Read 2 Samuel 24 side by side with translations · The Final Bible
1 ⲁⲩⲱ ⲁⲥⲟⲩⲱϩ ⲉⲧⲟⲟⲧⲥ ⲛϭⲓⲟⲩⲟⲣⲅⲏ ⲛⲧⲉⲡϫⲟⲉⲓⲥ ⲉⲧⲣⲉⲥⲙⲟⲩϩ ϩⲙⲡⲓⲥⲣⲁⲏⲗ ⲁⲩⲱ ⲁⲥⲕⲉⲙⲧⲇⲁⲇ ϩⲣⲁⲓ ⲛϩⲏⲧⲟⲩ ⲉϥϫⲱ ⲙⲙⲟⲥ ϫⲉⲃⲱⲕ ⲛⲅϫⲓⲏⲡⲉ ⲙⲡⲓⲥⲣⲁⲏⲗ ⲙⲛⲓⲟⲩⲇⲁ
2 ⲁⲩⲱ ⲡⲣⲣⲟ ⲡⲉϫⲁϥ ⲛⲓⲱⲁⲃ ⲡⲁⲣⲭⲱⲛ ⲙⲡⲉϥⲙⲏⲏϣⲉ ⲉϥⲛⲙⲙⲁϥ ⲉϥϫⲱ ⲙⲙⲟⲥ ⲛⲁϥ ϫⲉⲃⲱⲕ ⲉⲃⲟⲗ ϩⲛⲛⲉⲫⲩⲗⲏ ⲧⲏⲣⲟⲩ ⲙⲡⲓⲥⲣⲁⲏⲗ ϫⲓⲛⲇⲁⲛ ϣⲁⲃⲏⲣⲥⲁⲃⲉⲉ ⲛⲅϫⲓⲏⲡⲉ ⲙⲡⲗⲁⲟⲥ ϫⲉⲉⲓⲉⲉⲓⲙⲉ ⲉⲧⲉⲩⲏⲡⲉ ϫⲉⲡⲗⲁⲟⲥ ⲛⲁⲣⲟⲩⲏⲣ
3 ⲁⲩⲱ ⲓⲱⲁⲃ ⲡⲉϫⲁϥ ϩⲓⲧϩⲏ ⲙⲡⲣⲣⲟ ϫⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲉϥⲉⲟⲩⲱϩ ⲉϫⲙⲡⲗⲁⲟⲥ ⲛⲁⲁⲣⲟⲟⲩ ⲟⲛ ⲁⲩⲱ ⲟⲛ ⲛⲁⲁⲣⲟⲟⲩ ⲛϣⲉ ⲛⲕⲱⲃ ⲉⲣⲉⲛⲃⲁⲗ ⲙⲡϫⲟⲉⲓⲥ ⲡⲣⲣⲟ ϭⲱϣⲧ ⲉϫⲱⲟⲩ ⲁⲩⲱ ϭⲉ ⲡⲁϫⲟⲉⲓⲥ ⲡⲣⲣⲟ ⲁϩⲣoϥ ϥⲕⲱⲧⲉ ⲛⲥⲁⲡⲉⲓϣⲁϫⲉ ⲉⲁⲁϥ
4 ⲡϣⲁϫⲉ ⲇⲉ ⲙⲡⲣⲣⲟ ⲁϥⲃⲉⲉⲣⲉ ⲡϣⲁϫⲉ ⲛⲓⲱⲁⲃ ⲙⲛⲛⲕⲉⲁⲣⲭⲱⲛ ⲙⲡⲙⲏⲏϣⲉ ⲓⲱⲁⲃ ⲇⲉ ⲙⲛⲛⲕⲉⲁⲣⲭⲱⲛ ⲙⲡⲙⲏⲏϣⲉ ⲁϥⲉⲓ ⲉⲃⲟⲗ ϩⲓⲧⲟⲟⲧϥ ⲙⲡⲣⲣⲟ ⲉϫⲓⲏⲡⲉ ⲙⲡⲗⲁⲟⲥ ⲙⲡⲓⲥⲣⲁⲏⲗ
