1 ܘܐ̇ܙܠܬ ܐܢܐ ܒܪܘܟ ܡܢ ܬܡܢ ܘܐ̇ܬܝܬ ܨܝܕ ܥܡܐ ܘܟ̇ܢܫܬ ܐܢܘܢ ܡܢ ܪܒܐ ܘܥܕܡܐ ܠܙܥܘܪܐ ܘܐܡ̇ܪܬ ܠܗܘܢ
2 ܫܡ̣ܥܘ ܒ̈ܢܝ ܐܝܣܪܝܠ ܚܙܘ ܕܟܡܐ ܐܫܬܚܪܬܘܢ ܡܢ ܬܪܥܣܪ ܫܒ̈ܛܐ ܕܐܝܣܪܝܠ
3 ܠܟܘܢ ܕܝܢ ܘܠܐܒ̈ܗܝܟܘܢ ܡܪܝܐ ܝܗ̣ܒ ܢܡܘܣܐ ܝܬܝܪ ܡܢ ܟܘܠܗܘܢ ܥܡܡ̈ܐ
4 ܘܡܛܠ ܕܥܒ̣ܪܘ ܐܚ̈ܝܟܘܢ ܦܘܩ̈ܕܢܘܗܝ ܕܡܪܝܡܐ ܐܝܬܝ ܥܠܝܟܘܢ ܘܥܠܝܗܘܢ ܬܒ̇ܥܬܐ ܘܠܐ ܚܣ ܥܠ ܩܕܡ̈ܝܐ ܐܠܐ ܐܦ ܠܐܚܪ̈ܝܐ ܝܗ̣ܒ ܠܫܒܝܐ ܘܠܐ ܫܒ̣ܩ ܡܢܗܘܢ ܫܪܟܢܐ
5 ܘܗܐ ܐܝܬܝܟܘܢ ܗܪܟܐ ܥܡܝ
6 ܐܢ ܗܟܝܠ ܬܬܪܨܘܢ ܐܘܪ̈ܚܬܟܘܢ ܠܐ ܐܙܠܝܬܘܢ ܐܦ ܐܢܬܘܢ ܐܝܟ ܕܐܙܠܘ ܐܚ̈ܝܟܘܢ ܐܠܐ ܗ̣ܢܘܢ ܢܐܬܘܢ ܠܘܬܟܘܢ
7 ܡܛܘܠ ܕܡܪܚܡܢܐ ܗܘ ܗ̇ܘ ܕܦ̇ܠܚܝܢ ܐܢܬܘܢ ܠܗ ܘܡܪܚܦܢܐ ܗܘ ܗ̇ܘ ܕܡܣܒܪܝܢ ܐܢܬܘܢ ܒܗ ܘܫܪܝܪܐ ܗܘ ܕܢܛܐܒ ܘܠܐ ܕܢܒܐܫ
8 ܠܐ ܗܐ ܐܢܬܘܢ ܚܙ̣ܝܬܘܢ ܡܕܡ ܕܓܕܫܗ̇ ܠܨܗܝܘܢ
9 ܐܘ ܕܠܡܐ ܣ̇ܒܪܝܬܘܢ ܕܐܬܪܐ ܚܛ̣ܐ̇ ܘ̇ܡܛܠ ܗܢܐ ܐܣܬܚܦ ܐܘ ܐܪܥܐ ܡܕܡ ܐܣ̣ܟܠܬ ܘܡܛܠ ܗܢܐ ܐܫܬ̣ܠܡܬ
10 ܘܠܐ ܝܕ̇ܥܝܢ ܐܢܬܘܢ ܕܡܛܘܠܬܟܘܢ ܕܚ̣ܛܝܬܘܢ ܐܣܬܚܦ ܗ̇ܘ ܐܝ̇ܢܐ ܕܠܐ ܚܛ̣ܐ ܘܡܛܠ ܐܝܠܝܢ ܕܐܥܘܠܘ ܐܫܬܠܡ ܠܒܥܠܕܒ̈ܒܐ̇ ܗ̇ܘ ܐܝ̇ܢܐ ܕܠܐ ܐܣܟܠ
