2 Samuel 23 — Coptic (Sahidic)

1 ⲁⲩⲱ ⲛⲁⲓ ⲛⲉ ⲛϣⲁϫⲉ ⲛⲇⲁⲩⲉⲓⲇ ⲛϩⲁⲉⲉⲩ ⲟⲩⲡⲓⲥⲧⲟⲥ ⲡⲉ ⲇⲁⲩⲉⲓⲇ ⲡϣⲏⲣⲉ ⲛⲓⲉⲥⲥⲁⲓ ⲁⲩⲱ ⲟⲩⲡⲓⲥⲧⲟⲥ ⲡⲉ ⲡⲣⲱⲙⲉ ⲡⲁⲓ ⲛⲧⲁⲡϫⲟⲉⲓⲥ ⲧⲟⲩⲛⲟⲥϥ ⲉϫⲙⲡⲉϥⲗⲁⲟⲥ ⲓⲁⲕⲱⲃ ⲁⲩⲱ ⲛⲉⲥⲱⲟⲩ ⲛⲉⲯⲁⲗⲙⲟⲥ ⲙⲡⲓⲥⲣⲁⲏⲗ

2 ⲡⲉⲡⲛⲉⲩⲙⲁ ⲙⲡϫⲟⲉⲓⲥ ⲡⲉ ⲛⲧⲁϥϣⲁϫⲉ ϩⲣⲁⲓ ⲛϩⲏⲧ ⲁⲩⲱ ⲡⲉϥϣⲁϫⲉ ⲉϫⲙⲡⲁⲗⲁⲟⲥ

3 ⲡⲉϫⲉⲡⲛⲟⲩⲧⲉ ⲙⲡⲓⲥⲣⲁⲏⲗ ⲛⲧⲁϥϣⲁϫⲉ ⲛⲙⲙⲁⲓ ⲛϭⲓⲡⲉⲧⲣⲟⲉⲓⲥ ⲉⲡⲓⲥⲣⲁⲏⲗ ϫⲉⲧⲁⲩⲟ ⲛⲟⲩⲡⲁⲣⲁⲃⲟⲗⲏ ϩⲙⲡⲣⲱⲙⲉ ϫⲉⲉⲧⲉⲧⲛⲛⲁⲧⲁϫⲣⲟ ⲛⲁϣ ⲛϩⲉ ⲛⲧϩⲟⲧⲉ ⲙⲡⲉⲭⲣⲓⲥⲧⲟⲥ

4 ⲁⲩⲱ ϩⲙⲡⲟⲩⲟⲉⲓⲛ ⲙⲡⲛⲟⲩⲧⲉ ⲉⲧⲣⲉⲡⲣⲏ ϣⲁⲙⲡⲛⲁⲩ ⲛϩⲧⲟⲟⲩⲉ ⲁⲩⲱ ⲛⲧϩⲉ ⲛⲟⲩϯⲟⲩⲱ ⲉϩⲣⲁⲓ ϩⲙⲡⲕⲁϩ ⲉⲃⲟⲗ ϩⲙⲡϩⲟⲩⲙⲡⲏ

5 ⲡⲁⲓ ⲅⲁⲣ ⲁⲛ ⲡⲉ ⲡⲁⲏⲓ ⲙⲛⲡⲛⲟⲩⲧⲉ ⲉⲧⲧⲁϫⲣⲏⲩ ⲟⲩⲇⲓⲁⲑⲏⲕⲏ ⲛϣⲁ ⲉⲛⲉϩ ⲁϥⲥⲙⲛⲧⲥ ⲛⲁⲓ ⲉⲥⲥⲃⲧⲱⲧ ⲉⲁϥϩⲁⲣⲉϩ ⲉⲣⲟⲥ ⲛⲟⲩⲟⲉⲓϣ ⲛⲓⲙ ϫⲉⲡⲁⲟⲩϫⲁⲓ ⲧⲏⲣϥ ⲁⲩⲱ ⲡⲁϣⲁϫⲉ ⲧⲏⲣϥ ⲉϥϣⲟⲟⲡ ϩⲙⲡϫⲟⲉⲓⲥ ϫⲉⲡⲡⲁⲣⲁⲛⲟⲙⲟⲥ ⲛⲁϯⲟⲩⲱ ⲁⲛ ⲉϩⲣⲁⲓ

