2 Maccabees 7 — Coptic (Sahidic)

1 ⲁⲥϣⲱⲡⲉ ⲛⲕⲉⲥⲟϣϥ ⲛⲥⲟⲛ ⲙⲛⲧⲉⲩⲙⲁⲁⲩ ⲉⲩϯϩⲧⲟⲣ ⲉⲣⲟⲟⲩ ϩⲓⲧⲙⲡⲣⲟ ⲉⲩⲟⲩⲱⲙ ⲉⲃⲟⲗ ϩⲛⲧⲉⲑⲩⲥⲓⲁ ⲉⲧϫⲁϩⲙ ⲉⲩϩⲓⲟⲩⲉ ⲉⲣⲟⲟⲩ ϩⲛϩⲉⲛⲙⲁⲥⲧⲓⲅⲝ ⲙⲛϩⲉⲛⲕⲱⲃϩ

2 ϩⲁⲟⲩⲁ ⲇⲉ ⲛϩⲏⲧⲟⲩ ⲛϣⲟⲣⲡ ⲛϣⲁϫⲉ ⲉϥϫⲱ ⲙⲙⲟⲥ ϫⲉⲉⲕϣⲓⲛⲉ ⲙⲙⲟⲛ ⲉⲟⲩⲛⲉ ⲕⲛⲁⲥⲉⲧⲙⲟⲩ ⲛⲧⲟⲧⲛ ⲧⲛⲥⲃⲧⲱⲧ ⲅⲁⲣ ⲉⲙⲟⲩ ⲉϩⲟⲩⲉⲡⲁⲣⲁⲃⲁ ⲛⲛⲟⲙⲟⲥ ⲛⲛⲉⲛⲉⲓⲟⲧⲉ

3 ⲁϥϭⲱⲛⲧ ⲛϭⲓⲡⲣⲣⲟ ⲁϥⲟⲩⲉϩⲥⲁϩⲛⲉ ⲉⲥⲁϩⲧⲉ ϩⲁϩⲉⲛⲗⲁⲕⲛⲧ ⲙⲛϩⲉⲛⲭⲁⲗⲕⲓⲟⲛ

4 ⲛⲧⲁⲣⲟⲩϫⲉⲣⲟ ⲇⲉ ⲁϥϫⲟⲟϥ ⲉϣⲱⲱⲧ ⲙⲡⲗⲉⲥ ⲙⲡⲉⲛⲧⲁϥϣⲁϫⲉ ⲛϣⲟⲣⲡ ⲛⲥⲉⲕⲉⲕⲡⲉϥϣⲁⲁⲣ ⲛⲥⲛⲛⲉϥⲕⲉⲉⲥ ⲉⲃⲟⲗ ⲉⲩϭⲱϣⲧ ⲛⲥⲱϥ ⲛϭⲓⲛⲉϥⲥⲛⲏⲩ ⲙⲛⲧⲉϥⲙⲁⲁⲩ ⲛⲧⲁⲣⲉϥⲧⲁⲕⲟ ⲇⲉ ⲉⲡⲧⲏⲣϥ

5 ⲉⲧⲓ ⲉϥⲛⲓϥⲉ ⲁϥⲟⲩⲉϩⲥⲁϩⲛⲉ ⲉⲧⲁⲗⲟϥ ⲉϩⲣⲁⲓ ⲉϥ ⲛⲗⲁⲕⲛⲧ ⲛⲧⲁⲣⲉⲡⲕⲁⲡⲛⲟⲥ ⲇⲉ ⲛⲧⲗⲁⲕⲛⲧ ⲉⲓ ⲉϩⲣⲁⲓ ⲉⲡⲉϩⲟⲩⲟ ⲁⲩⲥⲟⲡⲥⲡ ⲛⲛⲉⲩⲉⲣⲏⲩ ⲙⲛⲧⲉⲩⲙⲁⲁⲩ ⲉⲩϫⲱ ⲙⲙⲟⲥ

