Read 4 Maccabees 7 side by side with translations · The Final Bible
1 ܐܝܟ ܩܘܒܪܢܛܐ ܓܝܪ ܡܗܝܪܐ̣ ܗܟܢܐ ܪܥܝܢܗ ܕܐܒܘܢ ܣܒܐ ܐܠܝܥܙܪ ܒܝܕ ܠܝܩ̈ܐ ܕܕܚܠܬ ܐܠܗܐ ܡܚܫܒܬܗ ܡܕܒܪ ܗܘܐ̇ ܒܓܘ ܝܡܐ ܪܒܐ ܕܫ̈ܢܕܐ ܘܚ̈ܫܐ̣
2 ܘܟܕ ܠܘܚ̈ܡܐ ܘܬܫ̈ܢܝܕܐ ܕܛܪܘܢܐ ܥܠܘܗܝ ܥ̇ܪܨܝܢ ܗܘܘ ܘܓ̈ܠܠܐ ܫ̈ܓܝܫܐ ܕܐܘ̈ܠܨܢܐ̣
3 ܘܠܐ ܒܚܕ ܐܣܟܝܡ ܐܗܦܟܘ ܠܩܘ̈ܗܝ ܡܢ ܕܚܠܬ ܐܠܗܐ ܥܕܡܐ ܕܪܕܐ ܘܡܛ̣ܐ ܠܠܡܐܢܐ ܕܙܟܘܬܐ ܕܠܐ ܡܝܬܐ
4 ܠܐ ܗܟܢܐ ܡܬܘܡ ܡܕܝܢܬܐ ܒܚܒܫܐ ܥܙܝܬ ܠܘܩܒܠ ܡܐ̈ܢܝ ܩܪܒܐ ܣܓ̈ܝܐܐ ܘܡܫ̈ܚܠܦܐ̇ ܐܝܟ ܗܢܐ ܡܢܝܢ ܒܟܠܗ̇ ܬܠܒܫܬܐ ܟܕ ܓܝܪ ܚܐ̇ܫܐ ܗܘܬ ܢܦܫܗ ܡܚܣܝܬܐ ܒܫ̈ܢܕܐ ܘܒܐܘ̈ܠܨܢܐ ܘܒܝܩܕܢܐ̣ ܙܟܐ ܠܐܘ̈ܠܨܢܐ ܕܚܕܝܪܝܢ ܗܘܘ ܠܗ ܡܛܠ ܪܥܝܢܗ ܕܡܬܟܬܫ ܗ̣ܘܐ ܥܠ ܐ̈ܦܝ ܫܪܪܐ
5 ܙܩܦ̣ ܓܝܪ ܪܥܝܢܗ ܘܐܪܝܡܗ ܐܝܟ ܫܢܐ ܕܙܩܝܦܐ ܐܒܘܢ ܐܠܝܥܙܪ ܘܠܡܚ̈ܫܘܠܐ ܕܚ̈ܫܐ ܫܗܝ̣ ܒܫܢܝܘܬܗܘܢ
6 ܐܘ ܠܟܗܢܐ ܕ̇ܫܘܐ ܗܘܐ ܠܟܗܢܘܬܐ ܠܐ ܣܝܒܬ ܣ̈ܦܘܬܟ ܕܟ̈ܝܬܐ ܘ̈ܫܢܝܟ ܘܠܐ ܠܟܪܣܟ ܕܫܪܬ ܒܗ̇ ܕܟܝܘܬܐ ܘܕܚܠܬ ܐܠܗܐ ܘܐܬܚܠܛܬ ܒܡܐܟܘܠܬܐ ܛܢܦܬܐ
7 ܐܘ ܫ̇ܠܡ ܠܢܡܘܣܐ ܘܡܠܦܢܐ ܕܚ̈ܝܐ ܐܠܗ̈ܝܐ
8 ܕܐܝܟ ܗܟܢܐ ܘ̇ܠܐ ܠܗܘܢ ܠܡܗܘܐ ܠܡܠܦ̈ܢܐ ܕܢܡܘܣܐ ܕܒܕܡܗܘܢ ܘܒܕܘܥܬܗܘܢ ܘܒܓܢܒܪܘܬܗܘܢ ܒܝܕ ܚܫ̈ܐ ܕܥܕܡܐ ܠܡܘܬܐ ܢܬܟܬܫܘܢ
9 ܐܢܬ ܐܒܘܢ ܠܢܡܘܣܢ ܫܦܝܪܐ ܒܝܕ ܡܣܝܒܪܢܘܬܟ ܒܬܫܒܘܚܬܐ ܫܪ̣ܪܬ ܘܩܠܣܬ ܩܕܝܫܘܬܗ ܘܐܘܪܒܬ ܘܠܐ ܣܚ̣̇ܦܬ ܘܒܝܕ̇ ܥ̇ܒ̈ܕܐ ܥܒ̣ܕ̇ܬ ܕܢܬܗ̈ܝܡܢܢ ܡ̈ܠܐ ܕܚܟܡܬܐ ܐܠܗܝܬܐ
10 ܐܘ ܣܒܐ ܕܡܢ ܟܠ ܫܢ̈ܕܝܢ ܩܛܝܪܟ ܩܫܐ ܗܘܐ ܘܩܫܝܫܐ ܕܡܢ ܢܘܪܐ ܚܣܝܢ ܗ̣ܘܝܬ ܘܡ̇ܠܟܐ ܪܒܐ ܕܥܠ ܚ̈ܫܐ ܐܠܝܥܙܪ