6 ϫⲉⲛⲧⲟⲟⲩ ⲧⲏⲣⲟⲩ ⲉⲩⲟ ⲛⲧϩⲉ ⲛⲟⲩϣⲟⲛⲧⲉ ⲉⲥⲛⲏϫ ⲉⲃⲟⲗ ϫⲉⲉⲩⲛⲁϭⲟⲡⲟⲩ ⲁⲛ ⲛϭⲓϫ

7 ⲁⲩⲱ ⲡⲣⲱⲙⲉ ⲉϥⲛⲁϣⲉⲡϩⲓⲥⲉ ⲛϩⲏⲧⲟⲩ ⲁⲩⲱ ⲡⲡⲉⲛⲓⲡⲉ ⲧⲏⲣϥ ⲁⲩⲱ ⲡϣⲉ ⲛⲟⲩⲗⲟⲅⲭⲏ ϥⲛⲁⲣⲟⲕϩⲟⲩ ϩⲛⲟⲩⲥⲁⲧⲉ ⲁⲩⲱ ⲥⲉⲛⲁⲕⲱ ⲉϩⲣⲁⲓ ⲛⲛⲉⲩϣⲓⲡⲉ

8 ⲛⲁⲓ ⲛⲉ ⲛⲣⲁⲛ ⲛⲛⲉⲇⲩⲛⲁⲧⲟⲥ ⲛⲇⲁⲩⲉⲓⲇ ⲓⲉⲃⲟⲩⲥⲑⲉ ⲡⲉⲭⲁⲛⲁⲛⲁⲓⲟⲥ ⲛⲧⲟϥ ⲡⲉⲧⲟ ⲛⲁⲣⲭⲱⲛ ⲉϫⲙⲡϣⲟⲙⲛⲧ ⲛⲟⲩⲱⲛ ⲁⲩⲱ ⲁⲇⲓⲛⲱⲛ ⲡⲁⲍⲱⲛⲁⲓⲟⲥ ⲡⲁⲓ ⲅⲁⲣ ⲁϥⲧⲱⲕⲙ ⲛⲧⲉϥⲥⲏϥⲉ ⲉϫⲙⲡϣⲟⲙⲛⲧ ⲛϣⲉ ⲛⲣⲱⲙⲉ ⲁϥⲣⲁϩⲧⲟⲩ ⲛⲟⲩⲥⲟⲡ ⲛⲟⲩⲱⲧ

9 ⲁⲩⲱ ⲙⲛⲛⲥⲱϥ ⲉⲗⲉⲁⲛⲁⲛ ⲡϣⲏⲛ ⲡⲥⲟⲛ ⲙⲡⲉϥⲉⲓⲱⲧ ⲡϣⲏⲣⲉ ⲛⲥⲱⲥⲓ ⲡⲉⲧϩⲙⲡϣⲟⲙⲛⲧ ⲛⲇⲩⲛⲁⲧⲟⲥ ⲛⲇⲁⲩⲉⲓⲇ ϩⲙⲡⲧⲣⲉϥⲛⲟϭⲛⲉϭ ⲛⲛⲁⲗⲗⲟⲫⲩⲗⲟⲥ ϩⲛϩⲣⲉⲥⲥⲁ ⲡⲙⲁ ⲛⲧⲁⲩⲥⲱⲟⲩϩ ⲉⲣⲟϥ ⲉⲡⲡⲟⲗⲉⲙⲟⲥ ⲁⲩⲱ ⲁϥⲱϣ ⲉⲃⲟⲗ ⲛϭⲓⲡⲣⲱⲙⲉ ⲙⲡⲓⲥⲣⲁⲏⲗ