5 ⲁⲩⲱ ⲁⲩϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲁⲩⲉⲓ ⲉϩⲣⲁⲓ ⲉⲁⲣⲓⲏⲗ ⲛⲥⲁⲟⲩⲛⲁⲙ ⲛⲧⲡⲟⲗⲓⲥ ⲧⲉⲧϩⲛⲧⲙⲏⲧⲉ ⲙⲡⲉⲓⲁ ⲛⲅⲁⲇ ⲙⲛⲉⲗⲓⲉⲍⲉⲣ
6 ⲁⲩⲱ ⲁⲩⲉⲓ ⲉϩⲣⲁⲓ ⲉⲅⲁⲗⲁⲁⲇ ⲁⲩⲱ ⲉϩⲣⲁⲓ ⲉⲑⲁⲃⲁⲥⲟⲛ ⲁⲩⲱ ⲉϩⲣⲁⲓ ⲉⲏⲥⲑⲱⲛ ⲁⲩⲱ ⲉϩⲣⲁⲓ ⲉⲉⲓⲁⲇⲁⲥⲁⲓ ⲁⲩⲱ ⲁⲩⲉⲓ ⲉϩⲣⲁⲓ ⲉⲇⲁⲛⲓⲁ ⲙⲛⲟⲩⲇⲁⲛ ⲁⲩⲱ ⲁⲩⲕⲱⲧⲉ ⲉⲥⲓⲇⲱⲛ
7 ⲁⲩⲱ ⲁⲩⲉⲓ ⲉϩⲣⲁⲓ ⲉⲙⲁⲯⲁⲣ ⲛⲧⲉⲧⲩⲣⲟⲥ ⲁⲩⲱ ⲉⲙⲡⲟⲗⲓⲥ ⲧⲏⲣⲟⲩ ⲙⲡⲉⲩϩⲉⲟⲥ ⲙⲛⲡⲉⲭⲁⲛⲁⲛⲁⲓⲟⲥ ⲁⲩⲱ ⲁⲩⲉⲓ ⲉϩⲣⲁⲓ ⲉⲡⲕⲁϩ ⲛⲓⲟⲩⲇⲁ ⲉϩⲣⲁⲓ ⲉⲃⲏⲣⲥⲁⲃⲉⲉ
8 ⲁⲩⲱ ⲁⲩⲃⲱⲕ ⲉⲃⲟⲗ ϩⲙⲡⲕⲁϩ ⲧⲏⲣϥ ⲙⲛⲛⲥⲁⲛⲁⲓ ⲉϫⲙⲡϫⲱⲕ ⲙⲯⲓⲥ ⲛⲉⲃⲟⲧ ⲙⲛϫⲟⲩⲱⲧ ⲛϩⲟⲟⲩ ⲁⲩⲉⲓ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ
9 ⲁⲩⲱ ⲓⲱⲁⲃ ⲁϥϯⲧⲏⲡⲉ ⲙⲡⲙⲏⲏϣⲉ ⲙⲡⲗⲁⲟⲥ ⲉⲧⲟⲟⲧϥ ⲙⲡⲣⲣⲟ ⲡⲓⲥⲣⲁⲏⲗ ⲇⲉ ⲁⲧⲉϥⲏⲡⲉ ⲣϥⲧⲟⲟⲩ ⲛϫⲟⲩⲱⲧ ⲛⲧⲃⲁ ⲛⲣⲱⲙⲉ ⲛⲇⲩⲛⲁⲧⲟⲥ ⲉⲩⲁⲙⲁϩⲧⲉ ⲛⲧⲥⲏϥⲉ ⲁⲩⲱ ⲛⲣⲱⲙⲉ ⲛⲓⲟⲩⲇⲁ ⲁⲩⲣⲧⲁⲓⲟⲩ ⲛⲧⲃⲁ ⲛⲣⲱⲙⲉ ⲛⲣⲉϥⲙⲓϣⲉ
10 ⲡϩⲏⲧ ⲇⲉ ⲛⲇⲁⲩⲉⲓⲇ ⲁϥⲟⲩⲱⲙ ⲙⲙⲟϥ ⲙⲛⲛⲥⲁⲉⲧⲣⲉϥϫⲓⲏⲡⲉ ⲙⲡⲗⲁⲟⲥ ⲁⲩⲱ ⲇⲁⲩⲉⲓⲇ ⲡⲉϫⲁϥ ϩⲓⲧϩⲏ ⲙⲡϫⲟⲉⲓⲥ ϫⲉⲁⲓⲣⲛⲟⲃⲉ ⲉⲙⲁⲧⲉ ϩⲙⲡⲉⲛⲧⲁⲓⲁⲁϥ ⲧⲉⲛⲟⲩ ϭⲉ ⲡϫⲟⲉⲓⲥ ⲕⲱ ⲉⲃⲟⲗ ⲛⲧⲁⲛⲟⲙⲓⲁ ⲙⲡⲉⲕϩⲙϩⲁⲗ ϫⲉⲁⲓⲣⲁⲑⲏⲧ ⲉⲙⲁⲧⲉ
