1 ܘܡ̈ܝܐ ܬܡ̈ܝܢܝܐ ܢܗܝܪ̈ܐ ܕܚ̣ܙܝܬ̣ ܗ̣ܝ ܗܝ ܟܐܢܘܬܗ ܘܬܪܝܨܘܬܗ ܕܚܙܩܝܐ ܡ̇ܠܟܐ ܕܝܗܘܕܐ ܘܛܒܘܬܗ ܕܐܬܬ ܥܠܘܗܝ̇
2 ܟܕ ܓܝܪ ܐܬܬܙܝܥ ܣܢܚܪܝܒ ܕܢܐܒܕ ܘܪܘܓܙܗ ܫ̇ܓܫ ܗܘܐ ܠܗ ܕܐܝ̇ܟܢܐ ܢܐܒܕ ܀ ܀ ܐܦ ܣܘܓܐܐ ܓܝܪ ܕܥܡܡ̈ܐ ܕܐܝܬ ܗܘܐ ܥܡܗ
3 ܟܕ ܕܝܢ ܫܡ̣ܥ ܚܙܩܝܐ ܡ̇ܠܟܐ ܗܠܝܢ ܕܡܬܚܫܒ ܗܘܐ ܐܬܘܪܝܐ ܡ̇ܠܟܐ ܕܢܐܬܐ ܘܢܐܚܕܝܘܗܝ ܘܢܘܒܕ ܠܥܡܗ̇ ܠܬܪܝܢ ܫܒ̈ܛܝܢ ܘܦܠܓܗ ܕܐܫܬܚܪܘ ܐܠܐ ܘܐܦ ܨܗܝܘܢ ܨܒ̇ܐ ܗܘܐ ܕܢܣܚܘܦ ܗܝ̇ܕܝܢ ܐܬܬܟܠ ܚܙܩܝܐ ܥܠ ܥ̇ܒ̈ܕܘܗܝ ܘܣܒܪ ܥܠ ܙܕܝܩܘܬܗ ܘܡܠܠ ܥܡ ܚܝܠܬܢܐ ܘܐܡ̣ܪ
4 ܚܙܝ ܕܗܐ ܡܛܝܒ ܣܢܚܪܝܦ ܕܢܘܒܕܢ ܘܢܗܘܐ ܡܫܬܒܗܪ ܘܡܬܪܡܪܡ ܡܐ ܕܐܘܒܕܗ̇ ܠܨܗܝܘܢ
5 ܘܫܡܥܗ ܚܝܠܬܢܐ ܚܟܝܡ ܗܘܐ ܓܝܪ ܚܙܩܝܐ ܘܚܪ ܒܒܥܘܬܗ ܡܛܠ ܕܙ̇ܕܝܩ ܗܘܐ
6 ܘܦܩ̣ܕ ܗܝ̇ܕܝܢ ܚܝܠܬܢܐ ܠܪܡܐܝܠ ܡܠܐܟܗ ܕܡܡܠܠ ܥܡܟ
7 ܘܢܦ̇ܩܬ ܘܐܘ̇ܒܕܬ ܠܣܘܓܗܘܢ ܗܠܝܢ ܕܗ̇ܘܐ ܗܘܐ ܒܠܚܘܕ ܡܢܝܢܐ ܕܪ̈ܘܪܒܢܝܗܘܢ ܡܐܐ ܘܬܡܢܐܝܢ ܘܚܡܫܐ ܐ̈ܠܦܝܢ ܘܠܟܠ ܚܕ ܚܕ ܡܢܗܘܢ ܗܟܢܐ ܐܝܬ ܗܘܐ ܠܗ ܒܡܢܝܢܐ
8 ܘܗ̣ܘܝܬ ܒܗ̇ܘ ܙܒܢܐ ܡܘܩܕ ܦܓܪ̈ܝܗܘܢ ܡܢ ܠܓܘ ܡܐ̈ܢܐ ܕܝܢ ܘܙܝܢܐ ܡܢ ܠܒܪ ܢܛ̇ܪ ܗܘܝܬ ܡܛܠ ܕܝܬܝܪܐܝܬ ܬܕܡܪ̈ܬܗ ܕܚܝܠܬܢܐ ܢܬܚ̈ܙܝܢ ܘܐܝܟ̇ܢܐ ܕܢܬܡܠܠ ܫܡܗ ܒܟܘܠܗ̇ ܐܪܥܐ
9 ܐܬܦ̣ܪܩܬ ܕܝܢ ܨܗܝܘܢ ܘܐܘܪܝܫܠܡ ܐܬܦ̣ܨܝܬ ܐܦ ܐܝܣܪܝܠ ܐܬܚܪܪ ܡܢ ܐܘܠܨ̈ܢܐ
10 ܘܚܕܝܘ ܟܘܠܗܘܢ ܐܝܠܝܢ ܕܐܝܬ ܗܘܘ ܒܐܪܥܐ ܩܕܝܫܬܐ ܘܐܫܬܒܚ ܫܡܗ ܕܚܝܠܬܢܐ ܐܝܟ ܕܢܬܡܠܠ
11 ܗܠܝܢ ܐܢܘܢ ܡ̈ܝܐ ܢܗܝܪ̈ܐ ܕܚܙ̣ܝܬ ܀