6 ϫⲉⲙⲁⲣⲉⲛⲙⲟⲩ ϩⲱⲱⲛ ϩⲛⲟⲩⲙⲛⲧϫⲱⲱⲣⲉ ⲡϫⲟⲉⲓⲥ ⲅⲁⲣ ⲡⲛⲟⲩⲧⲉ ⲙⲓϣⲉ ⲉϫⲱⲛ ⲕⲁⲧⲁⲧϩⲉ ⲉⲛⲧⲁϥϫⲟⲟⲥ ⲛϭⲓⲙⲱⲟⲩⲥⲏⲥ ϩⲛⲧⲉϥⲱⲇⲏ ⲉⲧⲣⲙⲛⲧⲣⲉ ϫⲉⲥⲉⲛⲁⲥⲉⲡⲥⲱⲡ ⲉϫⲛⲛⲉϥϩⲙϩⲁⲗ

7 ⲛⲧⲁⲡϣⲟⲣⲡ ⲇⲉ ⲙⲟⲩ ϩⲛⲡⲉⲓⲥⲙⲟⲧ ⲡⲙⲉϩⲥⲛⲁⲩ ⲟⲛ ⲁⲩⲛⲧϥ ⲉⲩⲥⲱⲃⲉ ⲛⲥⲱϥ ⲁⲩⲕⲉⲕⲡϣⲁⲁⲣ ⲛⲧⲉϥⲁⲡⲉ ⲙⲛⲛⲉϥϥⲱⲉ ⲁⲩϫⲛⲟⲩϥ ϫⲉⲕⲛⲁⲟⲩⲱⲙ ⲉⲙⲡⲁⲧⲧⲟⲩⲧⲓⲙⲱⲣⲓⲁ ⲙⲡⲉⲕⲥⲱⲙⲁ ⲕⲁⲧⲁⲙⲉⲗⲟⲥ

8 ⲛⲧⲟϥ ⲇⲉ ⲁϥⲟⲩⲱϣⲃ ϩⲛⲧⲉⲥⲡⲉ ⲛⲛⲉϥⲉⲓⲟⲧⲉ ⲉϥϫⲱ ⲙⲙⲟⲥ ϫⲉⲛⲧϩⲉ ⲛⲧⲁⲡϣⲟⲣⲡ ϥⲓ ϩⲁⲧⲃⲁⲥⲁⲛⲟⲥ ⲁⲛⲟⲕ ϩⲱⲱⲧ ⲟⲛ ⲛⲧⲉⲓϩⲉ

9 ⲛⲧⲁⲣⲉϥⲛⲟⲩ ⲇⲉ ⲉϯⲡⲉⲡⲛⲁ ⲡⲉϫⲁϥ ϫⲉⲛⲧⲟⲕ ⲙⲉⲛ ⲡⲣⲉϥⲣⲃⲱⲛ ⲉⲕⲛⲁⲣⲃⲟⲗ ϩⲛⲡⲁⲓⲱⲛϩ ⲡⲣⲣⲟ ⲇⲉ ⲙⲡⲕⲟⲥⲙⲟⲥ ⲉⲁⲛⲙⲟⲩ ϩⲁⲛⲉϥⲛⲟⲙⲟⲥ ϥⲛⲁⲧⲟⲩⲛⲟⲥⲛ ⲉⲩⲱⲛϩ ϣⲁⲉⲛⲉϩ

10 ⲙⲛⲛⲥⲁⲡⲁⲓ ⲁⲩⲉⲓⲛⲉⲡⲙⲉϩϣⲟⲙⲧ ⲁⲩⲁⲓⲧⲉⲓ ⲙⲡⲉϥⲗⲉⲥ ⲛⲧⲉⲩⲛⲟⲩ ⲁϥⲧⲁⲩⲁϥ ⲉⲃⲟⲗ ⲁϥϥⲓ ⲛⲛⲉϥϭⲓϫ ⲉϩⲣⲁⲓ

11 ⲉϥⲧⲏⲕ ⲛϩⲏⲧ ⲉϥϫⲱ ⲙⲙⲟⲥ ϩⲛⲟⲩⲙⲛⲧϫⲱⲱⲣⲉ ⲛⲧⲁⲩϯⲛⲁⲓ ⲛⲏⲓ ⲉⲃⲟⲗ ϩⲛⲧⲡⲉ ⲁⲩⲱ ⲉⲉⲓⲛⲉ ⲉⲣⲟⲟⲩ ⲉⲧϥⲉ ⲛⲉϥϩⲟⲧⲉ ⲙⲛⲡⲉϥⲛⲟⲙⲟⲥ ⲉⲓⲛⲁϩⲧⲉ ϫⲉϯⲛⲁϫⲓⲧⲟⲩ ⲟⲛ ⲉⲃⲟⲗ ϩⲓⲧⲟⲟⲧϥ