11 ܘܥ̣ܢܐ ܟܠܗ ܥܡܐ ܘܐܡ̣ܪܘ ܠܝ ܟܘܠ ܕܡܨ̇ܝܢܢ ܕܢܗܘܐ ܥܗ̇ܕܝܢܢ ܛ̇ܒ̈ܬܐ ܕܥܒ̣ܕ ܥܡܢ ܚܝܠܬܢܐ ܥܗܝܕܝܢ ܚܢܢ ܘܐܝܠܝܢ ܕܠܐ ܥܗܝܕܝܢ ܚܢܢ ܗ̣ܘ ܒܪ̈ܚ̣ܡܘܗܝ ܝܕܥ
12 ܒܪܡ ܕܝܢ ܗܕܐ ܥ̣ܒܕ ܠܢ ܠܥܡܟ ܟܬܘܒ ܐܦ ܠܐܚ̈ܝܢ ܠܒܒܠ ܐܓܪܬܐ ܕܝܘܠܦܢܐ ܘܟܪܟܐ ܕܣܒܪܬܐ ܕܐܦ ܠܗܘܢ ܬܚܝܠ ܡܢ ܩܕܡ ܕܠܐ ܬܐܙܠ ܠܟ ܡܢ ܠܘܬܢ
13 ܐܒ̣ܕܘ ܠܗܘܢ ܓܝܪ ܪ̈ܥܘܬܗ ܕܐܝܣܪܝܠ ܘܕܥ̣ܟܘ ܫܪ̈ܓܐ ܕܡܢܗܪܝܢ ܗܘܘ ܘܟܠܘ̣ ܡܒܘ̈ܥܐ ܪܗܛܗܘܢ ܡ̣ܢ ܐܝܟ̇ܐ ܕܫ̇ܬܝܢ ܗ̇ܘܝܢ
14 ܚܢܢ ܕܝܢ ܐܫ̇ܬܒܩܢ ܒܚܫܘܟܐ ܘܒܗܝܠܐ ܕܥܒܐ ܘܒܨܗܝܐ ܕܡܕܒܪܐ
15 ܘܥ̇ܢܝܬ ܘܐܡ̇ܪܬ ܠܗܘܢ ܪ̈ܥܘܬܐ ܘܫܪ̈ܓܐ ܘܡܒ̈ܘܥܐ ܡܢ ܢܡܘܣܐ ܐܝܬܝܗܘܢ ܗܘܘ ܘܐܢ ܚܢܢ ܐܙܠܝܢ ܚܢܢ ܐܠܐ ܢܡܘܣܐ ܩܝ̇ܡ ܗܘ
16 ܐܢ ܗܟܝܠ ܬܚܘܪܘܢ ܒܢܡܘܣܐ ܘܬܗܘܘܢ ܙܗܝܪܝܢ ܒܚܟܡܬܐ̣ ܠܐ ܚܣ̇ܪ ܫܪܓܐ ܘܪܥܝܐ ܠܐ ܥ̇ܢܕ ܘܡܒܘܥܐ ܠܐ ܝܒ̇ܫ
17 ܒܪܡ ܕܝܢ ܐܝܟ ܕܐܡ̣ܪܬܘܢ ܠܝ ܐܢܐ ܟܬ̇ܒ ܐܢܐ ܐܦ ܠܐܚܝ̈ܟܘܢ ܕܒܒܒܠ ܘܐܫܕܪ ܒܝܕ ܒܢ̈ܝ ܐܢܫܐ ܘܠܬܫܥܐ ܫܒ̈ܛܝܢ ܘܦܠܓܗ̣ ܗܟܢܐ ܐܟܬܘܒ ܘܐܫܕܪ ܒܝܕ ܦܪܚܬܐ
