Daniel 9 — Coptic (Sahidic)

1 ϩⲣⲁⲓ ϩⲛⲧϣⲟⲣⲡⲉ ⲛⲣⲟⲙⲡⲉ ⲛⲇⲁⲣⲓⲟⲥ ⲡϣⲏⲣⲉ ⲛⲁⲥⲩⲏⲣⲟⲥ ⲉⲃⲟⲗ ϩⲙⲡⲉⲥⲡⲉⲣⲙⲁ ⲛⲙⲙⲏⲇⲟⲥ ⲡⲁⲓ ⲛⲧⲁϥⲣⲣⲣⲟ ⲉϫⲛⲧⲙⲛⲧⲣⲣⲟ ⲛⲛⲉⲭⲁⲗⲇⲁⲓⲟⲥ

2 ⲁⲛⲟⲕ ⲇⲉ ⲇⲁⲛⲓⲏⲗ ⲁⲓⲉⲓⲙⲉ ϩⲣⲁⲓ ϩⲛⲛϫⲱⲱⲙⲉ ⲉⲧⲏⲡ ⲛⲛⲣⲟⲙⲡⲉ ⲙⲡϣⲁϫⲉ ⲛⲧⲉⲡϫⲟⲉⲓⲥ ⲛⲧⲁϥⲡⲱϩ ϣⲁⲓⲉⲣⲏⲙⲓⲁⲥ ⲡⲉⲡⲣⲟⲫⲏⲧⲏⲥ ϣϥⲉ ⲛⲣⲟⲙⲡⲉ ⲉⲡϫⲱⲕ ⲉⲃⲟⲗ ⲙⲡϣⲱϥ ⲛⲧϩⲓⲉⲣⲟⲩⲥⲁⲗⲏⲙ

3 ⲁⲩⲱ ⲁⲓϯ ⲙⲡⲁϩⲟ ⲛⲁϩⲣⲙ ⲡϫⲟⲉⲓⲥ ⲡⲛⲟⲩⲧⲉ ⲉϣⲓⲛⲉ ⲛⲥⲁⲟⲩϣⲗⲏⲗ ⲙⲛⲟⲩⲥⲟⲡⲥ ⲙⲛϩⲉⲛⲛⲏⲥⲧⲉⲓⲁ ⲙⲛⲟⲩϭⲟⲟⲩⲛⲉ

4 ⲁⲓϣⲗⲏⲗ ⲉϩⲣⲁⲓ ⲉⲡϫⲟⲉⲓⲥ ⲡⲁⲛⲟⲩⲧⲉ ⲁⲩⲱ ⲁⲓⲉⲝⲟⲙⲟⲗⲟⲅⲉⲓ ⲉⲓϫⲱ ⲙⲙⲟⲥ ϫⲉⲡϫⲟⲉⲓⲥ ⲡⲛⲟϭ ⲛⲛⲟⲩⲧⲉ ⲡⲉϣⲡⲏⲣⲉ ⲉⲕϩⲁⲣⲉϩ ⲉⲧⲉⲕⲇⲓⲁⲑⲏⲕⲏ ⲙⲛⲡⲉⲕⲛⲁ ⲛⲛⲉⲧⲙⲉ ⲙⲙⲟⲕ ⲁⲩⲱ ⲛⲉⲧϩⲁⲣⲉϩ ⲉⲛⲉⲕⲉⲛⲧⲟⲗⲏ

5 ⲁⲛⲣⲛⲟⲃⲉ ⲁⲛϫⲓⲛϭⲟⲛⲥ ⲁⲛⲁⲛⲟⲙⲉⲓ ⲁⲛⲥⲁϩⲱⲱⲛ ⲉⲃⲟⲗ ⲁⲛⲣⲁⲕⲧⲉⲛ ⲉⲃⲟⲗ ⲛⲛⲉⲕⲉⲛⲧⲟⲗⲏ ⲁⲩⲱ ⲉⲃⲟⲗ ⲛⲛⲉⲕϩⲁⲡ

