2 Baruch 6 — Aramaic (Peshitta)

1 ܘܗ̣ܘܐ ܠܝܘܡܐ ܕܡܚܪ̣ ܘܗܐ ܚܝܠܐ ܕܟ̈ܠܕܝܐ ܟܪܟܗ̇ ܠܡܕܝܢܬܐ ܘܒܥܕܢ ܪܡܫܐ̣ ܫܒܩܬܗ ܠܥܡܐ ܐܢܐ ܒܪܘܟ ܘܢ̇ܦܩܬ ܘܩ̣ܡ̇ܬ ܠܝ ܥܠ ܒܠܘܛܐ

2 ܘܡܬܥܝܩ ܗ̇ܘܝܬ ܥܠ ܨܗܝܘܢ ܘܡܬܬܢܚ ܥܠ ܫܒܝܬܐ ܕܐܬܬ ܥܠ ܥܡܐ

3 ܘܗܐ ܡܢ ܫܠܝܐ ܪܘܚܐ ܕܚܝܠܐ ܐܪܝܡܬܢܝ ܘܐܣܩܬܢܝ ܠܥܠ ܡܢ ܫܘܪܗ̇ ܕܐܘܪܫܠܡ ܠܥܠ

4 ܘܚ̇ܙܝܬ ܘܗܐ ܐܪܒܥܐ ܡܠܐ̈ܟܝܢ ܩܝ̇ܡܝܢ ܥܠ ܐܪ̈ܒܥܬܝܗܝܢ ܙܘܝ̈ܬܗ̇ ܕܡܕܝܢܬܐ ܟܕ ܐܚܝܕܝܢ ܗܘܘ ܚܕ ܚܕ ܡܢܗܘܢ ܠܡܦܐܕܐ ܕܢܘܪܐ ܒܐܝ̈ܕܘܗܝ

5 ܘܡܠܐܟܐ ܐܚܪܢܐ ܢܚܬ ܗܘܐ ܡܢ ܫܡܝܐ ܘܐܡ̣ܪ ܠܗܘܢ ܐܚܘܕܘ ܠܡܦܐ̈ܕܝܟܘܢ ܘܠܐ ܬܕܠܩܘܢ ܥܕܡܐ ܕܐܡ̇ܪ ܠܟܘܢ

6 ܐܫܬ̇ܕܪܬ ܓܝܪ ܕܠܘܩܕܡ ܐܡ̇ܪ ܠܐܪܥܐ ܡܠܬܐ ܘܐܣ̇ܝܡ ܠܘܬܗ̇ ܡܕܡ ܕܦܩܕܢܝ ܡܪܝܐ ܡܪܝܡܐ

7 ܘܚܙ̇ܝܬܗ ܕܢܚ̣ܬ ܠܒܝܬ ܩܕܘܫ ܩܘܕ̈ܫܐ ܘܢܣ̣ܒ ܡܢ ܬܡܢ ܐ̈ܦܝ ܬܪܥܐ̣ ܘܐܦܘܕܐ ܩܕܝܫܐ ܘܚܘܣܝܐ ܘܬܪ̈ܬܝܢ ܠܘܚ̈ܐ ܘܠܒܘܫܐ ܩܕܝܫܐ ܕܟܗ̈ܢܐ ܘܦܝܪܡܐ ܘܐܪܒܥܝܢ ܘܬܡ̈ܢܐ ܟܐ̈ܦܝܢ ܡܝܩܪ̈ܢ ܗܠܝܢ ܕܠܒ̇ܫ ܗܘܐ ܟܗܢܐ ܘܟܘܠܗܘܢ ܡܐ̈ܢܝ ܩܘܕܫܐ ܕܡܫܟܢܐ

8 ܘܐܡ̣ܪ ܠܐܪܥܐ ܒܩܠܐ ܪܡ̇ܐ ܐܪܥܐ ܐܪܥܐ̣ ܐܪܥܐ ܫܡ̣ܥ ܦܬܓܡܗ ܕܐܠܗܐ ܚܝܠܬܢܐ ܘܩܒ̇ܠ ܗܠܝܢ ܕܡܓܥܠ ܐܢܐ ܠܟܝ ܘܢܛ̇ܪ ܐܢܘܢ ܥܕܡܐ ܠܙ̈ܒܢܐ ܐܚܪ̈ܝܐ ܕܡܐ ܕܐܬܦ̣ܩܕܬ ܬܬܠܝܢ ܐܢܘܢ ܕܠܐ ܢܫܬܠܛܘܢ ܒܗܘܢ̣ ܢܘܟܪ̈ܝܐ

9 ܡܛܠ ܕܡ̣ܛܐ ܠܗ ܙܒܢܐ ܕܬܫܬܠܡ ܠܙܒܢܐ ܘܐܘܪܫܠܡ ܥܕܡܐ ܕܢܬܐܡܪ ܕܬܘܒ ܬܗܦܘܟ ܬܬܩܢ ܠܥܠܡ

10 ܘܦܬ̣ܚܬ ܐܪܥܐ ܦܘܡܗ̣̇ ܘܒܠ̣ܥܬ ܐܢܘܢ ܀