18 ܘܗ̣ܘܐ ܒܚܕ ܘܥܣܪܝܢ ܒܝܪܚܐ ܕܬܡܢܝܐ̣ ܐܬ̇ܝܬ ܐܢܐ ܒܪܘܟ ܘܝܬ̇ܒܬ ܬܚܝܬ ܒܠܘܛܐ ܒܛܠܠܐ ܕܣ̈ܘܟܐ ܘܐܢܫ̣ ܠܐ ܗܘ̣ܐ ܥܡܝ ܐܠܐ ܐܢܐ ܒܠܚܘܕܝ̣
19 ܘܟ̇ܬܒܬ ܗܠܝܢ ܬܪ̈ܬܝܢ ܐܓܪ̈ܢ ܚܕܐ ܫ̇ܕܪܬ ܒܝܕ ܢܫܪܐ ܠܬܫܥܐ ܫܒ̈ܛܝܢ ܘܦܠܓܗ̣ ܘܐܚܪܬܐ ܫ̇ܕܪܬ ܠܐܝܠܝܢ ܕܒܒܒܠ ܒܝܕ ܬܠܬܐ ܐܢ̈ܫܝܢ
20 ܘܩ̇ܪܝܬ ܠܢܫܪܐ ܘܐܡ̇ܪܬ ܠܗ ܡ̈ܠܐ ܗܠܝܢ
21 ܠܟ ܥ̣ܒܕ ܡܪܝܡܐ ܕܬܗܘܐ ܡܥܠܝ ܡܢ ܟܠܗ̇ ܦܪ̈ܚܬܐ
22 ܘܗܫܐ ܙܠ ܘܠܐ ܬܫܪܐ ܒܐܬܪܐ ܘܠܐ ܬܥܘܠ ܠܩܢܐ ܘܠܐ ܬܩܘܡ ܥܠ ܟܘܠ ܐܝܠܢ ܥܕܡܐ ܕܬܥܒܪ ܦܬܝܗܘܢ ܕܡ̈ܝܐ ܣܓ̈ܝܐܐ ܕܢܗܪܐ ܦܪܬ ܘܬܐܙܠ ܠܘܬ ܥܡܐ ܗ̇ܘ ܕܥ̇ܡܪ ܬܡܢ ܘܫܕܝ ܠܗܘܢ ܐܓܪܬܐ ܗܕܐ
23 ܐܬܕܟܪ ܕܝܢ ܕܒܙܒܢܐ ܕܛܘܦܢܐ ܡܢ ܝܘܢܐ ܩ̇ܒܠ ܢܘܚ ܦܐܪܐ ܕܙܝܬܐ ܟܕ ܫܕܪܗ̇ ܗܘܐ ܡܢ ܩܒܘܬܐ
24 ܐܠܐ ܐܦ ܥܘܪ̈ܒܐ ܫܡ̇ܫܘ ܠܐܠܝܐ ܟܕ ܡܝܬܝܢ ܗܘܘ ܠܗ ܬܘܪܣܝܐ ܐܝܟ ܕܡܬܦܩܕ ܗܘܐ ܠܗܘܢ
25 ܐܦ ܫܠܝܡܘܢ ܒܙܒܢܐ ܕܡܠܟܘܬܗ ܠܟܘܠ ܐܬܪ ܕܨ̇ܒܐ ܗܘܐ ܕܢܫܕܪ ܐܘ ܕܢܒܥܐ ܡܕܡ̣ ܠܦܪܚܬܐ ܦܩ̇ܕ ܗܘܐ ܘܡܫܬܡܥܐ ܗܘܬ ܠܗ̣ ܐܝܟ ܕܦ̇ܩܕ ܗܘܐ ܠܗ̇
26 ܘܗܫܐ̣ ܠܐ ܬܡܐܢ ܠܟ ܘܠܐ ܬܪܟܢ ܠܝܡܝܢܐ ܐܘ ܠܣܡܠܐ ܐܠܐ ܦ̣ܪܚ ܘܙܠ ܒܐܘܪܚܐ ܬܪܝܨܬܐ ܕܬܛܪ ܦܘܩܕܢܗ ܕܚܝܠܬܢܐ ܐܝܟ ܕܐܡ̇ܪܬ ܠܟ