11 ⲇⲁⲩⲉⲓⲇ ⲇⲉ ⲁϥⲧⲱⲟⲩⲛ ⲙⲡⲉϥϩⲧⲟⲟⲩⲉ ⲁⲩⲱ ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲅⲁⲇ ⲡⲉⲡⲣⲟⲫⲏⲧⲏⲥ ⲡⲉⲧⲛⲁⲩ ⲉⲃⲟⲗ
12 ⲉⲧⲣⲉϥⲃⲱⲕ ⲉⲣⲁⲧϥ ⲛⲇⲁⲩⲉⲓⲇ ⲉϥϫⲱ ⲙⲙⲟⲥ ⲛⲁϥ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲁⲛⲟⲕ ϣⲟⲙⲛⲧ ⲛϩⲱⲃ ϯⲛⲁϫⲟⲟⲩ ⲉⲣⲟⲕ ⲥⲉⲧⲡⲟⲩⲁ ⲛⲁⲕ ⲉⲃⲟⲗ ⲛϩⲏⲧⲟⲩ ⲛⲧⲁⲁⲁϥ ⲛⲙⲙⲁⲕ
13 ⲁⲩⲱ ⲅⲁⲇ ⲡⲉⲡⲣⲟⲫⲏⲧⲏⲥ ⲁϥⲃⲱⲕ ⲉϩⲟⲩⲛ ϣⲁⲇⲁⲩⲉⲓⲇ ⲁϥⲧⲁⲙⲟϥ ⲉϥϫⲱ ⲙⲙⲟⲥ ⲛⲁϥ ϫⲉⲥⲉⲧⲡⲟⲩϩⲱⲃ ⲛⲁⲕ ϩⲛⲛⲁⲓ ⲉⲧⲣⲉϥϣⲱⲡⲉ ⲏ ⲛⲧⲉⲟⲩϩⲉⲃⲱⲱⲛ ⲧⲁϩⲟⲕ ⲛϣⲟⲙⲧⲉ ⲛⲣⲟⲙⲡⲉ ϩⲓϫⲙⲡⲕⲁϩ ⲏ ⲛⲅⲣϣⲟⲙⲛⲧ ⲛⲉⲃⲟⲧ ⲉⲕⲡⲏⲧ ϩⲁⲡϩⲟ ⲛⲛⲉⲕϫⲁϫⲉ ⲉⲩⲡⲏⲧ ⲛⲥⲱⲕ ⲏ ⲛⲧⲉⲟⲩⲙⲟⲩ ϣⲱⲡⲉ ϩⲙⲡⲉⲕⲕⲁϩ ⲛϣⲟⲙⲛⲧ ⲛϩⲟⲟⲩ ⲧⲉⲛⲟⲩ ϭⲉ ⲉⲓⲙⲉ ⲛⲅⲛⲁⲩ ⲉⲡϣⲁϫⲉ ⲉϯⲛⲁϫⲟⲟϥ ⲙⲡⲉⲛⲧⲁϥⲧⲛⲛⲟⲟⲩⲧ ϣⲁⲣⲟⲕ
14 ⲡⲉϫⲉⲇⲁⲩⲉⲓⲇ ⲛⲅⲁⲇ ⲡⲉⲡⲣⲟⲫⲏⲧⲏⲥ ϫⲉⲛⲁⲓ ⲛⲧⲁⲕϫⲟⲟⲩ ϩⲛϩⲟϫϩϫ ⲛⲁⲓ ⲛⲉ ⲉⲡⲧⲏⲣϥ ⲉⲙⲁⲧⲉ ϯⲛⲁⲥⲟⲡⲧⲥ ⲛⲁⲓ ⲉⲧⲣⲁⲉⲓ ⲛⲧⲟϥ ⲉϩⲣⲁⲓ ⲉⲧϭⲓϫ ⲙⲡϫⲟⲉⲓⲥ ϫⲉⲛⲉϥⲙⲛⲧϣⲉⲛⲉϩⲧⲏϥ ⲛⲁϣⲱⲟⲩ ⲉⲙⲁⲧⲉ ⲛⲛⲁⲟⲩⲱϣ ϭⲉ ⲉⲧⲣⲁⲓ ⲉϩⲣⲁⲓ ⲉⲧϭⲓϫ ⲛⲛⲣⲱⲙⲉ
