Read 4 Maccabees 8 side by side with translations · The Final Bible
1 ܗ̇ܝܕܝܢ ܥܙܝܙܐܝܬ ܐܝܟ ܕܡܢ ܚܫܐ ܦ̣ܩܕ ܠܡܝܬܝܘ ܠܐܚܪ̈ܢܐ ܡܢ ܓܙܪܐ ܕܥܒܪ̈ܝܐ ܘܐܢ ܗ̣ܘ ܕܢܐܟܠܘܢ ܕܛܡ̣ܐ ܢܫܒܩܘܢ ܐܢܘܢ ܡܐ ܕܐܟܠܘ ܐܢ ܕܝܢ ܠܐ ܢܬܛܦܝܣܘܢ ܢܫܬܢܕܘܢ ܒܗܘܢ ܡܪܝܪܐܝܬ
2 ܟܕ ܕܝܢ ܦܩ̣ܕ ܗܠܝܢ ܛܪܘܢܐ̣ ܛ̈ܠܝܐ ܫܒܥܐ ܐܬܘ ܟܕ ܡܬܢܓܕܝܢ ܥܡ ܐܡܗܘܢ ܕܐܝܬܝܗ̇ ܗܘܬ ܣܒܬܐ ܦܐ̈ܝܐ ܘܢܟ̈ܦܐ ܘܚܝ̈ܠܬܢܐ ܕܒܟܠ ܡܕܡ ܪܘ̇ܙܝܢ ܗܘܘ
3 ܠܗܠܝܢ ܟܕ ܚ̣ܙܐ ܛܪܘܢܐ ܕܒܕܡܘܬ ܓܘܕܐ ܒܡܨܥܬܐ ܠܐܡܗܘܢ ܟܪܝܟܝܢ ܗܘܘ̣ ܚܕܝ ܘܬܗ̣ܪ ܒܚܙܬܗܘܢ ܘܒܐܘܝܘܬܗܘܢ ܘܐܦܨܚ ܐ̈ܦܘܗܝ ܠܘܩܒܠܗܘܢ ܘܩ̣ܪܐ ܐܢܘܢ ܥܠ ܓܒܗ ܘܐܡ̣ܪ
4 ܐܘ ܥܠܝ̈ܡܐ ܡܛܠ ܕܒܪܥܝܢܐ ܛܒ̇ܐ ܒܫܘܦܪܐ ܕܟܠ ܚܕ ܚܕ ܡܢܟܘܢ ܬܗ̇ܪ ܐܢܐ ܘܟܢܘܫܝܐ ܗܢܐ ܟܘܠܗ ܕܐ̈ܚܐ ܡܝܩܪ ܐܢܐ ܠܐ ܗܘܐ ܒܠܚܘܕ ܡ̇ܠܟ ܐܢܐ ܠܟܘܢ ܕܠܐ ܬܫ̣ܢܘܢ ܗ̇ܝ ܫܢܝܘܬܐ ܕܫ̣ܢܐ ܣܒܐ ܗ̇ܘ ܕܩ̇ܒܠ ܫ̈ܢܕܐ
5 ܐܠܐ ܐܦ ܒ̇ܥܐ ܐܢܐ ܡܢܟܘܢ ܕܬܬܛܦܝܣܘܢ ܠܝ ܘܬܗܘܘܢ ܠܝ ܪ̈ܚܡ̇ܐ ܡܨ̣ܐ ܐܢܐ ܗܘ ܓܝܪ ܐܟܙܢܐ ܕܐܣܝܡ ܒܪܫܐ ܕܗ̇ܢܘܢ ܕܠܐ ܡܬܛܦܝܣܝܢ ܠܦܘܩܕܢܝ ܗܟܘܬ ܕܐܥܒܕ ܫܦܝܪ̈ܬܐ ܠܗ̇ܢܘܢ ܕܡܬܛܦܝܣܝܢ ܠܝ
6 ܗܝܡܢܘ ܗܟܝܠ ܕܐܦ ܫܘܠܛܢܐ ܘܪ̈ܝܫܢܘܬܐ ܒܐܘܚܕܢܝ ܢܣ̇ܒܝܢ ܐܢܬܘܢ ܟܕ ܬܟܦܪܘܢ ܒܢܡܘ̈ܣܐ ܘܒܕܘܒܪ̈ܐ ܕܐܒܗ̈ܝܟܘܢ