12 ϩⲱⲥⲧⲉ ⲛⲥⲉⲣϣⲡⲏⲣⲉ ⲛⲧⲉⲯⲩⲭⲏ ⲙⲡϣⲏⲣⲉ ϣⲏⲙ ⲛϭⲟⲡⲣⲟ ⲙⲛⲛⲉⲧⲙⲙⲁϥ ⲛⲧϩⲉ ⲛⲧⲁϥⲟⲡϥ ⲙⲙⲟⲕϩⲥ ⲛⲧϩⲉ ⲛⲛⲓⲗⲁⲁⲩ

13 ⲛⲧⲁⲣⲉⲡⲁⲓ ⲇⲉ ⲙⲟⲩ ⲡⲙⲉϩϥⲧⲟⲟⲩ ⲟⲛ ⲛⲧⲉⲓϩⲉ ⲁⲩⲃⲁⲥⲁⲛⲓⲍⲉ ⲙⲙⲟϥ ⲉⲩϩⲓⲟⲩⲉ ⲉⲣⲟϥ

14 ⲛⲧⲁⲣⲉϥⲛⲟⲩⲉ ⲇⲉ ⲉⲙⲟⲩ ⲡⲉϫⲁϥ ⲛⲧⲉⲓϩⲉ ϫⲉⲛⲁⲛⲟⲩⲥ ⲛⲁⲛ ⲉⲙⲟⲩ ⲉⲃⲟⲗ ϩⲓⲧⲛⲛⲣⲱⲙⲉ ⲉϭⲱϣⲧ ⲉⲃⲟⲗ ϩⲏⲧⲥ ⲛⲧϩⲉⲗⲡⲓⲥ ⲙⲡⲛⲟⲩⲧⲉ ⲉⲧⲣⲉϥⲧⲟⲩⲛⲟⲥⲛ ⲛⲕⲉⲥⲟⲡ ⲛⲧⲟⲕ ⲇⲉ ⲙⲛⲁⲛⲁⲥⲧⲁⲥⲓⲥ ⲛⲱⲛϩ ϣⲟⲟⲡ ⲛⲁⲕ

15 ⲡⲙⲉϩϯⲟⲩ ⲟⲛ ⲛⲧⲁⲓϩⲉ ⲁⲩⲛⲧϥ ⲉⲩϩⲉⲧⲁⲍⲉ ⲙⲙⲟϥ ⲛⲧⲟϥ ⲇⲉ ⲁϥϭⲱϣⲧ ⲉϩⲟⲩⲛ ⲉϩⲣⲁϥ ⲡⲉϫⲁϥ ϫⲉ

16 ⲛⲧⲟⲕ ⲙⲉⲛ ⲛⲧⲕⲟⲩⲣⲱⲙⲉ ⲉϥⲛⲁⲧⲁⲕⲟ ⲁⲕϫⲓ ⲛⲧⲉⲝⲟⲩⲥⲓⲁ ⲛⲛⲣⲱⲙⲉ ⲉⲕⲉⲓⲣⲉ ⲙⲡⲉⲧⲉⲕⲟⲩⲁϣϥ ⲙⲡⲣⲣⲡⲙⲉⲉⲩⲉ ϭⲉ ϫⲉⲛⲧⲁⲡⲛⲟⲩⲧⲉ ⲕⲁⲡⲉⲛⲅⲉⲛⲟⲥ ⲛⲥⲱϥ