6 ⲙⲡⲉⲛⲥⲱⲧⲙ ⲛⲥⲁⲛⲉⲕϩⲙϩⲁⲗ ⲛⲉⲡⲣⲟ ⲫⲏⲧⲏⲥ ⲛⲁⲓ ⲛⲧⲁⲩϣⲁϫⲉ ϩⲙⲡⲉⲕⲣⲁⲛ ⲛⲁϩⲣⲛ ⲛⲉⲛⲉⲣⲱⲟⲩ ⲙⲛⲛⲉⲛⲁⲣⲭⲱⲛ ⲙⲛⲛⲉⲛⲉⲓⲟⲧⲉ ⲁⲩⲱ ⲛⲁϩⲣⲙ ⲡⲗⲁⲟⲥ ⲧⲏⲣϥ ⲙⲡⲕⲁϩ

7 ⲧⲇⲓⲕⲁⲓⲟⲥⲩⲛⲏ ⲉⲥϣⲟⲟⲡ ⲛⲁⲕ ⲡϫⲟⲉⲓⲥ ⲁⲩⲱ ⲡϣⲓⲡⲉ ⲙⲡϩⲟ ⲉϥϣⲟⲟⲡ ⲛⲁⲛ ⲛⲧϩⲉ ⲙⲡϩⲟⲟⲩ ⲛϩⲟⲟⲩ ⲙⲡⲣⲱⲙⲉ ⲛⲓⲟⲩⲇⲁ ⲙⲛⲛⲉⲧⲟⲩⲏϩ ϩⲛⲧϩⲓⲉⲣⲟⲩⲥⲁⲗⲏⲙ ⲙⲛⲡⲓⲥⲣⲁⲏⲗ ⲧⲏⲣϥ ⲛⲉⲧϩⲏⲛ ⲉϩⲟⲩⲛ ⲙⲛⲛⲉⲧⲉⲙⲡⲟⲩⲉ ϩⲣⲁⲓ ϩⲙⲡⲕⲁϩ ⲧⲏⲣϥ ⲛⲧⲁⲕϫⲟⲟⲣⲟⲩ ⲉⲃⲟⲗ ⲛϩⲏⲧϥ ϩⲣⲁⲓ ϩⲛⲧⲉⲩⲙⲛⲧⲁⲧⲥⲱⲧⲙ ⲛⲧⲁⲩⲁⲁⲥ ⲛϩⲏⲧⲕ

8 ⲡϫⲟⲉⲓⲥ ⲡϣⲓⲡⲉ ⲙⲡϩⲟ ⲉϥϣⲟⲟⲡ ⲛⲁⲛ ⲙⲛⲛⲉⲛⲉⲣⲱⲟⲩ ⲁⲩⲱ ⲛⲛⲁⲣⲭⲱⲛ ⲙⲛⲛⲉⲛⲉⲓⲟⲧⲉ ⲛⲁⲓ ⲛⲧⲁⲛⲉⲣⲛⲟⲃⲉ

9 ⲙⲙⲛⲧϣⲛϩⲧⲏϥ ⲙⲛⲛⲕⲱ ⲉⲃⲟⲗ ⲉⲩϣⲟⲟⲡ ⲛⲁⲕ ⲡϫⲟⲉⲓⲥ ⲡⲉⲛⲛⲟⲩⲧⲉ ϫⲉⲁⲛⲥⲁϩⲱⲱⲛ ⲉⲃⲟⲗ ⲙⲙⲟⲕ

10 ⲁⲩⲱ ⲙⲡⲉⲛⲥⲱⲧⲙ ⲛⲥⲁⲧⲉⲥⲙⲏ ⲙⲡϫⲟⲉⲓⲥ ⲡⲉⲛⲛⲟⲩⲧⲉ ⲉⲧⲣⲉⲛⲙⲟⲟϣⲉ ϩⲣⲁⲓ ϩⲙⲡⲉϥⲛⲟⲙⲟⲥ ⲛⲁⲓ ⲛⲧⲁϥⲧⲁⲁⲩ ⲙⲡⲉⲛⲉⲙⲧⲟ ⲉⲃⲟⲗ ϩⲛⲧϭⲓϫ ⲛⲛⲉϥϩⲙϩⲁⲗ ⲛⲉⲡⲣⲟⲫⲏⲧⲏⲥ