7 ܘܬܬܚܠܛܘܢ ܒܕܘܒܪ̈ܐ ܕܚܢܦܘܬܐ ܡܐ ܓܝܪ ܕܫܚܠܦܘܢ ܥܝܕ̈ܝܟܘܢ ܡܬܦܢܩܝܬܘܢ ܒܛܠܝܘܬܟܘܢ
8 ܘܐܠܐ ܐܢܗ̣ܘ ܕܪܘܓܙܐ ܒܝ ܬܓܘܙܠܘܢ ܒܝܕ ܠܐ ܡܬܛܦܝܣܢܘܬܟܘܢ ܥ̇ܨܝܢ ܐܢܬܘܢ ܠܝ ܕܒܫ̈ܢܕܐ ܩ̈ܫܝܐ ܠܟܠ ܚܕ ܚܕ ܡܢܟܘܢ ܐܘܒܕ
9 ܚܘܣܘ ܗܟܝܠ ܥܠ ܢܦܫܟܘܢ ܗ̇ܝ ܕܐܦ ܐܢܐ ܕܠܩܘܒܠܟܘܢ ܡܩܪܒ ܐܢܐ ܥܠܝܗ̇ ܚܐ̇ܣܢܐ ܘܡܪܚܡ ܐܢܐ ܥܠ ܩܘܡ̈ܬܟܘܢ ܘܥܠ ܫܘܦܪ̈ܝܟܘܢ
10 ܠܐ ܗܟܝܠ ܡܬܪܥܝܢ ܐܢܬܘܢ ܕܠܘ ܡܕܡ ܐܚܪܝܢ ܗ̇ܘܐ ܠܟܘܢ ܐܢ ܗ̣ܘ ܕܠܐ ܬܬܛܦܝܣܘܢ ܐܠܐ ܐܢ ܕܒܫ̈ܢܕܐ ܬܡܘܬܘܢ
11 ܟܕ ܕܝܢ ܗܠܝܢ ܐܡ̣ܪ̣ ܦ̣ܩܕ ܕܢܣܬܕܪܘܢ ܡܐ̈ܢܝ ܫ̈ܢܕܐ ܩܕܡܝܗܘܢ ܥܒ̣ܕ ܕܝܢ ܗܕܐ̣ ܐܝܟ ܡ̇ܢ ܕܒܝܕ ܕܚܠܬܐ ܣ̇ܒܪ ܗܘܐ ܕܡܦܝܣ ܗܘܐ ܠܗܘܢ ܕܢܐܟܠܘܢ ܡܕܡ ܕܡܣܝܒ
12 ܟܕ ܕܝܢ ܐܝܬܝܘ ܠܡܨܥܬܐ ܠܓܝ̈ܓܠܐ ܘܠܦܪ̈ܙܠܐ ܘܠܦܪ̈ܩܝ ܫܪ̈ܝܬܐ ܘܥܪ̈ܩܐ ܕܡ̈ܬܚܐ ܘܩܕ̈ܣܐ ܘܛܓ̈ܢܐ ܘܫܦܘ̈ܕܐ ܘܐܝ̈ܕܝܐ ܕܦܪܙܠܐ ܘܐܣ̈ܦܢܐ ܘܓܘܡܪ̈ܐ ܕܢܘܪܐ ܥܢ̣ܐ ܛܪܘܢܐ ܘܐܡ̣ܪ
13 ܛܠܝܐ ܕܚ̣ܠܘ ܐܦ ܕܝ̇ܢܐ ܗ̇ܘ ܕܡܢܗ ܕܚ̇ܠܝܢ ܐܢܬܘܢ ܫܒ̇ܩ ܠܟܘܢ ܡܛܠ ܕܡܢ ܩܛܝܪܐ ܥܒ̇ܪܝܢ ܐܢܬܘܢ ܥܠ ܢܡܘܣܐ
14 ܗ̣ܢܘܢ ܕܝܢ ܟܕ ܫܡ̣ܥܘ ܡ̈ܠܐ ܕܫܕܠܐ ܐܦ ܕܠܘܚܡܐ ܘܚܙܘ ܚܙܬܐ ܗ̇ܝ ܕܚܝܠܬܐ̣ ܠܐ ܐܣܬܪܕܘ ܐܠܐ ܐܦ ܡ̈ܠܐ ܕܚܟܡܬܐ̣ ܦܢ̇ܝܘ ܠܛܪܘܢܐ ܘܒܝܕ ܛܥܡܐ ܕܚܟܡܬܗܘܢ̣ ܠܛܪܘܢܘܬܗ ܣܚܦܘ
15 ܢܬܚܫܒ ܕܝܢ ܐܠܘ ܕܚܘ̈ܠܬܢܝܢ ܗ̇ܘܝ ܢܦܫ̈ܬܗܘܢ ܘܠܐ ܠܒܝܒܝܢ ܗܘܘ ܐܝܠܝܢ ܡ̈ܠܐ ܒܪ̈ܥܝܢܝܗܘܢ ܡܬܚܫܚܝܢ ܗܘܘ ܠܐ ܗܘܐ ܒܗܠܝܢ