17 ϭⲱϣⲧ ⲇⲉ ⲛⲧϩⲉ ⲉⲧϥⲛⲁⲃⲁⲥⲁⲛⲓⲍⲉ ⲙⲙⲟⲕ ⲙⲛⲡⲉⲕⲥⲡⲉⲣⲙⲁ

18 ⲙⲛⲛⲥⲁⲡⲁⲓ ⲁⲩⲉⲓⲛⲉ ⲙⲡⲙⲉϩⲥⲟⲟⲩ ⲛⲧⲟϥ ⲇⲉ ⲛⲧⲁⲣⲉϥⲉⲓ ⲉϥⲛⲁⲙⲟⲩ ⲡⲉϫⲁϥ ϫⲉⲙⲡⲣⲣⲡⲗⲁⲛⲁ ⲉⲡϫⲓⲛϫⲏ ⲁⲛⲟⲛ ⲅⲁⲣ ⲉⲛϣⲱⲡ ⲛⲛⲁⲓ ⲉⲧⲃⲉⲛⲉⲛⲛⲟⲃⲉ ⲉⲛⲧⲁⲛⲁⲁⲩ ⲙⲡⲉⲛⲛⲟⲩⲧⲉ

19 ⲛⲧⲟⲕ ⲇⲉ ⲙⲡⲣⲣⲡⲙⲉⲉⲩⲉ ϫⲉⲕⲛⲁⲣⲃⲟⲗ ⲉⲕϯ ⲟⲩⲃⲉⲡⲛⲟⲩⲧⲉ

20 ⲟⲩϣⲡⲏⲣⲉ ⲇⲉ ⲛϩⲟⲩⲟ ⲧⲉ ⲧⲉⲩⲙⲁⲁⲩ ϩⲱⲥ ⲉⲥⲙⲡϣⲁ ⲛⲟⲩⲣⲡⲙⲉⲉⲩⲉ ⲉⲛⲁⲛⲟⲩϥ ⲧⲁⲓ ⲉⲧϭⲱϣⲧ ⲉϫⲛⲥⲁϣϥ ⲛϣⲏⲣⲉ ⲉⲩⲧⲁⲕⲟ ⲙⲙⲁϥ ϩⲛⲟⲩϩⲟⲟⲩ ⲛⲟⲩⲱⲧ ⲉⲥϥⲓ ϩⲁⲣⲟⲥ ϩⲛⲟⲩⲙⲛⲧϫⲱⲱⲣⲉ ⲉⲧⲃⲉⲧϩⲉⲗⲡⲓⲥ ⲙⲡⲛⲟⲩⲧⲉ

21 ⲉⲥⲥⲟⲡⲥⲡ ⲙⲡⲟⲩⲁ ⲡⲟⲩⲁ ⲙⲙⲟⲟⲩ ϩⲛⲧⲉⲥⲁⲥⲡⲉ ⲉⲥϫⲏⲕ ⲉⲃⲟⲗ ϩⲛⲟⲩⲙⲛⲧϫⲱⲣⲉ ⲉⲁⲥⲧⲟⲩⲛⲉⲥⲡⲉⲥⲙⲉⲉⲩⲉ ⲛⲧⲉⲥⲙⲛⲧⲥϩⲓⲙⲉ ϩⲛⲟⲩϭⲱⲛⲧ ⲙⲙⲛⲧϩⲟⲟⲩⲧ ⲉⲥϫⲱ ⲙⲙⲟⲥ ⲛⲁⲩ

22 ϫⲉⲛϯⲥⲟⲟⲩⲛ ⲁⲛ ϫⲉⲛⲧⲁⲧⲉⲧⲛⲁϣ ⲛϩⲉ ϩⲣⲁⲓ ⲛϩⲏⲧ ⲟⲩⲇⲉ ⲁⲛⲟⲕ ⲁⲛⲁϩϯ ⲛⲏⲧⲛ ⲙⲡⲱⲛϩ ⲙⲛⲡⲉⲡⲛⲉⲩⲙⲁ ⲙⲛⲡⲥⲱⲙⲁ ⲙⲡⲟⲩⲁ ⲡⲟⲩⲁ

23 ⲧⲉⲛⲟⲩ ⲧⲉ ⲡⲣⲉϥⲥⲱⲛⲧ ⲙⲡⲕⲟⲥⲙⲟⲥ ⲧⲏⲣϥ ⲁϥⲡⲗⲁⲥⲥⲉ ⲙⲡⲣⲱⲙⲉ ⲙⲛⲛⲕⲁⲁ ⲛⲓⲙ ⲁϥϯ ⲛⲏⲧⲛ ⲟⲛ ⲙⲡⲉⲡⲛⲉⲩⲙⲁ ⲙⲡⲱⲛϩ ϩⲛⲡⲉϥⲛⲁ ⲛⲧϩⲉ ⲛⲧⲁⲧⲉⲧⲛϣⲧⲏⲩⲧⲛ ⲉⲣⲱⲧⲛ ⲉⲧⲃⲉⲡⲉϥⲛⲟⲙⲟⲥ