11 ⲁⲩⲱ ⲡⲓⲥⲣⲁⲏⲗ ⲧⲏⲣϥ ⲁϥⲡⲁⲣⲁⲃⲁ ⲙⲡⲉⲕⲛⲟⲙⲟⲥ ⲁⲩⲱ ⲁⲩⲣⲁⲕⲧⲟⲩ ⲉⲧⲙⲥⲱⲧⲙ ⲛⲥⲁⲧⲉⲕⲥⲙⲏ ⲁϥⲉⲓ ⲉϩⲣⲁⲓ ⲉϫⲱⲛ ⲛϭⲓⲡⲥⲁϩⲟⲩ ⲙⲛⲡⲁⲛⲁϣ ⲉⲧⲥⲏϩ ϩⲙⲡⲛⲟⲙⲟⲥ ⲙⲙⲱⲩⲥⲏⲥ ⲡϩⲙϩⲁⲗ ⲙⲡⲛⲟⲩⲧⲉ ϫⲉⲁⲛⲣⲛⲟⲃⲉ ⲉⲣⲟϥ

12 ⲁⲩⲱ ⲁϥⲧⲁϩⲟ ⲉⲣⲁⲧⲟⲩ ⲛⲛⲉϥϣⲁϫⲉ ⲛⲁⲓ ⲛⲧⲁϥϫⲟⲟⲩ ⲉϩⲣⲁⲓ ⲉϫⲱⲛ ⲙⲛⲛⲣⲉϥϯϩⲁⲡ ⲛⲁⲓ ⲛⲧⲁⲩⲕⲣⲓⲛⲉ ⲙⲙⲟⲛ ⲉⲉⲓⲛⲉ ⲉϩⲣⲁⲓ ⲉϫⲱⲛ ⲛϩⲉⲛⲛⲟϭ ⲙⲡⲉⲧϩⲟⲟⲩ ⲛⲁⲓ ⲙⲡⲟⲩϣⲱⲡⲉ ϩⲁⲧⲡⲉ ⲧⲏⲣⲥ ⲕⲁⲧⲁⲛⲉⲛⲧⲁⲩϣⲱⲡⲉ ϩⲛⲧϩⲓⲉⲣⲟⲩⲥⲁⲗⲏⲙ

13 ⲕⲁⲧⲁⲧϩⲉ ⲉⲧⲥⲏϩ ϩⲙⲡⲛⲟⲙⲟⲥ ⲙⲙⲱⲩⲥⲏⲥ ⲛⲉⲓⲡⲉⲧϩⲟⲟⲩ ⲧⲏⲣⲟⲩ ⲁⲩⲉⲓ ⲉϩⲣⲁⲓ ⲉϫⲱⲛ ⲁⲩⲱ ⲙⲡⲉⲛⲥⲟⲡⲥ ⲙⲡϩⲟ ⲙⲡϫⲟⲉⲓⲥ ⲡⲉⲛⲛⲟⲩⲧⲉ ⲉⲧⲣⲉⲛⲕⲧⲟⲛ ⲉⲃⲟⲗ ϩⲛⲛⲉⲛϫⲓⲛϭⲟⲛⲥ ⲁⲩⲱ ⲉⲉⲓⲙⲉ ϩⲙⲙⲉ ⲛⲓⲙ

14 ⲁⲡϫⲟⲉⲓⲥ ⲡⲉⲛⲛⲟⲩⲧⲉ ϯϩⲧⲏϥ ⲉϩⲣⲁⲓ ⲉϫⲛⲧⲉⲛⲕⲁⲕⲓⲁ ⲁϥⲉⲛⲧⲟⲩ ⲉϩⲣⲁⲓ ⲉϫⲱⲛ ϫⲉⲟⲩⲗⲓⲕⲁⲓⲟⲥ ⲡⲉ ⲡϫⲟⲉⲓⲥ ⲡⲉⲛⲛⲟⲩⲧⲉ ⲉϩⲣⲁⲓ ⲉϫⲛⲛⲉϥϩⲃⲏⲩⲉ ⲧⲏⲣⲟⲩ ⲛⲧⲁϥⲁⲁⲩ ⲁⲩⲱ ⲙⲡⲉⲛⲥⲱⲧⲙ ⲛⲥⲁⲧⲉϥⲥⲙⲏ