15 ⲁⲩⲱ ⲇⲁⲩⲉⲓⲇ ⲁϥⲥⲱⲧⲡ ⲛⲁϥ ⲙⲡⲙⲟⲩ ⲉⲧⲣⲉϥⲧⲁϩⲟϥ ⲛⲉ ⲛⲉϩⲟⲟⲩ ⲇⲉ ⲛⲉ ⲙⲡⲉϩⲥⲥⲟⲩⲟ ⲁⲩⲱ ⲡϫⲟⲉⲓⲥ ⲁϥⲟⲩⲉϩⲥⲁϩⲛⲉ ⲉⲧⲣⲉⲟⲩⲙⲟⲩ ϣⲱⲡⲉ ϩⲙⲡⲓⲥⲣⲁⲏⲗ ϫⲓⲛϩⲧⲟⲟⲩⲉ ϣⲁⲡⲛⲁⲩ ⲛⲟⲩⲱⲙ ⲙⲙⲉⲉⲣⲉ ⲧⲟⲣⲅⲏ ⲇⲉ ⲁⲥⲙⲟⲩϩ ⲉϩⲟⲩⲛ ⲉⲡⲗⲁⲟⲥ ⲁⲩⲱ ⲁⲩⲙⲟⲩ ⲉⲃⲟⲗ ϩⲙⲡⲗⲁⲟⲥ ϫⲓⲛⲇⲁⲛ ϣⲁⲉϩⲣⲁⲓ ⲉⲃⲏⲣⲥⲁⲃⲉⲉ ⲛϭⲓⲥⲁϣϥ ⲛⲧⲃⲁ ⲛⲣⲱⲙⲉ
16 ⲡⲁⲅⲅⲉⲗⲟⲥ ⲇⲉ ⲙⲡϫⲟⲉⲓⲥ ⲁϥⲥⲟⲩⲧⲛⲧⲟⲟⲧϥ ⲉⲃⲟⲗ ⲉⲧϩⲓⲉⲣⲟⲩⲥⲁⲗⲏⲙ ⲉⲧⲁⲕⲟⲥ ⲁⲩⲱ ⲡϫⲟⲉⲓⲥ ⲁⲩⲥⲉⲡⲥⲱⲡϥ ⲉⲧⲃⲉⲧⲉⲓⲕⲁⲕⲓⲁ ⲏ ⲧⲉⲓⲙⲟⲕϩⲥ ⲡⲉϫⲁϥ ⲙⲡⲁⲅⲅⲉⲗⲟⲥ ⲡⲉⲧⲙⲟⲩⲟⲩⲧ ϩⲙⲡⲗⲁⲟⲥ ϫⲉⲛⲁϣⲉ ⲧⲣⲁϩⲧⲥ ⲛⲧⲁⲥϣⲱⲡⲉ ⲧⲉⲛⲟⲩ ⲁⲛⲓⲧⲟⲟⲧⲕ ⲉⲣⲁⲕ ⲁⲩⲱ ⲡⲁⲅⲅⲉⲗⲟⲥ ⲙⲡϫⲟⲉⲓⲥ ⲛⲉϥⲁϩⲉⲣⲁⲧϥ ϩⲁⲧⲙ ⲡⲉϫⲛⲟⲟⲩ ⲛⲟⲣⲛⲁ ⲡⲓⲉⲃⲟⲩⲥⲁⲓⲟⲥ
17 ⲇⲁⲩⲉⲓⲇ ⲇⲉ ⲛⲧⲉⲣⲉϥⲛⲁⲩ ⲉⲡⲁⲅⲅⲉⲗⲟⲥ ⲡⲉϫⲁϥ ϩⲓⲧϩⲏ ⲙⲡϫⲟⲉⲓⲥ ϫⲉⲉⲓⲥϩⲏⲏⲧⲉ ⲁⲛⲟⲕ ⲡⲉ ⲛⲧⲁⲓⲣⲛⲟⲃⲉ ⲁⲛⲟⲕ ⲡϣⲱⲥ ⲁⲓⲉⲓⲣⲉ ⲛⲟⲩϫⲓⲛϭⲟⲛⲥ ⲛⲁⲓ ⲇⲉ ⲛⲉ ϩⲉⲛⲉⲥⲟⲟⲩ ⲛⲉ ⲙⲡⲟⲩⲣⲗⲁⲁⲩ ⲛⲧⲁⲩ ⲧⲉⲛⲟⲩ ϭⲉ ⲡϫⲟⲉⲓⲥ ⲙⲁⲣⲉⲧⲉⲕϭⲓϫ ⲉⲓ ⲉϩⲣⲁⲓ ⲉϫⲱⲓ ⲁⲩⲱ ⲉϫⲙⲡⲏⲓ ⲙⲡⲁⲉⲓⲱⲧ