24 ⲁⲛⲧⲓⲟⲭⲟⲥ ⲇⲉ ⲉϥϫⲱ ⲙⲙⲟⲥ ϫⲉⲥⲉⲕⲁⲧⲁⲫⲣⲟⲛⲉⲓ ⲙⲙⲟⲉⲓ ⲉϥⲛⲁⲩ ⲉⲧⲉⲥⲙⲏ ⲉⲧⲟⲩⲛⲁϭⲛⲉϭ ⲙⲙⲟϥ ⲉⲧⲓ ⲉⲣⲉⲡⲕⲟⲩⲓ ⲛϩⲏⲧⲟⲩ ϣⲟⲟⲡ ⲁϥⲥⲡⲥⲱⲡ ⲟⲩ ⲙⲟⲛⲟⲛ ϩⲙⲡϣⲁϫⲉ ⲁⲗⲗⲁ ϩⲛϩⲉⲛⲁⲛⲁϣ ⲉϥⲡⲉⲓⲑⲉ ⲙⲙⲟϥ ϫⲉϯⲛⲁⲁⲁⲕ ⲣⲣⲙⲙⲁⲟ ⲁⲩⲱ ⲙⲙⲁⲕⲁⲣⲓⲟⲥ ⲉⲕϣⲁⲛⲡⲱⲱⲛⲉ ⲉⲃⲟⲗ ϩⲛⲛⲛⲟⲙⲟⲥ ⲛⲛⲉⲕⲉⲓⲟⲧⲉ ⲧⲁⲁⲕ ⲛⲁⲓ ⲛϣⲃⲏⲣ ϯⲛⲁⲁⲁⲕ ⲛϩⲉⲛⲉⲝⲟⲩⲥⲓⲁ

25 ⲡϣⲏⲣⲉ ϣⲏⲙ ⲛⲧⲁⲣⲉϥⲧⲙϯϩⲧⲏϥ ϩⲁⲡⲣⲣⲟ ⲙⲟⲩⲧⲉ ⲉⲧⲉϥⲙⲁⲁⲩ ⲁϥⲥⲉⲡⲥⲱⲡⲥ ⲉⲡⲉⲓⲑⲉ ⲙⲡϣⲏⲣⲉ ϣⲏⲙ ⲉⲧⲣⲉϥⲟⲩϫⲁⲓ

26 ⲛⲧⲟⲥ ⲇⲉ ⲛⲧⲁⲣⲉⲥⲥⲱⲧⲙ ⲁⲥⲡⲁϩⲧⲥ ϩⲁⲣⲉⲧϥ ⲙⲡϣⲏⲣⲉ ϣⲏⲙ

27 ⲉⲥⲛⲟϭⲛⲉϭ ⲙⲡⲧⲩⲣⲁⲛⲛⲟⲥ ⲟⲩⲉϩⲓⲏⲧ ⲡⲉϫⲁⲥ ⲛⲁϥ ⲛⲧⲉⲓϩⲉ ϩⲛⲧⲉⲥⲁⲥⲡⲉ ϫⲉⲡⲁϣⲏⲣⲉ ⲛⲁⲉ ⲛⲁⲓ ⲧⲁⲓ ⲉⲛⲧⲁⲥϥⲓ ϩⲁⲣⲟⲕ ⲙⲡⲥⲓⲧ ⲛⲉⲃⲟⲧ ϩⲛⲧϩⲏ ⲁⲥⲧⲥⲉⲛⲕⲟⲕ ⲛϣⲁⲙⲧⲉ ⲛⲣⲟⲙⲡⲉ ⲁⲓⲥⲁⲛⲟⲩϣⲕ ⲁⲓⲁⲁⲕ ⲛⲧⲉⲓϭⲟⲧ