15 ⲧⲉⲛⲟⲩ ϭⲉ ⲡϫⲟⲉⲓⲥ ⲡⲉⲛⲛⲟⲩⲧⲉ ⲡⲁⲓ ⲛⲧⲁⲕⲉⲓⲛⲉ ⲙⲡⲉⲕⲗⲁⲟⲥ ⲉⲃⲟⲗ ϩⲙⲡⲕⲁϩ ⲛⲕⲏⲙⲉ ϩⲣⲁⲓ ϩⲛⲟⲩϭⲓϫ ⲉⲥϫⲟⲟⲣ ⲁⲩⲱ ⲁⲕⲉⲓⲣⲉ ⲛⲁⲕ ⲛⲟⲩⲣⲁⲛ ⲛⲧϩⲉ ⲙⲡϩⲟⲟⲩ ⲛϩⲟⲟⲩ ⲁⲛⲣⲛⲟⲃⲉ ⲁⲛⲁⲛⲟⲙⲉⲓ

16 ⲡϫⲟⲉⲓⲥ ϩⲣⲁⲓ ϩⲛⲛⲉⲕⲙⲛⲧⲛⲁ ⲧⲏⲣⲟⲩ ⲙⲁⲣⲉϥⲕⲧⲟϥ ⲛϭⲓⲡⲉⲕϭⲱⲛⲧ ⲙⲛⲧⲉⲕⲟⲣⲅⲏ ⲉⲃⲟⲗ ϩⲛⲧϩⲓⲉⲣⲟⲩⲥⲁⲗⲏⲙ ⲡⲉⲕⲧⲟⲟⲩ ⲉⲧⲟⲩⲁⲁⲃ ϫⲉⲁⲛⲣⲛⲟⲃⲉ ϩⲣⲁⲓ ϩⲛⲛⲉⲛϫⲓⲛϭⲟⲛⲥ ⲙⲛⲛⲁⲛⲉⲛⲉⲓⲟⲧⲉ ⲧϩⲓⲉⲣⲟⲩⲥⲁⲗⲏⲙ ⲙⲛⲡⲉⲕⲗⲁⲟⲥ ⲁⲩϣⲱⲡⲉ ⲉⲩⲛⲟϭⲛⲉϭ ϩⲣⲁⲓ ϩⲛⲛⲉⲧϩⲙ ⲡⲉⲛⲕⲱⲧⲉ ⲧⲏⲣⲟⲩ

17 ⲧⲉⲛⲟⲩ ϭⲉ ⲡϫⲟⲉⲓⲥ ⲡⲛⲟⲩⲧⲉ ⲥⲱⲧⲙ ⲉⲡⲉϣⲗⲏⲗ ⲙⲡⲉⲕϩⲙϩⲁⲗ ⲙⲛⲛⲉϥⲥⲟⲡⲥ ⲛⲅⲟⲩⲱⲛϩ ⲉⲃⲟⲗ ⲙⲡⲉⲕϩⲟ ⲉϩⲣⲁⲓ ⲉϫⲙⲡⲉⲕⲙⲁ ⲉⲧⲟⲩⲁⲁⲃ ⲉⲧⲟ ⲛϫⲁⲓⲉ ⲉⲧⲃⲏⲏⲧⲕ ⲡϫⲟⲉⲓⲥ