18 ⲅⲁⲇ ⲇⲉ ⲡⲉⲡⲣⲟⲫⲏⲧⲏⲥ ⲁϥⲉⲓ ⲉⲣⲁⲧϥ ⲛⲇⲁⲩⲉⲓⲇ ⲙⲡⲉϩⲟⲟⲩ ⲉⲧⲙⲙⲁⲩ ⲡⲉϫⲁϥ ⲛⲁϥ ϫⲉⲧⲱⲟⲩⲛ ⲛⲅⲃⲱⲕ ⲉϩⲣⲁⲓ ⲛⲅⲥⲙⲓⲛⲉ ⲛⲟⲩⲇⲓⲁⲑⲏⲕⲏ ⲙⲛⲡϫⲟⲉⲓⲥ ⲛⲅⲧⲁⲙⲓⲟ ⲛⲟⲩⲑⲩⲥⲓⲁⲥⲧⲏⲣⲓⲟⲛ ⲙⲡϫⲟⲉⲓⲥ ϩⲛⲧⲉⲣϫⲛⲟⲟⲩ ⲛⲟⲣⲛⲁ ⲡⲓⲉⲃⲟⲩⲥⲁⲓⲟⲥ
19 ⲁⲩⲱ ⲇⲁⲩⲉⲓⲇ ⲁϥⲧⲱⲟⲩⲛ ⲁϥⲃⲱⲕ ⲉϩⲣⲁⲓ ⲕⲁⲧⲁⲡϣⲁϫⲉ ⲛⲅⲁⲇ ⲛⲧϩⲉ ⲛⲧⲁⲡϫⲟⲉⲓⲥ ϩⲱⲛ ⲉⲧⲟⲟⲧϥ
20 ⲟⲣⲛⲁ ⲇⲉ ⲁϥϭⲱϣⲧ ⲁϥⲛⲁⲩ ⲉⲡⲣⲣⲟ ⲙⲛⲛⲉϥϩⲙϩⲁⲗ ⲉⲩⲙⲟⲟϣⲉ ⲉⲣⲟϥ ⲁⲩⲱ ⲟⲣⲛⲁ ⲁϥⲉⲓ ⲉⲃⲟⲗ ⲁϥⲡⲁϩⲧϥ ⲉⲡⲉⲥⲏⲧ ⲉϫⲙⲡⲉϥϩⲟ ⲁϥⲟⲩⲱϣⲧ ⲙⲡⲣⲣⲟ ⲇⲁⲩⲉⲓⲇ
21 ⲁⲩⲱ ⲡⲉϫⲉⲟⲣⲛⲁ ⲛⲁϥ ϫⲉⲉⲧⲃⲉⲟⲩ ⲡⲁϫⲟⲉⲓⲥ ⲡⲣⲣⲟ ⲁϥⲉⲓ ⲉⲣⲁⲧϥ ⲙⲡⲉϥϩⲙϩⲁⲗ ⲡⲉϫⲉⲇⲁⲩⲉⲓⲇ ⲛⲁϥ ϫⲉⲛⲧⲁⲓⲉⲓ ⲉⲧⲣⲁϣⲱⲡ ⲛⲧⲟⲟⲧⲕ ⲛⲧⲉⲕⲣϫⲛⲟⲟⲩ ϫⲉⲉⲓⲉⲕⲱⲧ ⲛⲟⲩⲑⲩⲥⲓⲁⲥⲧⲏⲣⲓⲟⲛ ⲙⲡϫⲟⲉⲓⲥ ⲛⲧⲉⲧⲟⲣⲅⲏ ⲙⲡⲙⲟⲩ ⲗⲟ ϩⲓϫⲙⲡⲗⲁⲟⲥ
22 ⲟⲣⲛⲁ ⲇⲉ ⲡⲉϫⲁϥ ⲛⲇⲁⲩⲉⲓⲇ ϫⲉⲡⲁϫⲟⲉⲓⲥ ⲡⲣⲣⲟ ⲙⲁⲣⲉϥϫⲓⲧⲥ ⲛϥⲉⲓⲣⲉ ⲛⲁϩⲣⲙ ⲡϫⲟⲉⲓⲥ ⲙⲡⲁⲅⲁⲑⲟⲛ ⲛⲁϩⲣⲁϥ ⲉⲓⲥ ⲛⲕⲉⲙⲁⲥⲉ ⲉⲧⲣⲉⲕⲧⲁⲗⲟⲟⲩ ⲉϩⲣⲁⲓ ⲛϭⲗⲓⲗ ⲁⲩⲱ ⲉⲓⲥ ⲛⲕⲉⲧⲣⲟⲭⲟⲥ ⲙⲛⲛⲉⲥⲕⲉⲩⲏ ⲛⲧⲁϭⲟⲗⲧⲉ ⲉⲁⲁⲩ ⲛϣⲉ ⲉⲡⲉϭⲗⲓⲗ