10 ⲛⲧⲟϥ ⲡⲉ ⲛⲧⲁϥⲧⲱⲟⲩⲛ ⲁⲩⲱ ⲁϥⲡⲁⲧⲁⲥⲥⲉⲓ ⲛⲛⲁⲗⲗⲟⲫⲩⲗⲟⲥ ϣⲁⲛⲧⲉⲧⲉϥϭⲓϫ ϩⲓⲥⲉ ⲉϥϩⲓⲟⲩⲉ ⲛⲧⲉⲧⲉϥϭⲓϫ ⲧⲱϭⲉ ⲉϩⲟⲩⲛ ⲉⲧⲧⲱⲣⲉ ⲛⲧⲥⲏϥⲉ ⲁⲩⲱ ⲡϫⲟⲉⲓⲥ ⲁϥⲉⲓⲣⲉ ⲛⲟⲩⲛⲟϭ ⲛⲟⲩϫⲁⲓ ⲙⲡⲉϩⲟⲟⲩ ⲉⲧⲙⲙⲁⲩ ⲡⲗⲁⲟⲥ ⲇⲉ ⲛⲉϥϩⲓ ⲡⲁϩⲟⲩ ⲙⲙⲟϥ ⲉϣⲱⲗ

11 ⲙⲛⲛⲥⲱϥ ⲥⲁⲙⲁⲁ ⲡϣⲏⲣⲉ ⲛⲁⲍⲁ ⲡⲁⲣⲟⲩⲅⲁⲓⲟⲥ ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲥⲱⲟⲩϩ ⲉϩⲟⲩⲛ ⲉϫⲙⲡⲙⲁ ⲛϭⲱⲣϫ ⲛⲉⲥⲙⲙⲁⲩ ⲇⲉ ⲛϭⲓⲟⲩⲙⲉⲣⲓⲥ ⲛⲧⲉⲧⲥⲱϣⲉ ⲉⲥⲙⲉϩ ⲛⲁⲣϣⲓⲛ ⲁⲩⲱ ⲡⲗⲁⲟⲥ ⲁϥⲡⲱⲧ ϩⲁⲡϩⲟ ⲛⲛⲁⲗⲗⲟⲫⲩⲗⲟⲥ

12 ⲁⲩⲱ ⲁϥⲁϩⲉⲣⲁⲧϥ ϩⲛⲧⲙⲏⲧⲉ ⲛⲧⲙⲉⲣⲓⲥ ⲁϥⲧⲟⲩϫⲟⲥ ⲁⲩⲱ ⲁϥⲡⲁⲧⲁⲥⲥⲉⲓ ⲛⲛⲁⲗⲗⲟⲫⲩⲗⲟⲥ ⲁⲡϫⲟⲉⲓⲥ ⲉⲓⲣⲉ ⲛⲟⲩⲛⲟϭ ⲛⲟⲩϫⲁⲓ

13 ⲁⲩⲱ ⲁⲩⲉⲓ ⲉϩⲣⲁⲓ ⲛϭⲓϣⲟⲙⲛⲧ ⲉⲃⲟⲗ ϩⲛⲧϣⲟⲙⲧⲉ ⲛⲁⲣⲭⲏ ⲏ ⲉⲃⲟⲗ ϩⲙⲡϣⲟⲙⲛⲧ ⲛⲉⲙⲗⲁϩ ⲁⲩⲉⲓ ⲉϩⲣⲁⲓ ⲉⲅⲁⲍⲱⲗ ⲉⲣⲱϥ ⲛⲇⲁⲩⲉⲓⲇ ⲉⲡⲉⲙϩⲁⲁⲩ ⲛⲟⲇⲟⲗⲁⲙ ⲙⲛⲟⲩⲧⲁⲅⲙⲁ ⲛⲧⲉⲛⲁⲗⲗⲟⲫⲩⲗⲟⲥ ⲁⲩⲧⲁⲁⲩ ⲉϩⲣⲁⲓ ⲉⲡⲉⲓⲁ ⲛⲛⲉϩⲣⲁⲫⲁⲉⲓⲛ