18 ⲡⲁⲛⲟⲩⲧⲉ ⲣⲓⲕⲉ ⲙⲡⲉⲕⲙⲁⲁϫⲉ ⲛⲅⲥⲱⲧⲙ ⲁⲟⲩⲱⲛ ⲛⲛⲉⲕⲃⲁⲗ ⲛⲅⲛⲁⲩ ⲉⲡⲉⲛⲧⲁⲕⲟ ⲙⲛⲡⲧⲁⲕⲟ ⲛⲧⲉⲕⲡⲟⲗⲓⲥ ⲧⲁⲓ ⲛⲧⲁⲩⲉⲡⲓⲕⲁⲗⲉⲓ ⲙⲡⲉⲕⲣⲁⲛ ⲉϩⲣⲁⲓ ⲉϫⲱⲥ ϫⲉⲉϩⲣⲁⲓ ⲁⲛ ⲉϫⲛⲛⲉⲛⲇⲓⲕⲁⲓⲟⲥⲩⲛⲏ ⲁⲛⲟⲛ ⲉⲛⲛⲁⲛⲟⲩϫⲉ ⲛⲛⲉⲛⲙⲛⲧϣⲉⲛⲉ ϩⲧⲏϥ ⲙⲡⲉⲕⲉⲙⲧⲟ ⲉⲃⲟⲗ ⲁⲗⲗⲁ ⲉϩⲣⲁⲓ ⲉϫⲛⲛⲉⲕⲙⲛⲧϣⲛ ϩⲧⲏϥ ⲉⲧⲛⲁϣⲱⲟⲩ ⲡϫⲟⲉⲓⲥ

19 ⲥⲱⲧⲙ ⲉⲣⲟⲛ ⲡϫⲟⲉⲓⲥ ⲕⲱ ⲛⲁⲛ ⲉⲃⲟⲗ ⲡϫⲟⲉⲓⲥ ϯϩⲧⲏⲕ ⲡϫⲟⲉⲓⲥ ⲁⲣⲓⲥ ⲉⲧⲃⲏⲏⲧⲕ ⲛⲅⲧⲙⲱⲥⲕ ⲡⲁⲛⲟⲩⲧⲉ ϫⲉⲡⲉⲕⲣⲁⲛ ⲁⲩⲧⲁⲩⲟϥ ⲉϩⲣⲁⲓ ⲉϫⲛⲧⲉⲕⲡⲟⲗⲓⲥ ⲁⲩⲱ ⲉϩⲣⲁⲓ ⲉϫⲙⲡⲉⲕⲗⲁⲟⲥ

20 ⲁⲓⲧⲉⲓ ⲇⲉ ⲉⲓϣⲁϫⲉ ⲁⲩⲱⲉⲓϣⲗⲏⲗ ⲉⲓⲧⲁⲩⲟ ⲛⲛⲁⲛⲟⲃⲉ ⲙⲛⲛⲛⲟⲃⲉ ⲙⲡⲁⲗⲁⲟⲥ ⲙⲡⲓⲥⲣⲁⲏⲗ ⲁⲩⲱ ⲉⲓⲛⲟⲩϫ ⲙⲡⲁⲛⲁ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲡⲁⲛⲟⲩⲧⲉ ⲉⲧⲃⲉⲡⲧⲟⲟⲩ ⲉⲧⲟⲩⲁⲁⲃ ⲛⲧⲉⲡⲁⲛⲟⲩⲧⲉ

21 ⲁⲓⲧⲉⲓ ⲉⲓϣⲁϫⲉ ϩⲣⲁⲓ ϩⲙⲡⲁϣⲗⲏⲗ ⲉⲓⲥ ϩⲏⲏⲧⲉ ⲉⲓⲥ ⲡⲣⲱⲙⲉ ⲅⲁⲃⲣⲓⲏⲗ ⲡⲉⲛⲧⲁⲓⲛⲁⲩ ⲉⲣⲟϥ ϩⲛⲧϩⲟⲣⲁⲥⲓⲥ ⲛϣⲟⲣⲡ ⲉϥϩⲏⲗ ⲁϥϫⲱϩ ⲉⲣⲟⲓ ⲛⲧϩⲉ ⲙⲡⲛⲁⲩ ⲛⲧⲉⲑⲩⲥⲓⲁ ⲙⲡⲛⲁⲩ ⲛⲣⲟⲩϩⲉ

