1 ܘܗ̣ܘܐ ܡܢ ܒܬܪ ܫܒܥܐ ܝܘܡ̈ܝܢ̣ ܗ̣ܘܐ ܥܠܝ ܦܬܓܡܗ ܕܐܠܗܐ ܘܐܡ̣ܪ ܠܝ
2 ܐܡ̣ܪ ܠܐܪܡܝܐ ܕܢܐܙܠ ܘܢܩܝܡ ܫܒܝܬܗ ܕܥܡܐ ܥܕܡܐ ܠܒܒܠ
3 ܐܢܬ ܕܝܢ ܟܬܪ ܗܪܟܐ ܒܚܘܪܒܗ̇ ܕܨܗܝܘܢ ܘܐܢܐ ܡܚܘܐ ܐܢܐ ܠܟ ܡܢ ܒܬܪ ܗܠܝܢ ܝܘܡ̈ܬܐ̣ ܡܕܡ ܕܥܬܝܕ ܕܢܓܕܫ ܒܐܚܪܝܬ ܝܘܡ̈ܬܐ
4 ܘܐ̇ܡܪܬ ܠܐܪܡܝܐ ܐܝܟ ܕܦܩܕܢܝ ܡܪܝܐ
5 ܘܗ̣ܘ ܕܝܢ ܐ̣ܙܠ ܥܡ ܥܡܐ ܐܢܐ ܕܝܢ ܒܪܘܟ̣ ܗ̇ܦܟܬ ܐܬ̇ܝܬ ܘܝܬ̇ܒܬ ܩܕܡ ܬܪ̈ܥܘܗܝ ܕܗܝܟܠܐ ܘܐ̇ܠܝܬ ܐܘܠܝܬܐ ܗܕܐ ܥܠ ܨܗܝܘܢ ܘܐܡ̇ܪܬ̇̇
6 ܛܘܒܘܗܝ ܠܗ̇ܘ ܕܠܐ ܐܬܝܠܕ ܐܘ̇ ܠܗ̇ܘ ܕܐܬܝܠܕ ܘܡܝܬ
7 ܠܢ ܕܝܢ ܠܐܝܠܝܢ ܕܚܝ̈ܝܢ ܘܝ ܠܢ ܕܚ̈ܙܝܢ ܥܩ̈ܬܗ̇ ܕܨܗܝܘܢ ܘܡܕܡ ܕܓܕܫܗ̇ ܠܐܘܪܫܠܡ
8 ܐܩ̇ܪܐ ܠܣܝܪܝܢܘܣ ܡܢ ܝܡܐ ܘܐܢܬܝܢ ܠܠܝ̈ܬܐ ܡܢ ܡܕܒܪܐ ܐܬ̈ܝܢ ܘܫܐ̈ܕܐ ܘܝܪ̈ܘܪܐ ܡܢ ܥܒ̈ܐ ܐܬܬܥܝܪܘ ܘܐܣܘܪܘ ܚܨ̈ܝܟܘܢ ܠܡܪܩܘܕܬܐ ܘܣܒܘ ܥܡܝ ܐܘ̈ܠܝܬܐ ܘܐܪܩܕܘ̇ ܥܡܝ
9 ܐܢܬܘܢ ܦܠܚ̈ܐ ܠܐ ܬܙܪܥܘܢ ܬܘܒ ܘܐܢܬ ܐܪܥܐ̣ ܠܡܢܐ ܝܗ̇ܒܬ ܦܐܪ̈ܐ ܕܥ̈ܠܠܬܟܝ ܐܚܘܕܝ ܒܓܘܟܝ ܚܠܝܘܬܐ ܕܡܙܘܢܝ̈ܟܝ
10 ܘܐܢܬ ܓܦܬܐ ܠܡܢܐ ܡ̇ܘܣܦܬܝ ܕܬܬܠܝܢ ܚܡ̣ܪܟܝ ܕܠܐ ܬܘܒ ܡܬܩܪܒ ܡܢܗ̇ ܒܨܗܝܘܢ ܘܠܐ ܬܘܒ ܪܝܫ ܦܐܪ̈ܐ ܡܬܩܪܒܝܢ
11 ܘܐܢܬܘܢ ܫܡܝܐ ܐܚܘܕܘ ܛܠܟܘܢ ܘܠܐ ܬܦܬܚܘܢ ܐܘܨܪ̈ܐ ܕܡܛܪܐ
