⲡⲁⲓ ⲁϫⲓⲥ ⲛϣⲏⲣⲉ ⲙⲡⲓⲥⲣⲁⲏⲗ ϫⲉⲛⲁⲓ ⲛⲉ ⲉⲧⲉϥϫⲱ ⲙⲙⲟⲟⲩ ⲛϭⲓⲡϫⲟⲉⲓⲥ ⲡϫⲟⲉⲓⲥ ϫⲉⲛⲉⲁⲓⲉⲓⲣⲉ ⲛⲏⲧⲛ ⲡⲏⲓ ⲙⲡⲓⲥⲣⲁⲏⲗ ⲁⲗⲗⲁ ⲉⲧⲃⲉⲡⲁⲣⲁⲛ ⲉⲧⲟⲩⲁⲁⲃ ⲡⲉⲛⲧⲁⲧⲉⲧⲛⲥⲱⲱϥ ⲙⲙⲟϥ ϩⲛⲛϩⲉⲑⲛⲟⲥ ϩⲙⲡⲙⲁ ⲛⲧⲁⲧⲉⲧⲛⲃⲱⲕ ⲉϩⲟⲩⲛ ⲉⲣⲟϥ
23 ⲁⲩⲱ ⲡⲁⲛⲟϭ ⲛⲣⲁⲛ ⲙⲡⲉⲧⲛⲧⲃⲃⲟϥ ⲁⲩⲱ ⲁⲛ ϩⲉⲑⲛⲟⲥ ⲥⲱⲱϥ ⲁⲩⲱ ⲛⲧⲱⲧⲛ ⲁⲧⲉⲧⲛⲥⲱⲱϥ ϩⲛⲧⲉⲩⲙⲏⲧⲉ ϯⲛⲁϫⲟⲟⲣ ⲙⲙⲱⲧⲛ ⲉⲃⲟⲗ ⲁⲩⲱ ⲧⲉⲧⲛⲛⲁⲣⲕⲟⲩⲓ ϩⲙⲡⲧⲣⲁⲉⲓⲣⲉ ⲛⲧⲁϭⲟⲙ ⲁⲩⲱ ⲥⲉⲛⲁⲉⲓⲙⲉ ⲛϭⲓⲛϩⲉⲑⲛⲟⲥ ⲧⲏⲣⲟⲩ ϫⲉⲁⲛⲟⲕ ⲡⲉ ⲡϫⲟⲉⲓⲥ ⲡⲉϫⲉⲁⲇⲱⲛⲁⲓ ⲡϫⲟⲉⲓⲥ
24 ϯⲛⲁϫⲓⲧⲏⲩⲧⲛ ⲉⲃⲟⲗ ϩⲛⲛϩⲉⲑⲛⲟⲥ ⲁⲩⲱ ⲛⲧⲁⲥⲉⲩϩⲧⲏⲩⲧⲛ ⲉϩⲟⲩⲛ ⲉⲃⲟⲗ ϩⲙⲡⲕⲁϩ ⲧⲏⲣϥ ⲛⲧⲁϫⲓⲧⲏⲩⲧⲛ ⲉϩⲟⲩⲛ ⲉⲡⲉⲧⲛⲕⲁϩ
25 ϯⲛⲁⲛⲟⲩϫ ⲉϫⲛⲧⲏⲩⲧⲛ ⲛⲟⲩⲙⲟⲟⲩ ⲉϥⲥⲟⲧⲡ ⲁⲩⲱ ⲧⲁⲧⲃⲃⲉⲧⲏⲩⲧⲛ ⲉⲃⲟⲗ ϩⲛⲛⲉⲧⲛⲁⲛⲟⲙⲓⲁ ⲧⲏⲣⲟⲩ ⲁⲩⲱ ⲉⲃⲟⲗ ϩⲛⲛⲉⲧⲛⲉⲓⲇⲱⲗⲟⲛ ⲧⲏⲣⲟⲩ ϯⲛⲁⲧⲃⲃⲉⲧⲏⲩⲧⲛ
26 ⲁⲩⲱ ϯⲛⲁϯ ⲛⲏⲧⲛ ⲛⲟⲩϩⲏⲧ ⲛⲃⲣⲣⲉ ⲁⲩⲱ ⲟⲩⲡⲛⲉⲩⲙⲁ ⲉⲡⲱⲓ ⲡⲉ ϯⲛⲁⲧⲁⲁϥ ⲉϩⲟⲩⲛ ⲉⲣⲱⲧⲛ ⲁⲩⲱ ϯⲛⲁϥⲓ ⲙⲡⲉⲓϩⲏⲧ ⲛⲱⲛⲉ ⲉⲃⲟⲗ ϩⲛⲛⲉⲧⲛⲥⲁⲣⲝ ⲛⲧⲁϯ ⲛⲏⲧⲛ ⲛⲟⲩϩⲏⲧ ⲛⲥⲁⲣⲝ
27 ⲛⲧⲁϯ ⲛⲏⲧⲛ ⲉⲃⲟⲗ ϩⲙⲡⲁⲡⲛⲉⲩⲙⲁ ⲁⲩⲱ ϯⲛⲁⲁⲁⲥ ⲛⲏⲧⲛ ⲛⲧϩⲉ ⲉⲧⲉⲣⲉⲛⲉⲓⲟⲧⲉ ⲉⲓⲣⲉ ⲙⲙⲟⲥ ⲛⲛⲉⲩϣⲏⲣⲉ ⲙⲙⲉⲣⲓⲧ ϫⲉⲕⲁⲥ ⲉⲧⲉⲧⲛⲁⲙⲟⲟϣⲉ ϩⲛⲛⲁⲇⲓⲕⲁⲓⲱⲙⲁ ⲁⲩⲱ ⲛⲧⲉⲧⲛϩⲁⲣⲉϩ ⲉⲛⲁⲉⲛⲧⲟⲗⲏ
28 ⲁⲩⲱ ϫⲉⲕⲁⲥ ⲉⲧⲉⲧⲛⲉϣⲱⲡⲉ ϩⲙⲡⲕⲁϩ ⲛⲛⲉⲧⲛⲉⲓⲟⲧⲉ ⲡⲁⲓ ⲛⲧⲁⲓⲉⲣⲏⲧ ⲙⲙⲟϥ ⲉⲧⲁⲁϥ ⲛⲁⲩ ⲉⲧⲉⲧⲛϣⲱⲡⲉ ⲛⲁⲓ ⲛⲟⲩⲗⲁⲟⲥ ⲁⲩⲱ ⲁⲛⲟⲕ ϩⲱ ⲛⲧⲁϣⲱⲡⲉ ⲛⲏⲧⲛ ⲛⲛⲟⲩⲧⲉ
29 ⲛⲧⲁⲧⲃⲃⲉⲧⲏⲩⲧⲛ ⲉⲃⲟⲗ ϩⲛⲛⲉⲧⲛⲁⲛⲟⲙⲓⲁ ⲧⲏⲣⲟⲩ
Ezekiel 35 · Ezekiel 37 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)