22 ⲁϥⲧⲁⲙⲟⲓ ⲁⲩⲱ ⲁϥϣⲁϫⲉ ⲛⲙⲙⲁⲓ ⲉϥϫⲱ ⲙⲙⲟⲥ ϫⲉⲇⲁⲛⲓⲏⲗ ⲧⲉⲛⲟⲩ ⲛⲧⲁⲓⲉⲓ ⲉⲃⲟⲗ ⲉⲧⲥⲁⲃⲟⲕ ⲉⲧⲙⲛⲧⲣⲉⲙⲛϩⲏⲧ

23 ϩⲣⲁⲓ ϩⲛⲧⲁⲣⲭⲏ ⲙⲡⲉⲕⲥⲟⲡⲥ ⲁϥⲉⲓ ⲉⲃⲟⲗ ⲛϭⲓⲡϣⲁϫⲉ ⲁⲛⲟⲕ ϩⲱ ⲁⲓⲉⲓ ⲉⲧⲁⲙⲟⲕ ϫⲉⲛⲧⲟⲕ ⲟⲩⲣⲱⲙⲉ ⲛϣⲟⲩⲁϣϥ ⲁⲩⲱ ⲙⲉⲕⲙⲟⲩⲕ ϩⲣⲁⲓ ϩⲙⲡϣⲁϫⲉ ⲁⲩⲱ ⲛⲅⲉⲓⲙⲉ ϩⲙⲡϭⲱⲗⲡ ⲉⲃⲟⲗ

24 ϣϥⲉ ⲛϩⲉⲃⲇⲟⲙⲁⲥ ⲁⲩⲧⲟϣⲟⲩ ⲉϫⲙⲡⲉⲕⲗⲁⲟⲥ ⲁⲩⲱ ⲉϫⲛⲧⲡⲟⲗⲓⲥ ⲉⲧⲟⲩⲁⲁⲃ ⲉⲧⲣⲉϥϫⲱⲕ ⲉⲃⲟⲗ ⲛϭⲓⲡⲛⲟⲃⲉ ⲁⲩⲱ ⲛⲥⲉⲥⲫⲣⲁⲅⲓⲍⲉ ⲛⲉⲛⲛⲟⲃⲉ ⲉⲃⲱⲧⲉ ⲉⲃⲟⲗ ⲛⲉⲛϫⲓⲛϭⲟⲛⲥ ⲁⲩⲱ ⲉⲕⲱ ⲉⲃⲟⲗ ⲛⲉⲛϫⲓⲛϭⲟⲛⲥ ⲉⲉⲓⲛⲉ ⲛⲧⲇⲓⲕⲁⲓⲟⲥⲩⲛⲏ ⲛϣⲁ ⲉⲛⲉϩ ⲁⲩⲱ ⲉⲥⲫⲣⲁⲅⲓⲍⲉ ⲛⲧϩⲟⲣⲁⲥⲓⲥ ⲙⲛⲟⲩⲡⲣⲟⲫⲏⲧⲏⲥ ⲉⲧⲱϩⲥ ⲙⲡⲉⲧⲟⲩⲁⲁⲃ ⲛⲛⲉⲧⲟⲩⲁⲁⲃ

25 ⲁⲩⲱ ⲕⲛⲁⲉⲓⲙⲉ ⲛⲅⲛⲟⲉⲓ ϫⲓⲛⲡⲓ ⲉⲃⲟⲗ ⲙⲡϣⲁϫⲉ ⲉⲟⲩⲱϣⲃ ⲁⲩⲱ ⲉⲕⲱⲧ ⲛⲧϩⲓⲉⲣⲟⲩⲥⲁⲗⲏⲙ ϣⲁⲉϩⲣⲁⲓ ⲉⲡϩⲏⲅⲟⲩⲙⲉⲛⲟⲥ ⲡⲉⲭⲣⲓⲥⲧⲟⲥ ⲥⲁϣϥⲉ ⲛϩⲉⲃⲇⲟⲙⲁⲥ ⲁⲩⲱ ⲥⲉⲥⲛⲟⲟⲩⲥⲉ ⲛϩⲉⲃⲇⲟⲙⲁⲥ ⲁⲩⲱ ⲛϥⲕⲟⲧϥ ⲛⲥⲉⲕⲱⲧ ⲛⲧⲉⲡⲗⲁϯⲁ ⲙⲛⲡⲯⲟⲃⲧ ⲉⲧϩⲓⲃⲟⲗ ⲛⲧⲉⲛⲉⲟⲩⲟⲉⲓϣ ϣⲱⲡⲉ ⲉⲩϣⲟⲩⲉⲓⲧ