14 ⲇⲁⲩⲉⲓⲇ ⲇⲉ ⲛⲉϥϣⲟⲟⲡ ϩⲛⲧⲡⲉⲣⲓⲟⲭⲏ ⲁⲩⲱ ⲡⲙⲏⲏϣⲉ ⲛⲧⲉⲛⲁⲗⲗⲟⲫⲩⲗⲟⲥ ⲛⲉϥϣⲟⲟⲡ ϩⲛⲃⲏⲑⲗⲉⲉⲙ

15 ⲇⲁⲩⲉⲓⲇ ⲇⲉ ⲁϥϣⲱⲡⲉ ϩⲛⲟⲩⲉⲡⲓⲑⲩⲙⲓⲁ ⲡⲉϫⲁϥ ϫⲉⲛⲓⲙ ⲡⲉⲧⲛⲁⲧⲥⲟⲓ ⲙⲙⲟⲟⲩ ⲉⲃⲟⲗ ϩⲙⲡϣⲏⲓ ⲉⲧϩⲛⲃⲏⲑⲗⲉⲉⲙ ⲡⲉⲧϩⲛⲧⲡⲩⲗⲏ ⲡⲙⲏⲏϣⲉ ⲇⲉ ⲛⲛⲁⲗⲗⲟⲫⲩⲗⲟⲥ ⲛⲉϥϩⲛⲃⲏⲑⲗⲉⲉⲙ

16 ⲁⲩⲱ ⲡϣⲟⲙⲛⲧ ⲛⲇⲩⲛⲁⲧⲟⲥ ⲁⲩⲛⲉϩⲛⲟⲩϩⲉ ⲉⲃⲟⲗ ⲁⲩϫⲱⲧⲉ ⲉϩⲟⲩⲛ ⲉⲧⲡⲁⲣⲉⲙⲃⲟⲗⲏ ⲛⲛⲁⲗⲗⲟⲫⲩⲗⲟⲥ ⲁⲩⲙⲉϩⲙⲟⲟⲩ ⲉⲃⲟⲗ ϩⲙⲡϣⲏⲓ ⲛⲃⲏⲑⲗⲉⲉⲙ ⲡⲉⲧϩⲛⲧⲡⲩⲗⲏ ⲁⲩⲱ ⲁⲩϫⲓ ⲙⲡϩⲟⲟⲩ ⲁⲩⲉⲓ ⲉⲣⲁⲧϥ ⲛⲇⲁⲩⲉⲓⲇ ⲙⲡⲉϥⲟⲩⲱϣ ⲉⲥⲟⲟϥ ⲁⲗⲗⲁ ⲁϥⲟⲩⲟⲧⲛⲉϥ ⲉⲃⲟⲗ ϩⲓⲧϩⲏ ⲙⲡϫⲟⲉⲓⲥ

17 ⲉϥϫⲱ ⲙⲙⲟⲥ ϫⲉⲧⲟⲩϫⲟⲉⲓ ⲡϫⲟⲉⲓⲥ ⲛⲛⲉⲥϣⲱⲡⲉ ⲙⲙⲟⲓ ⲉⲧⲣⲁⲣⲡⲁⲓ ⲉⲛⲉⲓⲉⲥⲱ ⲙⲡⲉⲥⲛⲟϥ ⲛⲛⲉⲓⲣⲱⲙⲉ ⲛⲁⲓ ⲛⲧⲁⲩⲛⲟⲩϫⲉ ⲛⲛⲉⲩⲯⲩⲭⲏ ⲉⲃⲟⲗ ⲁⲩⲡⲱⲧ ⲁⲩⲱ ⲙⲡⲉϥⲣϩⲛⲁϥ ⲉⲥⲟⲟϥ ⲛⲁⲓ ⲛⲉ ⲛⲧⲁⲩⲁⲁⲩ ⲛϭⲓⲡϣⲟⲙⲛⲧ ⲛⲇⲩⲛⲁⲧⲟⲥ