12 ܘܐܢܬ ܫܡ̣ܫܐ ܐܚܘܕ ܢܘܗܪܗܘܢ ܕܙܠܝܩ̈ܝܟ ܘܐܢܬ ܣܗܪܐ ܐܕܥܟ ܣܘܓܐܐ ܕܢܘܗܪܟ ܠܡܢܐ ܓܝܪ ܬܘܒ ܢܕܢܚ ܢܘܗܪܐ ܐܝ̇ܟܐ ܕܢܘܗܪܗ̇ ܕܨܗܝܘܢ ܚ̣ܫܟ
13 ܘܐܢܬܘܢ ܚ̈ܬܢܐ ܠܐ ܬܥܠܘܢ ܘܒܬܘ̈ܠܬܐ ܒܟ̈ܠܝܠܐ̇ ܠܐ ܢܨܛܒ̈ܬܢ ܘܐܢܬܝܢ ܢܫ̈ܐ ܠܐ ܬܨ̈ܠܝܢ ܕܬܐ̈ܠܕܢ
14 ܢܬܒ̈ܣܡܢ ܓܝܪ ܝܬܝܪܐܝܬ ܥܩܪ̈ܬܐ ܘܢܚ̈ܕܝܢ ܐܝܠܝܢ ܕܠܝܬ ܠܗܝܢ ܒ̈ܢܝܐ ܘܐܝܠܝܢ ܕܐܝܬ ܠܗܝܢ ܒܢ̈ܝܐ ܢܬܬܥ̈ܝܩܢ
15 ܠܡܢܐ ܓܝܪ ܝܠܕ̈ܢ ܒܟܐܒ̈ܐ ܘܩܒܪ̈ܢ ܒܬܐܢ̈ܚܬܐ
16 ܐܘ ܠܡܢܐ ܬܘܒ ܗ̇ܘܝܢ ܠܗܘܢ ܒ̈ܢܝܐ ܠܒܢܝ̈ܢܫܐ ܐܘ ܙܪܥܗ ܕܟܝܢܗܘܢ ܠܡܢܐ ܬܘܒ ܡܫܬܡܗ ܐܝ̇ܟܐ ܕܗܕܐ ܐܡܐ ܚܪܒ̣ܬ ܘܒܢ̈ܝܗ̇ ܐܫܬܒܝܘ
17 ܡܢ ܗܫܐ ܠܐ ܬܘܒ ܬܐܡܪܘܢ ܥܠ ܫܘܦܪܐ ܘܠܐ ܬܬܢܘܢ ܥܠ ܝܐܝܘܬܐ
18 ܐܢܬܘܢ ܕܝܢ ܟܗ̈ܢܐ ܣܒܘ ܩܠܝ̈ܕܐ ܕܒܝܬ ܡܩܕܫܐ ܘܫܕܘ ܐܢܘܢ ܠܪܘܡܗܘܢ ܕܫܡܝܐ ܘܗܒܘ ܐܢܘܢ ܠܡܪܝܐ ܘܐܡ̣ܪܘ ܛܪ ܒܝܬܟ ܐܢܬ ܚܢܢ ܓܝܪ ܗܐ ܐܫܬܟܚܢ ܪ̈ܒܝ ܒܬ̈ܐ ܕܓ̈ܠܐ
19 ܘܐܢܬܝܢ ܒܬܘ̈ܠܬܐ ܕܥ̈ܙܠܢ ܒܘܨܐ ܘܫܪ̈ܝܐ ܥܡ ܕܗܒܐ ܕܐܘܦܝܪ ܐܣܬܪܗܒܝܢ ܘܣ̈ܒܝܢ ܟܠܡܕܡ ܘܫ̣ܕ̈ܝܢ ܒܢܘܪܐ ܕܬܘܒܠ ܐܢܘܢ ܠܘܬ ܗ̇ܘ ܕܥ̣ܒܕ ܐܢܘܢ ܘܫܠܗܒܝܬܐ ܬܫܕܪ ܐܢܘܢ ܠܘܬ ܗ̇ܘ ܕܒ̣ܪܐ ܐܢܘܢ ܕܠܐ ܢܫܬܠܛܘܢ ܒܗܘܢ ܒܥܠܕܒ̈ܒܐ ܀