28 ϯⲥⲟⲡⲥⲉⲡ ⲙⲙⲟⲕ ⲡⲁϣⲏⲣⲉ ⲉⲧⲣⲉⲕϭⲱϣⲧ ⲉⲧⲡⲉ ⲙⲛⲡⲕⲁϩ ⲙⲛⲛⲉⲧⲛϩⲏⲧⲟⲩ ⲧⲏⲣⲟⲩ ⲉⲧⲣⲉⲕⲉⲓⲙⲉ ϫⲉⲛⲧⲁⲡⲛⲟⲩⲧⲉ ⲧⲁⲙⲓⲟⲟⲩ ⲉⲃⲟⲗ ϩⲛⲛⲉⲧⲉⲛⲥⲉϣⲟⲟⲡ ⲁⲛ ⲧⲁⲓ ⲟⲛ ⲧⲉ ⲧϩⲉ ⲙⲡⲅⲉⲛⲟⲥ ⲛⲛⲣⲱⲙⲉ

29 ⲙⲡⲣⲣϩⲟⲧⲉ ϩⲏⲧϥ ⲙⲡⲣⲉϥϩⲱⲧⲃ ⲁⲗⲗⲁ ϣⲱⲡⲉ ⲉⲕⲙⲡϣⲁ ⲛⲉⲕⲥⲛⲏⲩ ⲛⲅϣⲱⲡ ⲉⲣⲟⲕ ⲙⲡⲙⲟⲩ ϫⲉⲕⲁⲁⲥ ϩⲙⲡⲙⲁ ⲙⲡⲛⲟⲩⲧⲉ ⲉϥⲉⲧⲁⲁⲕ ⲛⲏⲓ ⲙⲛⲛⲉⲕⲥⲛⲏⲩ

30 ⲉⲙⲡⲁⲧⲉⲥⲟⲩⲱ ⲛⲛⲓϣⲁϫⲉ ⲡⲉϫⲁϥ ⲛϭⲓⲡⲏⲣⲉ ϣⲏⲙ ⲉⲧⲉⲧⲛϭⲉⲉⲧ ⲉⲛⲓⲙ ⲛⲧⲁⲥⲱⲧⲙ ⲁⲛ ⲛⲥⲁⲡⲟⲩⲁϩⲥⲁϩⲛⲉ ⲙⲡⲣⲣⲟ ⲡⲟⲩⲉϩⲥⲁϩⲛⲉ ⲇⲉ ⲛⲧⲟϥ ⲙⲡⲛⲟⲙⲟⲥ ⲙⲙⲱⲟⲩⲥⲏⲥ ⲉⲛⲧⲁϥⲁⲁϥ ⲛⲛⲉⲛⲉⲓⲁⲧⲉ ϯⲛⲁⲥⲱⲧⲙ ⲛⲥⲱϥ

31 ⲛⲧⲟⲕ ⲇⲉ ⲉⲕⲙⲉⲉⲩⲉ ⲉⲡⲉⲧϩⲟⲟⲩ ⲛⲓⲙ ⲉϩⲟⲩⲛ ⲉⲛϩⲉⲃⲣⲁⲓⲟⲥ ⲛⲉⲕⲣⲃⲟⲗ ⲉⲧϭⲓϫ ⲙⲡⲛⲟⲩⲧⲉ ⲁⲛ

32 ⲁⲛⲟⲛ ⲅⲁⲣ ⲛⲧⲁⲛϣⲡⲛⲁⲓ ⲉⲧⲃⲉⲛⲉⲛⲛⲟⲃⲉ ⲉϥϫⲡⲓⲟ ⲙⲙⲟⲛ ⲛϭⲓⲡⲉⲛϫⲟⲉⲓⲥ ⲡⲉⲧⲟⲛϩ

33 ⲉⲙⲡⲁⲧⲉⲕⲣⲃⲟⲗ ⲉⲧⲕⲣⲓⲥⲓⲥ ⲙⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ

34 ⲛⲧⲟⲕ ⲇⲉ ⲡⲉⲧϫⲁϩⲙ ⲉⲧⲟ ⲛⲃⲁⲧⲉ ⲛⲛⲣⲱⲙⲉ ⲛⲓⲙ ⲙⲡⲣϫⲓⲥⲉ ⲛϩⲏⲧ ⲉⲡϫⲓⲛϫⲏ ⲉϫⲛϩⲛϩⲉⲗⲡⲓⲥ ⲉⲩϣⲟⲩⲉⲓⲧ ⲉⲁⲕⲧⲟⲕ ⲉϩⲣⲁⲓ ⲉϫⲛⲛϣⲏⲣⲉ ⲛⲧⲡⲉ