18 ⲁⲩⲱ ⲁⲃⲓⲥⲁ ⲡⲥⲟⲛ ⲛⲓⲓⲱⲁⲃ ⲡϣⲏⲣⲉ ⲛⲥⲁⲣⲟⲩⲉⲓⲁⲥ ⲛⲧⲟϥ ϩⲱⲱϥ ⲛⲉϥⲟ ⲛⲁⲣⲭⲱⲛ ϩⲙⲡϣⲟⲙⲛⲧ ⲁⲩⲱ ⲛⲧⲟϥ ⲡⲉⲛⲧⲁϥⲧⲟⲩⲛⲉⲥⲧⲉϥⲗⲟⲅⲭⲏ ⲉϫⲙⲡϣⲟⲙⲛⲧ ⲛϣⲉ ⲛⲣⲱⲙⲉ ⲁϥⲣⲁϩⲧⲟⲩ ⲁⲩⲱ ⲛⲉⲣⲉⲡⲉϥⲣⲁⲛ ϣⲟⲟⲡ ϩⲙⲡϣⲟⲙⲛⲧ

19 ⲉϥⲱⲉⲓ ⲉⲃⲟⲗ ϩⲙⲡϣⲟⲙⲛⲧ ⲉⲧⲙⲙⲁⲩ ⲁⲩⲱ ⲁϥϣⲱⲡⲉ ⲛⲁⲩ ⲛⲁⲣⲭⲱⲛ ⲙⲡⲉϥⲓ ⲉⲣⲁⲧⲟⲩ ⲙⲡⲉⲓϣⲟⲙⲛⲧ

20 ⲁⲩⲱ ⲃⲁⲛⲉⲁⲥ ⲡϣⲏⲣⲉ ⲛⲓⲱⲇⲁⲉ ⲉⲩⲣⲱⲙⲉ ⲡⲉ ⲛϫⲱⲱⲣⲉ ⲛⲧⲟϥ ⲉϥⲟϣ ⲛϩⲱⲃ ⲉϥⲱⲉⲓ ⲉⲃⲟⲗ ϩⲙⲡϣⲟⲙⲛⲧ ⲉⲃⲟⲗ ϩⲛⲅⲁⲃⲉⲥⲉⲏⲗ ⲁⲩⲱ ⲛⲧⲟϥ ⲡⲉⲛⲧⲁϥⲡⲁⲧⲁⲥⲥⲉⲓ ⲙⲡϣⲏⲣⲉ ⲥⲛⲁⲩ ⲛⲁⲣⲓⲏⲗ ⲡⲉ ⲉⲃⲟⲗ ϩⲙⲙⲱⲁⲃ ⲁⲩⲱ ⲛⲧⲟϥ ⲡⲉⲛⲧⲁϥⲃⲱⲕ ⲉϩⲣⲁⲓ ⲁϥⲡⲁⲧⲁⲥⲥⲉⲓ ⲙⲡⲙⲟⲩⲓ ϩⲛⲧⲙⲏⲧⲉ ⲙⲡϣⲏⲓ ⲙⲡⲉϩⲟⲟⲩ ⲙⲡⲉⲭⲓⲙⲱⲛ