23 ⲛⲁⲓ ⲧⲏⲣⲟⲩ ⲁⲟⲣⲛⲁ ⲧⲁⲁⲩ ⲙⲡⲣⲣⲟ ⲁⲩⲱ ⲟⲣⲛⲁ ⲡⲉϫⲁϥ ⲙⲡⲣⲣⲟ ϫⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲉϥⲉⲥⲙⲟⲩ ⲉⲣⲟⲕ
24 ⲡⲣⲣⲟ ⲇⲉ ⲡⲉϫⲁϥ ⲛⲟⲣⲛⲁ ϫⲉⲛϯⲛⲁϫⲓⲧⲟⲩ ⲁⲛ ϩⲓⲛⲁⲓ ⲁⲗⲗⲁ ϩⲛⲟⲩϣⲱⲡ ⲉⲓⲛⲁϣⲟⲡⲟⲩ ⲛⲧⲟⲟⲧⲕ ϩⲁϩⲟⲙⲛⲧ ⲁⲩⲱ ⲛϯⲛⲁⲧⲁⲗⲟ ⲁⲛ ⲉϩⲣⲁⲓ ⲛⲟⲩϭⲗⲓⲗ ⲙⲙⲁϩ ⲙⲡϫⲟⲉⲓⲥ ⲡⲁⲛⲟⲩⲧⲉ ⲛϫⲓⲛϫⲏ ⲁⲩⲱ ⲇⲁⲩⲉⲓⲇ ⲁϥϣⲱⲡ ⲛⲧⲧⲟ ⲛⲧⲉⲣϫⲛⲟⲟⲩ ⲙⲛⲛⲉⲕⲉⲙⲁⲥⲉ ⲛⲧⲟⲟⲧϥ ⲛⲟⲣⲛⲁ ϩⲁⲧⲁⲉⲓⲟⲩ ⲛⲥⲁⲧⲉⲉⲣⲉ ⲛϩⲁⲧ
25 ⲁⲩⲱ ⲇⲁⲩⲉⲓⲇ ⲁϥⲕⲱⲧ ⲙⲡⲙⲁ ⲉⲧⲙⲙⲁⲩ ⲛⲟⲩⲑⲩⲥⲓⲁⲥⲧⲏⲣⲓⲟⲛ ⲙⲡϫⲟⲉⲓⲥ ⲁϥⲧⲁⲗⲟ ⲉϩⲣⲁⲓ ⲉϫⲱϥ ⲛⲟⲩϭⲗⲓⲗ ⲙⲛϩⲉⲛⲑⲩⲥⲓⲁ ⲛⲉⲓⲣⲏⲛⲓⲕⲟⲛ ⲁⲩⲱ ⲁϥⲟⲩⲱϩ ⲉⲧⲟⲟⲧϥ ⲉⲧⲁⲗⲟ ⲉϩⲣⲁⲓ ⲛⲥⲟⲗⲟⲙⲱⲛ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲉⲡϩⲁⲉ ⲉⲃⲟⲗ ϫⲉⲛⲉⲣⲉⲡϩⲱⲃ ⲥⲟⲃⲕ ⲉⲧⲁⲗⲟϥ ⲉϩⲣⲁⲓ ⲛϣⲟⲣⲡ ⲁⲩⲱ ⲡϫⲟⲉⲓⲥ ⲁϥϯϩⲧⲏϥ ⲉϫⲙⲡⲕⲁϩ ⲁⲩⲱ ⲧⲟⲣⲅⲏ ⲙⲡⲙⲟⲩ ⲁⲥⲗⲟ ⲙⲙⲁⲩ ϩⲓϫⲙⲡⲓⲥⲣⲁⲏⲗ
2 Samuel 23 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)