16 ܕܘ̈ܝܐ ܚܢܢ ܘܐܢܫܐ ܕܛܒ ܣܟܠܝܢ ܡ̇ܠܟܐ ܡܢܢ ܒ̇ܥܐ ܘܠܛܒ̇ܬܐ ܩ̇ܪܐ ܠܢ ܘ̇ܠܐ ܕܢܬܛܦܝܣ ܠܨܒܝܢܗ
17 ܡܢܐ ܡܬܠܠܠܝܢ ܚܢܢ̇ ܘܒܠܐ ܡܬܛܦܝܣܢܘܬܐ ܕܡܝܬܝܐ ܡܘܬܐ ܡܡܪܚܝܢ ܚܢܢ ܠܡܩܘܝܘ
18 ܢܕܚܠ ܡܢ ܫܢ̈ܕܐ ܓ̇ܒܪܐ ܐܚ̈ܐ ܘܢܣܩ ܥܠ ܒܠܢ ܠܘܚܡ̈ܝܗܘܢ ܘܢ̇ܥܪܘܩ ܡܢ ܪܚܡܬ ܬܫܒܘܚܬܐ ܗܕܐ̇ ܘܡܢ ܫܒܗܪܢܘܬܐ ܕܛܥܝܢܐ ܡܘܬܐ
19 ܢܚܘܣ ܥܠ ܩܘ̈ܡܬܢ ܘܬܟ̇ܪܐ ܠܢ ܥܠ ܣܝܒܘܬܗ̇ ܕܐܡܢ
20 ܘܢܬܪܥܐ ܕܐܠܐ ܢܬܛܦܝܣ̣ ܡ̇ܝܬܝܢܢ
21 ܠܐ ܕܝܢ ܪܓ̇ܙ ܥܠܝܢ ܐܦܠܐ ܕܝܢ̣ܐ ܐܠܗܝܐ̇ ܕܡܛܠ ܩܛܝܪܐ ܕܚ̇ܠܢܢ ܡܢ ܡ̇ܠܟܐ
22 ܡܢܐ ܡܦܩܝܢܢ ܢܦܫܢ ܡܢ ܚ̈ܝܐ ܗܠܝܢ ܗܢ̈ܝܐ̇ ܘܡܢ ܥܠܡܐ ܗܢܐ ܚܠܝܐ ܓ̇ܠܙܝܢܢ ܠܗ̇
23 ܠܐ ܢܕܒܪܗ̇ ܒܩܛܝܪܐ ܠܐܢܢܩܐ ܘܠܐ ܢܗܘܐ ܪ̈ܚ̇ܡܝ ܫܘܒܚܐ ܡܛܠ ܫܢ̈ܕܐ
24 ܐܦܠܐ ܗ̣ܘ ܢܡܘܣܐ ܡܡܝܬ ܠܢ ܟܕ ܠܐ ܨܒ̇ܝܢܢ
25 ܡܢ ܐܝܡܟܐ ܗܢܐ ܟܠܗ ܚܪܝܢܐ ܩܒܝܥ ܒܢ ܘܚܘܡܣܢܐ ܕܫܘܦܪܢܘܬܐ ܕܡܝܬܝܐ ܡܘܬܐ ܟܕ ܦܫܝܩ ܠܢ ܕܕܠܐ ܫܓܘܫܝܐ ܢܬܛܦܝܣ ܠܡ̇ܠܟܐ ܘܢܚܐ
26 ܐܠܐ ܘܠܐ ܚܕ̇ܐ ܡܢ ܗ̣ܠܝܢ ܐܡ̣ܪܘ ܥ̈ܠܝܡܐ̇ ܟܕ ܥܬܝܕܝܢ ܗܘܘ ܠܡܥܠ ܠܐܘ̈ܠܨܢܐ ܘܠܐ ܐܣܩܘ ܥܠ ܒܠܗܘܢ
27 ܐܝܬܝܗܘܢ ܗܘܘ ܓܝܪ ܡܒܣܪܝ ܥܠ ܚܫ̈ܐ ܘܙ̈ܟܝܝ ܠܟܐ̈ܒܐ
28 ܗܟܢܐ ܕܥܡܗ ܕܫܠܝ ܛܪܘܢܐ ܡܢ ܕܡܠ̣ܟ ܠܗܘܢ ܕܢܐܟܠܘܢ ܕܡܣܝܒ̣ ܟܠܗܘܢ ܐܝܟ ܕܡܢ ܚܕ ܩܠܐ ܘܐܝܟ ܕܡܢ ܚܕܐ ܢܦܫܐ ܫܘܝܐܝܬ ܐܡ̣ܪܘ