26 ⲙⲛⲛⲥⲁⲧⲥⲉ ⲥⲛⲟⲟⲩⲥⲉ ⲇⲉ ⲛϩⲉⲃⲇⲟⲙⲁⲥ ⲥⲉⲛⲁⲃⲱⲧⲉ ⲉⲃⲟⲗ ⲙⲡⲧⲱϩⲥ ⲛⲧⲉⲡϩⲁⲡ ϣⲱⲡⲉ ⲛⲁϥ ⲉⲩⲡⲉⲧϣⲟⲩ ⲉⲓⲧⲁⲛ ⲧⲡⲟⲗⲓⲥ ⲇⲉ ⲙⲛⲡⲡⲉⲧⲟⲩⲁⲁⲃ ϥⲛⲁⲧⲁⲕⲟⲟⲩ ⲙⲛⲡϩⲩⲅⲟⲩⲙⲉⲛⲟⲥ ⲉⲧⲛⲏⲩ ⲛϥϣⲁⲁⲧⲟⲩ ϩⲛⲟⲩⲕⲁⲧⲁⲕⲗⲩⲥⲙⲟⲥ ⲛϥⲕⲱ ⲙⲙⲟⲟⲩ ϣⲁⲡϫⲱⲕ ⲉⲃⲟⲗ ⲙⲡⲡⲟⲗⲉⲙⲟⲥ ⲉⲧⲧⲏϣ ϩⲣⲁⲓ ϩⲛϩⲉⲛⲧⲁⲕⲟ

27 ⲟⲩϩⲉⲃⲇⲟⲙⲁⲥ ⲁⲩⲱ ⲧⲡⲁϣⲉ ⲛⲟⲩϩⲉⲃⲇⲟⲙⲁⲥ ⲛⲉϥⲧⲁⲗϭⲟ ⲛⲛⲉⲑⲏⲥⲓⲁⲥ ⲧⲏⲣⲓⲟⲛ ⲙⲛⲛⲉⲑⲩⲥⲓⲁ ⲛⲧⲉⲡⲉⲡⲧⲉⲣⲩⲅⲓⲟⲛ ⲉⲃⲟⲗ ϩⲙⲛⲧⲁⲕⲟ ⲛϥⲕⲱ ⲙⲙⲟⲟⲩ ϣⲁⲉϩⲣⲁⲓ ⲉⲧⲥⲩⲛⲧⲉⲗⲉⲓⲁ ⲙⲡⲉϣⲧⲟⲣⲧⲣ ⲉϩⲣⲁⲓ ⲉϫⲛⲟⲩⲧⲁⲕⲟ ⲁⲩⲱ ϥⲛⲁϯ ⲛⲧⲗⲓⲁⲑⲏⲕⲏ ⲛϩⲁϩ ⲟⲩϩⲉⲃⲇⲟⲙⲁⲥ ⲁⲩⲱ ϩⲛⲧⲡⲁϣⲉ ⲛⲑⲉⲃⲗⲱⲙⲁⲥ ⲥⲉⲛⲁϥⲓ ⲛⲧⲉⲑⲩⲥⲓⲁ ⲙⲛⲛⲟⲩⲱⲧⲛ ⲉⲃⲟⲗ ⲛⲧⲉⲧⲃⲟⲧⲉ ⲙⲡϣⲱϥ ϣⲱⲡⲉ ϩⲓϫⲙⲡⲣⲡⲉ ϣⲁⲉϩⲣⲁⲓ ⲉⲡϫⲱⲕ ⲉⲃⲟⲗ ⲙⲡⲉⲟⲩⲟⲉⲓϣ ⲛⲥⲉϯ ⲛⲟⲩⲃⲟⲧⲉ ⲙⲡϣⲱϥ