36 ⲛⲁⲥⲛⲏⲩ ⲅⲁⲣ ⲧⲉⲛⲟⲩ ⲉⲁⲩϥⲓ ϩⲁⲟⲩⲕⲟⲩⲓ ⲛϩⲓⲥⲉ ⲁⲩϣⲱⲡⲉ ϩⲛⲇⲓⲁⲑⲏⲕⲏ ⲙⲡⲛⲟⲩⲧⲉ ⲛⲧⲟⲕ ⲇⲉ ϩⲣⲁⲓ ϩⲛⲧⲉϥⲕⲣⲓⲥⲓⲥ ⲕⲛⲁϫⲓ ⲛⲟⲩⲕⲟⲗⲁⲥⲓⲥ ⲉⲥⲙⲡϣⲁ ⲛⲧⲉⲕⲙⲛⲧϫⲁⲥⲓϩⲏⲧ

37 ⲁⲛⲟⲕ ⲇⲉ ⲟⲛ ⲛⲧϩⲉ ⲛⲛⲁⲕⲉⲥⲛⲏⲩ ϯⲛⲁϯ ⲙⲡⲁⲥⲱⲙⲁ ⲙⲛⲧⲁⲯⲩⲭⲏ ⲛⲛⲁⲛⲟⲙⲟⲥ ⲛⲛⲁⲉⲓⲁⲧⲉ ⲉⲉⲓⲉⲡⲓⲕⲁⲗⲉⲓ ⲙⲡⲛⲟⲩⲧⲉ ⲉⲕⲱⲉ ⲉⲃⲟⲗ ⲙⲡⲉⲛⲅⲉⲛⲟⲥ ϩⲛⲟⲩϭⲉⲡⲏ ⲛⲧⲟⲕ ⲇⲉ ϩⲛϩⲉⲛⲥⲏϣⲉ ⲙⲛϩⲉⲛⲙⲁⲥⲧⲓⲅⲝ ⲉⲧⲣⲉⲕϩⲟⲙⲟⲗⲟⲅⲉⲓ ϫⲉⲛⲧⲟϥ ⲡⲉ ⲡⲛⲟⲩⲧⲉ ⲟⲩⲁⲁϥ

38 ⲛⲥⲉϭⲱ ⲉϩⲣⲁⲓ ⲉϫⲱⲓ ⲙⲛⲛⲁⲥⲛⲏⲩ ⲛϭⲓⲧⲟⲣⲅⲏ ⲙⲡⲡⲁⲛⲧⲟⲕⲣⲁⲧⲱⲣ ⲧⲉⲛⲧⲁϥⲛⲧⲥ ⲉϩⲣⲁⲓ ⲉϫⲛⲡⲉⲛⲅⲉⲛⲟⲥ ⲧⲏⲣϥ ϩⲛⲟⲩⲙⲡϣⲁ

39 ⲁϥϭⲱⲛⲧ ⲇⲉ ⲉⲡⲁⲓ ⲛϩⲟⲩⲟ ⲛϭⲓⲡⲣⲣⲟ ⲡⲁⲣⲁⲡⲕⲉⲥⲉⲉⲡⲉ ⲧⲏⲣϥ ⲁϥⲙⲟⲟⲩⲧϥ ⲛⲧⲟϥ ⲙⲙⲓⲛⲙⲙⲟϥ ⲉϥϣⲓⲡⲉ ⲛⲧϩⲉ ⲉⲛⲧⲁϥⲛⲉϭⲛⲟⲩϭϥ

40 ⲧⲁⲓ ⲧⲉ ⲧϩⲉ ⲉⲛⲧⲁⲡⲉⲓⲕⲉⲙⲟⲩ ϩⲛⲟⲩⲧⲃⲃⲟ ⲉϥⲛⲁϩⲧⲉ ⲉⲡϫⲟⲉⲓⲥ ϣⲁⲧϩⲁⲏ

41 ⲙⲛⲛⲥⲁⲛϣⲏⲣⲉ ⲇⲉ ⲧⲏⲣⲟⲩ ⲁⲥⲙⲟⲩ ϩⲱⲱⲥ ⲛϭⲓⲧⲉⲩⲙⲁⲁⲩ