21 ⲁⲩⲱ ⲛⲧⲟϥ ⲡⲉⲛⲧⲁϥⲡⲁⲧⲁⲥⲥⲉⲓ ⲙⲡⲣⲙⲛⲕⲏⲙⲉ ⲟⲩⲣⲱⲙⲉ ⲉϥⲟ ⲛϣⲡⲏⲣⲉ ⲉⲛⲁⲩ ⲉⲣⲟϥ ⲉⲣⲉⲟⲩⲙⲉⲣⲉϩ ⲇⲉ ϩⲛⲧϭⲓϫ ⲙⲡⲣⲙⲛⲕⲏⲙⲉ ⲉϥⲟ ⲛⲧϩⲉ ⲛⲟⲩϣⲉ ⲛϩⲱⲧ ⲛⲇⲓⲁⲃⲁⲑⲣⲁ ⲁⲩⲱ ⲃⲁⲛⲉⲁⲥ ⲁϥⲉⲓ ⲉⲃⲟⲗ ⲉⲣⲟϥ ϩⲙⲡⲙⲉⲣⲉϩ ⲉⲧⲉⲛⲧⲟⲟⲧϥ ⲁⲩⲱ ⲁϥϩⲁⲣⲡⲁⲍⲉ ⲙⲡⲙⲉⲣⲉϩ ⲉⲃⲟⲗ ϩⲛⲧϭⲓϫ ⲙⲡⲣⲙⲛⲕⲏⲙⲉ ⲁϥⲙⲟⲩⲟⲩⲧ ⲙⲙⲟϥ ϩⲙⲡⲉϥⲙⲉⲣⲉϩ

22 ⲛⲁⲓ ⲛⲉ ⲛⲧⲁϥⲁⲁⲩ ⲛϭⲓⲃⲁⲛⲉⲁⲥ ⲡϣⲏⲣⲉ ⲛⲓⲱⲇⲁⲉ ⲛⲧⲟϥ ϩⲱⲱϥ ⲉⲣⲉⲡⲉϥⲣⲁⲛ ϣⲟⲟⲡ ϩⲙⲡϣⲟⲙⲛⲧ ⲛⲛⲟϭ ⲛⲇⲩⲛⲁⲧⲟⲥ

23 ⲉⲃⲱⲉⲓ ⲉⲃⲟⲗ ϩⲙⲡϣⲟⲙⲛⲧ ⲁⲩⲱ ⲙⲡⲉϥⲓ ⲉⲣⲁⲧⲟⲩ ⲙⲡϣⲟⲙⲛⲧ ⲁⲩⲱ ⲇⲁⲩⲉⲓⲇ ⲁϥⲕⲁⲁϥ ⲉϥⲧⲏϭ ⲉⲣⲟϥ ⲁⲩⲱ ⲛⲁⲓ ⲛⲉ ⲛⲣⲁⲛ ⲛⲛⲇⲩⲛⲁⲧⲟⲥ ⲙⲡⲣⲣⲟ ⲇⲁⲩⲉⲓⲇ

24 ⲁⲍⲁⲏⲗ ⲡⲥⲟⲛ ⲛⲓⲱⲁⲃ ⲡⲁⲓ ⲛⲉϥⲏⲡ ϩⲙⲡⲉϥⲧⲟⲟⲩ ⲉⲗⲉⲁⲛⲁⲛ ⲡϣⲏⲣⲉ ⲛⲇⲟⲩⲇⲓ ⲡⲥⲟⲛ ⲙⲡⲉϥⲉⲓⲱⲧ ϩⲛⲃⲏⲑⲗⲉⲉⲙ