11 ܐܟܙܢܐ ܓܝܪ ܕܐܒܘܢ ܐܗܪܘܢ ܟܕ ܒܦܝܪܡܐ ܐܝܟ ܕܒܙܝܢܐ ܡܙܝܢ ܗܘܐ ܒܓܘ ܥܡܐ ܪܗ̇ܛ ܗܘܐ ܘܠܡܠܐܟܐ ܡܘܩܕܢܐ ܙܟ̣ܐ̣
12 ܗܟܢܐ ܐܦ ܐܗܪܘܢܝܐ ܐܠܝܥܙܪ ܟܕ ܫܐ̇ܚ ܗܘܐ ܒܢܘܪܐ ܠܐ ܐܫܬܚܠܦ ܪܥܝܢܗ
13 ܕܬܡܝܗܐ ܕܝܢ ܡܢ ܟܠܗܝܢ̣ ܕܟܕ ܗ̣ܘ ܣܒܐ ܘܡܫܪܝ̣ ܗܘܐ ܚܝܠܐ ܕܗܕ̈ܡܘܗܝ ܘܡܪܫܠ ܦܓܪܗ ܘܠܐ̣ܝܢ ܫܪ̈ܝܢܘܗܝ ܐܬܛܠܝ ܒܪܘܚܐ ܕܪܥܝܢܗ
14 ܘܠܫ̈ܢܕܐ ܣܓܝܐ̈ܝ ܐܣܟܡ̈ܐ ܚ̇ܣܢ
15 ܐܘ ܠܣܝܒܘܬܐ ܛܘܒܢܝܬܐ ܘܠܕܘܒܪ̈ܐ ܕܟ̈ܝܐ ܘܠܚ̈ܝܐ ܢܡܘ̈ܣܝܐ ܠܟ ܚܬܡܐ ܫ̇ܪܝܪܐ ܕܡܘܬܐ ܓܡܪ܀
16 ܐܢܗ̣ܘ ܗܟܝܠ ܕܓܒܪܐ ܣܒܐ ܥܠ ܫ̈ܢܕܐ ܕܥܕܡܐ ܠܡܘܬܐ ܡܛܠ ܫܪܪܐ ܐܡܣ̣ܪ ܝܕܝܥܐ ܗܝ̣ ܕܡܫܠܛ ܗܘ ܥܠ ܚܫ̈ܐ ܪܥܝܢܐ ܕܡܠ̣ܐ ܕܚܠܬ ܐܠܗܐ
17 ܘܟܒܪ ܐܢܫ ܢܐܡܪ ܕܚ̈ܫܐ ܠܐ ܗܘܐ ܟܠܢܫ ܚܣܢ ܡ̇ܛܠ ܕܐܦ ܠܐ ܟܠ ܐܢܫ ܪܥܝܢܐ ܚܟܝܡܐ ܐܝܬ ܠܗ
18 ܐܠܐ ܗ̇ܢܘܢ ܕܐܟ̇ܦܐ ܠܗܘܢ ܥܠ ܕܚܠܬ ܐܠܗܐ ܗ̇ܢܘܢ ܗܘ ܒܠܚܘܕ ܡܨܝܢ ܠܡܙܟܐ ܚ̈ܫܘܗܝ ܕܦܓܪܐ
20 ܘܠܐ ܡܕܡ ܗܟܝܠ ܡܟܝܐ ܗܕܐ̇ ܐܢܗ̣ܘ ܕܡܬܚܙܝܢ ܐܢ̈ܫܝܢ ܕܙ̇ܟܝܢ ܠܚ̈ܫܐ ܡܛܠ ܪܥܝܢܗܘܢ ܡܚܝܠܐ
21 ܘܐܠܐ ܐܝܢܘ ܕܒܟܘܠܗ ܫܒܝܠܐ ܬܪܝܨܐ ܕܙܕܝܩܘܬܐ ܐܙ̇ܠ ܘܡܗܝܡܢ ܠܐܠܗܐ
22 ܘܡܦܣ ܕܡܛܠ ܡܝܬܪܘܬܐ ܛܘܒܢܐ ܗܘ ܐܢܗ̣ܘ ܕܟܠ ܥܡ̈ܠܝܢ ܢܣܝܒܪ ܘܠܐ ܢܙܟܐ ܠܚ̈ܫܐ ܡܛܠ ܫܪܪܐ
23 ܒܠܚܘܕ ܓܝܪ ܐܝ̇ܢܐ ܕܐܝܬܘܗܝ ܚܟܝܡܐ ܘܓܢܒܪܐ ܐܝܬܘܗܝ ܡܫܠܛ ܥܠ ܚ̈ܫܘܗܝ
24 ܘܥܠ ܗܕܐ ܐܦ ܛ̈ܠܝܐ ܟܕ ܒܪܥܝܢܐ ܕܕܚܠܬ ܐܠܗܐ ܐܝܬܝܗܘܢ ܗܘܘ ܠܫܢ̈ܕܐ ܕܡܢ ܗܠܝܢ ܩܫ̣ܝܢ ܙܟܘ܀
25 ܡܛܠ ܓܝܪ ܕܒܢܣܝܢܐ ܩܕܡܝܐ ܐܙܕܟ̇ܝ ܛܪܘܢܐ ܪܘܪܒܐܝܬ ܠܥܝܢ ܟܠ ܐܢܫ ܘܠܐ ܐܫܟܚ ܠܡܥܨܐ ܠܓܒܪܐ ܣܒܐ ܠܡܐܟܠ ܡܐܟܘܠܬܐ ܡܣܝܒܬܐ