1 ܘܡ̈ܝܐ ܕܬܫܥܐ ܐܘܟܡ̈ܐ ܕܚ̣ܙܝܬ̣ ܗ̇ܘ ܗܘ ܟܘܠܗ ܪܘܫܥܐ ܕܗ̣ܘܐ ܒܝܘܡ̈ܬܗ ܕܡܢܫܐ ܒܪ ܚܙܩܝܐ
2 ܡܛܠ ܕܣܓܝ ܐܪܫܥ ܘܙܕܝ̈ܩܐ ܩܛ̣ܠ ܘܕܝ̣ܢܐ ܨܠ̣ܐ ܘܕܡܐ ܙܟܝܐ ܐܫ̣ܕ ܘܢܫ̈ܝ ܓܒܪ̈ܐ ܒܩܛܝܪܐ ܛܡܐ ܘܣܚܦ ܡܕܒ̈ܚܐ ܘܩܘܪ̈ܒܢܝܗܘܢ ܒ̇ܛܠ ܘܟ̈ܗܢܐ ܐܦܩ ܕܠܐ ܢܫܡܫܘܢ ܒܝܬ ܡܩܕܫܐ
3 ܘܥ̣ܒܕ ܨܠܡܐ ܕܚܡܫ ܐ̈ܦܝܢ ܐܪܒܥ ܡܢܗܝܢ ܚܝܪ̈ܢ ܠܐܪܒܥ ܪ̈ܘܚܝܢ ܘܚܡܝܫܝܬܐ ܥܠ ܪܝܫܗ ܕܨܠܡܐ ܐܝܟ ܕܠܘܩܒܠ ܛܢܢܗ ܕܚܝܠܬܢܐ
4 ܘܗܝ̇ܕܝܢ ܢܦ̣ܩ ܪܘܓܙܐ ܡܢ ܩܕܡ ܚܝܠܬܢܐ ܐܝܟ ܕܬܬܥܩܪ ܨܗܝܘܢ ܐܝܟ ܕܐܦ ܓ̣ܕܫ ܒܝܘܡ̈ܬܟܘܢ
5 ܐܠܐ ܐܦ ܥܠ ܬܪܝܢ ܫܒ̈ܛܝܢ ܘܦܠܓܗ ܢܦ̣ܩ ܓܙܪ ܕܝܢ̣ܐ ܕܐܦ ܗ̣ܢܘܢ ܢܫܬܒܘܢ ܐܝܟ ܕܚ̣ܙܝܬ ܗܫܐ
6 ܘܥܕܡܐ ܠܗܟܢܐ ܣܓ̣ܝ ܪܘܫܥܗ ܕܡܢܫܐ ܐܝܟ ܕܬܫܒܘܚܬܗ ܕܡܪܝܡܐ ܬܪܚܩ ܡܢ ܒܝܬ ܡܩܕܫܐ
7 ܡܛܠ ܗܢܐ ܡܢܫܐ ܒܗܢܐ ܙܒܢܐ ܐܫܬܡܗ ܪܫܝܥܐ ܘܒܚܪܝܬܐ ܒܢܘܪܐ ܗ̣ܘܐ ܡܥܡܪܗ
8 ܟܕ ܓܝܪ ܐܫܬܡܥܬ ܒܥܘܬܗ ܠܘܬ ܡܪܝܡܐ ܒܐܚܪܝܬܐ ܟܕ ܢܦ̣ܠ ܒܣܘܣܝܐ ܕܢܚܫܐ ܘܐܬܦܫܪ ܣܘܣܝܐ ܕܢܚܫܐ ܘܗܘܬ ܠܗ ܐܬ̇ܐ ܠܫܥܬܐ
9 ܠܐ ܗܘܐ ܓܝܪ ܡܫܠܡܢܐܝܬ ܚܝ̣ܐ ܐܦ ܠܐ ܓܝܪ ܫܘ̇ܐ ܗܘܐ ܐܠܐ ܕܡܢ ܗܫܐ ܢܕܥ ܕܒܐܚܪܝܬܐ ܡܢ ܡ̣ܢܘ ܐܝܬ ܠܗ ܕܢܫܬܢܩ
10 ܗ̇ܘ ܓܝܪ ܕܡܨ̇ܐ ܕܢܛܐܒ ܐܦ ܕܢܫܢܩ ܡܨ̣ܐ ܀