25 ⲥⲏⲙⲁ ⲡⲁⲣⲟⲩⲕⲁⲓⲟⲥ

26 ⲥⲉⲗⲗⲏⲙ ⲡⲕⲉⲣⲱⲑⲉⲓ ⲉⲓⲣⲁⲥ ⲡϣⲏⲣⲉ ⲛⲉⲥⲅⲉⲑ ⲡⲉⲑⲉⲅⲱⲛⲓⲧⲏⲥ

27 ⲁⲃⲓⲉⲍⲉⲣ ⲡⲁⲛⲟⲓⲧⲏⲥ ⲉⲃⲟⲗ ϩⲛⲛⲉϣⲏⲣⲉ ⲙⲡⲁⲥⲱⲑⲓⲧⲏⲥ

28 ⲉⲗⲗⲱⲛ ⲡⲁⲓⲱⲧⲏⲥ ⲛⲱⲉⲣⲉ ⲡⲉⲛⲧⲟⲫⲁⲛⲓⲧⲏⲥ

29 ⲉⲧϩⲉ ⲡϣⲏⲣⲉ ⲛϩⲣⲓⲃⲁ ⲉⲃⲟⲗ ϩⲛⲅⲁⲃⲁⲉⲑ ⲡϣⲏⲣⲉ ⲛⲃⲉⲛⲓⲁⲙⲓⲙ

30 ⲡⲉⲫⲣⲁⲑⲉⲟⲥ

31 ⲁⲥⲙⲱⲑ ⲡⲥⲁⲣⲁⲁⲃⲓⲧⲏⲥ

32 ⲉⲙⲁⲥⲟⲩ ⲡⲥⲁⲗⲁⲃⲟⲩⲛⲓⲧⲏⲥ ⲛϣⲏⲣⲉ ⲛⲁⲥⲱⲛ ⲓⲱⲛⲁⲑⲁⲛ

33 ⲥⲁⲙⲛⲁⲛ ⲡⲁⲣⲱⲇⲓⲧⲏⲥ ϩⲁⲙⲛⲁⲛ ⲡϣⲏⲣⲉ ⲛⲥⲁⲣⲉ ⲡⲁⲣⲁⲑⲩⲣⲓⲧⲏⲥ

34 ⲉⲣⲓⲫⲁⲉⲉⲑ ⲡϣⲏⲣⲉ ⲛⲁⲥⲃⲓⲧⲏⲥ ⲡϣⲏⲣⲉ ⲙⲙⲁⲁⲭⲁⲁⲭⲓ ⲉⲗⲓⲁⲃ ⲡϣⲏⲣⲉ ⲛⲁⲭⲓⲇⲟⲫⲉⲗ ⲡⲕⲉⲗⲱⲛⲓⲧⲏⲥ

35 ⲁⲍⲁⲣⲉ ⲡⲕⲁⲣⲙⲏⲗⲓⲟⲥ ⲡϣⲏⲣⲉ ⲛⲟⲩⲣⲉ ⲉⲧⲉⲉⲣⲭⲣⲓ ⲡⲉ

36 ⲅⲁⲗⲁⲁⲇ ⲡϣⲏⲣⲉ ⲛⲁⲑⲁⲛ ⲉⲩϣⲏⲣⲉ ⲡⲉ ⲛⲇⲩⲛⲁⲧⲟⲥ ⲡϣⲏⲣⲉ ⲛⲅⲁⲗⲁⲁⲇⲇⲓ

37 ⲉⲗⲓⲉ ⲡϩⲁⲙⲁⲛⲓⲧⲏⲥ ⲅⲉⲗⲱⲣⲓ ⲡⲕⲉⲣⲱⲑⲉⲟⲥ ⲉϥϥⲓ ⲛⲛⲉⲥⲕⲉⲩⲏ ⲛⲓⲱⲁⲃ ⲡϣⲏⲣⲉ ⲛⲥⲁⲣⲟⲩⲉⲓⲁⲥ

38 ⲡⲓⲉⲑⲓⲣⲉⲟⲥ ⲅⲁⲣⲏⲃ ⲡⲓⲉⲑⲓⲛⲉⲟⲥ

39 ⲟⲩⲣⲓⲁⲥ ⲡⲉⲭⲉⲇⲇⲁⲓⲟⲥ ⲛⲁⲓ ⲇⲉ ⲧⲏⲣⲟⲩ ⲉⲩⲛⲁⲣⲙⲁⲁⲃ ⲥⲁϣϥ ⲉⲁⲇⲁ ⲡⲉ ⲉⲃⲟⲗ ϩⲛⲭⲓⲙⲁⲣⲣⲟⲛ ⲅⲁⲃⲓⲏⲗ ⲡϣⲏⲣⲉ ⲙⲡⲁⲣⲁⲃⲟⲑⲉⲟⲥ